நீங்கள் தேடியது "Property tax"

சென்னை:

சென்னையில் சொத்துவரியை வசூலிக்க மாநகராட்சி முடிவு செய்துள்ளது. இது தொடர்பாக சீரமைக்கப்பட்ட சொத்துவரி பற்றி வீட்டின் உரிமையாளர்களுக்கு மாநகராட்சி சார்பில் கடிதம் அனுப்பப்பட்டுள்ளது.

சென்னையில் சுமார் 12 லட்சத்துக்கும் மேற்பட்ட சொத்து உரிமையாளர்கள் உள்ளனர். இவர்களில் 7 லட்சத்துக்கும் மேற்பட்டவர்களுக்கு சொத்துவரி குறித்த அறிவிப்பு அனுப்பி வைக்கப்பட்டுள்ளது.

சொத்துவரி மிக அதிகளவில் உயர்த்தப்பட்டுள்ளதாக மக்கள் மத்தியில் அதிருப்தி எழுந்துள்ளது. இது தொடர்பாக ஆட்சேபனை தெரிவிக்கலாம் என்று சென்னை மாநகராட்சி கூறி இருந்தது. அதன்படி சுமார் 4 ஆயிரம் பேர் சென்னை மாநகராட்சியில் கடிதம் கொடுத்தனர்.

என்றாலும் சொத்து வரி விதிப்பை தீவிரப்படுத்த சென்னை மாநகராட்சி முடிவு செய்துள்ளது. சொத்து வரியை எந்த காரணம் கொண்டும் குறைக்கப்போவதில்லை என்று மாநகராட்சி அதிகாரிகள் சூசகமாக தெரிவித்துள்ளனர். அதிருப்தியில் இருப்பவர்களுக்கு உரிய விளக்கம் அளிக்கப்படும் என்று அதிகாரிகள் கூறினார்கள்.

இதற்கிடையே சொத்து வரியை நீண்ட நாட்களுக்கு நிலுவையில் வைத்திருக்கும் வீட்டு உரிமையாளர்கள் மீது புதிய அதிரடி நடவடிக்கை எடுக்க சென்னை மாநகராட்சி முடிவு செய்துள்ளது. அதன்படி சொத்து வரியை நீண்ட நாட்களாக நிலுவையில் வைத்திருக்கும் வீடுகளை சீல் வைக்கும் வகையில் சட்டத்தில் திருத்தம் கொண்டுவர சென்னை மாநகராட்சி ஆலோசித்து வருகிறது.

அதற்கு முன்னதாக வரி நிலுவையில் உள்ள கட்டிடங்களுக்கு 3 முறை நோடடீஸ் வழங்கி, 6 மாதம் அவகாசம் கொடுக்கப்படும். வீட்டு உரிமையாளர்களே வீட்டை அளந்து வரி விதிப்பு பற்றி தெரிவிக்கலாம். இதில் அலட்சியம் காட்டினால் வீடு சீல் வைக்கப்படும் என்று கூறப்படுகிறது.

சென்னையில் சொத்து வரியை முழுமையாக வசூல் செய்தால் ஆண்டுக்கு சென்னை மாநகராட்சிக்கு ரூ.1,400 கோடி வருமானம் கிடைக்கும் என்று தெரிய வந்துள்ளது. உயர்த்தப்பட்ட சொத்துவரி முழுமையாக வசூலிக்கப்பட்டால் சென்னை மாநகராட்சிக்கு மேலும் பல நூறு கோடி ரூபாய் வருவாய் கிடைக்க வாய்ப்புள்ளது.

இதைக் கருத்தில் கொண்டு சொத்து வரி எவ்வாறு கணக்கிடப்பட்டுள்ளது என்பதை ஆன்லைன் மூலம் சென்னை மாநகராட்சி வழங்கி வருகிறது.

தஞ்சாவூர்:

மின் கட்டணம், சொத்து வரி, விலைவாசி உயர்வு மற்றும் சட்ட ஒழுங்கு சீர்கேடு ஆகியவற்றை கண்டித்தும், தி.மு.க. அரசை கண்டித்தும் தமிழகம் முழுவதும் இன்று பா.ஜ.க. சார்பில் ஆர்ப்பாட்டம் நடைபெற்றது.

அதன்படி தஞ்சை ரெயிலடியில் பா.ஜ.க.வினர் ஆர்ப்பாட்டத்தில் ஈடுபட்டனர். இந்த ஆர்ப்பாட்டத்திற்கு தெற்கு மாவட்ட தலைவர் ஜெய்சதீஷ் தலைமை வகித்தார்.

ஆன்மீகம் மற்றும் ஆலயம் மேம்பாட்டு பிரிவு மாநில செயலாளர் குமரேசன், மாவட்டத் தலைவர் பாலா என்கிற பாலமுருகன், மாவட்டத் துணைத் தலைவர் இளங்கோவன், வழக்கறிஞர் பிரிவு சீனிவாசன் ஆகியோர் முன்னிலை வகித்தனர். ஆர்ப்பாட்டத்தின் போது கோரிக்கைகளை வலியுறுத்தி கோஷங்கள் எழுப்பப்பட்டன. இதில் ஏராளமானோர் கலந்து கொண்டனர்.

சென்னை:

சென்னை மாநகராட்சி பகுதிக்கு உட்பட்ட குடியிருப்புகள் மற்றும் வணிக கட்டிடங்களுக்கு சொத்து வரி கடந்த ஏப்ரல் மாதத்தில் இருந்து உயர்த்தப்பட்டது. 25 சதவீதம் முதல் 150 சதவீதம் வரை பல்வேறு வகையாக பிரித்து நிர்ணயிக்கப்பட்டுள்ளது.

சென்னை நகரின் பழைய பகுதிகளுக்கு அதிகமாவும், விரிவாக்கம் செய்யப்பட்ட பகுதிகளுக்கு குறைந்த விகிதத்திலும் ஒவ்வொரு தெருக்களின் மதிப்பு அடிப்படையில் சொத்து வரி நிர்ணயிக்கப்பட்டுள்ளது.

சொத்து வரி எவ்வளவு உயர்த்தப்பட்டுள்ளது. ஏற்கனவே செலுத்தப்பட்ட சொத்து வரி எவ்வளவு போன்ற விவரங்கள் ஒவ்வொருவருக்கும் அனுப்பப்பட்டுள்ளது.

சொத்து வரி செலுத்தக்கூடிய 13 லட்சம் பேருக்கு சொத்து வரி உயர்வு விளக்க நோட்டீஸ் கடந்த மாதம் முதல் தபால் மூலம் அனுப்பப்படுகிறது. இருப்பினும் சொத்து வரி உயர்வு அதிகமாக இருப்பதாக கருதினால் மாநகராட்சி ஆணையரிடம் முறையிடலாம் எனவும் தெரிவிக்கப்பட்டு இருந்தது.

இந்தநிலையில் சொத்து வரி உயர்வு அதிகமாக இருப்பதாக கூறி 3,552 புகார்கள் மாநகராட்சிக்கு இதுவரையில் வந்துள்ளன. அதற்கு உரிய விளக்கத்தை அதிகாரிகள் இன்று முதல் அளிக்கிறார்கள்.

மாநகராட்சி கமிஷனர் ககன்தீப்சிங் பேடி அறிவுறுத்தலின் பேரில் மண்டல துணை கமிஷனர்கள் சொத்து வரி புகாருக்கு உரிய விளக்கத்தை ஆன்லைன் வழியாக வழங்குகிறார்கள்.

இதுகுறித்து மாநகராட்சி துணை கமிஷனர் விஷ்ணு மகாஜன் கூறியதாவது:-

சொத்து வரி உயர்வு அதிகமாக இருப்பதாக பல புகார்கள் வந்துள்ளன. சொத்து வரியை நாங்கள் குறைக்க முடியாது. அரசின் உத்தரவை தொடர்ந்து சொத்துவரி சீராய்வு செய்யப்பட்டு நடைமுறைப்படுத்தப்பட்டுள்ளது.

மாநகராட்சி மன்ற கூட்டத்திலும் சொத்துவரி உயர்வுக்கு ஒப்புதல் பெறப்பட்டுள்ளது. சொத்துவரி எவ்வாறு கணக்கிடப்பட்டது என்ற விவரத்தை ஆன்லைன் வழியாக கொடுக்கிறோம். நியாயமான புகார்களுக்கு தகுந்த விளக்கங்கள் தரப்படுகின்றன.

ஆன்லைன் வழியாக சொத்துவரி புகார் கொடுத்தவர்களுக்கு உயர்வு விளக்கம் கூற தகுந்த ஏற்பாடு செய்யப்பட்டுள்ளது. சிங்கார சென்னையாக மாற்ற சொத்துவரியை குறித்த காலத்தில் செலுத்தி உதவிட வேண்டும். சொத்து வரியை முன்கூட்டியே செலுத்துபவர்களுக்கு சினிமா டிக்கெட், கேஷ்பேக் சலுகை வழங்குகிறோம்.

இவ்வாறு அவர் கூறினார்.

மாநகராட்சிக்கு பெறப்பட்ட புகார்களால் அதிகமாக அண்ணாநகர், தேனாம்பேட்டை, கோடம்பாக்கம், திரு.வி.க.நகர், அம்பத்தூரில் இருந்து வந்துள்ளது. மத்திய சென்னையில் இருந்து 1986 புகார்களில் 221-ல் விளக்கம் கொடுக்கப்பட்டுள்ளது.

வடசென்னை பகுதியில் இருந்து பெறப்பட்ட 668 புகாரில் 10 மட்டுமே சரி செய்யப்பட்டுள்ளது. தென் சென்னையில் இருந்து பெற்ற 878 மனுக்களில் 94-க்கு மட்டும் தீர்வு காணப்பட்டுள்ளது.

சென்னை:

சென்னையில் சொத்து வரியை உயர்த்துவது தொடர்பாக கடந்த 30-ந்தேதி நடந்த சென்னை மாநகராட்சி கவுன்சில் கூட்டத்தில் தீர்மானம் நிறைவேற்றப்பட்டது.

அதன்படி சென்னையில் சொத்து வரியை உயர்த்துவது தொடர்பான நடவடிக்கைகள் தொடங்கி உள்ளன. இதற்காக சொத்து உரிமையாளர்களுக்கு படிவம் 6 நோட்டீசை சென்னை மாநகராட்சி வழங்க உள்ளது.

படிவம் 6-ல் கட்டிடங்களின் அளவு, பரப்பளவு, தெரு, திருத்தப்பட்ட வரித்தொகை இடம்பெற்றிருக்கும்.

சென்னையில் 13 லட்சத்து 6 ஆயிரத்து 777 குடியிருப்புகள் உள்ளன. அதன் உரிமையாளர்களுக்கு சொத்து வரி உயர்வு தொடர்பான நோட்டீசு அடுத்த வாரம் முதல் வினியோகம் செய்யப்பட உள்ளது.

இது தொடர்பாக சென்னை மாநகராட்சி அதிகாரி ஒருவர் கூறியிருப்பதாவது:-

சொத்து வரி உயர்வு தொடர்பான நோட்டீசு வருகிற 13 அல்லது 14-ந்தேதி முதல் அச்சடித்து வினியோகம் செய்யப்படும். ஒவ்வொரு சொத்துக்களும் தனித்தனி நோட்டீசு இருக்கும். மொத்தம் 13 லட்சத்துக்கும் அதிகமான நோட்டீசுகளை ஒன்றுக்கொன்று வித்தியாசமாக அச்சிட உள்ளோம்.

உரிமையாளர்கள் பெயர், பில் எண் மற்ற விவரங்கள் நோட்டீசில் சேர்க்கப்படும். சொத்து உரிமையாளர்கள் புதிய வரி விகிதம், சொத்தின் அளவு ஆகியவற்றின் முரண்பாடுகளை கண்டறிந்தால் மேல்முறையீடு செய்ய 15 நாட்கள் அவகாசம் வழங்கப்படும்.

ஏற்கனவே இருந்த மாநகராட்சி பகுதிகளில் 600 சதுர அடி வரையிலான குடியிருப்புகளுக்கு 150 சதவீதம் வரி உயர்த்தப்படுகிறது. விரிவாக்கம் செய்யப்பட்ட மாநகராட்சி பகுதிகளில் 600 சதுர அடி வரையிலான குடியிருப்புகளுக்கு 125 சதவீதம் வரி உயர்த்தப்படுகிறது.

இதே போல் 601 சதுர அடி முதல் 1200 சதுர அடி வரையிலான குடியிருப்புகளுக்கு வரி உயர்வு 175 மற்றும் 150 சதவீதமாக இருக்கும்.

1201 சதுர அடி முதல் 1800 சதுர அடி வரையிலான குடியிருப்புகளுக்கு 200 மற்றும் 175 சதவீதம் வரி உயர்வு இருக்கும். 1801 சதுர அடிக்கு மேல் உள்ள குடியிருப்புகளுக்கு 250 சதவீதம் மற்றும் 200 சதவீத அளவுக்கு வரி உயரும்.

சென்னை மாநகராட்சியில் விரிவாக்கம் செய்யப்பட்ட பகுதிகள் ஏற்கனவே உள்ளாட்சி அமைப்புகளாக இருந்த போது சொத்து வரி உயர்த்தப்பட்டது. எனவே அங்கு சொத்து வரி உயர்வு குறைவாக உள்ளது.

இவ்வாறு அவர் கூறினார்.

பெங்களூரு:

பெங்களூரு மாநகராட்சியில் 2022-23-ம் ஆண்டிற்கான சொத்து வரி வசூல் நடைபெற்று வருகிறது. கடந்த ஏப்ரல் மாதம் 1-ந்தேதி வரி வசூல் தொடங்கியது. இது தொடங்கிய முதல் 28 நாட்களில் ரூ.1,000 கோடி வசூலானது. 28 நாட்களில் ரூ.1,000 கோடி வசூலானது இதுவே முதல் முறை ஆகும். இது வரி வசூலில் புதிய சாதனையாக பார்க்கப்படுகிறது.

முதல் மாதத்தில் 5 சதவீத தள்ளுபடி வழங்கப்படுகிறது. இந்த தள்ளுபடி மேலும் ஒரு மாதம் அதாவது கடந்த மே மாதம் வரை நீட்டிக்கப்பட்டது. இந்த தள்ளுபடி வழங்கப்பட்ட 2 மாதங்களில் ரூ.2,000 கோடி சொத்து வரி வசூலாகியுள்ளது.

இதுகுறித்து பெங்களூரு மாநகராட்சி சிறப்பு கமிஷனர் தீபக் கூறுகையில், ''நாங்கள் சொத்துவரி செலுத்தும் நடைமுறையில் சில மாற்றங்களை செய்தோம். இதற்கு நல்ல பலன் கிடைத்துள்ளது. இதன் காரணமாக சொத்துவரி வசூல் அதிகரித்துள்ளது. வரி வருவாயை மேலும் அதிகரிக்கும் வகையில் வரும் நாட்களில் சொத்துவரி செலுத்தும் நடைமுறையை மேலும் சீரமைப்போம். கட்டிடங்களின் உரிமையாளர்கள் சரியான முறையில் வரியை செலுத்துகிறார்களா? என்பது குறித்து கட்டிட சர்வே நடத்துகிறோம்'' என்றார்.

சென்னை:

பா.ம.க. நிறுவனர் டாக்டர் ராமதாஸ் வெளியிட்டுள்ள அறிக்கையில் கூறி இருப்பதாவது:-

தமிழ்நாடு முழுவதும் சென்னை உயர்நீதிமன்ற வழிகாட்டுதல்படி சொத்து வரி உயர்த்தப்பட்டுள்ளது. ஆனால், சென்னையில் உயர்நீதிமன்றத்தில் உறுதியளித்ததை விட பல மடங்கு அதிகமாக சொத்துவரி உயர்த்தப்பட்டிருக்கிறது. மக்களைச் சுரண்டும் இந்த நடவடிக்கை கடுமையாக கண்டிக்கத்தக்கது.

தமிழ்நாட்டில் 5 ஆண்டுகளுக்கு ஒரு முறை சொத்து வரி உயர்த்த வேண்டும் என்று விதி இருந்தாலும், 1998-ம் ஆண்டுக்குப் பிறகு கடந்த 20 ஆண்டுகளாக சென்னை மாநகராட்சி உட்பட தமிழகத்தின் பெரும்பாலான பகுதிகளில் சொத்துவரி உயர்த்தப்படவில்லை. இதுகுறித்த வழக்கை விசாரித்த சென்னை உயர்நீதிமன்றம் கடந்த ஜூலை மாதம் தமிழகம் முழுவதும் சொத்து வரியை உயர்த்த ஆணையிட்டது.

சென்னை உயர்நீதிமன்றத்தின் தீர்ப்பைப் பயன்படுத்திக் கொண்டு தமிழக அரசும், உள்ளாட்சி அமைப்புகளும் சொத்துவரியை விருப்பம் போல உயர்த்தியுள்ளன. சென்னையின் சில பகுதிகளில் சொத்து வரி 518 விழுக்காடு வரை உயர்த்தப்பட்டிருக்கிறது.

சென்னை பெரவள்ளூர் அகரம் பகுதியில் 958 சதுர அடி பரப்புள்ள தனி வீட்டுக்கான ஆண்டு சொத்துவரி 390 ரூபாயிலிருந்து ரூ.2410 ஆக அதிகரிக்கப்பட்டுள்ளது. சென்னை கோடம்பாக்கம் பகுதியில் அடுக்குமாடி குடியிருப்பு வீட்டுக்கான ஆண்டு சொத்துவரி 1100 ரூபாயிலிருந்து ரூ.3370 ஆக அதிகரிக்கப்பட்டுள்ளது. இது 206 சதவீதம் உயர்வாகும்.

ஆலந்தூர் பகுதியில் அடுக்குமாடி குடியிருப்பு வீட்டுக்கான சொத்துவரி 256 ரூபாயிலிருந்து ரூ.1480 ஆக அதிகரிக்கப்பட்டுள்ளது. இது 478 சதவீதம் உயர்வாகும். சில இடங்களில் இதைவிட அதிகமாக சொத்து வரி உயர்த்தப்பட்டிருப்பதாகத் தெரிகிறது. வீடுகளுக்கான சொத்துவரியை ஒரே நேரத்தில் 518 விழுக்காடு அளவுக்கு உயர்த்துவது எந்த அடிப்படையில் நியாயம் என்பது தெரியவில்லை. எந்த அளவீடுகளின் அடிப்படையில் சொத்துவரியை சென்னை மாநகராட்சி இந்த அளவு உயர்த்தியது என்பதும் தெரியவில்லை.

அதேநேரத்தில் சிலருக்கு மட்டும் மிகக்குறைந்த அளவிலேயே சொத்துவரி உயர்த்தப்பட்டுள்ளது. சென்னைக் கோடம்பாக்கத்தில் 394 சதுர அடி பரப்பளவுள்ள தனி வீட்டுக்கு இதுவரை சொத்துவரியாக ஆண்டுக்கு ரூ.1802 வசூலிக்கப்பட்டு வந்தது. இப்போது இது ரூ.2020 ஆக அதிகரிக்கப்பட்டுள்ளது. இது வெறும் 12 சதவீதம் உயர்வு மட்டும் தான் என்பது குறிப்பிடத்தக்கது.

இதேபோல் பல குடியிருப்புகளுக்கு குறைந்தபட்சமாக 10 சதவீதம் வரையிலும், வணிக நிறுவனங்களுக்கு 40 சதவீதம் வரையிலும் மட்டுமே சொத்து வரி உயர்த்தப்பட்டிருக்கிறது. எந்த அடிப்படையில் இவர்களுக்கு வரி குறைவாக உயர்த்தப்பட்டது என்பது ரகசியமாகவே உள்ளது. இவற்றை யார், எந்த அடிப்படையில் தீர்மானித்தனர் என்பது தெரியவில்லை.

சொத்துவரி தொடர்பான சென்னை உயர்நீதிமன்றத் தீர்ப்பைத் தொடர்ந்து வீடுகள், வணிக நிறுவனங்கள் ஆகியவற்றுக்கான சொத்து வரி 100 சதவீதம் உயர்த்தப்படும் என்று கடந்த ஜூலை 23-ந்தேதி அறிவிப்பு வெளியானது.

கடந்த ஏப்ரல் மாதம் முதல் பின் தேதியிட்டு இந்த வரி வசூலிக்கப்படும் என்றும் அரசு அறிவித்தது. ஆனால், பொதுமக்கள் மத்தியிலும், அரசியல் கட்சிகள் மத்தியிலும் கடும் எதிர்ப்பு எழுந்ததைத் தொடர்ந்து சொந்தப் பயன்பாட்டுக்கான வீடுகளுக்கான சொத்து வரி 50 சதவீதம் வரை மட்டுமே உயர்த்தப்படும் என்றும், பின்தேதியிட்டு ஏப்ரல் மாதத்திலிருந்து வசூலிக்கப்படாது என்றும், அக்டோபர் மாதம் முதல் தான் புதிய வரி வசூலிக்கப்படும் என்றும் தமிழக அரசு அறிவித்திருந்தது.

ஆனால், தமிழக அரசின் அரசாணையை தமிழக அரசே மதிக்கவில்லை. அதிகபட்ச வரி உயர்வை விட 10 மடங்குக்கும் கூடுதலாக சொத்துவரி வசூலிக்கப்பட்டிருக்கிறது. அதுமட்டுமின்றி, ஏப்ரல் மாதம் முதல் பின்தேதியிட்டு சொத்துவரி வசூலிக்கப்பட்டு வருகிறது. இதை எந்த வகையிலும் நியாயப்படுத்த முடியாது.

நகர்ப்புற உள்ளாட்சிகளின் செலவுகள் அதிகரித்து விட்ட நிலையில், அதை சமாளிக்க சொத்துவரியை ஓரளவு உயர்த்த வேண்டியது அவசியம் தான். ஆனால், அது மக்களைப் பாதிக்காவாறு இருக்க வேண்டும். மக்கள் பொறுத்துக் கொள்வார்கள் என்ற எண்ணத்தில் விருப்பம் போல சொத்து வரியை உயர்த்துவது கொள்ளைக்கு சமமானதாகும். மக்களை சுரண்டவும், கொள்ளை அடிக்கவும் ஓர் எல்லை உண்டு என்பதை தமிழக ஆட்சியாளர்கள் உணர்ந்து நடந்து கொள்ள வேண்டும்.

வீடுகளுக்கான சொத்து வரி 50 விழுக்காட்டுக்கும் மேல் உயர்த்தப்படாது என்று உயர்நீதிமன்றத்தில் உத்தரவாதம் அளித்த தமிழக அரசு, அதை விட 10 மடங்குக்கும் மேலாக சொத்துவரியை உயர்த்தி இருப்பது நீதிமன்றத்தை அவமதிக்கும் செயலாகும். இதை உணர்ந்து சொத்துவரி உயர்வை 50 சதவீதம் என்ற அளவுக்கு அரசு குறைக்க வேண்டும். இல்லாவிட்டால் பா.ம.க. மிகப்பெரிய போராட்டத்தை நடத்தும்.

அதுமட்டுமின்றி, சொத்துவரியை உயர்த்தும் அரசின் முடிவை ஏதேனும் அரசியல் கட்சி தலைவர்கள் விமர்சித்தால் அவர்களை நீதிமன்றம் பார்த்துக் கொள்ளும் என்று எச்சரித்த சென்னை உயர்நீதிமன்றம், தமிழக அரசின் நீதிமன்ற அவமதிப்பை மிகக் கடுமையாக கையாள வேண்டும். இதற்கு காரணமான அமைச்சர் முதல் அதிகாரிகள் வரை அனைவரையும் நீதிமன்றத்திற்கு அழைத்து கண்டிக்க வேண்டும்.

இவ்வாறு டாக்டர் ராமதாஸ் கூறியுள்ளார்.

சென்னை:

தமிழ்நாட்டில் சொத்துவரி விதிப்பு 5 ஆண்டுகளுக்கு ஒரு முறை மாற்றி அமைக்கப்பட வேண்டும்.

அந்த அடிப்படையில் கடந்த 2008-ம் ஆண்டு அனைத்து உள்ளாட்சி அமைப்புகள் மூலம் சொத்துவரியில் திருத்தம் செய்யப்பட்டன. ஆனால் அப்போது சென்னை மாநகராட்சிக்கு உட்பட்ட பகுதிகளில் மட்டும் சொத்து வரியில் திருத்தம் செய்யப்பட வில்லை.

இந்த நிலையில் சென்னை மாநகராட்சி பகுதியில் சொத்துவரியை சீரமைக்க முடிவு செய்யப்பட்டது. அதன்படி அதிகாரிகள் ஆய்வு செய்து புதிய வரி விதிப்பு பட்டியலை தயாரித்த னர். கடந்த ஜூலை மாதம் அந்த வரிவிதிப்பு விவரம் வெளியிடப்பட்டது.

இதில் சொத்துவரி 100 சதவீதம் உயர்த்தப்பட்டு இருந்தது. இதை எதிர்த்து சென்னை ஐகோர்ட்டில் வழக்குகள் தொடரப்பட்டன. அந்த வழக்குகளை விசாரித்த நீதிபதிகள் சென்னை மாநாகரட்சிக்குட்பட்ட பகுதிகளில் சொத்துவரியை மறு ஆய்வு செய்ய உத்தர விட்டனர்.

இதையடுத்து சென்னை மாநகராட்சி சார்பில் அனைத்து வீட்டின் உரிமையாளர்களுக்கு நோட்டீஸ் அனுப்பப்பட்டது. அதில் உங்கள் வீட்டின் மொத்த பரப்பளவு எவ்வளவு? அதில் எத்தனை சதுர அடிக்கு வீடு கட்டப்பட்டுள்ளது? எத்தனை அறைகள் உள்ளன? என்பன போன்ற விவரங்கள் கேட்கப்பட்டு இருந்தன.

சுமார் 12 லட்சம் சொத்துக்களுக்கு இந்த நோட்டீஸ் அனுப்பப்பட்டு இருந்தது. அவர்கள் சொத்துவரி தொடர்பான விண்ணப்பத்தை பூர்த்தி செய்து கொடுப்பதற்கு ஆகஸ்டு 31-ந்தேதி இறுதி நாள் என்று அறிவிக்கப்பட்டு இருந்தது.

ஆனால் ஆகஸ்டு இறுதி வரை கொஞ்சம் பேர் தான் வரித்தொடர்பான விண்ணப்பத்தை பூர்த்தி செய்து கொடுத்து இருந்தனர். இதையடுத்து செப்டம்பர் மாதம் 16-ந்தேதி வரை வீட்டின் அளவு பற்றிய தகவல்களை மாநகராட்சி மண்டல அலுவலகங்களில் தெரிவிக்கலாம் என்று அறிவிக்கப்பட்டது.

அதன் பேரில் சுமார் 8 லட்சம் பேர் தங்களது வீட்டின் அளவு பற்றி தகவல்களை பூர்த்தி செய்து கொடுத்து இருந்தனர். மக்கள் அளித்துள்ள சுய தகவல் விண்ணப்பங்களின் அடிப்படையில் ஒவ்வொரு வீட்டிற்கும் புதிய வரிகள் நிர்ணயம் செய்யப்பட்டன.

அந்த புதிய வரி விதிப்பு பற்றிய தகவல்கள் வீட்டின் சொந்தக்காரர்களுக்கு ‘குறுஞ்செய்தி’ மூலம் அனுப்பி வைக்கப்பட்டுள்ளது. புதிய வரியை உடனே கட்டும்படி பொது மக்கள் அறிவுறுத்தப்பட்டுள்ளனர்.

நாளை (புதன்கிழமை) முதல் புதிய வரி விதிப்பின் அடிப்படையில் சொத்து வரிகளை கட்ட வேண்டும் என்று சென்னை மாநகராட்சி அறிவித்துள்ளது. ஏற்கனவே இந்த பருவத்திற்கான சொத்து வரியை கட்டியவர்கள் கட்டிய தொகையை கழித்துவிட்டு மீதமுள்ள தொகையை செலுத்த வேண் டும் என்று மாநகராட்சி அதிகாரிகள் கூறியுள்ளனர்.

செப்டம்பர் மாதம் 30-ந்தேதிக்குள் அனைவரும் புதிய வரி விதிப்பின்படி சொத்து வரியை கட்ட வேண்டும் என்று அறிவிக்கப்பட்டுள்ளது. இதன் மூலம் சென்னை மாநகராட்சிக்கு ரூ.300 கோடி கூடுதல் வருவாய் கிடைக்கும் என்று எதிர் பார்க்கப்படுகிறது.

சில இடங்களில் பாதிகட்டப்பட்ட நிலையில் கட்டிடங்கள் உள்ளன. அந்த கட்டிடங்கள் உள்ள பகுதிகளுக்கு சொத்து வரியில் 20 சதவீதம் சலுகை வழங்கப்பட்டுள்ளது.

சொத்துவரி அதிகரிக்கப்பட்டு இருப்பதற்கு பெரும் பாலான குடியிருப்பு வாசிகள் அதிருப்தி தெரிவித்துள்ளனர். சொத்து வரி கட்டுவதற்கு கால அவகாசம் தரவேண்டும் என்று கோரிக்கை விடுத்துள்ளனர். பொதுவாக சொத்துவரி ஆண்டுக்கு 2 தடவை வசூலிக்கப்படுகிறது.

ஏப்ரல் முதல் செப்டம்பர் மாதம் வரை முதல் அரையாண்டும் அக்டோபர் முதல் மார்ச் வரை 2-வது அரையாண்டும் கணக்கிடப்பட்டு சொத்து வரி வசூலிக்கப்படுகிறது.

சென்னை மாநகராட்சி பகுதியில் இன்னமும் 4 லட்சம் வீட்டுக்காரர்கள் தங்களது வீட்டின் அளவு பற்றிய சுய தகவலை சென்னை மாநகராட்சி அலுவலகங்களில் ஒப்படைக்காமல் இருக்கிறார்கள். அவர்களது இல்லங்களுக்கு வருவாய் அதிகாரிகள் சென்று விண்ணப்பத்தை வழங்கி சொத்து பற்றிய தகவல்களை சேகரிக்க உள்ளனர்.

இந்த பணிகள் முடிந்த பிறகு சென்னை மாநகராட்சி சார்பில் ஒவ்வொரு வீட்டின் சொத்து வரி தொடர்பான தகவல்கள் சரியாக உள்ளதா? என்ற ஆய்வு பணியை நடத்த உள்ளனர்.#ChennaiCorporation #PropertyTax