வேலூர்

வேலூர்:

வேலூர் மாவட்டத்தில் வெளிமாநிலங்களில் இருந்து வருபவர்கள் தீவிரமாக கண்காணிக்கப்பட்டு வருகின்றனர்.

காட்பாடி அடுத்த கிறிஸ்டியான்பேட்டையில் உள்ள சோதனைச்சாவடியில் கண்காணிப்பு உயர் கோபுரம் அமைக்கப்பட்டுள்ளது. இதேபோல் மாநில எல்லைகளில் உள்ள அனைத்து சோதனை சாவடிகளிலும் கண்காணிப்பு கோபுரங்கள் அமைக்கப்படுகிறது.

இந்த கண்காணிப்பு உயர் கோபுரத்தின் மீது 3 ஷிப்டுகளில் போலீசார் பணியில் ஈடுபட்டு கண்காணிக்கின்றனர்.

வெளிமாநிலங்களில் இருந்து வரும் வாகனங்கள் தடுத்து நிறுத்தப்படுகிறது.

உரிய அனுமதி பெற்று வருபவர்கள் மட்டும் அனுமதிக்கப்படுகின்றனர்.

துப்பாக்கி ஏந்திய போலீசார் பணியில் ஈடுபடுத்தப்பட்டுள்ளனர்.

வேலூர்:

கொரோனா பரவலை தடுக்க ஊரடங்கு உத்தரவு அமலில் உள்ளது. இதில் வெளிமாவட்டங்களில் இருந்து வேலூர் சிஎம்சி மருத்துவ மனையில் சிகிச்சைக்காக வந்த வடமாநிலத்தவர்கள் உணவு, தங்குவதற்கு பணமில்லை என்று கூறி கலெக்டரிடம் புகார் அளித்தனர்.

இதையடுத்து அவர்களுக்கு லாட்ஜ் கட்டணத்தில் சலுகை, 3 வேளை உணவும் வழங்கப்பட்டது. இதற்கிடையே சிகிச்சை முடிந்த அவர்கள் சொந்த ஊர்களுக்கு செல்ல அனுமதிக்க கோரிக்கை வைத்தனர்.

இதையடுத்து கடந்த வாரம் மாவட்ட நிர்வாகம் சார்பில் தனியார் வாடகை கார் மூலம் ஜார்கண்ட், பீகார், ஒடிசா உள்ளிட்ட மாநிலங்களுக்கு அனுப்பி வைக்கப்பட்டனர். ஊரடங்கு காரணமாக வடமாநிலங்கள் சென்ற வாகனங்கள் மீண்டும் வேலூர் வருவதில் சிக்கல் ஏற்பட்டது.

இதையடுத்து அந்த மாநில அரசின் உதவியோடு 2 நாட்களுக்கு முன்பு டிரைவர்களின் ஒரு குழுவினர் வேலூர் திரும்பினர். வேலூர் வந்த 182 டிரைவர்களை அலமேலுமங்காபுரம் தனியார் மண்டபத்தில் தங்க வைத்து பரிசோதனை மேற்கொள்ளப்பட்டது. அதில் 132 பேருக்கு அறிகுறி இல்லை என்று பரிசோதனை முடிவில் தெரிய வந்தது.

இதையடுத்து 132 பேர் நேற்று முன்தினம் வீடுகளுக்கு அனுப்பி வைக்கப்பட்டனர். மீதமுள்ள 50 டிரைவர்களுக்கு பரிசோதனை செய்யப் பட்டது. அவர்களுக்கு நேற்று பாதிப்பில்லை என்று முடிவு வெளியானது.

இதற்கிடையே வெளிமாநிலங்களுக்கு சென்று திரும்பிய டிரைவர்களின் வீடுகளில் தனிமைப்படுத்தப்பட்டவர்கள் என்று ஸ்டிக்கர் ஒட்டப்பட்டுள்ளது. இதனால் அதிர்ச்சி அடைந்த டிரைவர்கள் அவர்கள் தங்கியிருந்த மண்டபத்திற்கு சென்று அங்கிருந்த போலீசாரிடம் முறையிட்டனர். தொடர்ந்து எங்களுக்கு முடிவு தெரியும் வரையில் இங்கிருந்து செல்ல மாட்டோம் என்று கூறியுள்ளனர்.

இதுகுறித்து தகவல் அறிந்த அதிகாரிகள் சம்பவ இடத்துக்கு சென்றனர். அங்கிருந்த டிரைவர்கள் அதிகாரிகளை முற்றுகையிட்டு கொரோனா பாதிப்பில்லாத எங்கள் வீடுகளில் ஏன் கொரோனா ஸ்டிக்கர் ஓட்டுநீர்கள் என்று வாக்குவாதத்தில் ஈடுபட்டனர்.

இதையடுத்து அதிகாரிகள் வாக்குவாதத்தில் ஈடுபட்ட டிரைவர்களிடம் பராமரிப்பு இல்லாத இல்லாவிட்டாலும் நீங்கள் வெளிமாநிலங்களுக்கு சென்று வந்துள்ளதால் உங்களை 14 நாட்கள் தனிமைப்படுத்திக் கொள்ள வேண்டும் அந்த ஸ்டிக்கரில் பாதிக்கப்பட்டவர் என்று குறிப்பிடப்படவில்லை. வீடுகளில் தனிமைப்படுத்தப்பட்டவர்கள் என்று தான் உள்ளது.

இதை நீங்கள் தவறாக எடுத்துக் கொள்ளக் கூடாது என்று கூறியுள்ளார். இதை ஏற்ற டிரைவர்கள் அங்கிருந்து கலைந்து சென்றனர். இந்த சம்பவத்தால் அப்பகுதியில் பரபரப்பு ஏற்பட்டது.

ராணிப்பேட்டை:

ராணிப்பேட்டை மாவட்டத்தில் கொரோனா பாதிப்புக்குள்ளான 39 பேர் ஆஸ்பத்திரியில் சிகிச்சை பெற்று வந்தனர். அவர்களில் 33 பேர் குணமடைந்து வீடு திரும்பியுள்ளனர்.

வெளியில் செல்லும் அனைவரும் முக கவசம் அணிவது கட்டாயமாக்கப்பட்டுள்ளது. இதனால் முககவசத்திற்கு தட்டுப்பாடு ஏற்பட்டுள்ளது.

இந்நிலையில் ராணிப்பேட்டை கலெக்டர் அலுவலக வளாகத்தில் பொதுமக்கள் பயன்பாட்டிற்காக முகக்கவச தானியங்கி எந்திரத்தை கலெக்டர் திவ்யதர்ஷினி தொடங்கி வைத்தார்.

இந்த முகக்கவச தானியங்கி எந்திரத்தை ராணிப்பேட்டை பெல் சப்ளையர்ஸ் அசோசியேசன் தயாரித்து கொடுத்துள்ளனர்.

ராணிப்பேட்டை மாவட்டத்தில் முகக்கவசம் தட்டுப்பாடு போக்க கலெக்டர் திவ்யதர்ஷினி உத்தரவை ஏற்று தானியங்கி முகக்கவச சாதன எந்திரம் ராணிப்பேட்டையில் நிறுவப்பட்டுள்ளது.

இந்த தானியங்கி எந்திரத்தில் ரூ.5 சில்லரை நாணயத்தை போட்டால் முகக்கவசம் கிடைக்கும்படி வடிவமைக்கப்பட்டுள்ளது. இதை பயன்படுத்தி ஏழை எளிய பொதுமக்கள் அனைவரும் 5 ரூபாய் விலையில் தரமான முகக்கவசத்தை பெறலாம்.

வாணியம்பாடி:

வாணியம்பாடி தாலுகா போலீஸ் நிலையத்தில் பெண் போலீஸ் இன்ஸ்பெக்டருக்கு கொரோனா பாதிப்பு ஏற்பட்டது. இதனை தொடர்ந்து அந்த போலீஸ் நிலையம் மூடப்பட்டது. வளாகம் முழுவதும் கிருமி நாசினிகள் தெளிக்கப்பட்டன. போலீஸ் நிலையத்தில் வேலை பார்த்த போலீசார் மற்றும் பெண் இன்ஸ்பெக்டர் பணியின் போது சந்தித்த ஆம்பூர் வாணியம்பாடி போலீசார் என மொத்தம் 41 பேர் தனிமைப்படுத்தப்பட்டனர். அவர்களுக்கு கொரோனா பரிசோதனை செய்யப்பட்டது.

இதில் அவர்களுக்கு எந்த அறிகுறியும் இல்லை. இதனை தொடர்ந்து அவர்கள் வீடுகளில் தனிமைப்படுத்தப்பட்டுள்ளனர்.

வேலூர்:

வேலூரில் மூப்பனார் ஆட்டோ ஓட்டுனர் சங்க நிர்வாகிகள் மற்றும் த.மா.கா. நிர்வாகிகளுக்கு வேலூர் மாவட்ட தலைவர் பி.எஸ்.பழனி 15 வகையான மளிகைப் பொருட்கள் மற்றும் காய்கறி ஆகியவற்றை வழங்கினார்.

நிகழ்ச்சியில் இளைஞரணி மாவட்ட தலைவர் பாலகணேஷ், மாவட்ட செயலாளர் சேகர், இளைஞரணி துணை தலைவர் சீனிவாசன், சதீஷ்குமார், வெங்கடேசன், தொழிற்சங்க தலைவர் முனியப்பன், ராஜேஷ்கண்ணா, தினேஷ்மாறன் உள்பட பலர் கலந்து கொண்டனர்.

வேலூர்:

வேலூர் மாவட்டத்தில் ஏப்ரல் மாதம் தொடங்கியது முதலே 100 டிகிரிக்கு அதிகமாக வெயில் கொளுத்தியது. இதனால், ஊரடங்கால் வீடுகளில் அடைந்துள்ள மக்கள் பகல் நேரங்களில் கடும் அவதிக்குள்ளாகி வந்தனர். நேற்று 100 டிகிரி அளவுக்கு வெயில் அடித்தது.

இந்நிலையில், கோடை வெயிலுக்கு இதம் தரும் வகையில் வேலூரில் நேற்று மாலை காற்று வீசியது. பிறகு லேசான தூறலாக தொடங்கிய மழை ½ மணி நேரத்துக்கும் மேல் கனமழையாக பெய்தது. இதனால், சாலைகளில் வெள்ளம் பெருக்கெடுத்து ஓடியதுடன், வெப்பம் குறைந்து குளிர்ச்சி நிலவியது.

தோட்டப்பாளையம், சைதாப்பேட்டை, சத்துவாச்சாரி உள்ளிட்ட சில பகுதிகளில் ஆலங்கட்டி மழை பெய்தது.

மழைத்துளிகள் சிறுசிறு பனிக்கட்டிகளாக விழுந்ததால் வீடுகளின் கூரைகளில் கற்கள் விழுவது போன்ற ஓசை எழுந்தது. திடீரென பெய்த ஆலங்கட்டி மழையால் பொதுமக்களும், சிறுவர்களும் மகிழ்ச்சியடைந்தனர்.

கண்ணமங்கலம், சந்தவாசல், படவேடு மற்றும் அதைச் சற்றியுள்ள பல்வேறு கிராமங்களில் நேற்று மாலை சுமார் ½ மணி நேரம் இடி மின்னல் சூறைக்காற்றுடன் ஆலங்கட்டி மழை பெய்தது.

சூறைக்காற்று வீசியதால் ஆங்காங்கே சாலையில் மரங்கள் விழுந்தன. கண்ணமங்கலம் புதுப்பேட்டையில் உள்ள ஆரம்ப பள்ளியின் காம்பவுண்ட் சுவர் இடிந்து விழுந்தது. கண்ணமங்கலம்-ஆற்காடு சாலையில் கம்மவான்பேட்டை அருகே சாலையோர மரம் அடியோடு சாய்ந்தது.

வேலூர்:

வேலூர் மாவட்டத்தில் பிரசித்தி பெற்ற அம்மன் கோவில் திருவிழாக்களில் குடியாத்தம் கெங்கையம்மன் கோவில் சிரசு திருவிழாவும் ஒன்று. இந்த கோவில் திருவிழா ஆண்டுதோறும் காப்புக்கட்டுதலுடன் தொடங்கி வைகாசி மாதம் முதல் நாள் சிரசு விழா கொண்டாடப்படும். இதில் லட்சக்கணக்கான பக்தர்கள் கலந்து கொள்வார்கள்.

இந்த நிலையில் கொரோனா தொற்று பரவுவதை கட்டுப்படுத்த ஊரடங்கு அமல்படுத்தப்பட்டுள்ளது. எனவே வேலூர் மாவட்டத்தில் அனைத்து மத விழாக்களும் ரத்து செய்யப்படுகிறது. அதனால் அடுத்த மாதம் நடைபெற இருந்த குடியாத்தம் கெங்கையம்மன் சிரசு திருவிழாவுக்கு அனுமதி இல்லை என வேலூர் கலெக்டர் சண்முகசுந்தரம் தெரிவித்துள்ளார்.