கிருஷ்ணகிரி

மத்தூர்:

கிருஷ்ணகிரி மாவட்டம் மத்தூர் அருகே உள்ள சுண்ணாம்பட்டி, கொட்டாவூர் பகுதியை சேர்ந்தவர் முருகேசன் (வயது 52) , லாரி டிரைவரான இவரும் மனைவி அம்சா ஆகிய இருவரும் நேற்று மாலை வீட்டை பூட்டி விட்டு வெளியில் சென்றுள்ளனர்.

மீண்டும் வந்து பார்த்த போது வீட்டின் பூட்டு உடைக்கப்பட்டு பீரோவில் இருந்த 6 பவுன் தங்க நகை மற்றும் ரூ.5 ஆயிரம் பணம் ஆகியவற்றை  மர்ம நபர்கள் திருடி சென்றுள்ளனர்.

இது குறித்து மத்தூர் காவல் நிலையத்திற்கு வீட்டின் உரிமையாளர் முருகேசன் புகார் அளித்தார். அதன் பேரில் மத்தூர் போலீஸ் இன்ஸ்பெக்டர் முருகன் மற்றும் போலீசார் விசாரணை  நடத்தி வருகின்றனர்.

மத்தூர்:

கிருஷ்ணகிரி மாவட்டம் மத்தூர் அருகே உள்ள சிவம்பட்டி பகுதியை சேர்ந்தவர் சுகேந்திரன். இவரது மகன் குரு (வயது 31). அரசு பஸ் கண்டக்டராக பணிபுரிந்து வருகிறார். இந்நிலையில் இவருக்கும், பிருந்தா என்ற இளம்பெண்ணுக்கும் இடையே கடந்த 11 மாதங்களுக்கு முன்பு திருமணம் நடைபெற்றது.

இந்த நிலையில் குருவுக்கு மது குடிக்கும் பழக்கம் இருந்து வந்தது. இதனால் கணவன்- மனைவி இடையே அடிக்கடி தகராறு ஏற்பட்டு வந்தது.

இதனால் வாழ்க்கையில் வெறுப்படைந்த நிலையில் குரு இருந்து வந்தார். இந்த நிலையில் நேற்று இரவு வீட்டில் யாரும் இல்லாத நேரத்தில் அளவுக்கு அதிகமாக தூக்கமாத்திரை தின்று தற்கொலை செய்து கொண்டார்.

இது குறித்து உறவினர்கள் மத்தூர் போலீஸ் நிலையத்திற்கு தகவல் கொடுத்தனர். அதன்பேரில் போலீஸ் இன்ஸ்பெக்டர் முருகன் மற்றும் போலீசார் விரைந்து சென்று கண்டக்டர் குருவின் உடலை கைப்பற்றி மத்தூர் அரசு மருத்துவமனைக்கு பிரேத பரிசோதனைக்கு அனுப்பி வைத்தனர்.

இதுகுறித்து மத்தூர் போலீசார் வழக்கு பதிவு செய்து குருவின் தற்கொலைக்கான காரணம் குறித்து விசாரித்து வருகின்றனர்.

மத்தூர்:

கிருஷ்ணகிரி மாவட்டம் ஊத்தங்கரை அருகே உள்ள ரெட்டிப்பட்டி பகுதியை சேர்ந்த ஆறுமுகம் மகன் அருள் (வயது 24) இவருக்கு வாட்ஸ்அப் மூலம் வந்த தகவல்படி பணத்தை உடனடியாக அதாவது ஒரு லட்சத்துக்கு, இரண்டு லட்சம் தருவதாக கூறி தகவல் வந்துள்ளது. இந்த தகவலின் படி வாலிபர் அருள் தொலைபேசி மூலம் தொடர்பு கொண்டு நேற்று ஊத்தங்கரை பேருந்து நிலையத்திற்கு வருமாறு அந்த நபர்களை வரவழித்தும் இது குறித்து ஊத்தங்கரை காவல் நிலையத்திற்கு தகவல் கொடுத்துள்ளார்.

தகவலின்படி போலீஸார் விரைந்து வந்து பேருந்து நிலையத்தில் மறைந்திருந்து வாலிபர் அருளிடம்  வாட்ஸ்அப் தகவல் மோசடி நபர்களிடம் பணம் கொடுக்குமாறு தெரிவித்துள்ளனர். அதே போல் வாலிபர் அந்த நபர்களிடம் பணம் கொடுக்கும் போது மறைந்திருந்த போலீஸார் அந்த மர்மநபர்களை கையும் களவுமாக பிடித்து காவல் நிலையத்திற்கு அழைத்து தீவிர விசாரணை மேற்கொண்டதில் ராணிப்பேட்டை மாவட்டம், வாலாஜா வட்டம், ஒழுகூர் கிராமத்தை சேர்ந்த யோகணன் சத்யா வயது 53, அதே விலாசத்தை சேர்ந்த செல்வகுமார் வயது 41, பழனி 51 என தெரிய வந்தது.

இந்த மோசடியில் ஈடுபட்ட மூவரிடமும் வாலிபர் அருள் கொடுத்த பணத்தை பறிமுதல் செய்தும் மோசடி வழக்கில் கைது செய்ததுடன் மூவர் மீது வழக்கு பதிவு செய்து கிருஷ்ணகிரி கோர்ட்டில் ஆஜர்படுத்தி ஒசூர் கிளை சிறையில் அடைத்தனர்.

ராயக்கோட்டை:

கிருஷ்ணகிரி மாவட்டம் ஓசூர் அருகே சினிகிரிப்பள்ளி கிராமத்தை சேர்ந்தவர் முனிராஜ். இவரது மகள் நவியாஸ்ரீ (வயது 17). இவர் கெலமங்கலம் அரசு பெண்கள் மேல்நிலைப்பள்ளியில் பிளஸ்-2 படித்து வருகிறார். தினமும் பள்ளிக்கு அரசு பஸ்சில் செல்வது வழக்கம்.

இந்த நிலையில் நேற்று காலை வழக்கம் போல் மாணவி பள்ளிக்கு சென்றார். பின்னர் மாலையில் பள்ளி முடிந்ததும் மாணவி நவியாஸ்ரீ, கெலமங்கலத்தில் இருந்து தருமபுரி நோக்கி சென்ற அரசு பஸ்சில் ஏறி தனது ஊருக்கு பயணம் செய்தார்.

அப்போது சினிகிரிப்பள்ளி கிராமத்தில் உள்ள பஸ் ஸ்டாப்பில் பஸ் நிற்காமல் சென்றுள்ளது. இதனால் அதிர்ச்சிக்குள்ளான மாணவி, பதட்டத்துடன் இருக்கையில் இருந்து எழுந்துள்ளார். அப்போது திடீரென எதிர்பாராத வகையில் மாணவி, ஓடும் பஸ்சில் இருந்து கீழே குதித்தார்.

இதில் கீழே விழுந்த மாணவி மீது பஸ்சின் பின்சக்கரம் ஏறி இறங்கியது. இதனால் படுகாயம் அடைந்த மாணவி வலியால் துடித்தார். உடனே சக பயணிகள், கூச்சல் போட்டு பஸ்சை உடனடியாக நிறுத்தினர். பின்னர் மாணவியை மீட்டு, அதே பஸ்சில் உத்தனப்பள்ளி அரசு ஆரம்ப சுகாதார நிலையத்தில் சேர்த்தனர். பின்னர் முதலுதவி சிகிச்சைக்கு பிறகு ஓசூர் அரசு ஆஸ்பத்திரிக்கு அனுப்பினர். தொடர்ந்து மேல் சிகிச்சைக்காக கிருஷ்ணகிரி அரசு ஆஸ்பத்திரிக்கு மாணவியை அனுப்பினர். இந்த நிலையில் சிகிச்சை பலனின்றி நேற்று 10 மணியளவில் மாணவி நவியாஸ்ரீ பரிதாபமாக இறந்தார்.

இந்த விபத்து பற்றி உத்தனப்பள்ளி போலீசார் வழக்குப்பதிவு செய்து விசாரணை நடத்தி வருகின்றனர்.