நாகப்பட்டினம்

வெளிப்பாளையம்:

நாகையில் ஆண்கள் மற்றும் பெண்களுக்கான மாவட்ட அளவிலான கபடி போட்டி நடைபெற்றது.நிகழ்ச்சிக்கு அமெச்சூர் கபடி கழகம் மாவட்ட தலைவர் ஆனந்த வடிவேல் தலைமை தாங்கினார். மாவட்ட விளையாட்டு அலுவலர் ராஜா, இ.ஜி.எஸ்.பிள்ளை கல்லூரி செயலாளர் பரமேஸ்வரன், பொருளாளர் சந்திரன், தி.மு.க. மாவட்ட துணை செயலாளர் மனோகரன் ஆகியோர் போட்டியை தொடங்கி வைத்தனர்.

போட்டியில் ஆண்களுக்கான சீனியர், ஜூனியர் 85 கிலோ மற்றும் 70 கிலோ எடை பிரிவில் 50 அணிகள் கலந்து கொண்டன. பெண்களுக்கான சீனியர், ஜூனியர் 75 கிலோ மற்றும் 60 கிலோ எடை பிரிவில் 10 அணிகள் கலந்து கொண்டன.

பெண்களுக்கான ஜூனியர் பிரிவில் நடந்த இறுதி போட்டியில் நாகை கீச்சாங்குப்பம் அணியும், திருப்பூண்டி அணியும் மோதின. இதில் கீச்சாங்குப்பம் அணி அதிக புள்ளிகளை பெற்று வெற்றி பெற்றது. இதேபோல ஆண்கள் ஜூனியர் பிரிவில் ஆற்காட்டுதுறை அணியும், சோழவித்யாபுரம் அணியும் மோதின. இதில் ஆறுகாட்டுத்துறை அணி வெற்றி பெற்றது.

போட்டிகளில் வெற்றி பெற்ற அணிகளுக்கு கோப்பை மற்றும் சான்றிதழுடன், ரொக்க பரிசுகளும் வழங்கப்பட்டன. இந்த போட்டியில் வெற்றி பெற்ற அணிகள் மாநில அளவிலான போட்டியில் விளையாட தகுதி பெற்றன.

சிக்கல்:

கீழ்வேளூர் கடைத்தெருவில் கடந்த சில நாட்களுக்கு முன்பு 60 வயது மதிக்கத்தக்க அடையாளம் தெரியாத முதியவர் ஒருவர் மயங்கி கிடந்தார். இதுகுறித்து தகவல் அறிந்த கீழ்வேளூர் போலீசார் சம்பவ இடத்துக்கு வந்து மயங்கி கிடந்த முதியவரை மீட்டு சிகிச்சைக்காக 108 ஆம்புலன்ஸ் மூலம் திருவாரூர் அரசு மருத்துவக்கல்லூரி ஆஸ்பத்திரிக்கு அனுப்பி வைத்தனர். அங்கு சிகிச்சை பலனின்றி அந்த முதியவர் உயிரிழந்தார்.இதுகுறித்து கீழ்வேளூர் கிராம நிர்வாக அலுவலர் அருண் கொடுத்த புகாரின் பேரில் போலீசார் வழக்குப்பதிவு செய்து உயிரிழந்த முதியவர் யார்? எந்த ஊரை சேர்ந்தவர்? என விசாரணை நடத்தி வருகின்றனர்.

வேளாங்கண்ணி:

கர்நாடக மாநிலம் பெங்களூரு ஹரமாவு ராமமூர்த்தி நகர் பகுதியை சேர்ந்த தயாளன் மகன் கெல்வின்(வயது 12). இவன் அங்கு உள்ள பள்ளியில் 6-ம் வகுப்பு படித்து வந்தான். இவன் தனது தாய் ஞானமணி மற்றும் உறவினர்களுடன் நேற்று முன்தினம் நாகை மாவட்டம் வேளாங்கண்ணிக்கு சுற்றுலா வந்தான்.

பின்னர் வேளாங்கண்ணி வெள்ளையாற்றின் முகத்துவாரத்தில் கெல்வின் குளித்தபோது ஆற்றில் தண்ணீரின் வேகத்தில் கடலுக்குள் இழுத்து செல்லப்பட்டு மூழ்கினான். இதை பார்த்த உறவினர்கள் சத்தம் போட்டனர். உடனே அருகில் இருந்த போலீசார் மற்றும் பொதுமக்கள் கடலில் இறங்கி தேடினர். ஆனாலும் அவன் கிடைக்கவில்லை.

இந்த நிலையில் பிரதாபராமபுரம் கடற்கரையில் கெல்வின் உடல் கரை ஒதுங்கியது. இதுகுறித்து தகவல் அறிந்த கீழையூர் கடலோர காவல் படை போலீசார் சம்பவ இடத்துக்கு வந்து கெல்வின் உடலை மீட்டு பிரேத பரிசோதனைக்காக நாகை அரசு மருத்துவக்கல்லூரி ஆஸ்பத்திரிக்கு அனுப்பி வைத்தனர்.

மேலும் இதுதொடர்பான புகாரின் பேரில் போலீசார் வழக்குப்பதிவு செய்து விசாரணை செய்து வருகின்றனர்.

வேளாங்கண்ணி:

வேளாங்கண்ணி அருகே பிரதாபராமபுரம் தெற்குதெரு பகுதியை சேர்ந்தவர் பக்கிரிசாமி. இவருடைய மகன் ரமேஷ் (வயது 30). இவர் திருப்பூண்டி கிழக்கு கடற்கரை சாலை அருகே பிராய்லர் கோழி கடை நடத்தி வருகிறார். இங்கிருந்து சிக்கல், நாகை, நாகூர் உள்ளிட்ட பகுதிகளில் உள்ள சில்லறை கடைகளுக்கு சரக்கு வேன் மூலம் கோழிகளை விற்பனை செய்வது வழக்கம். இவரிடம் திருப்பூண்டி அருகே உள்ள சிந்தாமணி மெயின்ரோடு பகுதியை சேர்ந்த ராஜேந்திரன் மகன் மணிகண்டன் (33) என்பவர் சரக்கு வேன் டிரைவராக பணிபுரிந்து வருகிறார். மேலும், முருகானந்தம், சிவானந்தம், கார்த்திகேயன் ஆகியோர் கோழிகளை வேனில் ஏற்றி இறக்கும் பணியில் ஈடுபட்டு வருகின்றனர். இந்த நிலையில் கடந்த 12-ந்தேதி வழக்கம் போல் கோழிகளை கடைகளில் இறக்கி விட்டுவிட்டு, அதற்கான தொகை ரூ. 1 லட்சத்து 2 ஆயிரத்து 420-ஐ வசூல் செய்து கொண்டு சரக்குவேனில் வந்துள்ளனர். இவர்கள் பரவை கடைத்தெரு அருகே வேனை நிறுத்தி விட்டு டீ குடிக்க சென்றுள்ளனர். பின்னர் திரும்பி வந்து பார்த்தபோது வேனில் வைக்கப்பட்டிருந்த ரூ.1 லட்சத்தை காணவில்லை. இதுகுறித்து ரமேஷ் கொடுத்த புகாரின் பேரில் வேளாங்கண்ணி போலீசார் வழக்குப்பதிவு செய்து சம்பவம் நடந்த இடத்தில் இருந்த கண்காணிப்பு கேமராவில் பதிவான காட்சிகளை ஆய்வு செய்தனர். இதில் டிரைவர் மணிகண்டன், பணத்தை எடுத்துச் சென்று அருகில் மண்ணில் புதைத்து வைக்கும் காட்சி பதிவாகி இருந்தது. இதை தொடர்ந்து மணிகண்டனை போலீசார் கைது செய்தனர். மேலும் அவர் திருடிய ரூ.1 லட்சத்தை பறிமுதல் செய்தனர்.

வேளாங்கண்ணி:

நாகை மாவட்டம் புத்தூர் தெற்குதெரு பகுதியை சேர்ந்தவர் பேபி (வயது 64). இவர் தனது மகன் அறிவொளி மற்றும் மருமகள், பேரக்குழந்தைகளுடன் கடந்த 12-ந்தேதி வேளாங்கண்ணி பேராலயத்துக்கு வந்தனர்.

பின்னர் இவர்கள் இரவு 7 மணியளவில் கடற்கரையில் நடந்து சென்று கொண்டிருந்தனர். கண்காணிப்பு கோபுரம் அருகே சென்று கொண்டிருந்தபோது மறைந்திருந்த மர்ம நபர்கள் திடீரென பேபியின் கழுத்தில் கிடந்த 13½ பவுன் சங்கிலியை பறித்து சென்றனர். இதனால் அதிர்ச்சி அடைந்த அவர், திருடன், திருடன் என சத்தமிட்டுள்ளார். இந்த சத்தத்தை கேட்டு அக்கம் பக்கத்தினர் அங்கு ஓடி வந்தனர். அதற்குள் மர்ம நபர்கள் தப்பி ஓடி விட்டனர்.

இதுகுறித்து தகவல் அறிந்த வேளாங்கண்ணி போலீசார் சம்பவ இடத்திற்கு வந்து விசாரணை நடத்தினர். அப்போது கடற்கரை மணலில் பேபி அணிந்திருந்த சங்கிலியில் இருந்த தாலி, குண்டு, காசு உள்ளிட்ட 3½ பவுன் நகை கீழே கிடந்துள்ளது.

பேபியிடம் மர்ம நபர்கள் சங்கிலியை பறித்த போது இவைகள் சங்கிலியில் இருந்து கீழே விழுந்துள்ளது. மீதமிருந்த 10 பவுன் சங்கிலியுடன் மர்ம நபர்கள் தப்பி ஓடி உள்ளனர். இதுகுறித்து போலீசார் வழக்குப்பதிவு செய்து 10 பவுன் சங்கிலியை பறித்து சென்ற மர்ம நபர்களை வலைவீசி தேடி வருகின்றனர்.

சிக்கல்:

கீழ்வேளூர் அருகே தேவூர், காக்கழனி, ராதாமங்கலம் பகுதிகளில் கீழ்வேளூர் போலீசார் ரோந்து பணியில் ஈடுபட்டனர். அப்போது தேவூர்- இரட்டைமதகடி சாலை கடுவையாறு பகுதியில் சந்தேகப்படும் வகையில் நின்று கொண்டிருந்த ஒருவரை பிடித்து போலீசார் விசாரணை நடத்தினர். இதில் அவர், தேவூர் பிடாரி கோவில் தெருவை சேர்ந்த சங்கர் மகன் பிரபு (வயது 33) என்பதும். இவர் சாராயம் விற்றதும் தெரிய வந்ததது. இதுகுறித்து போலீசார் வழக்குப்பதிவு செய்து அவரை கைது செய்தனர். மேலும் அவரிடம் இருந்து 110 லிட்டர் சாராயத்தை பறிமுதல் செய்தனர். இதே போல காக்கழனி தோப்பு தெருவில் சாராயம் விற்ற அதே பகுதியை சேர்ந்த துரைசாமி மகன் தங்கபாண்டியன் ( 27), ராதாமங்கலம் எறும்புகன்னி மெயின்ரோட்டில் சாராயம் விற்ற அதே பகுதியை சேர்ந்த நாகப்பன் மகன் கண்ணதாசன் (52), கீழகாவலக்குடி காளவாய்கரை பகுதியில் சாராயம் விற்ற நாகை வெளிப்பாளையம், தென்கரை பகுதியை சேர்ந்த செல்வராஜ் மனைவி அமிர்தம் (54) ஆகிய 3 பேரையும் போலீசார் கைது செய்தனர். மேலும் அவர்களிடம் இருந்து தலா 110 லிட்டர் சாராயத்தை பறிமுதல் செய்தனர்.

இந்த நிலையில் நேற்று செட்டிபுலம் பகுதியில் ஆடு திருடி சென்ற காட்சி சமூக வலைதளங்களில் வைரல் ஆனது. தொடர்ந்து தனிப்படை போலீசார் வேதாரண்யம் செங்காதலை பாலம் அருகே நின்று கொண்டிருந்த 2 பேரை பிடித்து விசாரணை நடத்தினர்.

சிக்கல்:

கீழ்வேளூரில், கச்சனம் சாலை சந்திப்பில் மார்க்சிஸ்ட் கம்யூனிஸ்டு கட்சியின் விவசாய தொழிலாளர்கள் சங்கம் சார்பில் பெட்ரோல், டீசல் மற்றும் கியாஸ் விலை உயர்வை கண்டித்தும், விலை உயர்வை குறைக்கக்கோரியும் சாலையில் வாகனம் நிறுத்தும் போராட்டம் நடைபெற்றது.

போராட்டத்தில் அகில இந்திய விவசாய தொழிலாளர்கள் சங்க மாவட்ட குழு உறுப்பினர் ஜோதிபாஸ், அகில இந்திய விவசாய தொழிலாளர்கள் சங்க ஒன்றிய செயலாளர் கிருஷ்ணமூர்த்தி, துணை தலைவர் சுந்தரமூர்த்தி மற்றும் விவசாய தொழிலாளர்கள் சங்கத்தினர் உள்பட பலர் கலந்து கொண்டு பெட்ரோல், டீசல் மற்றும் கியாஸ் விலை உயர்வை கண்டித்தும், விலை உயர்வை குறைக்க வலியுறுத்தியும் கோஷங்கள் எழுப்பினர்.

இதேபோல பெட்ரோல், டீசல் மற்றும் கியாஸ் விலை உயர்வை கண்டித்து திருமருகல் பஸ்நிலையம் எதிரே சி.ஐ.டி.யூ. தொழிற் சங்கம் சார்பில் சாலை மறியல் போராட்டம் நடைபெற்றது. போராட்டத்திற்கு சி.ஐ.டி.யூ. தொழிற்சங்க மாவட்ட குழு உறுப்பினர் லெனின் தலைமை தாங்கினார். ஜனநாயக வாலிபர் சங்க ஒன்றிய செயலாளர் பாலு முன்னிலை வகித்தார்.

இதில் மார்க்சிஸ்ட் கம்யூனிஸ்டு கட்சியின் ஒன்றியக்குழு உறுப்பினர்கள் மார்க்ஸ், பிரபாகரன், கஸ்தூரி, வாலிபர் சங்க கிளை செயலாளர் ராஜ்குமார் மற்றும் நிர்வாகிகள் பலர் கலந்து கொண்டு பெட்ரோல், டீசல் மற்றும் கியாஸ் விலை உயர்வை கண்டித்து கோஷங்கள் எழுப்பினர்.

நாகப்பட்டினம்:

நாகை வெளிப்பாளையத்துக்கு உட்பட்ட பகுதிகளில் போலீஸ் இன்ஸ்பெக்டர் தியாகராஜன் தலைமையில் போலீசார் ரோந்து பணியில் ஈடுபட்டு கொண்டிருந்தனர். அப்போது சந்தேகத்துக்கு இடமாக நின்று கொண்டிருந்த ஒருவரை பிடித்து விசாரணை நடத்தினர். அதில் அவர் செல்லூர் சுனாமி குடியிருப்பை சேர்ந்த ரீகன் (வயது36) என்பதும், தடைசெய்யப்பட்ட லாட்டரி சீட்டுக்களை விற்பனை செய்து வந்ததும் தெரியவந்தது. இதுகுறித்து போலீசார் வழக்குப்பதிவு செய்து ரீகனை கைது செய்தனர்.

இதேபோல, ரெயிலடி தெருவில் லாட்டரி சீட்டு விற்று கொண்டிருந்த அதே பகுதியை சேர்ந்த பரமன் (50) என்பவரை போலீசார் கைது செய்தனர்.