ஈரோடு

பெருந்துறை:

பெருந்துறை மற்றும் சுற்று வட்டாரப்பகுதிகளில் ஆயிக்கணக்கான வட மாநிலத் தொழிலாளர்கள் தங்கள் குடும்பத்தினருடன் தங்கி பல்வேறு நிறுவனங்களில் பணிபுரிந்து வருகின்றனர்.

தற்போது அனைத்து நிறுவனங்களும் இயங்க தடை விதிக்கபட்ட நிலையில் வடமாநில தொழிலாளர்கள் வேலை வாய்ப்பினை இழந்து தவித்து வந்தனர். இந்த நிலையில் இங்கு தங்கியுள்ள வட மாநில தொழிலாளர்கள் கணக்கீடு செய்யப்பட்டு அவர்கள் அனைவரும் அவர்களது சொந்த ஊருக்கு திருப்பி அனுப்ப அரசின் சார்பில் நடவடிக்கைகள் மேற்கொள்ளப்பட்டு வருகிறது.

அதற்காக அவர்களின் விவரங்களை கொண்டு பூர்த்தி செய்யப்பட்ட இ- பாஸ் வழங்க ஏற்பாடுகள் செய்யப்பட்டது. இந்த இ-பாஸ் அந்தந்த தாசில்தார் அலுவலகத்தில் உள்ள இ- சேவை மையங்கள் மூலம் வழங்க முடிவு செய்யபட்டது. இது குறித்து தகவல் அறிந்த வட மாநில தொழிலாளர்கள் சுமார் 100-க்கும் மேற்பட்டோர் காலை முதலே நீண்ட வரிசையில் காத்து நின்றனர்.

காலை 10 மணியளவில் இ-சேவை மையம் திறக்கப்பட்ட பின்னர் அங்கு சர்வர் வேலை செய்யாதது தெரிய வந்தது. இது குறித்து தாசில்தாருக்கும் தகவல் கொடுக்கப்பட்டது. இந்த சர்வர் இயக்கத்திற்கு வந்த பின்னர் அனைவருக்கும் இ-பாஸ் வழங்கப்படும் என தெரிவிக்கப்பட்டதால் காத்து நின்ற வடமாநிலத் தொழிலாளர்கள் ஏக்கத்துடன் திரும்பி சென்றனர்.

ஈரோடு:

கொரோனா வைரஸ் பரவலை தடுக்க ஈரோட்டுக்கு வெளி மாவட்டங்களில் இருந்து வந்தவர்களை கண்டறிந்து சுகாதாரத்துறையினர் தனிமைப்படுத்தி வருகின்றனர்.

வீடுகள் நெருக்கமாக இல்லாத பகுதிகளில் உள்ளவர்களை வீடுகளிலே தனிமைப்படுத்தி வருகின்றனர். இந்த நிலையில் ஈரோடு சடையம்பாளையம் பகுதியை சேர்ந்த 35 வயது மதிக்க தக்க வாலிபர் சென்னையில் பணியாற்றி கடந்த 5 நாட்களுக்கு முன்பு ஈரோடு திரும்பினார்.

இதனை அறிந்த சுகாதாரத் துறையினர் அந்த வாலிபரை வீட்டிலே 14 நாட்களுக்கு தனிமைப்படுத்தி கொள்ள உத்தரவிட்டனர். மேலும் அவரது வீட்டிற்கு முன்பாக தனிமைப்படுத்தப்பட்ட வீடு என நோட்டீசும் ஒட்டினர்.

ஆனால் அந்த வாலிபர் தன்னை தனிமைப்படுத்தி கொள்ளாமல் வீதிகளில் உலா வருவதாக அப்பகுதி மக்கள் மாவட்ட கட்டுப்பாட்டு அறைக்கு புகார் தெரிவித்தனர்.

இதனை தொடர்ந்து போலீசார், சுகாதாரத்துறையினர் நேரில் என்று அந்த வாலிபரை எச்சரித்தனர். ஆனாலும் அந்த வாலிபர் தொடர்ந்து வீதிகளில் உலா வருவதால் பொதுமக்கள் பீதி அடைந்துள்ளனர்.

சூரம்பட்டி:

கொரோனா தொற்று காரணமாக தமிழ்நாடு முழுவதும் கடந்த மாதம் ரே‌ஷன் கடைகளில் இலவச பொருட்கள் வழங்கப்பட்டன. இதைத் தொடர்ந்து இந்த மாதமும் இலவச பொருட்கள் வழங்கப்படும் என்று முதலமைச்சர் எடப்பாடி பழனிசாமி அறிவித்திருந்தார். அனைத்து ரே‌ஷன் கடைகளிலும் சர்க்கரை, எண்ணெய், பருப்பு, அரிசி, கோதுமை ஆகிய பொருட்கள் பொது மக்களுக்கு இலவசமாக வழங்கப்பட்டன.

ஈரோடு எஸ்.கே.சி ரோட்டில் உள்ள ஒரு ரே‌ஷன் கடைகளில் இலவச பொருள்கள் வழங்கும் நிகழ்ச்சி பெரியார் நகர் பகுதி செயலாளர் மனோகரன் தலைமையில் நடந்தது. எம்.எல்.ஏ.க்கள் கே.வி. ராமலிங்கம், கே.எஸ்.தென்னரசு ஆகியோர் இலவச பொருள்களை வழங்கி தொடங்கி வைத்தனர்.

இந்த நிகழ்ச்சியில் பகுதி செயலாளர்கள் கேசவமூர்த்தி, ஜெகதீசன் உள்பட பலர் கலந்து கொண்டனர்.