விளையாட்டு

புதுடெல்லி:

இந்திய கிரிக்கெட் அணியின் அதிரடி தொடக்க ஆட்டக்காரர் ஷிகர் தவான், முன்னாள் வீரர் இர்பான் பதானுடன் ‘இன்ஸ்டாகிராம்’ மூலம் கலந்துரையாடினார். அப்போது கேட்கப்பட்ட கேள்விகளுக்கு தவான் அளித்த பதில் வருமாறு:

கேள்வி: உங்களுக்கு பிடித்தமான இந்திய கேப்டன்?

பதில்: டோனி, விராட் கோலி ஆகியோரின் தலைமையின் கீழ் மட்டுமே விளையாடி இருக்கிறேன். இப்போதைக்கு டோனியை தேர்வு செய்கிறேன்.

கேள்வி: உங்களுடைய சிறந்த பேட்டிங் பார்ட்னர்?

பதில்: ரோகித் சர்மா.

கேள்வி: தற்போதைய இந்திய அணியின் சிறந்த பேட்ஸ்மேன் யார்?

பதில்: விராட் கோலி.

கேள்வி : உங்களது கிரிக்கெட் வாழ்க்கையில் எதிர்கொண்ட கடினமான பவுலர்?

பதில்: ஆஸ்திரேலிய வேகப்பந்து வீச்சாளர் மிட்செல் ஸ்டார்க்கை (4 முறை இவரது பந்து வீச்சில் ஆட்டம் இழந்திருக்கிறார்) சொல்வேன்.

கேள்வி: சமீபத்தில் ஒரு உரையாடலில், நீங்கள் ஒரு போதும் இன்னிங்சின் முதல் பந்தை அதுவும் வேகப்பந்து வீச்சாக இருந்தால் சந்திப்பதில்லை என்று சக தொடக்க வீரர் ரோகித் சர்மா கூறியுள்ளாரே?

பதில்: இந்த கருத்தை நான் ஏற்றுக்கொள்ளமாட்டேன். நான் ஒரு தொடக்க ஆட்டக்காரர். இந்திய அணிக்காக இந்த வரிசையில் 8 ஆண்டுகளாக ஆடுகிறேன். வேகப்பந்து வீச்சை சந்திக்க எனக்கு பயம் கிடையாது. முதல் ஓவரில் வேகப்பந்து வீச்சை சந்திக்காவிட்டால், அடுத்த ஓவரில் எதிர்கொள்ளப்போகிறேன் அவ்வளவு தான். அதே சமயம் ஆட்டத்தின் முதல் பந்தை நான் சந்திக்க விரும்புவதில்லை என்பதை ஒப்புக் கொள்கிறேன். இருப்பினும் தொடக்க வீரர் என்னை விட இளம் வீரராக இருந்து அவரும் முதல் பந்தை ஆடுவதில் அசவுரியமாக உணர்ந்தால் நானே முதல் பந்தை சந்திப்பேன். 2013-ம் ஆண்டு சாம்பியன்ஸ் கோப்பை போட்டியில் முதல் முறையாக ரோகித் சர்மாவுடன் தொடக்க ஆட்டக்காரராக விளையாடிய போது முதல் பந்தை சந்திக்கும்படி அவரிடம் கூறினேன். அந்த நடைமுறை மாற்றமின்றி இப்போதும் தொடருகிறது.

இவ்வாறு தவான் கூறினார்.

மும்பை:

கொரோனா வைரஸ் பரவலை தடுக்க ஊரடங்கு அமலில் இருப்பதால் வீட்டில் முடங்கி கிடக்கும் இந்திய கிரிக்கெட் அணியின் தொடக்க ஆட்டக்காரர் ரோகித் சர்மா ஸ்டார் ஸ்போர்ட்ஸ் டெலிவிஷன் நிகழ்ச்சி ஒன்றில் பங்கேற்று பேசுகையில் கூறியதாவது:-

“நீண்ட கால இலக்கு உங்களுக்கு எந்தவகையிலும் உதவாது என்பதை கடந்த கால அனுபவத்தின் மூலம் நான் உணர்ந்து இருக்கிறேன். மாறாக அது உங்களுக்கு நெருக்கடியையும், அழுத்தத்தையும் அதிகரிக்கும். நான் எப்பொழுதும் குறுகிய கால இலக்கை நிர்ணயித்து தான் கவனம் செலுத்துவேன். அதிலும் முக்கியமாக அடுத்த 2-3 மாதங்களில் வரும் சில ஆட்டங்கள் குறித்தும், யாருக்கு எதிராக விளையாடுகிறோம். அதில் என்னால் என்ன சிறப்பாக செய்ய முடியும் என்பது குறித்து தான் சிந்திப்பேன். ஒவ்வொரு தொடர் அல்லது ஒவ்வொரு போட்டிக்கு என்று தனியாக இலக்கு நிர்ணயித்து செயல்படுவது எனக்கு நிறைய உதவிகரமாக இருக்கிறது. வருங்காலத்திலும் இந்த முறையையே தொடர்ந்து பின்பற்ற நான் விரும்புகிறேன்.

கொரோனா வைரஸ் தாக்கம் தணிந்து மீண்டும் கிரிக்கெட் விளையாட எங்களுக்கு வாய்ப்பு கிடைக்கும் என்று நம்புகிறேன். அதற்காக காத்து இருக்கிறேன். ஆனால் நாங்கள் மீண்டும் எப்போது கிரிக்கெட் விளையாட தொடங்குவோம் என்பது தெரியாது. நாங்கள் மீண்டும் விளையாட ஆரம்பிக்கையில் 20 ஓவர் உலக கோப்பை போட்டியா? அல்லது ஐ.பி.எல். போட்டியா? நமது வழியில் வருகிறது என்பதை பார்க்க வேண்டும். நாங்கள் ஆஸ்திரேலிய அணிக்கு எதிரான பெரிய போட்டி தொடரில் விளையாடவும் திட்டமிடப்பட்டு இருக்கிறது. நாங்கள் யாருக்கு எதிராக விளையாட போகிறோம் என்பதை ஆராய்ந்து பார்க்க வேண்டும்.

இவ்வாறு அவர் கூறினார்.

மராட்டியத்தை சேர்ந்த 33 வயது ஹிட்மேனான ரோகித் சர்மா 32 டெஸ்ட் போட்டியில் விளையாடி 6 சதம் உள்பட 2,141 ரன்னும், 224 ஒருநாள் போட்டியில் ஆடி 29 சதம் உள்பட 9,115 ரன்னும், 108 இருபது ஓவர் போட்டியில் ஆடி 4 சதம் உள்பட 2,773 ரன்னும் எடுத்துள்ளார் என்பது குறிப்பிடத்தக்கது.