சிவகங்கை

மானாமதுரை:

சிவகங்கை மாவட்டம் மானாமதுரை அருகே ராஜகம்பீரம் கிராமத்தில் வசித்து வருபவர் கமர் ரகுமான். இவர் சொந்தமாக 4 சக்கர வாகனம் வைத்துள்ளார். இவர் வீட்டில் ஒருவாரமாக தனது வாகனத்தை நிறுத்தி வைத்துள்ளார்.

இந்நிலையில் அவருக்கு மதுரை - ராமேசுவரம் நெடுஞ்சாலையில் அமைந்துள்ள திருப்பாச்சேத்தி சுங்கச்சாவடியில் இருந்து பணம் எடுக்கப்பட்டு உள்ளதாக குறுஞ்செய்தி தகவலாக வந்துள்ளது. இதை பார்த்து அதிர்ச்சி அடைந்த காரின் உரிமையாளர் இதுகுறித்து உடனடியாக ஆதாரத்துடன் சுங்கச்சாவடி சென்று முறையிட்டு உள்ளார். அதற்கு சுங்கச்சாவடி மேலாளர், இதற்கும் எங்களுக்கும் எந்த ஒரு சம்பந்தமும் இல்லை. நாங்கள் பொறுப்பு இல்லை. அந்த பணம் எடுத்த நேரத்தில் உங்கள் வண்டி செல்லவில்லை என்று தெரிவித்தனர். இதையடுத்து அவர்கள் இடையே வாக்குவாதம் ஏற்பட்டது.

இதுகுறித்து வாகனத்தின் உரிமையாளர் கூறுகையில், இதேபோல வங்கிக் கணக்கில் இருந்து அடிக்கடி பணம் எடுக்கப்படுகிறது. பணத்தையும் பறிகொடுத்துவிட்டு அதைப்பற்றி கேட்டாலும் அதற்கு தகுந்த பதில் வரவில்லை. எனவே இந்த சுங்கச்சாவடியை கண்காணித்து தகுந்த நடவடிக்கை எடுக்க வேண்டும் என்று கூறினார்.

மேலும் மானாமதுரை வாடகை கார் ஓட்டுனர்களும் இதே குற்றச்சாட்டை கூறுகின்றனர். ஒரே நேரத்தில் 3 முறை வசூல் செய்வதாகவும் புகார் கூறுகின்றனர்.

சிங்கம்புணரி:

சிங்கம்புணரி ஒன்றியத்துக்கு உட்பட்டது ஏரியூர் ஊராட்சி. இந்த ஊராட்சியில் மலை கோவில் அருகில் சுமார் 2 ஆயிரம் ஏக்கர் பரப்பளவில் ஏரிக்கண்மாய் உள்ளது. விவசாயத்திற்கு பெரிதும் உதவியாக இருக்கும் இந்த கண்மாய் பல ஆண்டுகளாக மழை இன்றியும் உப்பாறு நீர்வரத்து இன்றி வறண்ட நிலையில் கிடந்தது 16 ஆண்டுகளாக வறண்ட ஏரிக்கண்மாய் சமீபத்தில் பெய்த மழையால் நீர்நிரம்பி மறுகால் செல்கிறது. இந்த கண்மாய்க்கு உப்பாறில் இருந்து நீர்வரத்து வருகிறது.

திண்டுக்கல் மாவட்டம் நத்தம் அருகே மழைநீரால் உருவாகும் உப்பாறு மதுரை மாவட்டம் மலம்பட்டி வழியாக சிவகங்கை மாவட்டம் எருமைப்பட்டி மற்றும் உப்பிலாம்பட்டி வழியாக ஏரியூர் ஏரிக்கண்மாய் வந்து அடைகிறது. தற்போது கண்மாய் நிரம்பி தடுப்பணையை தாண்டி மறுகால் பாய்கிறது. இந்த தண்ணீர் அரளிக்கோட்டை பெரிய கண்மாய் சென்று அடைகிறது. அந்த பெரிய கண்மாயை நிரம்பி சிறு, சிறு கண்மாய்கள் நிரம்பி கல்லல் வழியாக மணிமுத்தாறு சென்று அடைகிறது. அங்கிருந்து தொண்டி சென்று கடலில் கலக்கின்றது.

16 ஆண்டுகளுக்கு பிறகு ஏரிக்கண்மாய் நிரம்பி உள்ளதால் அப்பகுதி விவசாயிகள், பொதுமக்கள் மகிழ்ச்சி அடைந்து உள்ளனர். தற்போது அது ஒரு சுற்றுலா தலமாக மாறி உள்ளது. சுற்றுவட்டார கிராம மக்கள் கண்மாய்க்கு சுற்றுலா வர தொடங்கி உள்ளனர். மறுகால் பாயும் தண்ணீரில் அவர்கள் உற்சாகமாக குளித்து மகிழ்ந்தனர்.

தற்போது கண்மாய் பகுதியில் சுற்றுலா பயணிகள் கூட்டம் அதிகமாக காணப்படுகிறது. எனவே கிராம மக்கள் பாதுகாப்பாக குளிப்பதற்கு பொதுப்பணித்துறை அதிகாரிகள் நடவடிக்கை எடுக்க வேண்டும் என சமூக ஆர்வலர்கள் கோரிக்கை விடுத்து உள்ளனர்.

சிவகங்கை:

சிவகங்கை அருகே மதகுபட்டி கீழத்தெரு, மேற்குத்தெரு, சலுகைபுரம் பகுதிகளில் அதிகளவில் ஒரு சமூகத்தினர் வசிக்கின்றனர். இவர்கள் காவல் தெய்வங்களாக பிடாரி அம்மன், பொன்னழகி அம்மனை வழிபட்டு வருகின்றனர். மாட்டு பொங்கல் அன்று அம்மனுக்கு பெண்கள் வளையல், மெட்டி, கொலுசு தவிர்த்து வெள்ளை சேலை அணிந்து பொங்கல் வைத்தனர்.

அம்மனுக்கு நேர்த்திக்கடனாக தொட்டில் கரும்பு கட்டினர். விழா முடிந்ததும் மாலையில் கீழத்தெருவில் நேர்த்திக்கடன் கரும்புகள், விரதமிருந்து அம்மன் காலடியில் வைத்த எலுமிச்சை ஆகியவை ஏலம் விடப்பட்டது.

இந்த ஏலத்தில் உள்ளூர் மக்கள் மட்டுமின்றி பல்வேறு பகுதிகளில் இருந்தும் ஏராளமானோர் பங்கேற்றனர்.கரும்பு, எலுமிச்சையை ஏலம் எடுத்தால் நினைத்த காரியம் கைகூடும் என்பது அப்பகுதி மக்களின் நம்பிக்கை. இதனால் அவற்றை போட்டி போட்டு கொண்டு ஏலம் எடுத்தனர். இதில் ஒரு கரும்பு அதிகபட்சமாக ரூ.35,001-க்கும், ஒரு எலுமிச்சை ரூ.15,100-க்கும் ஏலம்போனது.

இதுகுறித்து அப்பகுதி மக்கள் கூறியதாவது:-

எங்கள் தெய்வங்களுக்கு முன்பு ஏழை, பணக்காரர் என வித்தியாசமின்றி அனைவரும் சமம் என்பதற்காக அணிகலன்கள் அணியாமல் ஒரே மாதிரியாக உடையணிந்து பொங்கல் வைப்போம். இதற்காக ஒரு மாதத்திற்கு முன்பே விரதம் இருக்க தொடங்கி விடுவோம். ஏலம் எடுப்போருக்கு நினைத்த காரியம் நடப்பதால் ஆண்டுதோறும் ஏலத்தொகை அதிகரித்து கொண்டே செல்கிறது என்றனர்.

சிவகங்கை:

சிவகங்கை இந்திராநகரை சேர்ந்தவர் முத்து (வயது 38). பெயிண்டர். இவரது மனைவி சுதா(34) இவர்களுக்கு 2 மகனும், ஒரு மகளும் உள்ளனர். குடும்ப பிரச்சனையால் கணவன்-மனைவி இருவரும் கடந்த 3 வருடமாக பிரிந்து வாழ்கின்றனர். தற்போது சுதா அண்ணாமலை நகரில் உள்ள அவரது தாய் வீட்டில் வசிக்கிறார்.

சம்பவத்தன்று சுதாவின் உறவினர் ஒருவர் இறந்து போனதால் அவரது துக்க நிகழ்ச்சியில் கலந்து கொள்ள சுதா இந்திராநகரில் உள்ள உறவினர் வீட்டிற்கு வந்திருந்தார். அப்போது அங்கு வந்த முத்து தனிக்குடித்தனம் போகலாம் என்று சுதாவை அழைத்தாராம். ஆனால் சுதா மறுத்து விட்டாராம். இதில் ஆத்திரம் அடைந்து முத்து மற்றும் அங்கிருந்த மற்றொரு உறவினரான முத்துக்குமார் (40) ஆகியோர் சுதாவை அரிவாளால் வெட்டினர். இதில் பலத்தகாயம் அடைந்த சுதாவை சிகிச்சைக்காக சிவகங்கை அரசு மருத்துவமனையில் சேர்த்தனர். அங்கு முதலுதவி சிகிச்சைக்கு பின்னர் அவரை மதுரை அரசு மருத்துவமனையில் சேர்த்தனர்.

இது தொடர்பாக சிவகங்கை நகர் இன்ஸ்பெக்டர் மீனுப்பிரியா, சப்-இன்ஸ்பெக்டர் முருகானந்தம் ஆகியோர் விசாரணை நடத்தினர். இந்த வழக்கில் முத்துவை கைது செய்தனர். முத்துக்குமாரை தேடி வருகின்றனர்.

காரைக்குடி:

காரைக்குடி முத்துப்பட்டினம் பகுதியை சேர்ந்தவர் ஆறுமுகபிரபு. இவர் சித்தா டாக்டர் ஆவார். அப்பகுதியில் கிளினிக் நடத்தி வருகிறார். இவரது மகள் ஹரிதா (வயது 18). அப்பகுதியில் உள்ள ஒரு பள்ளியில் பிளஸ்-2 படித்து வந்தார். அதற்காக ஆன்லைன் மூலம் பாடங்களை கற்று வந்தார். தற்போது ஆன்லைன் வகுப்புகள் முடிவடைந்து விட்டதால் அவரிடம் இருந்த செல்போனை அவரது தந்தை வாங்கிக் கொண்டதாக தெரிகிறது. இதனால் விரக்தி அடைந்த ஹரிதா சம்பவத்தன்று மாடி அறைக்கு சென்று சேலையால் தூக்குப்போட்டு தற்கொலை செய்து கொண்டார்.

இது குறித்து தகவல் அறிந்ததும் காரைக்குடி வடக்கு போலீசார் சம்பவ இடத்துக்கு விரைந்து சென்றனர். மாணவியின் உடலை கைப்பற்றி பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர்.

இது குறித்து வழக்கு பதிவு செய்து விசாரணை நடத்தி வருகின்றனர்.

காரைக்குடி:

காரைக்குடி சத்யா நகரை சேர்ந்தவர் காசிவிஸ்வநாதன் (64). இவர் பழ வியாபாரம் செய்து வருகிறார். சம்பவத்தன்று காசிவிஸ்வநாதன் மொபட்டில் சென்று கொண்டு இருந்தார்.

அப்போது அண்ணாநகரைச்சேர்ந்த தினேஷ் (20) என்பவர் ஓட்டி வந்த மோட்டார் சைக்கிள் மோதியது. இதில் படுகாயம் அடைந்த காசிவிஸ்வநாதன் சம்பவ இடத்திலேயே பரிதாபமாக உயிரிழந்தார்.

இதுகுறித்து காரைக்குடி வடக்கு போலீசார் வழக்குப்பதிவு செய்து விசாரணை நடத்தி வருகின்றனர்.