நாகப்பட்டினம்

பொறையாறு:

நாகை மாவட்டம் தரங்கம்பாடி அருகே உள்ள மாணிக்கப்பங்கு ஊராட்சி புதுப்பேட்டை மீனவ கிராமத்தை சேர்ந்த சிலம்பரசன் (வயது31), செல்லச்செட்டி(42) ஆகியோர் கடந்த 2 மாதங்களுக்கு முன்பு பக்கத்து கிராமமான தாழம்பேட்டையில் பயன்படுத்தப்பட்ட பைபர் படகை ரூ.1 லட்சத்து 75 ஆயிரத்துக்கு வாங்கி வந்து மீன்பிடி தொழில் செய்து வந்தனர்.

கடந்த சில நாட்களாக மீன்பிடி தொழிலுக்கு செல்லாததால் புதுப்பேட்டை கடற்கரையோரம் அந்த பைபர் படகை நிறுத்தி வைத்திருந்தனர். நேற்று காலை மீனவர்கள் இருவரும் கடலுக்கு வந்து பார்த்தபோது பைபர் படகு மற்றும் அதில் இருந்த வலைகள், என்ஜின் உள்ளிட்டவை தீயில் எரிந்த நிலையில் காட்சி அளித்தன.

இதனால் அதிர்ச்சி அடைந்த அவர்கள் உடனடியாக பொறையாறு போலீசாருக்கு தகவல் தெரிவித்தனர். தகவலின்பேரில் சீர்காழி துணை போலீஸ் சூப்பிரண்டு யுவபிரியா, பொறையாறு போலீஸ் இன்ஸ்பெக்டர் செல்வம் மற்றும் போலீசார் அங்கு சென்று விசாரணை மேற்கொண்டனர். மேலும் இதுதொடர்பாக போலீசார் வழக்குப்பதிவு செய்து பைபர் படகிற்கு மர்ம நபர்கள் தீ வைத்தார்களா? என்பது பற்றி விசாரணை நடத்தி வருகிறார்கள்.

எரிந்த பைபர் படகு, வலை மற்றும் என்ஜின் உள்ளிட்டவற்றின் மதிப்பு ரூ.3 லட்சம் இருக்கும் என கூறப்படுகிறது. பைபர் படகு மீனவர்களுக்கும், சுருக்குமடி வலையை பயன்படுத்தும் விசைப்படகு மீனவர்களுக்கும் இடையே கடந்த சில மாதங்களாக பிரச்சினை நிலவி வரும் நிலையில் புதுப்பேட்டை மீனவ கிராமத்தில் பைபர் படகு தீயில் எரிந்து கிடந்தது அந்த பகுதியில் பரபரப்பை ஏற்படுத்தி உள்ளது.

நாகை:

நாகையில் நடைபெற்ற அரசு நிகழ்ச்சியில் கலந்துகொண்ட எம்பிக்கள், எம்எல்ஏ ஆகியோருக்கு நோய் தொற்று ஏற்பட்டதை அடுத்து இக்கூட்டத்தில் கலந்துகொண்ட மாவட்ட ஆட்சியர் அலுவலகத்தில் பணிபுரிந்து வந்த அரசு ஊழியர்களுக்கு கொரோனா பரிசோதனை மேற்கொள்ளப்பட்டது.

இதில் மாவட்ட ஆட்சியரின் நேர்முக உதவியாளர் மற்றும் அரசு ஊழியர்கள் பலருக்கு கொரோனா தொற்று கண்டறியப்பட்டுள்ளது. 

இதனால் ஆட்சியர் அலுவலகம் இன்றும் நாளையும் செயல்படாது என அறிவிக்கப்பட்டுள்ளது.

பொறையாறு:

ஆகஸ்டு மாதம் அனைத்து ஞாயிற்றுக்கிழமைகளிலும் தளர்வுகள் இல்லாத முழு ஊரடங்கை தமிழக அரசு அறிவித்துள்ளது. அதன்படி நேற்று ஞாயிற்றுக்கிழமையையொட்டி தரங்கம்பாடி தாலுகா பகுதிகளில் 2 ஆயிரத்திற்கும் மேற்பட்ட கடைகள் அடைக்கப்பட்டன. இதனால் மக்கள் நடமாட்டமின்றி சாலைகள் வெறிச்சோடி காணப்பட்டன. இந்தநிலையில் நாகை மாவட்டம் எல்லை முடிவு, காரைக்கால் மாவட்டம் எல்லை ஆரம்பம் ஆகிய இருமாவட்ட எல்லையில் தமிழ்நாடு மற்றும் புதுச்சேரி மாநில போலீசார் தீவிர கண்காணிப்பில் ஈடுபட்டு வருகின்றனர். நாகை மாவட்ட எல்லையான பொறையாறு அருகே நண்டலாறு சோதனை சாவடியில் பொறையாறு போலீசார் தீவிர கண்காணிப்பில் ஈடுபட்டனர்.

அப்போது இ-பாஸ் அனுமதி இல்லாமல் வரும் கனரக வாகனங்கள், கார், வேன் மற்றும் மோட்டார் சைக்கிள் உள்ளிட்ட வாகனங்களில் வருபவர்கள், பாதசாரிகள் ஆகியோரை போலீசார் தடுத்து நிறுத்தி சோதனை செய்தனர். அப்போது இ-பாஸ் இல்லாமல் வரும் பயணிகளை போலீசார் திருப்பி அனுப்பினர். இதேபோல் காரைக்கால் மாவட்டத்தில் இருந்து புதுச்சேரிக்கு சாராயம் வாங்க செல்லும் மதுப்பிரியர்களையும் போலீசார் திருப்பி அனுப்பினர். இதனால் அங்கு பரபரப்பு ஏற்பட்டது.