புதுச்சேரி

புதுச்சேரி:

புதுச்சேரி அரசு சார்பு செயலாளர் புனிதமேரி வெளியிட்டுள்ள செய்திக்குறிப்பில் கூறியிருப்பதாவது:-

புதுவை மாநிலத்தில் கவர்னர் பரிந்துரையின்படி சென்டாக் கலந்தாய்வு மூலம் 2021-22ம் கல்வி ஆண்டுக்கான மருத்துவம், பல் மருத்துவம், பி.பார்ம், செவிலியர் படிப்பிற்கு அரசு ஒதுக்கீட்டில் சேர்க்கை பெறும் மாணவர்களுக்கு கடந்த ஆண்டு வசூலிக்கப்பட்ட கல்வி கட்டணமே வசூலிக்க வேண்டும். இந்த கட்டணத்தில் எந்தவித மாற்றமும் இல்லை.

இவ்வாறு அந்த செய்திக் குறிப்பில் கூறப்பட்டுள்ளது.

புதுவை மாநில மாணவர் பெற்றோர் சங்க தலைவர் வை. பாலா வெளியிட்டுள்ள அறிக்கையில் கூறியிருப்பதாவது:-

கொரோனா தொற்று காலத்தில் கடந்த 2 ஆண்டுகளாக புதுச்சேரி மாநிலத்தில் வசிக்கும் அனைத்து மக்களும் பொருளாதார ரீதியில் பாதிக்கப்பட்டுள்ளனர். இதனை கருத்தில் கொண்டு புதுச்சேரி மாநில மாணவர்கள் மற்றும் பெற்றோரின் கோரிக்கையை ஏற்று நடப்பு கல்வியாண்டில் மருத்துவம், பல் மருத்துவம், பி.பார்ம், செவிலியர் படிப்பிற்கு எந்தவித கல்விக்கட்டண உயர்வும் இல்லை என்று அறிவித்த கவர்னர் தமிழிசை சவுந்தரராஜன், முதல்-அமைச்சர் ரங்கசாமி, கல்வித்துறை அமைச்சர் நமச்சிவாயம் ஆகியோருக்கு புதுச்சேரி மாநில மாணவர், பெற்றோர் நலச்சங்கம் சார்பில் நன்றியையும், பாராட்டுக்களையும் தெரிவித்துக்கொள்கிறோம்.

சுப்ரீம் கோர்ட்டு வழிகாட்டுதலின்படி மாநில மற்றும் யூனியன் பிரதேசங்களில் அமைக்கப்பட்ட கட்டண குழுவால் நிர்ணயிக்கப்பட்ட கல்வி கட்டணங்களை காட்டிலும் ஒரு சில கல்லூரி நிர்வாகங்கள் கூடுதல் கட்டணம் பெறுகின்றன. இதன் மீது நடவடிக்கை எடுக்க மற்ற மாநிலங்களில் உள்ளதுபோல் புதுவை அரசும் கல்விக்கட்டண கண்காணிப்பு ஆணையத்தை அமைக்க வேண்டும்.

இவ்வாறு அந்த அறிக்கையில் கூறப்பட்டுள்ளது.

காரைக்கால்:

காரைக்கால் நகர் பகுதியில் கடந்த சில மாதங்களாக கால்நடைகள் சுற்றித்திரிகின்றன. முன்பெல்லாம் இரவு நேரத்தில் சுற்றித்திரிந்த கால்நடைகள் தற்போது பகல் நேரத்திலேயே உலா வருகின்றன.

மாவட்ட கலெக்டர் அலுவலகம், நகராட்சி அலுவலகம், போலீஸ் சூப்பிரண்டு, பொதுப்பணித்துறை, வருவாய்த்துறை, பள்ளி, கல்லூரிகள், மார்க்கெட், கடற்கரை, பகுதிகளில் கூட்டம், கூட்டமாக கால்நடைகள் சுற்றித்திரிகின்றன. மாடுகள், நாய்கள், குதிரை, பன்றி போன்றவை சாலைகளில் சுற்றித்திரிவதால் போக்குவரத்து இடையூறு ஏற்படுவது மட்டுமின்றி விபத்துகளும் ஏற்பட்டு வருகின்றன.

கடந்த 12-ந்தேதி காரைக்கால் பைபாஸ் சாலையில் எருமை மாடு மீது மோட்டார் சைக்கிள் மோதியதில் வாலிபர் பலியானார். எருமை மாடும் இறந்து போனது. கடந்த 2 நாட்களுக்கு முன்பு கூட குதிரை மீது மோட்டார் சைக்கிள் மோதியதில் நாகை மாவட்டம் திட்டச்சேரியை சேர்ந்த அன்வர்தீன் என்பவர் பலியானார்.

இது போதாதென்று நாய்களும் கூட்டம் கூட்டமாக சுற்றித்திரிகின்றன. வாகனங்கள் மற்றும் நடந்து செல்வோரை துரத்திச் சென்று கடித்து வருகின்றன. சாலைகளில் சுற்றித்திரியும் கால்நடைகளால் நாளுக்கு நாள் விபத்துகள் அதிகரித்த வண்ணம் உள்ளது. எனவே நகர் பகுதியில் கட்டுப்பாடின்றி சுற்றித்திரியும் கால்நடைகளை பிடித்து அப்புறப்படுத்த வேண்டும் என்று பொதுமக்கள் கோரிக்கை விடுத்துள்ளனர்.

காரைக்கால்:

புதுச்சேரி சாலை போக்குவரத்துகழகம் சார்பில், 100-க்கும் மேற்பட்ட பஸ்கள் இயக்கப்படுகின்றன. பயணிகளின் பாதுகாப்பு கருதி அரசு பஸ்களில் கண்காணிப்பு கேமரா பொருத்த முடிவு செய்யப்பட்டது. முதற்கட்டமாக புதுச்சேரியில் இயங்கும் 3 பஸ்களில் கண்காணிப்பு கேமரா பொருத்தப்பட்டு சோதனை ஓட்டம் நடத்தப்பட்டது. இதன் தொடர்ச்சியாக நேற்று காரைக்காலில் 3 பஸ்களில் கண்காணிப்பு கேமராக்கள் பொருத்தப்பட்டன.

இதனை அமைச்சர் சந்திர பிரியங்கா தொடங்கி வைத்து பஸ்சில் பயணம் செய்தார். பின்னர் அவர் நிருபர்களிடம் கூறியதாவது:-

முதல்-அமைச்சர் ரங்கசாமி தலைமையிலான அரசு, பொதுமக்களுக்கு உரிய பாதுகாப்பு வழங்க தேவையான நடவடிக்கைகளை எடுத்து வருகிறது. குறிப்பாக பஸ் பயணிகளுக்கு பாதுகாப்பை உறுதிப்படுத்தும் வகையில் கண்காணிப்பு கேமராக்கள் பொருத்தப்பட்டு வருகின்றன.

பயணிகள் ஏதேனும் குறைகள் தெரிவிக்க விரும்பினால், பஸ்சில் ஒட்டியிருக்கும் செல்போன் எண்ணுக்கு தொடர்பு கொள்ளலாம். புகார் கொடுத்த சில மணி நேரங்களிலேயே நடவடிக்கை எடுக்கப்படும். பஸ்களில் பயணம் செய்வோர் சமூக இடைவெளியை கடைபிடிப்பதோடு, முக கவசம் அணிவது கட்டாயம்.

இவ்வாறு அவர் கூறினார்.

காரைக்கால் மேற்கு புறவழிச்சாலை, மக்கள் பயன்பாட்டிற்கு வந்து வெகு நாட்களாகியும், மின் விளக்குகள் இல்லாததால் தொடர்ந்து விபத்துகள் ஏற்பட்டு வருவதாக புகார் எழுந்தது.

இதையடுத்து நேற்று முன்தினம் இரவு மேற்கு புறவழிச்சாலையில் அமைச்சர் ஆய்வு செய்தார். அப்போது அங்கு மின்விளக்குகளை பொருத்த நடவடிக்கை எடுக்குமாறு உத்தரவிட்டார்.

அதற்கு மாவட்ட கலெக்டர் அர்ஜூன் சர்மா, பொதுப்பணித்துறை மூலம் ரூ.2 கோடியில் சூரியசக்தி உயர் மின்விளக்கு பொருத்த திட்டம் தயார் நிலையில் உள்ளதாக தெரிவித்தார்.

ஆய்வின் போது பொதுப்பணித்துறை செயற்பொறியாளர் வீரசெல்வம், நகராட்சி ஆணையர் செந்தில்நாதன், மின்துறை உதவி செயற்பொறியாளர் அனுராதா, போலீஸ் சூப்பிரண்டு ரகுநாயகம் ஆகியோர் உடன் இருந்தனர்.

சேதராப்பட்டு:

புதுவை அருகே சர்வதேச நகரமான ஆரோவில் அமைந்துள்ளது. இப்பகுதியில் ஏராளமான வெளிநாட்டினர் வசித்து வருகிறார்கள்.

மேலும் அரவிந்தர் அன்னையின் கனவு நகரமாக ஆரோவில்லை விரிவாக்கம் செய்ய வேண்டும் என்ற திட்டத்தின் அடிப்படையில் கடந்த மாதம் விரிவாக்க பணிகள் நடைபெற்றபோது மரங்கள் வெட்டப்பட்டது.

இதற்கு ஆரோவில்லில் உள்ள வெளிநாட்டினர் எதிர்ப்பு தெரிவித்த நிலையில் சென்னை பசுமை தீர்ப்பாயம் மரம் வெட்டும் பணிக்கு இடைக்கால தடை விதித்தது. இதனால் பணிகள் நிறுத்தப்பட்டது.

ஆனால், ஆரோவில் நிர்வாகம் விரிவாக்க பணியை மேற்கொள்ள தொடர் நடவடிக்கைகளை மேற்கொண்டு வரும் நிலையில் இன்று தமிழக கவர்னர் ஆர்.என். ரவி தலைமையில் ஆரோவில் 58-வது ஆட்சிமன்ற குழு கூட்டம் இன்று நடைபெற்றது.

ஆரோவில் அறக்கட்டளை மையத்தில் நடைபெற்ற இந்த கூட்டத்தில் புதுவை கவர்னர் தமிழிசை சவுந்தரராஜன், ஆட்சி மன்றக் குழு செயலர் ஜெயந்தி ரவி மற்றும் உறுப்பினர்கள் கலந்து கொண்டனர்.

இந்த ஆலோசனை கூட்டத்தில், அன்னையின் கனவு திட்டமான ஆரோவில் விரிவாக்க பணிகள் தொடங்கியபோது ஏற்பட்ட எதிர்ப்புகள். ஆரோவில் நிர்வாகத்திற்கு எதிராக பசுமை தீர்ப்பாயம் கொண்டுவந்த தடை ஆணை. தற்போது உயர்நீதிமன்றம் ஆரோவில் நிர்வாகத்திற்கு அளித்துள்ள தீர்ப்பு குறித்து விவாதிக்கப்பட்டது.

ஆரோவில் நிர்வாக குழு கூட்டத்தில் பங்கேற்க இரு மாநில கவர்னர்கள் வருகை தந்ததையொட்டி கோட்டக்குப்பம் துணை போலீஸ் சூப்பிரண்டு அருண் தலைமையில் ஏராளமான போலீசார் பாதுகாப்பு பணியில் ஈடுபட்டனர்.