அரியலூர்

அரியலூர்:

அரியலூர் மாவட்டத்தில் நேற்று அரியலூர், ஜெயங்கொண்டம் ஆகிய நகராட்சிகளுக்கு உட்பட்ட பகுதிகள் மற்றும் திருமானூர் ஊராட்சி ஒன்றியத்துக்கு உட்பட்ட பகுதியில் தலா ஒருவருக்கும், செந்துறை, ஜெயங்கொண்டம் ஆகிய ஒன்றியங்களுக்கு உட்பட்ட பகுதிகளில் தலா 2 பேருக்கும் என மொத்தம் 7 பேர் புதிதாக கொரோனா பாதிப்புக்கு உள்ளாகியுள்ளனர். இதனால் அரியலூர் மாவட்டத்தில் பாதிக்கப்பட்டவர்களின் எண்ணிக்கை 4,302 ஆக உயர்ந்துள்ளது.

ஏற்கனவே கொரோனாவிற்கு மாவட்டத்தில் 46 பேர் உயிரிழந்துள்ளனர். மேலும் பல்வேறு மருத்துவமனைகளில் கொரோனாவிற்கு தற்போது 637 பேர் சிகிச்சை பெற்று வருகின்றனர். மாவட்டத்தில் மொத்தம் 3,619 பேர் சிகிச்சை பெற்று வீடு திரும்பியுள்ளனர். மேலும் 488 பேருக்கு கொரோனா மருத்துவ பரிசோதனை முடிவுகள் வரவேண்டியுள்ளது.

இதேபோல் பெரம்பலூர் மாவட்டத்தில் நேற்று பெரம்பலூர், வேப்பந்தட்டை, வேப்பூர் ஆகிய வட்டாரங்களில் தலா 2 பேரும், ஆலத்தூர் வட்டாரத்தில் ஒருவரும் என மொத்தம் 7 பேருக்கு கொரோனா தொற்று உறுதி செய்யப்பட்டுள்ளது. இதனால் பெரம்பலூர் மாவட்டத்தில் கொரோனாவினால் பாதிக்கப்பட்டவர்களின் எண்ணிக்கை 2,096 ஆக உயர்ந்துள்ளது. மாவட்டத்தில் ஏற்கனவே 20 பேர் கொரோனாவிற்கு உயிரிழந்துள்ளனர். மேலும் மருத்துவமனைகளில் இருந்து இதுவரைக்கும் 1,989 பேர் டிஸ்சார்ஜ் ஆகிய நிலையில், தற்போது 87 பேர் சிகிச்சை பெற்று வருகின்றனர். மேலும் 400 பேருக்கு கொரோனா மருத்துவ பரிசோதனை செய்யப்பட்டுள்ளது.

செந்துறை:

பெரம்பலூர் மாவட்டம் குன்னம் அருகே உள்ள துங்கபுரம் கிராமத்தை சேர்ந்தவர் பழனிவேல். இவருடைய மனைவி முத்துலட்சுமி(வயது 33). இவர்கள் கடந்த 7 ஆண்டுகளுக்கு முன்பு செந்துறை அண்ணா நகரில் உள்ள ஒரு வீட்டின் முதல் தளத்தில் வாடகைக்கு குடிவந்தனர்.

தற்போது பழனிவேல் சிங்கப்பூரில் வேலை பார்த்து வருகிறார். அண்ணா நகரில் உள்ள வீட்டில் வசித்து வரும் முத்துலட்சுமி, பால் கூட்டுறவு சங்கத்தில் வேலை பார்த்து வருகிறார்.

இந்த நிலையில் நேற்று வீட்டை பூட்டிவிட்டு வேலைக்கு சென்ற முத்துலட்சுமி இரவில் வீட்டிற்கு திரும்பி வந்தார். அப்போது வீட்டின் முன் கதவின் பூட்டு மற்றும் சாமி அறை கதவின் தாழ்ப்பாள் அறுக்கப்பட்டு இருந்தது. இதனால் அதிர்ச்சியடைந்த முத்துலட்சுமி உள்ளே சென்று பார்த்தபோது, அங்கு பையில் வைக்கப்பட்டு இருந்த நகை திருட்டு போனது தெரியவந்தது.

அந்த பையில் 48 பவுன் நகை வைத்திருந்ததாகவும், அதில் 13 பவுன் நகையை காணவில்லை என்றும் முத்துலட்சுமி கூறினார். இது குறித்து அவர் செந்துறை போலீசில் புகார் அளித்தார். இதையடுத்து செந்துறை போலீசார் மற்றும் அரியலூர் துணை போலீஸ் சூப்பிரண்டு மதன் ஆகியோர் சம்பவ இடத்திற்கு விரைந்து வந்து பார்வையிட்டு விசாரணை நடத்தினர்.

கீழப்பழுவூர்:

அரியலூர் மாவட்டம், திருமானூர் ஒன்றியத்துக்கு உட்பட்ட வெற்றியூர் ஊராட்சி மன்ற தலைவராக இருப்பவர் தவமணி சுப்பிரமணியன். இவர் அந்த கிராமத்தில் எந்த திட்டங்களையும் சரிவர செய்யவில்லை என்று அப்பகுதியை சேர்ந்த சிலர் சமூக வலைத்தளங்களில் அவதூறு பரப்பியதாகவும், நேற்று முன்தினம் அதே கிராமத்தை சேர்ந்த 2 பேர் தனிப்பட்ட முறையில் நிலத்தகராறில் ஈடுபட்டதற்கு கூட ஊராட்சி மன்ற தலைவர் தான் காரணம் என்பது போல சித்தரித்து சமூக வலைத்தளங்களில் அவர்கள் பதிவிட்டதாகவும் கூறப்படுகிறது.

இதனால் ஆத்திரமடைந்த ஊராட்சி மன்ற தலைவர் தவமணி நேற்று வெற்றியூர் ஊராட்சி மன்ற அலுவலகம் முன்பு அமர்ந்து, அவதூறாக செய்திகள் பரப்புவோர் மீது நடவடிக்கை எடுக்கக்கோரி தர்ணா போராட்டத்தில் ஈடுபட்டார்.

இதுபற்றி தகவல் அறிந்து சம்பவ இடத்திற்கு வந்த வட்டார வளர்ச்சி அலுவலர் செந்தில்குமார் மற்றும் கீழப்பழுவூர் இன்ஸ்பெக்டர் வெங்கடேஸ்வரன் ஆகியோர் ஊராட்சி மன்ற தலைவரிடம் பேச்சுவார்த்தையில் ஈடுபட்டனர். அப்போது போலீஸ் இன்ஸ்பெக்டர் வெங்கடேஸ்வரன், அவதூறு பரப்புபவர்கள் மீது நடவடிக்கை எடுக்கப்படும் என்று உறுதி அளித்ததையடுத்து போராட்டத்தை ஊராட்சி மன்ற தலைவர் கைவிட்டார். ஊராட்சி மன்ற தலைவரே தர்ணா போராட்டத்தில் ஈடுபட்டதால் அப்பகுதியில் சிறிது நேரம் பரபரப்பு ஏற்பட்டது.

தா.பழூர்:

அரியலூர் மாவட்டம் தா.பழூரை அடுத்த மதனத்தூர் காலனி பகுதியில் பொன்னார் பாலம் அருகே சிறிய அளவிலான மாரியம்மன் கோவில் உள்ளது. இந்த கோவில் அருகே நேற்று மாலை 7 மணி அளவில் அதே பகுதியை சேர்ந்த வாலிபர்கள் சிலர் நின்று கொண்டு பேசிக் கொண்டிருந்தனர்.

அப்போது ஜெயங்கொண்டத்தில் இருந்து கும்பகோணம் நோக்கி பைப் ஏற்றி வந்த சரக்கு லாரி, கட்டுப்பாட்டை இழந்து சாலையோரம் நின்றவர்கள் மீது மோதிவிட்டு, கோவிலின் முகப்பு பகுதியில் மோதி நின்றது. இதில் அங்கு பேசிக் கொண்டிருந்த வாலிபர்கள் அனைவரும் லாரியின் அடியில் சிக்கினர்.

இதில் மதனத்தூர் காலனியைச் சேர்ந்த செல்வமணியின் மகன் செல்வகுமார் (வயது 22) என்பவர் சம்பவ இடத்திலேயே உயிரிழந்தார். மேலும் அதே பகுதியைச் சேர்ந்த முருகேசன் மகன் பிலவேந்திரன், சுந்தரமூர்த்தி மகன் சூரியமூர்த்தி, ராஜேந்திரன் மகன் ராஜ்கிரண் மற்றும் வாணதிரையன்பட்டினத்தை சேர்ந்த அய்யாவு மகன் பாஸ்கர் ஆகியோர் படுகாயம் அடைந்தனர்.

உடனடியாக 108 ஆம்புலன்ஸ் வரவழைக்கப்பட்டு, படுகாயமடைந்த 4 பேரையும் மீட்டு கும்பகோணம் அரசு மருத்துவமனைக்கு சிகிச்சைக்காக அனுப்பி வைத்தனர். இதில் சூரியமூர்த்தி, பாஸ்கர் ஆகியோர் மேல்சிகிச்சைக்காக தஞ்சாவூர் அரசு மருத்துவ கல்லூரி மருத்துவமனைக்கு அனுப்பப்பட்டனர்.

இந்த விபத்து காரணமாக ஆத்திரமடைந்த அப்பகுதி மக்கள், விபத்தை கண்டித்து சாலை மறியலில் ஈடுபட முயன்றனர். அவர்களை போலீசார் தடுத்து உரிய நடவடிக்கை எடுக்கப்படும் என்று கூறி அப்புறப்படுத்தினர். சம்பவ இடத்திற்கு ஜெயங்கொண்டம் துணை சூப்பிரண்டு தேவராஜ், உதவி சூப்பிரண்டு திருமேனி ஆகியோர் உடனடியாக வந்து பொதுமக்களை சமாதானப்படுத்தினர். இறந்தவரின் உடலை பார்த்து உறவினர்கள் கதறி அழுதனர். இந்த விபத்தால் அந்தப் பகுதியே சோகமயமாக காணப்பட்டது. மேலும் சாலை மறியல் முயற்சியில் பொதுமக்கள் ஈடுபட்டதால் வாகன போக்குவரத்துக்கு தடை ஏற்பட்டது. இதனால் ஜெயங்கொண்டம்- கும்பகோணம் நெடுஞ்சாலையில் பரபரப்பு ஏற்பட்டது.

அரியலூர்:

அரியலூர் துணை மின் நிலையத்தில் கடந்த 13-ந் தேதி பராமரிப்பு பணிகளுக்காக காலை 9 மணி முதல் மாலை 6 வரை மின்சாரம் நிறுத்தப்பட்டது. இது பற்றி முன்னதாக அறிவிக்கப்பட்டது. இதனால் பொதுமக்கள் அதற்கு தகுந்தாற்போல் மிக்சியில் மசாலா அரைத்தல் போன்றவற்றை காலையில் மின்சாரம் நிறுத்தப்படும் முன்பே செய்தனர். இந்நிலையில் நேற்று முன்தினம் காலை 10 மணிக்கு திடீரென மின்சாரம் தடைபட்டது. இது தொடர்பாக மின்வாரிய அலுவலகத்தில் தொடர்பு கொண்டு கேட்டபோது, பராமரிப்பு பணிக்காக மின்சாரம் நிறுத்தப்பட்டுள்ளது, மாலை 6 மணிக்குத்தான் மின்சாரம் வரும், என்றனர்.

முன் அறிவிப்பு எதுவும் இல்லாமல் மின்சாரம் நிறுத்தப்பட்டதால் அறவை மில்கள் உள்பட பல வணிக நிறுவனங்களில் பணிகளும் மற்றும் பொதுமக்களின் இயல்பு வாழ்க்கையிலும் பாதிப்பு ஏற்பட்டது. இதனால் அவர்கள் அவதியடைந்தனர். நகரில் இரண்டு தனியார் மருத்துவமனைகளில் கொரோனாவால் பாதிக்கப்பட்டவர்களுக்கு சிகிச்சை அளிக்கபடுகிறது. அறிவிப்பு எதுவும் இல்லாமல் மின் தடை ஏற்பட்ட நிலையில், ஆக்சிஜன் கொடுப்பதில் தாமதம் ஏற்பட்டதால் பல நோயாளிகள் சிரமப்பட்டனர். எனவே இனிவரும் காலங்களில் மின்சாரம் நிறுத்தப்படுவது குறித்து மின்வாரிய அதிகாரிகள் முன்னதாகவே அறிவிக்க வேண்டும் என்பதே பொதுமக்களின் வேண்டுகோளாகும்.