கள்ளக்குறிச்சி

சங்கராபுரம்:

கள்ளக்குறிச்சி மாவட்டம் சங்கராபுரம் வட்டம் ரிஷிவந்தியம் ஒன்றியம் பள்ளிப்பட்டு ஏரியில் இருந்து சூளாங்குறிச்சி ஏரிக்கு தண்ணீர் செல்லும் ஓடை உள்ளது. அந்த ஓடை வழியாக அதை ஒட்டியுள்ள விவசாய நிலங்களில் அறுவடை செய்யப்படும் விளைபொருட்களை விவசாயிகள் எடுத்துச் செல்வது வழக்கம்.

இந்த நிலையில் ஓடையை சிலர் ஆக்கிரமித்திருந்ததால் தண்ணீர் பாய்ந்தோடுவதற்கும், அறுவடை செய்த விளை பொருட்களை வெளியே கொண்டு செல்வதற்கும் சிரமமாக இருந்தது. எனவே ஓடையில் உள்ள ஆக்கிரமிப்பை அகற்றக் கோரி விவசாயி மாரிமுத்து கள்ளக்குறிச்சி கலெக்டர் அலுவலகத்தில் மனு அளித்தார்.

அதன்பேரில் சங்கராபுரம் வருவாய்துறை அதிகாரிகள் விசாரணை மேற்கொண்டு ஆக்கிரமிப்புகளை அளவீடு செய்யும் பணியை தொடங்கினர். தொடர்ந்து ரிஷிவந்தியம் வருவாய் ஆய்வாளர் சதீஷ்குமார், பள்ளிப்பட்டு கிராம நிர்வாக அலுவலர் ராஜ்குமார், நில அளவையாளர் ஜெயவேல் மற்றும் அலுவலர்கள் அளவீடு செய்து பொக்லைன் எந்திரம் மூலம் ஓடையில் உள்ள ஆக்கிரமிப்புகளை அகற்றினர். ஆக்கிரமிப்புகளை அகற்றியபோது, அசம்பாவித சம்பவங்களை தடுக்க போலீசார் பாதுகாப்பு பணியில் ஈடுபட்டனர்.

திருநாவலூர்:

உளுந்தூர்பேட்டை உட்கோட்ட பகுதியில் உள்ள அனைத்து கிராமங்களிலும் தேசிய நெடுஞ்சாலைகளிலும் சாலை விபத்து குற்றங்கள் அதிகரித்து வருகிறது. இதனை குறைக்கும் பொருட்டு கிராம பகுதியில் கண்காணிப்பு கேமிரா பொருத்தப்பட்டு வருகிறது. அதன்படி திருநாவலூர் அருகே ஈஸ்வர கண்ட நல்லூரில் கண்காணிப்பு கேமிராவை உளுந்தூர்பேட்டை போலீஸ் டி.எஸ்.பி.மகேஷ் திறந்துவைத்து பேசினார். நிகழ்ச்சியில் திருநாவலூர் இன்ஸ்பெக்டர் சீனிவாசன், சப்-இன்ஸ்பெக்டர்கள் பாலமுரளி, விநாயகம், தனிப்பிரிவு தலைமை காவலர் மனோகர் மற்றும் போலீசார் பங்கேற்றனர்.

கள்ளக்குறிச்சி:

கள்ளக்குறிச்சி அருகே நீலமங்கலம் ஊராட்சியில் தேசிய ஊராட்சிகள் தினத்தையொட்டி சிறப்பு கிராம சபை கூட்டம் நடைபெற்றது.

கூட்டத்தில் மாவட்ட கலெக்டர் கூறியதாவது:-

ஒவ்வொரு ஆண்டும் ஏப்ரல் 24-ந் தேதி தேசிய ஊராட்சிகள் தினம் அனுசரிக்கப்படுகிறது. தமிழ் நாடு முதலமைச்சர் அனைத்து ஊராட்சி மன்ற தலைவர்களுக்கும் கடிதம் அனுப்பியுள்ளார். அதில் தன்னிறைவு பெற்ற கிராமங்களை உருவாக்குவது மட்டுமல்லாமல் சமூக நீதியை ஏற்படுத்தவும், சாதி சமயமற்ற சமத்துவ சமுதாயத்தை உருவாக்கவும் முன்வர வேண்டும் என தெரிவித்துள்ளார்.

கள்ளக்குறிச்சி மாவட்டத்தில் உள்ள ஒவ்வொரு ஊராட்சிகளும் நீடித்த வளர்ச்சி இலக்குகளை அடையும் வகையில், வறுமை ஒழிப்பு, ஆரோக்கியமான வாழ்வு, குழந்தை நேயம், குடிநீர் வசதி, சமூகப்பாது காப்பு, சிறந்த நிர்வாகம், அடிப்படை வசதிகள், பசுமையும் தூய்மையும் மற்றும் பாலின சமத்துவம் ஆகிய 9 இலக்குகளை அடைய வேண்டும்என்ற முதல்-அமைச்சர் ஸ்டாலின் விருப்பத்தினை நிறைவேற்ற அனைவரும் ஒத்துழைக்க வேண்டும்.

மேலும் ஆரோக்கியமான வாழ்வு, பசுமை மற்றும் தூய்மை கிராமம் மற்றும் பாலின சமத்துவ வளர்ச்சி ஆகிய சாரம்சங்கள் கொண்டு சிறப்பாக செயல்படும் கிராம ஊராட்சி தலைவர்களுக்கு வரும் ஆண்டில் உத்தமர் காந்தி விருது தமிழக அரசால் வழங்கப்படவுள்ளது. எனவே நீலமங்கலம் ஊராட்சி மன்ற தலைவர் இந்த திட்டங்களை சிறப்பாக செயல்படுத்தி விருதினைபெற வாழ்த்து தெரிவித்துக் கொள்கிறேன்.

இவ்வாறு பேசினார்.

தொடர்ந்து மாவட்ட கலெக்டர் தலைமையில் சாலை பாதுகாப்பு குறித்து அனைவரும் உறுதிமொழி ஏற்றுக்கொண்டனர். கூட்டத்தில் அனைவரும் மேம்பட்ட வாழ்க்கை மற்றும் உடல்நலத்துடன் வாழ நடவடிக்கை மேற்கொள்ளுதல், ஊரக வேலைவாய்ப்பு திட்டத்தின் கீழ் கிராம ஊராட்சி வளர்சிக் குழு உறுப்பினர் நியமனம் செய்தல் உள்ளிட்ட 19 தீர் மானங்கள் நிறைவேற்றப்பட்டன.

முன்னதாக மாவட்ட ஒருங்கிணைந்த குழந்தை வளர்ச்சி திட்ட அலுவலர் செல்வி, வேளாண்மை இணை இயக்குனர் வேல் விழி, மாவட்ட முன்னோடி வங்கி மேலாளர் முனீஸ்வரன் ஆகியோர் துறை சார்ந்த திட்டங்கள் குறித்து பொது மக்களுக்கு விளக்கமாக கூறினர்.

அப்போது உதவி இயக்குநர் (ஊராட்சிகள்) ரெத்தின மாலா, ஊராட்சி ஒன்றியக் குழு உறுப்பினர் ராதிகா, ஊராட்சி மன்ற தலைவர் ஜெயசங்கர், ஊராட்சி மன்ற உறுப்பினர்கள் மற்றும் அரசு அலுவலர்கள், கிராம பொது மக்கள் பலரும் கலந்து கொண்டனர்.

கள்ளக்குறிச்சி:

கள்ளக்குறிச்சி அருகே நீலமங்கலம் ஊராட்சிக்கு உட்பட்ட ஏ.கே.டி நகர் உள்ளது. இங்கு தியாகதுருகம் சாலை அருகே சில ஆண்டுகளுக்கு முன்பு ஆழ்துளை கிணறு அமைத்து, மினி நீர்த்தேக்கத் தொட்டி அமைக்கப்பட்டது. இதனை அப்பகுதியை சேர்ந்த பொது மக்கள் பயன்படுத்திவந்தனர்.

இந்நிலையில் நீர்த்தேக்க தொட்டியில் பயன்படுத்தப்பட்டு வீணாகும் நீர் அதே பகுதியில் பள்ளம் அமைத்து அதனை சுற்றி உரைகள் அமைக்கப்பட்டு மூடி போட்டு மூடப்பட்டிருந்தது. ஆனால் இந்த பள்ளம் தற்போது தூர்ந்து போனதால் கழிவுநீர் செல்ல வழியின்றி மினி நீர்த்தேக்கத் தொட்டி, ஆழ்துளை கிணறு மற்றும் அதன் அருகே உள்ள கழிவு நீர் பள்ளம் ஆகிய பகுதிகளில் குளம்போல தேங்கி கிடக்கிறது. இதனால் அப்பகுதியில் துர்நாற்றம் வீசுவதாகவும், கொசுக்களின் உற்பத்தி கூடாரமாக விளங்குவதாகவும் அப்பகுதி மக்கள் கூறுகின்றனர்.

எனவே சம்பந்தப்பட்ட வட்டார வளர்ச்சி அலுவலர் நேரில் சென்று ஆய்வு செய்து, தூர்ந்து போன கழிவுநீர் பள்ளத்தை சரி செய்து தரவேண்டுமென அப்பகுதி மக்கள் வேண்டு கோள் விடுத்துள்ளனர்.

சங்கராபுரம்:

கள்ளக்குறிச்சி மாவட்டம் ரிஷிவந்தியத்தை தலைமையிடமாக கொண்டு புதிய தாலுகா அறிவிக்க வேண்டும் என்பதை வலியுறுத்தி ரிஷிவந்தியம் காமராஜர் தெருவில் உள்ள மாரியம்மன் கோவில் வளாகத்தில் ரிஷிவந்தியம் மற்றும் அதை சுற்றியுள்ள பல்வேறு கிராமங்களை சேர்ந்த பொது மக்கள் காத்திருப்பு போராட்டத்தை தொடங்கினர்.

தகவல் அறிந்த திருக்கோவிலூர் துணை போலீஸ் சூப்பிரண்டு பழனி தலைமையில் இன்ஸ்பெக்டர்கள் பாபு, பாண்டியன், சப்-இன்ஸ்பெக்டர்கள் சிவச்சந்திரன், அன்பழகன் ஆகியோர் சம்பவ இடத்துக்கு விரைந்து சென்று பேச்சுவார்த்தை நடத்தினர். ஆனால் போராட்டக்காரர்கள் போலீசாரின் சமாதானத்தை ஏற்கவில்லை. அப்போது சிலர் அந்த பகுதியில் சாலை மறியலில் ஈடுபட முயன்றனர். அவர்களை போலீசார் தடுத்து நிறுத்தி கைது செய்தனர்.

இதன் மூலம் 3 பெண்கள் உட்பட 24 பேர் கைது செய்யப்பட்டனர். இருப்பினும் கோவில் வளாகத்தில் காத்திருப்பு போராட்டத்தை கிராம மக்கள் தொடர்ந்து நடத்தினர். இவர்களிடம் மாலையில் துணை போலீஸ் சூப்பிரண்டு பழனி நடத்திய பேச்சுவார்த் தையின் பேரில் கலைந்து சென்றனர். மேலும் கைது செய்யப்பட்டவர்கள் மால யில் விடுவிக்கப்பட்டனர். இந்த சம்பவத்தால் அப்பகுதியில் பரபரப்பு நிலவியது.