நீங்கள் தேடியது "புதுச்சேரி மழை"

புதுச்சேரி:

வங்க கடலில் ஏற்பட்ட டிட்வா புயல் வலுவிழந்து காற்றழுத்த தாழ்வு நிலை பகுதியாக மாறியுள்ளது.

டிட்வா புயலால் கடந்த சில நாட்களாக மழை பெய்து வருகிறது. வானம் மேகமூட்டத்துடன் எப்போது வேண்டுமானாலும் மழை கொட்டலாம் என்ற நிலையில் இருந்தது. அதேநேரத்தில் நேற்று முன்தினம் மழையே இல்லை. ஆனால் குளிர்ந்த காற்று, இருண்ட சூழலும் தொடர்ந்தது.

இந்த நிலையில் நேற்றைய தினம் காலையிலிருந்து லேசான மழை பெய்தது. டிட்வா புயல் எச்சரிக்கையால் சனி மற்றும் திங்கட்கிழமை அரசு பள்ளிகளுக்கு விடுமுறை அறிவிக்கப்பட்டது.

நேற்றைய தினம் பள்ளிகளுக்கு விடுமுறை அளிக்கப்படவில்லை. புதுச்சேரியில் நேற்று அவ்வப்போது சாரல் மழை பெய்து வந்தது.

இந்த நிலையில் இன்று மகாபலிபுரம் அருகே குறைந்த காற்றழுத்த தாழ்வு பகுதி கரையை கடக்கும் என வானிலை ஆய்வு மையம் தெரிவித்துள்ளது.

வலு குறைந்திருந்தாலும், புதுச்சேரி உள்ளிட்ட பகுதிகளில் சூறை காற்றுடன் கனமழை பெய்யும் என எச்சரிக்கை விடப்பட்டது. இந்த நிலையில் நேற்று இரவு 9 மணியளவில் திடீரென இடி, மின்னலுடன் மழை பெய்தது. சுமார் ஒரு மணி நேரம் மழை பெய்ததால், சாலைகளில் வெள்ளம் பெருக்கெடுத்தது. தாழ்வான பகுதிகளில் வெள்ள நீர் தேங்கியது. தொடர்ந்து இரவு முழுவதும் விட்டு, விட்டு மழை பெய்தது.

இன்று அதிகாலை முதல் மழை நீடிக்கிறது. வானம் சூழ்ந்து இருண்டு காணப்படுகிறது. கனமழை எச்சரிக்கை காரணமாக இன்று அரசு மற்றும் தனியார் பள்ளிகளுக்கு விடுமுறை அளிக்கப்பட்டது. கல்லூரிகள் வழக்கம்போல இயங்குகிறது.

புதுச்சேரி:

'டிட்வா' புயல் எச்சரிக்கை காரணமாக இன்றும், நாளையும் பலத்த காற்றுடன் கனமழை பெய்யக்கூடும் என்று வானிலை மையம் அறிவித்துள்ளது.

அதையொட்டி இன்றும், நாளையும் அவசியம் இல்லாமல் பொதுமக்கள் வெளியே செல்ல வேண்டாம். பாதுகாப்பாக இருக்க வேண்டும் என புதுச்சேரி அரசு அறிவுறுத்தியுள்ளது.

இதையடுத்து 2 நாட்களுக்கு வீட்டிற்கு தேவையான அத்தியாவசிய பொருட்களை வாங்க நேற்று மாலை முதல் புதுச்சேரியில் உள்ள கடைகளில் மக்கள் குவிந்தனர். இதில் மளிகை, காய்கறி, மருந்து மற்றும் நொறுக்குத்தீனிகள், மெழுகுவர்த்தி உள்ளிட்டவைகளை ஒரே நாளில் வாங்கி குவித்தனர்.

இதனால் மார்க்கெட், மளிகை கடைகள், பேக்கரி, மருந்தகங்கள் என பல கடைகளில் நேற்று மாலையே பொருட்கள் தீர்ந்து விட்டன.

அதே போல் பால், பிரட் உள்ளிட்ட பொருட்களுக்கும் தட்டுப்பாடு நிலவியது. புதுச்சேரியில் உள்ள பெட்ரோல் பங்குகளிலும் மக்கள் வாகன ஓட்டிகள் கூட்டம் நிரம்பி வழிந்தது.

புதுச்சேரி:

புதுச்சேரியில் கடந்த 16-ந்தேதி முதல் வடகிழக்கு பருவமழை பெய்ய தொடங்கியுள்ளது.

நேற்று முன்தினம் முதல் புதுச்சேரியில் கனமழை பெய்து வருகிறது. நேற்று அதிகாலை முதல் தொடர் மழை பெய்தது. பகல் பொழுதில் மட்டும் 2.86 செ.மீ. மழை பதிவாகியது. மதியத்துக்கு பின் மழை பெய்யவில்லை.

ஆனால் இரவில் மீண்டும் மழை பெய்ய தொடங்கியது. 7 மணிக்கு மேல் சுமார் 3 மணி நேரம் தொடர்ந்து கனமழை கொட்டி தீர்த்தது. இதனால் நகரெங்கும் சாலைகளில் மழைநீர் தேங்கியது. தாழ்வான பகுதிகளில் மழைநீர் தேங்கிய குளம் போல நின்றது.

கடலூர் சாலை நயினார் மண்டபம், சுதானா நகர், இந்திராகாந்தி சிலை சதுக்கம் ஆகிய பகுதிகளில் வெள்ளம் போல சாலைகள் காட்சியளித்தது. தாழ்வான பகுதிகளான ரெயின்போ நகர், வெங்கட்டாநகர், கிருஷ்ணாநகர், பூமியான் பேட், பாவாணர் நகர், முதலியார்பேட்டை புவன்கரே வீதி, முத்தியால் பேட்டை டி.வி. நகர், பெரியார் நகர், முத்தியால் பேட்டை பகுதிகளில் 100-க்கணக்கான வீடுகளுக்குள் தண்ணீர் புகுந்தது.

இதனால் அந்த பகுதி மக்கள் சிரமத்துக்கு ஆளாகினர். கிராமப்புறங்களிலும் சாலைகளிலும், தாழ்வான பகுதிகளிலும் மழைநீர் தேங்கியது. வீடுகளுக்குள் புகுந்த தண்ணீரை பொதுமக்கள் வாரி இறைத்து வெளியேற்றினர். தொடர்ந்து இரவு முழுவதும் அவ்வப்போது மழை கொட்டியது. இரவில் மட்டும் 11 செ.மீ. மழை பதிவானது.

ஒட்டுமொத்தமாக 24 மணி நேரத்தில் புதுச்சேரியில் 14.7 செ.மீ. மழை பதிவாகியது. பல இடங்களில் மரங்கள் சாய்ந்தன. கிளைகள் முறிந்து விழுந்தன. மழையினால் புதுச்சேரி மக்களின் இயல்பு வாழ்க்கை பாதிக்கப்பட்டது.

மழை பாதிப்புகளை அறிந்த முதல்-மந்திரி ரங்கசாமி, நகரின் பல்வேறு இடங்களுக்கு காரில் சென்று மழை பாதிப்புகளை பார்வையிட்டு மக்களுக்கு ஆறுதல் தெரிவித்தார். மழைநீரை வெளியேற்றவும், பாதுகாப்புக்கு தேவையான நடவடிக்கை எடுக்க அதிகாரிகளுக்கு உத்தரவிட்டார்.

இன்று அதிகாலை முதல் மழை இல்லை. இதனால் பெரும்பாலான சாலைகள், தாழ்வான பகுதிகளில் இருந்து மழை நீர் வெளியேறியது.

வானம் வெறிச்சோடி காணப்பட்டு லேசான வெயில் அடிக்க தொடங்கியது. ஆனாலும் அவ்வப்போது மேகங்கள் திரண்டு, இருண்டு மீண்டும் மழை பெய்வதற்கான சூழலும் நிலவுகிறது.

இதனிடையே புதுச்சேரிக்கு கனமழைக்கான ரெட் அலர்ட் எச்சரிக்கையை வானிலை மையம் அறிவித்திருந்தது. இதனால் புதுச்சேரியில் பள்ளி, கல்லூரிகளுக்கு இன்று விடுமுறை அறிவிக்கப்பட்டிருந்தது. இதனால் சாலைகளில் பொதுமக்கள் நடமாட்டம் குறைவாகவே இருந்தது.

கிராம பகுதிகளிலும் மழை கொட்டியது. பாகூர், திருக்கனூர், வில்லியனூர், செல்லிப்பட்டு, பத்துக்கண்ணு, அரியாங்குப்பம், தவளக்குப்பம், சேதராப்பட்டு பகுதிகளிலும் பரவலாக கனமழை பெய்தது. பாகூர் மற்றும் சுற்று வட்டார பகுதிகளில் சுமார் 200 ஏக்கர் விளை நிலங்கள் மழை வெள்ளத்தில் மூழ்கியுள்ளது. இதனால் விவசாயிகள் கவலையடைந்துள்ளனர்.

புதுச்சேரி:

புதுவையில் ஆண்டு தோறும் சராசரியாக 1, 330 மி.மீ. மழை பதிவாகும்.

தென்மேற்கு பருவமழை காலத்தைவிட வடகிழக்கு பருவமழை காலத்தில் மழை பதிவு அதிகமாக இருக்கும். நடப்பு ஆண்டு தென்மேற்கு பருவமழை இயல்பை விட அதிகமாக பதிவாகியுள்ளது. மொத்தமாக 575.3 மி.மீ. மழை பதிவாகியுள்ளது. கூடுதலாக 173.4 மி.மீ. மழை பெய்துள்ளது.

தற்போது வடகிழக்கு பருவமழை தொடங்கியுள்ளது. இந்த காலத்திலும் இயல்பை விட அதிகமாக மழை பெய்யும் என புதுச்சேரி வானிலையாளர் பாலமுருகன் கூறியுள்ளார்.

இந்த ஆண்டு வடகிழக்கு பருவமழை சராசரியை விட அதிகமாக இருக்கும். தென்மேற்கு பருவமழை சீசனில் கூட இயல்பைவிட அதிகமாக மழை பெய்துள்ளது. இந்த ஆண்டு வடகிழக்கு பருவமழை தொடங்கியவுடன் கன மழைக்கு வாய்ப்புள்ளது. குறிப்பாக அக்டோபர் 3-ம் வாரத்தில் இருந்து புதுவையில் கனமழை பெய்யக்கூடும். 2 முதல் 3 புயல்கள் தாக்ககூடும் என கணிக்கப்பட்டுள்ளது.

இவ்வாறு அவர் தெரிவித்துள்ளார்.

புதுச்சேரி:

புதுச்சேரியில் கோடை காலத்திற்கு பின்னும், வெயிலின் தாக்கம் அதிகமாக இருந்தது.

குறிப்பாக கடந்த மாதம் மட்டும் 10 நாட்களுக்கும் மேலாக 100 டிகிரிக்கு மேல் வெயில் கொளுத்தி வந்தது. இதனால் மக்கள் மிகுந்த அவதிகுள்ளாகி வந்தனர்.

இந்த நிலையில் மேற்கு திசை காற்றின் காரணமாக புதுச்சேரியில் வருகிற 7-ந்தேதி வரை மிதமான மழை பெய்யும் வாய்ப்பு உள்ளதாக வானிலை ஆய்வு மையம் அறிவித்தது.

அதன்படி புதுச்சேரியில் நேற்று இரவு 8.30 மணிக்கு மேல் கனமழை பெய்யத் தொடங்கியது.

சுமார் 3 மணி நேரம் பெய்த கனமழையால் சாலைகளில் மழைநீர் பெருக்கெடுத்து ஓடியது.

இதேபோல் நெட்டப்பாக்கம், திருக்கனுார், பாகூர், வில்லியனுார் பகுதிகளில் நள்ளிரவு வரை இடியுடன் கூடிய கனமழை பெய்தது.

தொடர்ந்து பெய்த கனமழையால் ஏற்பட்ட போக்குவரத்து ஸ்தம்பிப்பால் இந்திரா காந்தி சிக்னல் சந்திப்பில் வாகனங்கள் வரிசையாக நின்றன.

3 மணி நேரத்திற்கு மேலாக கனமழை வெளுத்து வாங்கியதால் சாலையின் இரு புறங்களிலும் மழைநீர் பெருக்கெடுத்து ஓடியது, இதனால் வாகன ஓட்டிகள் கடுமையான சிரமத்திற்கு ஆளாகியதுடன் சாலை ஓரங்களில் நிறுத்தப்பட்டிருந்த வாகனங்களும் மழைநீரில் மூழ்கியது.

தாழ்வான குடியிருப்பு பகுதிகளிலும் மழை நீர் சூழ்ந்ததால் பொதுமக்களும் கடுமையான சிரமத்திற்கு ஆளாகினார்கள். நகர பகுதியான முத்தியால்பேட்டை, முதலியார் பேட்டை, உப்பளம், ராஜ்பவன், கிருஷ்ணா நகர், பூமியான் பேட்டை, கடற்கரை சாலை, பஸ் நிலையம், விமான நிலையம் உள்ளிட்ட பல்வேறு பகுதிகளில் குடியிருப்புகளை மழைநீர் சூழ்ந்ததால் பொதுமக்கள் கடும் சிரமத்திற்கு ஆளாகினார்கள்.

கிராமப்புறங்களான பாகூர், வில்லியனூர், திருக்கனூர், திருபுவனை, கரையாம் புத்தூர், மண்ணாடிபட்டு உள்ளிட்ட பகுதிகளிலும் கனமழை பெய்ததால் பொதுமக்கள் கடுமையான சிரமத்திற்கு ஆளாகினார்கள். தொடர்ந்து பெய்த கனமழையால் நகரம் மற்றும் கிராமப்புறங்களில் ஒரு சில இடங்களில் மின் வினியோகம் துண்டிக்கப்பட்டது.

இதனால் பொதுமக்கள் பெரும் அவதிக்குள்ளானர்கள். நேற்று இரவு 3 மணி நேரம் பெய்த மழையில் 10 செ.மீ மழை அளவு பதிவாகியுள்ளது.

புதுச்சேரி:

புதுச்சேரியில் அக்னி நட்சத்திரம் எனப்படும் கத்திரி வெயில் கடந்த மே 4-ந் தேதி தொடங்கி 28-ந் தேதியுடன் முடிவடைந்தது.

கத்திரியின் முதல் நாளில் புதுச்சேரியில் 100.6 டிகிரியும். 12-ந் தேதி 102.6 டிகிரியும் பதிவானது. அதன் பிறகு பருவமழை காரணமாக இந்த ஆண்டு கத்திரியின் தாக்கம் பெரிதாக தெரியவில்லை. ஆனால் கத்திரி முடிந்த பிறகும் அனல் காற்றுடன் வெயில் வறுத்தெடுத்து வருகிறது. கடந்த 11 மற்றும் 22-ந் தேதிகளில் பலத்த மழையால் வெயிலின் தாக்கம் குறைந்து இருந்தது. அதன் பிறகு மீண்டும் தினமும் வெயில் அதிகரித்து காணப்பட்டது சராசரியாக 97 முதல் 99 டிகிரி வரை வெயில் வாட்டி எடுத்தது.

இந்நிலையில் மாலை 6 மணிக்கு லேசாக தொடங்கிய மழை பின்னர் வெளுத்து வாங்கியது. பலத்த காற்று, இடி, மின்ன லுடன் சுமார் 45 நிமிடம் பலத்த மழை கொட்டித் தீர்த்தது. சற்று ஓய்ந்த நிலை யில், மீண்டும் இரவு 8.40 மணி முதல் அரை மணி நேரம் கனமழை பெய்தது.

மழையால் தாழ்வான பகுதிகளில் வெள்ளநீர் புகுந்தது. சாலைகளில் மழைநீர் வெள்ளம்போல் பெருக்கெடுத்து ஓடியது. காமராஜர் சாலை, 45 அடி ரோடு உள்ளிட்ட முக்கிய சாலைகளில் மழைநீர் தேங்கியது. இதனால் அவ்வழியே போக்குவரத்து நெரிசல் ஏற்பட்டது.

100அடி ரோடு மேம்பாலத்தில் இருந்து வில்லியனூருக்கு செல்லும் புதிய பைபாஸ் ரோடு இறக்கத்தில் நெடுஞ்சாலை துறை சார்பில் வாகன ஓட்டிகளுக்காக வைக்கப்பட்டிருந்த வழிகாட்டி பெயர் பலகை சூறை காற்று மழையால் கீழே சரிந்து விழுந்தது. ஆனால் யாருக்கும்காயம் ஏற்படவில்லை. இதனால் அவ்வழியே போக்குவரத்து பாதிக்கப்பட்டது.

அதேபோல், மூலகுளம்-விழுப்புரம் மெயின் ரோட்டில் பெயர் பலகை உயர்மின் அழுத்த கம்பி மீது விழுந்தது. இது பற்றி தகவலறிந்த கோரிமேடு தீயணைப்பு வீரர்கள் விரைந்து சென்று சரி செய்தனர். பலத்த மழையால் புதுச்சேரியில் வெப்பம் தணிந்து குளிர்ச்சி நிலவியது.

புதுச்சேரி:

புதுச்சேரியில் வெயிலின் தாக்கம் இன்னும் குறையவில்லை. இதனால் மக்கள் கடும் அவதியடைந்து வருகின்றனர். நேற்று காலை வழக்கம்போல் வெயில் கொளுத்தியது.

இதனால் சாலைகளில் அனல் காற்று வீசியது. வாகன ஓட்டிகள். பொது மக்கள் அவதிப்பட்டனர். புதுச்சேரியில் நேற்று 98 டிகிரி வெயில் பதிவானது.

இந்த நிலையில் மாலை 6 மணிக்குமேல் வானிலையில் மாற்றம் ஏற்பட்டது. வானில் கருமேகங்கள் சூழ்ந்து குளிர்ந்த காற்று வீசியது. இரவு 7.30 மணிக்கு சூறைக்காற்று வீசியது. சாலையில் புழுதி, குப்பைகள் பறந்ததால் வாகன ஓட்டிகள் பொது மக்கள் பாதிக்கப்பட்டனர். சிறிது நேரத்தில் பலத்த காற்றுடன் மழையும் பெய்தது.

இந்த மழை சுமார் 30 நிமிடம் நீடித்தது. அதன் பிறகும் மழை தூறிக் கொண்டே இருந்தது. சூறைக்காற்று வீசியதில் கடலூர் சாலை மரப்பாலம் பகுதியில் வைக்கப்பட்டு இருந்த பேனர்கள் சரிந்து விழுந்தன. அப்போது அந்த வழியாக மோட்டார் சைக்கிளில் சென்ற 2 பேர் சிக்கி லேசான காயமடைந்தனர்.

இதுபோல் எஸ்.வி.படேல் சாலையில் நிழலுக்காக போடப்பட்டிருந்த பசுமை பந்தல் சரிந்து விழுந்தது. இதனால் அங்கு போக்குவரத்து பாதிப்பு ஏற்பட்டது. இதுபோல் பல இடங்களில் மரக்கிளைகள் முறிந்து விழுந்தன.

புதுச்சேரி கிழக்கு கடற்கரை சாலையில் 2 மின் கம்பங்கள் சரிந்து விழுந்தன. அப்போது அந்த வழியாக வாகனங்கள் எதுவும் செல்லாததால் பெரும் விபத்து தவிர்க்கபட்டது. பலத்த சூறைகாற்றினால் பல இடங்களில் மின்சாரம் துண்டிக்கப்பட்டது.

புதுச்சேரி:

தென்கிழக்கு அரபிக்கடல் மற்றும் தென்மேற்கு வங்கக்கடல் மற்றும் அதனை ஒட்டிய பகுதிகளில் வளிமண்டல கீழடுக்கு சுழற்சி நிலவுகிறது.

இதன் காரணமாக தமிழகம், புதுச்சேரி, காரைக்கால், கேரளா மற்றும் லட்சத்தீவுகளில் அடுத்த 5 நாட்களுக்கு மிதமான மழைக்கு வாய்ப்பு இருப்பதாக இந்திய வானிலை ஆய்வு மையம் தெரிவித்துள்ளது.

அதன்படி, புதுச்சேரியின் பல்வேறு பகுதிகளில் தொடந்து மிதமான மழை பெய்து வருகிறது. பாகூர், காலாப்பட்டு, தவளக்குப்பம், அரியாங்குப்பம் உள்ளிட்ட பல்வேறு பகுதிகளில் மழை தொடர்கிறது. இதனால் பல்வேறு பகுதிகளில் வெள்ளம் சூழ்ந்து பொதுமக்களின் இயல்பு வாழ்க்கை பாதிக்கப்பட்டுள்ளது.

இந்நிலையில், மழை காரணமாக புதுச்சேரி மத்திய பல்கலைக்கழகத்திற்கு இன்று விடுமுறை அளிக்கப்பட்டுள்ளது.

ஏற்கனவே மழை காரணமாக பள்ளி, கல்லூரிகளுக்கு விடுமுறை அளிக்கப்பட்டுள்ளது.

புதுச்சேரி:

வங்க கடலில் உருவான காற்றழுத்த தாழ்வு பகுதி வலுவடைந்து தாழ்வு மண்டலமாக மாறியுள்ளது.

இதனால் தமிழகத்தின் வட மாவட்டங்களிலும், புதுச்சேரியிலும் கனமழை பெய்யும் என வானிலை மையம் எச்சரிக்கை விடுத்துள்ளது. காற்றழுத்த தாழ்வு மண்டலம் தமிழகம், தெற்கு ஆந்திரா கடற்கரை பகுதியில் புதுச்சேரி-நெல்லூர் இடையே நாளை அதிகாலை கரையை கடக்கும் என வானிலை மையம் தெரிவித்துள்ளது.

இதனால் இன்று புதுச்சேரிக்கு கனமழை பெய்யக்கூடும் என வானிலை மையம் எச்சரிக்கை விடுத்துள்ளது. மழையை எதிர்கொள்ள அரசு துறைகள் அனைத்தும் முடுக்கி விடப்பட்டுள்ளது. மழையால் பாதிக்கப்படும் மக்களை தங்க வைக்க நிவாரண முகாம்கள், உணவு ஆகியவற்றுக்கும் ஏற்பாடு செய்யப்பட்டுள்ளது. மழை பாதிப்புகளை உடனுக்குடன் தெரிவிக்க கட்டுப்பாட்டு அறைகள் திறக்கப்பட்டுள்ளது. அரசு துறைகள் அனைத்தும் ஒருங்கிணைக்கப்பட்டு பல்வேறு குழுக்கள் அமைக்கப்பட்டுள்ளது.

புதுச்சேரியில் தலா 30 பேர் கொண்ட 2 தேசிய பேரிடர் மீட்புக்குழு தயார் நிலையில் உள்ளது. நேற்று மதியம் 12 மணி முதல் புதுச்சேரியில் மழை பெய்ய தொடங்கியது.

இந்த மழை இரவு வரை தொடர்ந்தது. தொடர் மழையால் மக்கள் வீட்டை விட்டு வெளியே வராமல் வீடுகளுக்குள் முடங்கினர். பள்ளி, கல்லூரிகளுக்கு 2-வது நாளாக இன்றும் விடுமுறை அளிக்கப்பட்டுள்ளது. இதனால் சாலைகளில் மக்கள் நடமாட்டம் குறைந்து வெறிச்சோடியது.

தீபாவளி பண்டிகைக்கு இன்னும் 15 நாட்களே உள்ள நிலையில் மழை காரணமாக வியாபாரம் பாதிக்கப்பட்டுள்ளது. பண்டிகைக்காக சாலையோரங்களில் கடைகளை வைக்க முடியாமல் வியாபாரிகள் அவதிப்படுகின்றனர்.

கனமழை எச்சரிக்கை காரணமாக மீனவர்கள் கடலுக்கு செல்லவில்லை. கடலில் அலைகள் சீற்றத்துடன் காணப்படுகிறது.

இந்நிலையில் இன்று அதிகாலை முதல் புதுச்சேரியில் மழை இல்லை. ஆனால் வானம் மேகமூட்டத்துடன் காணப்படுகிறது. எப்போது வேண்டுமனாலும் மழை பெய்யலாம் என்ற சூழல் நிலவுகிறது.

புதுவை துறைமுகத்தில் 3-ம் எண் எச்சரிக்கை கூண்டு ஏற்றப்பட்டுள்ளது. மீனவர்கள் யாரும் கடலுக்கு மீன்பிடிக்க செல்ல வேண்டாம் என மீன்வளத்துறை அறிவுறுத்தியுள்ளது.

புதுச்சேரி:

தென்மேற்கு வங்க கடலில் நிலை கொண்டிருந்த ஆழ்ந்த காற்றழுத்த தாழ்வு மண்டலம் பெஞ்சல் புயலாக உருவெடுதுள்ளது.

இந்த புயல் இன்று மாலையில் புதுவைக்கும், சென்னைக்கும் இடையே மகாபலிபுரம், மரக்காணம் பகுதியில் கரையை கடக்கலாம் எனவும், இதனால் சூறை காற்றுடன் கனமழை பெய்யும் எனவும் இந்திய வானிலை ஆய்வு மையம் ரெட் அலர்ட் எச்சரிக்கை விடுத்துள்ளது.

புயல் காரணமாக புதுவை கடலில் அலைகளின் சீற்றம் அதிகமாக உள்ளது. 6 அடிக்கு மேல் அலைகள் எழும்பின. 4 நாட்களுக்கும் மேலாக மீனவர்கள் கடலுக்கு செல்ல தடை நீடிக்கிறது.

ஆழ்கடல் விசைப் படகுகள் அனைத்தும் தேங்காய்திட்டு துறை முகத்தில் பாதுகாப்பாக நிறுத்தி வைக்கப்பட்டுள்ளன. மீனவ கிராமங்களில் கடற்கரையில் நிறுத்தப்படும் படகுகள் கிரேன் மூலம் கரைக்கு ஏற்றப்பட்டு, பாதுகாப்பாக வைக்கப்பட்டுள்ளது.

புயல் எச்சரிக்கை காரணமாக பாதுகாப்பு கருதி, புதுவை கடற்கரை சாலை நேற்று இரவு முதல் மூடப்பட்டுள்ளது. இன்று காலையில் கடற்கரை சாலையில் நடைபயிற்சிக்காக வந்தவர்களை போலீசார் அனுமதிக்கவில்லை. அவர்களையும், கடற்கரையை சுற்றி பார்க்க வந்த சுற்றுலா பயணிகள் மற்றும் பொதுமக்களையும் தடுத்து நிறுத்தி, போலீசார் திருப்பி அனுப்பினர்.

பாண்டி மெரீனா கடற்கரை செல்லவும் தடை விதித்த போலீசார் தடுப்புகளை வைத்து பாதையை மூடினர். நோணாங்குப்பம் சுண்ணாம்பாறு படகு குழாம், ஊசுட்டேரி படகு குழாம் உள்ளிட்ட சுற்றுலா தளங்கள் மூடப்பட்டுள்ளது.

பெஞ்சல் புயல் கரையை கடக்கும் போது மணிக்கு 90 கி.மீ. வேகத்தில் சூறை காற்று வீசுவதோடு, 15 செ.மீ.க்கு மேல் கனமழையும் பெய்யும் என அறிவிக்கப்பட்டுள்ளது. இதனால் புதுவை மக்கள் அனைவரும் அத்தியாவசிய பொருட்களை வாங்கி வைத்து கொள்ளும்படியும் வீடுகளில் பாதுகாப்பாக இருக்க வேண்டும் என அரசு அறிவுறுத்தியுள்ளது.

புதுவையில் புயல் நிலவரம், கரையை கடக்கும் நேரம் குறித்து பொதுமக்கள் பாதுகாப்புக்காக அனைவருக்கும் செல்போனில் ஒரே நேரத்தில் எஸ்.எம்.எஸ் அனுப்பவும் பேரிடர் மேலாண்மை துறை திட்டமிட்டுள்ளது. புயலை எதிர்கொள்ள அரசு துறைகள் உஷார்படுத்தப்பட்டு தயார் நிலையில் உள்ளது.

மேலும் பல்வேறு முன்எச்சரிக்கை நடவடிக்கைகளையும் அரசு எடுத்துள்ளது. தாழ்வான பகுதியில் குடியிருப்போரை தங்க வைக்க புதுவையில் 208 நிவாரண முகாம்கள் தயார்நிலையில் வைக்கப்பட்டுள்ளது.

இதில் 121 முகாம்கள் பொதுமக்கள் தங்குவதற்காக தற்போது திறந்து வைக்கப்பட்டுள்ளது. அங்கு வருபவர்களுக்கு சுத்தமான குடிநீர், கழிப்பறை வசதி, பிரட், பால், உணவு வழங்கப்படுகிறது. புயல் பாதிப்புக்கு ஏற்ப மற்ற நிவாரண முகாம்களை திறக்கப்படும்.

தாழ்வான பகுதிகள் மற்றும் தண்ணீர் தேங்கும் பகுதிகளில் வசிக்கும் பொதுமக்கள் நிவாரண முகாம்களுக்கு வரும்படி வருவாய்த்துறையினர் அறிவுறுத்தி வருகின்றனர்.

கடந்த 2 நாட்களில் 13 ஆயிரம் பேருக்கு உணவு வழங்கப்பட்டுள்ளது. புயல் காரணமாக பல்வேறு துறைகள் அடங்கிய பேரிடர் மீட்பு குழுக்கள் ஏற்படுத்தப்பட்டுள்ளன.

இந்த குழுவில் இடம் பெற்றுள்ள 400 பேர் தங்களுக்கு ஒதுக்கப்பட்ட பணிகளில் இரவு, பகலாக செய்து வருகின்றனர். இந்த பணிகளை முதல்-அமைச்சர் ரங்கசாமி, கலெக்டர் குலோத்துங்கன் ஆகியோர் ஆய்வு செய்து பல்வேறு ஆலோசனைகளையும், உத்தரவுகளையும் வழங்கியுள்ளனர்.

புதுவையில் கடற்கரையை புயல் நெருங்கி வருவதை எச்சரிக்கும் வகையில் 7-ம் எண் புயல் எச்சரிக்கை கூண்டு ஏற்றப்பட்டுள்ளது. புதுவையில் இன்றுடன் தொடர்ந்து 4-வது நாளாக அரசு பள்ளி, கல்லூரிகளுக்கு விடுமுறை அறிவிக்கப்பட்டுள்ளது.

புதுவைக்கு ஏற்கனவே ஒரு தேசிய பேரிடர் மீட்பு குழு வரவழைக்கப்பட்டிருந்தது. இந்த நிலையில் கூடுதலாக மேலும் ஒரு தேசிய பேரிடர் மீட்பு குழுவினர் அரக்கோணத்திலிருந்து புதுவைக்கு வரவழைக்கப்பட்டுள்ளனர். அவர்கள் புதுவை போலீசார், வருவாய்த் துறையினருடன் இணைந்து மீட்பு நடவடிக்கையில் இறங்க தயார் நிலையில் உள்ளனர்.

புயலை எதிர்கொள்ள நகராட்சி, கொம்யூன் பஞ்சாயத்து, பொதுப்பணித்துறை ஊழியர்கள் தயாராக உள்ளனர். அனைத்து ஆரம்ப சுகாதார நிலையங்களிலும் மருத்துவர்கள் 24 மணி நேரமும் பணியில் இருக்க உத்தரவிடப்பட்டுள்ளது. அவசர தொலைபேசி எண்களான 112 மற்றும் 1077, வாட்ஸ்அப் எண் 94889 81070 ஆகியவற்றில் பொதுமக்கள் புயல் பாதிப்பு, மரங்கள் விழுதல், மின்சாரம் துண்டிப்பு உட்பட பிரச்சனைகள் குறித்து 24 மணி நேரமும் புகார் தெரிவிக்கலாம் என மாவட்ட நிர்வாகம் தெரிவித்துள்ளது.

புதுவை அரசின் மீன்வளத்துறை சார்பில் 50 படகுகளும் தயார் நிலையில் வைக்கப்பட்டுள்ளது. தாழ்வான பகுதிகளில் தண்ணீர் தேங்கினால் அதை வெளியேற்ற 60 மோட்டார்களை பொதுப்பணித்துறை தயார் நிலையில் வைத்துள்ளனர். காவல்துறை, பொதுப்பணித்துறை, வருவாய்த்துறை, மின்துறை அதிகாரிகள், பிற அரசு துறை ஊழியர்கள் 24 மணி நேரமும் பணியில் இருக்க உத்தரவிடப்பட்டுள்ளனர்.

குடிமைப்பொருள் வழங்கல் துறை மூலம் ஆயிரக்கணக்கான பிரட் பாக்கெட், பால் விநியோகம் செய்யவும் ஏற்பாடு செய்யப்பட்டுள்ளது. சூறை காற்றால் அசம்பாவிதங்கள் ஏற்படுவதை தடுக்க நகரம் முழுவதும் வைக்கப்பட்டிருந்த பேனர்களை அதிகாரிகள் அப்புறப்படுத்தியுள்ளனர்.

பல திரைப்படங்களில் இடம்பெற்ற புதுவை பழைய துறைமுக பாலம் 2022-ம் ஆண்டு இடிந்தது. புயலின் கடல் அலைகள் சீற்றத்தால் இந்த பாலம் முழுமையாக இடிந்து விழும் நிலை உருவாகியுள்ளது. புதுவை கடற்கரை சாலைக்கு நாளை காலை 10 மணி வரை பொதுமக்கள் வர தடை விதிக்கப்பட்டுள்ளது.

சீனியர் போலீஸ் சூப்பிரெண்டு கலைவாணன் தலைமையில் போலீசார் கடற்கரை சாலையில் கண்காணிப்பு பணியில் ஈடுபட்டுள்ளனர். புதுவை முழுவதும் முக்கிய சந்திப்புகளில் 200-க்கும் மேற்பட்ட போலீசார் பாதுகாப்பு பணியில் அமர்த்தப்பட்டுள்ளனர். பொதுமக்களுக்கு தேவையான உதவிகள், முன்னெச்சரிக்கை நடவடிக்கைகள், பாதுகாப்பு பணியில் இவர்கள் ஈடுபடுத்தப்பட உள்ளனர்.

இந்த நிலையில் புதுவையில் இன்று அதிகாலை முதல் காற்றின் வேகம் படிப்படியாக அதிகரிக்க தொடங்கியது. சூறை காற்றுடன் மழை பெய்ய தொடங்கியுள்ளது. வானம் இருண்டு கருமேகங்களுடன் திரண்டு காணப்படுகிறது. புயல் எச்சரிக்கை, பள்ளிகள், அரசு அலுவலகங்கள் விடுமுறையால் பொதுமக்கள் தங்கள் வீடுகளில் முடங்கினர்.

இதனால் சாலைகளில் பொதுமக்கள் நடமாட்டம் வெகுவாக குறைந்து காணப்பட்டது. எதிரே வரும் வாகனங்கள் தெரியாத அளவுக்கு இருள் சூழ்ந்து இருந்ததால் வாகனங்களில் முகப்பு விளக்குகளை எரியவிட்ட படி வாகன ஓட்டிகள் சென்றனர். சூறைகாற்று கடும் குளிருடன் வீசுவதால், ஸ்வெட்டர், ஜெர்கின் போன்றவற்றை பொது மக்கள் அணிந்திருந்தனர்.

புயல் எச்சரிக்கை காரணமாக பல பகுதியில் பொதுமக்கள் மெழுகுவர்த்தி, உணவுப் பொருட்களை வாங்கி வைத்தனர். வீடுகளில் தண்ணீரையும் சேமித்து வைத்துள்ளனர். மின்சாரம் தடைபடலாம் என்பதால் விளக்குகள், செல்போன்களுக்கு சார்ஜ் ஏற்றி வைத்துள்ளனர்.

புதுவையை எப்போது புயல் கடக்கும்? பாதிப்புகள் ஏதும் ஏற்படுமா? என வானிலை மையத்தின் அறிவிப்புகளை தொடர்ந்து மக்கள் கவனித்து வருகின்றனர். அடுத்தடுத்து வரும் புயல் எச்சரிக்கை அறிவிப்புகள் புதுவை மக்களை பீதியில் ஆழ்த்தியுள்ளது.

புதுச்சேரி:

புதுச்சேரியை ஃபெஞ்சல் புயல் தாக்கி கோர தாண்ட வம் ஆடியது.

சூறை காற்றுடன் வரலாறு காணாத வகையில் ஒரே நாளில் 50 செ.மீ. கனமழை பெய்ததால் புதுச்சேரி நகரம் மற்றும் கிராமப்புற பகுதிகளில் உள்ள சாலைகள், வீடுகளை வெள்ளம் சூழ்ந்தது. ஆயிரக்கணக்கான வீடுகளுக்குள் வெள்ளம் புகுந்தது. மறுநாள் மழை பெய்யாததால் தேங்கிய நீர் நகர பகுதியில் வடிய தொடங்கியது.

நேற்று முதல் நகர பகுதியில் இயல்பு வாழ்க்கை திரும்ப தொடங்கியது. அதே நேரத்தில் கிராமப்பகுதிகளில் வயல்வெளி, வீடுகளில் புகுந்த மழைநீர் வெளியேறவில்லை. இதை வெளியேற்றும் பணி நடந்து வந்தது. இதனிடையே புயல் புதுச்சேரியை கடந்து தமிழகத்தின் அண்டை மாவட்டங்களில் நுழைந்தது. செல்லும் இடமெல்லாம் 50 செ.மீ. மழையை கொட்டியபடி சென்றது.

இதனால் தமிழகத்தில் உள்ள வீடூர், சாத்தனூர் அணைகள் நிரம்பியது. இந்த அணைகளை திறந்துள்ளனர். 2 அணைகளில் இருந்தும் பல ஆயிரம் கன அடி தண்ணீர் வெளியேற்றப்பட்டு வருகிறது. வீடூர் அணை வெள்ளம் புதுச்சேரி சங்கராபரணி ஆற்றின் வழியாகவும், சாத்தனூர் அணை வெள்ளம் புதுச்சேரி தென்பெண்ணை ஆற்று வழியாகவும் கடலில் கலக்கும்.

திடீரென 2 அணைகளிலும் பல ஆயிரம் கன அடி தண்ணீரை திறந்து விட்டதால் ஆற்றின் இருபுறமும் உள்ள கரையோர கிராமங்களில் நீர் புகுந்தது. தென்பெண்ணை ஆற்றின் வெள்ளத்தால் புதுச்சேரி, கடலூர் சாலை போக்குவரத்து துண்டிக்கப்பட்டுள்ளது. சுமார் 50-க்கும் மேற்பட்ட கிராமங்கள் தண்ணீரில் மூழ்கி தத்தளித்து வருகிறது. மழை நின்றாலும், அணை திறப்பால் புதுச்சேரி கிராம மக்கள் வெள்ளத்தில் சிக்கி தவித்து வருகின்றனர்.

தென்பெண்ணையாற்று வெள்ளத்தால் புதுச்சேரியின் பாகூர், இருளஞ்சந்தை, குருவிநத்தம், சோரியாங்குப்பம், கொமந்தான்மேடு, ஆராய்ச்சிக்குப்பம் கிராமங்களை சேர்ந்த 5 ஆயிரம் குடும்பங்கள் பாதிக்கப்பட்டுள்ளன. இவர்கள் வீடுகளை விட்டு வெளியேறி முகாம், உறவினர்கள் வீடுகளில் தஞ்சம் புகுந்துள்ளனர். தீயணைப்பு வீரர்கள், தேசிய பேரிடர் மீட்பு படை, போலீசார், இளைஞர்கள் வெள்ளத்தில் சிக்கியவர்களை மீட்டு பாதுகாப்பாக தங்க வைத்தனர்.

மீட்பு பணிகளை செந்தில் குமார் எம்.எல்.ஏ. பார்வையிட்டு உணவு பொருட்களை வழங்கினார். பாகூர் ஏரிக்கு அதிக நீர் வருவதால் உடையும் அபாயம் நிலவுகிறது. புதுச்சேரி- கடலூர் சாலையில் கங்கணாங்குப்பத்தில் வெள்ளம் பெருக்கெடுத்து ஓடுவதால் போக்குவரத்து தடை செய்யப்பட்டு, நாகை புறவழிச்சாலை வழியாக திருப்பிவிடப்பட்டது.

பாகூர் பகுதி வெள்ள பாதிப்புகளை கவர்னர் கைலாஷ்நாதன், முதல்-அமைச்சர் ரங்கசாமி, பொதுப்பணித்துறை அமைச்சர் லட்சுமி நாராயணன், கலெக்டர் குலோத்துங்கன் ஆகியோர் தனித்தனியே ஆய்வு செய்து ஆறுதல் கூறினர்.

சங்கராபரணி ஆற்றின் வெள்ளப்பெருக்கால் மணலிப்பட்டு, கூனிச்சம் பட்டு கிராமங்களுக்கு இடையில் போக்குவரத்து துண்டிக்கப்பட்டுள்ளது. கொடுக்கூர், திருவக்கரை செல்லும் சாலையிலும் தண்ணீர் பெருக்கெடுத்து ஓடுகிறது.

சங்கராபரணி ஆற்றின் கரையோரம் அமைக்கப்பட்டிருந்த 3 கோழிப்பண்ணைகள் நீரில் மூழ்கியது. சுமார் 2 ஆயிரத்துக்கும் மேற்பட்ட கோழிகள் வெள்ளத்தில் அடித்து செல்லப்பட்டது.

அணைகள் திறப்பு குறித்து புதுச்சேரி பொதுப்பணித்துறை தலைமை பொறியாளர் தீனதயாளன் வெளியிட்டுள்ள செய்திக்குறிப்பில் கூறியிருப்பதாவது:-

52 ஆண்டுக்கு பின் தென்பெண்ணை ஆற்றில் 2 லட்சம் கன அடி தண்ணீர் பெருக்கெடுத்து ஓடுகிறது. சாத்தனூர் அணையிலிருந்து வினாடிக்கு 76 ஆயிரம் கன அடி தண்ணீர் திறந்தாலும், பெண்ணையாறு நீர்பிடிப்பு பகுதியிலிருந்து மேலும் ஒரு லட்சத்து 24 ஆயிரம் கன அடி தண்ணீர் என மொத்தமாக வினாடிக்கு 2 லட்சம் கனஅடி தண்ணீர் பெண்ணையாறில் வருகிறது.

இதனால், புதுச்சேரி கிராமப்புற பகுதியான கொமந்தான்மேடு, பெரிய ஆராய்ச்சிக்குப்பம், மணமேடு, கரையாம்புத்தூர், கடுவனூர், பாகூர், பரிக்கல் பட்டு, சோரியாங்குப்பம், குருவிநத்தம், ஆகிய பகுதிகளில் வெள்ள நீர் புகுந்துள்ளது.

இக்கிராமங்களில் தாழ்வான பகுதியில் உள்ள மக்களை அரசுக்கு சொந்தமான கட்டடங்களில் பாதுகாப்பாக தங்க வைக்கப்பட்டுள்ளனர். இந்த நீர் பிடிப்பு பகுதிகளில் தற்போது மழை குறைந்து இருப்பதால் ஆற்றில் செல்லும் தண்ணீர் குறைய வாய்ப்புள்ளது.

இவ்வாறு அவர் தெரிவித்தார்.

ஃபெஞ்சல் புயல் முன்னெச்சரிக்கையாக கடந்த 27-ந்தேதி முதல் புதுச்சேரி பள்ளி, கல்லூரிகளுக்கு விடுமுறை அளிக்கப்பட்டு இருந்தது. இந்த நிலையில், இன்று 3-ந்தேதி பள்ளி, கல்லூரிகள் வழக்கம்போல் இயங்கும் என கல்வித்துறை அமைச்சர் நமச்சிவாயம் அறிவித்தார்.

பின்னர் முதல்-அமைச்சருடன் அவர் தீவிர ஆலோசனை நடத்தினார். வீடூர், சாத்தனூர், அணைகள் திறப்பால் கிராமப்புற பகுதிகளில் வெள்ளப்பெருக்கு அதிகமாக காணப்படுவதால் பாதுகாப்பு கருதி, புதுச்சேரியில் உள்ள அனைத்து பள்ளி மற்றும் கல்லூரிகளுக்கு இன்று 3-ந்தேதி விடுமுறை அளிக்கப்படுவதாக முதல்-அமைச்சர் ரங்கசாமி, கல்வி அமைச்சர் நமச்சிவாயம் ஆகியோர் அறிவித்தனர்.

ஃபெஞ்சல் புயலால் புதுச்சேரியில் உள்ள பள்ளி, கல்லூரிகளுக்கு கடந்த 27-ந்தேதி முதல் தொடர் விடுமுறை அறிவிக்கப்பட்டது.

ஒரு வார கால விடுமுறைக்கு பிறகு இன்று (புதன்கிழமை) பள்ளி மற்றும் கல்லூரிகள் மீண்டும் திறக்கப்பட்டது. மாணவர்கள் உற்சாகத்தோடு பள்ளிக்கு வந்தனர்.

அதேநேரத்தில் தண்ணீர் தேங்கிய, முகாம்களாக மாறிய தவளக்குப்பம், காக்காயன்தோப்பு, மூலகுளம், கூனிச்சம்பட்டு, கரையாம்புத்தூர், சின்ன கரையாம்புத்தூர், கடுவனூர், கிருஷ்ணாபுரம், மணமேடு ஆகிய 9 அரசு தொடக்கப்பள்ளிகள், பண்டசோழநல்லூர், மணலிப்பட்டு, பூரணாங்குப்பம், டி.என்.பாளையம், பனையடிக்குப்பம் அரசு நடுநிலை பள்ளிகள், உறுவையாறு, மங்கலம், திருக்கனூர், பனித்திட்டு, அரசு உயர்நிலைப்பள்ளிகள், கரையாம்புத்தூர் அரசு மேல்நிலை பள்ளி, முத்தியால்பேட்டை சின்னாத்தா அரசு பெண்கள் மேல்நிலைப் பள்ளி, கூனிச்சம்பேட் அறிஞர் அண்ணா அரசு மேல்நிலைப்பள்ளி ஆகிய 21 பள்ளிகளுக்கு விடுமுறை அளிக்கப்பட்டது.

மேலும் தென்பெண்னை ஆற்றின் வெள்ளநீர் சூழ்ந்துள்ள பாகூர் கொம்யூனில் உள்ள அனைத்து அரசு, தனியார் பள்ளிகளுக்கு விடுமுறை விடப்பட்டது.

இந்நிலையில், புதுச்சேரியில் மழை வெள்ளம் பாதிப்பு காரணமாக, முகாமாக மாற்றப்பட்டுள்ள குறிப்பிட்ட பள்ளிகளுக்கு மட்டும் நாளை (டிச.05) விடுமுறை அளிக்கப்பட்டுள்ளது.

அதன்படி, தவளக்குப்பம், காக்காயன்தோப்பு, கூனிச்சம்பட்டு, கரையாம்புத்தூர், சின்ன கரையாம்புத்தூர், கடுவனூர், கிருஷ்ணாபுரம், மணமேடு, திருக்கனூர், செட்டிபட்டு, பூரணாங்குப்பம், டி.என்.பாளையம், பனையடிக்குப்பம், பனித்திட்டு, நத்தமேடு, பாகூர் கொம்பூனில் உள்ள அரசு மற்றும் தனியார் பள்ளிகளுக்கு நாளை விடுமுறை விடுத்து பள்ளிக் கல்வித் துறை அறிவித்துள்ளது.