டெஸ்ட் கிரிக்கெட்டில்தான் வீரர்களின் உண்மையான திறமைகளை கண்டறிய முடியும் என்பதால், டெஸ்ட் கிரிக்கெட் முக்கியத்துவம் வாய்ந்ததாக இருந்தது. கிரிக்கெட் தொடங்கிய காலத்தில் எத்தனை நாட்கள் ஆனாலும் இரண்டு இன்னிங்சை முடித்தே தீர வேண்டும்.
நாளடைவில் அது 6 நாட்களாக குறைந்து, தற்போது ஐந்து நாட்களாக உள்ளது. காலங்கள் மாறமாற கிரிக்கெட் ரசிகர்கள் ஐந்து நாட்கள் மைதானம் சென்று போட்டியை காண விரும்பவில்லை. இதனால் ரசிகர்களை ஈர்க்கும் வகையில் 50 ஓவர் கிரிக்கெட் தொடங்கப்பட்டது.
இது நாளடைவில் 20 ஓவர் போட்டியாகியுள்ளது. இதற்கு ரசிகர்களிடையே கடும் வரவேற்பை பெற்றுள்ளது. இந்நிலையில் இங்கிலாந்து கிரிக்கெட் வாரியம் 100 பந்து போட்டியை அறிமுகப்படுத்த உள்ளது.
இந்த போட்டியில் 12 வீரர்கள் விளையாடுவார்கள் என்பததுதான் உச்சக்கட்டம். தற்போதைய நிலையில் மாற்று வீரர் பீல்டிங் செய்யலாம். பந்து வீசவோ, பேட்டிங் செய்யவோ முடியாது. ஆனால் 100 பந்து பேட்டியில் பேட்டிங்கும் செய்யலாம், பந்து வீசலாம் என்பது நடைமுறைப்படுத்த இருப்பதாக கூறப்பட்டது.
இந்நிலையில் இங்கிலாந்து கிரிக்கெட் வாரியத்தின் செய்தி தொடர்பாளர் இந்த செய்தியை முற்றிலும் மறுத்துள்ளார். ‘‘100 பந்து தொடருக்கான முழு வடிவத்தை இன்னும் உருவாக்கவில்லை. செப்டம்பர் மாதம் ஏராளமான பரிசோதனை போட்டிகள் நடத்தப்பட்ட பின்னர்தான் முடிவு செய்யப்படும்’’ என்று அறிவித்துள்ளார்.
