என் மலர்
புதுச்சேரி
புதுச்சேரி:
புதுவை சட்டப்பேரவை தேர்தலில் போட்டியிடும் வேட்பாளர்கள் மீதான வழக்குகள், கல்வித்தகுதி தொடர்பாக தேர்தல் கண்காணிப்பகம் அறிக்கையை வெளியிட்டுள்ளது.
அதில் குற்றப்பின்னணி வேட்பாளர்களில் ஆய்வு செய்யப்பட்ட 323 பேரில் 54 பேர் மீது (17 சதவீதம்) கிரிமினில் வழக்குகள் நிலுவையில் உள்ளன. 28 பேர் மீது (9 சதவீதம்) கொலை, கொலை முயற்சி, பெண்களுக்கு எதிரான குற்றங்கள் என்ற கடுமையான கிரிமினல் வழக்குகள் நிலுவையில் உள்ளன.
2 வேட்பாளர்கள் மீது கொலை வழக்கும், ஒரு வேட்பாளர் மீது கொலை முயற்சி வழக்கும். ஒரு வேட்பாளர் மீது பெண்ணை மானபங்கம்படுத்தி தாக்கிய வழக்கும் உள்ளது. இது கடந்த 2016 தேர்தலில் 30 பேராக இருந்தது.
கட்சி ரீதியாக கிரிமினல் வழக்கு விவரம்:
அ.தி.மு.க.வில் 5 வேட்பாளர்களில் 3 பேர் மீதும் (60 சதவீதம்), பா.ஜனதாவில் 9 வேட்பாளர்களில் 5 பேர் மீதும் (56 சதவீதம்), தி.மு.க. வேட்பாளர்கள் 13 பேரில் 7 பேர் மீதும் (54 சதவீதம்), காங்கிரசில் 14 வேட்பாளர்களில் 4 பேர் மீதும் (29 சதவீதம்) கிரிமினல் வழக்குகள் நிலுவையில் உள்ளன.
கடுமையான கிரிமினல் வழக்குகள் விவரம்:
அ.தி.மு.க.வில் 5 வேட் பாளர்களில் 2 பேர் மீதும் (40 சதவீதம்), பா.ஜனதாவில் 9 வேட்பாளர்களில் 2 பேர் மீதும் (22 சதவீதம்), காங்கிரசில் 14 வேட்பாளர்களில் 2 பேர் மீதும் (14 சதவீதம்), என்.ஆர்.காங்கிரசில் 16 வேட்பாளர்களில் ஒருவர் மீதும் (6 சதவீதம்), சுயேட்சை வேட்பாளர்களில் 96 பேரில் 4 பேர் மீதும் (4 சதவீதம்) கடுமையான கிரிமினல் வழக்குகள் நிலுவையில் உள்ளன.
புதுவையில் 162 வேட்பாளர்கள் 5 முதல் 12-ம் வகுப்பு வரை படித்தவர்கள். இது 50 சதவீதமாகும். 133 பேர் பட்டப்படிப்பு மற்றும் அதற்கு மேல் படித்தவர்கள் (41 சதவீதம்), 18 பேர் பட்டயப்படிப்பும், 6 பேர் படிக்காதவர்கள் என்றும், 4 பேர் ஓரளவு படிக்கத்தெரியும் என்றும் தெரிவித்துள்ளனர்.
புதுவையில் போட்டியிடுவோரில் 175 பேர் 41 முதல் 60 வயதுக்கு உட்பட்டவர்கள். இது 54 சதவீதமாகும். அதே போல் 25 முதல் 45 வயதுக்கு உட்பட்டோர் 109 பேர். 61 முதல் 80 வயதுக்கு உட்பட்டோர் 39 பேர்.
புதுவையில் பெண் வேட்பாளர்கள் 35 பேர் களத்தில் உள்ளனர். அதே நேரத்தில் கடந்த தேர்தலில் 343 பேரில் 26 பேர் களத்தில் இருந்தனர்.
புதுச்சேரி:
மார்க்சிஸ்டு கம்யூனிஸ்டு புதுவை பிரதேச செயலாளர் ராஜாங்கம், தமிழ் மாநில குழு உறுப்பினர் பெருமாள் ஆகியோர் கூட்டாக நிருபர்களிடம் கூறியதாவது:-
புதுவை பா.ஜ.க.வினர் வாக்காளர்களின் தொலைபேசி எண்களுக்கு பா.ஜ.க.வில் சேருங்கள் என்கிற முறையில் எஸ்.எம்.எஸ். அனுப்பியுள்ளனர்.
இதுதொடர்பாக பிரதேச குழு உறுப்பினர் ஆனந்த், சென்னை உயர்நீதி மன்றத்தில் பொது நல வழக்கு தொடர்ந்தார்.
அந்த வழக்கு 24-ந் தேதியும், 26-ந் தேதியும் விசாரணைக்கு வந்தது. அப்போது நீதிபதிகள் பல கேள்விகளை முன் வைத்துள்ளனர்.
தனி நபர் தரவுகள் எப்படி பா.ஜ.க.வுக்கு கிடைத்தது என்று அறிக்கை அளிக்க கோரி புதுவை அரசுக்கும், தேர்தல் அதிகாரிகளுக்கும், ஆதார் ஆணையத்துக்கும் நோட்டீஸ் அனுப்பியுள்ளனர். தனி நபர் விவரங்கள் பாதுகாக்க வேண்டும் என உச்சநீதிமன்றமே பல உத்தரவுகளை வழங்கி உள்ளது.
அப்படி இருக்கும்போது, தனிநபர் பற்றி விவரங்கள் பா.ஜ.க.வால் எப்படி சேகரிக்க முடிந்தது. குறிப்பாக பூத் வாரியாக வாக்காளர்களுக்கு தொலைபேசி எண்ணுக்கு பா.ஜ.க.வில் சேருங்கள் என லிங்க் அனுப்பி உள்ளனர்.
அவர்களுக்கு எப்படி வாக்காளர்களின் தொலைபேசி எண் கிடைத்தது? என்பது சம்பந்தமாக புதுவை தேர்தல் அதிகாரிகள் இதுவரை எந்த விளக்கத்தையும் தரவில்லை. இதுபோன்ற குறுந்தகவலை அனுப்ப பா.ஜ.க. எவ்வித அனுமதியும் பெறவில்லை என தேர்தல் துறை கூறியிருக்கிறது.
அனுமதியின்றி தகவல் பரப்பியது தேர்தல் நடத்தை விதிமுறைகளுக்கு எதிரானதாகும். எனவே, பா.ஜ.க.வின் அனைத்து வேட்பாளர்களை தகுதி நீக்கம் செய்ய வேண்டும். புதுவையில் தேர்தல் உயர்மட்ட அதிகாரிகள் ஒரு கட்சிக்கு ஆதரவாக செயல்பட்டு வருகிறார்கள் என தொடர்ந்து நாங்கள் விமர்சனம் செய்து வருகிறோம்.
தேர்தல் ஆணையத்திடம் பல முறை புகார் அளித்துள்ளோம். இந்த சூழ்நிலையில் தேர்தல் உயர்மட்ட அதிகாரிகளுடைய ஒத்துழைப்பு இல்லாமல் இப்படிப்பட்ட விதிமீறல்கள் நடக்க வாய்ப்பில்லை.
எனவே, புதுவை தலைமை தேர்தல் அதிகாரி உள்ளிட்ட உயர் அதிகாரிகளை தேர்தல் பணியில் இருந்து உடனடியாக மாற்றப்பட வேண்டும்.
குறிப்பாக மாவட்ட தேர்தல் அதிகாரி பூர்வா கார்க் ஒருதலைப்பட்சமாக செயல்பட்டு வருகிறார். அவரை உடனடியாக பணியில் இருந்து விடுவிக்க வேண்டும். நேர்மையான அதிகாரிகளை தேர்தல் பணியில் ஈடுபடுத்த வேண்டும்.
இவ்வாறு அவர்கள் கூறினர்.
புதுவைக்கு ஒரு நாள் பயணமாக வந்த மத்திய நிதி மந்திரி நிர்மலா சீத்தாராமன் தேர்தல் அறிக்கையை வெளியிட்டார்.
அதைத்தொடர்ந்து காரைக்கால் செல்வதாக இருந்த பயணத்தை ரத்து செய்துவிட்டு புதுவையில் பா.ஜ.க. வேட்பாளர்கள் போட்டியிடும் தொகுதியில் வீதிகளில் நடந்து சென்று வாக்கு சேகரிக்க தொடங்கினார்.
அவரை வரவேற்கும் விதத்தில் மேளதாளங்கள் இசைக்கப்பட்டன. அப்போது பெண்கள் ஆரத்தி, மாலை அணிவித்தனர்.
நெல்லித்தோப்பு பெரியார் நகர் கஸ்தூரிபாய் வீதியில் மத்திய மந்திரி நிர்மலா சீத்தாராமன் சென்றபோது, அங்கிருந்த பெண் ஒருவர், மத்திய மந்திரி தலையில் சூடிக்கொள்ள மல்லிகை பூ சரத்தை கொடுத்தார்.
அதை மகிழ்வுடன் அவர் பெற்றுக்கொண்டு நடந்து அடுத்த வீட்டுக்கு சென்றபோது, அங்கிருந்த பெண்ணின் தலையில் பூ இல்லாமல் இருந்ததை பார்த்தார். அவரை அழைத்து அந்த பெண் தலையில் மல்லிகை பூ சரத்தை சூட்டினார். இதை பார்த்த அங்கிருந்தவர்கள் கைதட்டி மகிழ்ச்சியை தெரிவித்தனர்.
புதுச்சேரி:
புதுவையில் பா.ஜ.க. கூட்டணியில் இடம் பெற்றுள்ள பா.ம.க.வுக்கு தொகுதி ஒதுக்காததால் தனித்து போட்டியிட போவதாக பா.ம.க. மாநில அமைப்பாளர் தன்ராஜ் அறிவித்தார்.
இதைதொடர்ந்து 10 வேட்பாளர்கள் அறிவிக்கப்பட்டு வேட்பு மனு தாக்கல் செய்தனர். ஆனால், இடையில் பா.ஜ.க.வுடன் உடன்பாடு ஏற்பட்டு அனைவரின் வேட்பு மனுக்களையும் வாபஸ் வாங்குவதாக தன்ராஜ் கூறினார்.
இந்த நிலையில் புதுவையில் பா.ம.க. கட்சியின் முன்னாள் மாநில செயலாளர் கோபி என்கிற கோபாலகிருஷ்ணன் தலைமையில் பாட்டாளி மக்கள் பேரவை என்ற புதிய அமைப்பு தொடங்கப்பட்டு உள்ளது.
பா.ம.க.வில் இருந்து கோபி தலைமையில் நிர்வாகிகள் விலகி இந்த அமைப்பை உருவாக்கி உள்ளனர்.
இதுபற்றி அவர்கள் கூறுகையில், பா.ம.க. மாநில அமைப்பாளர் தன்ராஜின் செயல்பாடு சரியாக இல்லை. வாட்ஸ்அப் மூலமே கட்சியை நடத்துகிறார்.
30 ஆண்டுகளாக பா.ம.க.வில் பணியாற்றி வருவோரை வயது முதிர்ந்து விட்டது என்று கூறி மதிப்பதில்லை. அதனால் கலந்து ஆலோசித்து புதிய அமைப்பை உருவாக்கி உள்ளோம்.
சட்டசபை தேர்தலில் என்.ஆர்.காங்கிரஸ் கட்சிக்கு ஆதரவு தெரிவிப்போம். விரைவில் என்.ஆர்.காங்கிரஸ் தலைவர் ரங்கசாமியை சந்தித்து ஆதரவு கடிதம் அளிப்போம். என்.ஆர்.காங்கிரசுக்கு ஆதரவாக பிரசாரம் செய்வோம் என்று குறிப்பிட்டனர்.
பா.ம.க.வில் இருந்து விலகி புதிய அமைப்பை உருவாக்கியவர்கள் பா.ஜ.க. கூட்டணியிலுள்ள என்.ஆர்.காங்கிரசை ஆதரிப்பது குறிப்பிடத்தக்கது.
புதுவை பள்ளிக்கல்வித்துறை இணைஇயக்குனர் மைக்கேல் பென்னோ பள்ளிகளுக்கு அனுப்பியுள்ள சுற்றறிக்கையில் கூறியிருப்பதாவது:-
புதுவையில் தமிழக பாடத்திட்டத்தின் கீழ் செயல்படும் பள்ளிகள் 1 முதல் பிளஸ்-1 வரை வழக்கமான அல்லது சிறப்பு வகுப்புகள் நடத்தக்கூடாது. பிளஸ்-2 வகுப்புக்கு மட்டும் பொதுத்தேர்வு வருவதால் சிறப்பு வகுப்பு நடத்தலாம்.
சி.பி.எஸ்.இ., ஐ.சி.எஸ்.இ. பாடத்திட்டத்தின் கீழ் செயல்படும் பள்ளிகள் 1 முதல் 9-ம் வகுப்பு வரை மற்றும் பிளஸ்-1 வகுப்புகளுக்கு வழக்கமான சிறப்பு வகுப்புகள் நடத்தக்கூடாது.
10, பிளஸ்-2 வகுப்புகளுக்கு பொதுத்தேர்வு வர உள்ளதால் வகுப்புகள் நடத்தலாம். பெற்றோர் அனுமதி கடிதம் பெற்ற பிறகே வகுப்புகளை நடத்த வேண்டும்.
கொரோனா தொற்றால் பெற்றோர்கள் மாணவர்களை பள்ளிக்கு அனுப்பவில்லை என்றால் அவர்களை அனுப்ப கட்டாயப்படுத்தக்கூடாது. பொதுத்தேர்வு நடைபெறும் வரை விதிமுறைகளுடன் வகுப்புகள் நடத்த வேண்டும்.
விதிமீறல் தொடர்பாக புகார்கள் வந்தால் சம்பந்தப்பட்ட பள்ளி மீது உரிய நடவடிக்கை எடுக்கப்படும்.
இவ்வாறு அவர் தெரிவித்துள்ளார்.
புதுவை சட்டசபை தேர்தலையொட்டி ஒட்டுப்பதிவு எந்திரங்கள் பாதுகாப்பு அறைக்கு கொண்டு வரப்பட்டு பாதுகாப்பாக வைக்கப்பட்டன.
இன்று முதல் சின்னங்கள் பொருத்தும் பணி தொடங்குகிறது. புதுவையில் 30 தொகுதிகளிலும் 324 பேர் போட்டியிடுகின்றனர்.
புதுவையில் 23 தொகுதிகளில் ஆயிரத்து 217 ஓட்டுச்சாவடிகள் அமைக்கப்பட்டு உள்ளது. புதுவை ரெட்டியார் பாளையம் ஜெயா நகர் பகுதியில் உள்ள தலைமை தேர்தல் ஆணைய அலுவலகத்தில் இருந்து லாஸ்பேட்டையில் உள்ள அரசு தொழில்நுட்ப கல்லூரிக்கு ஆயிரத்து 822 ஓட்டு எந்திரங்கள் ஆயிரத்து 724 வி.வி.பேட் எந்திரம் கொண்டு வரப்பட்டு பாதுகாப்பு அறையில் வைக்கப்பட்டது.
வாக்கு எண்ணிக்கை மைய அதிகாரி சுதாகர் கூறுகையில், வாக்குப்பதிவு எந்திரங்கள் பாதுகாப்புடன் எடுத்து வரப்பட்டு பாதுகாப்பு அறையில் வைக்கப்பட்டது.
இன்று முதல் 2 நாட்களுக்கு வாக்குப்பதிவு எந்திரங்களில் சின்னங்கள் பொருத்தும் பணி நடைபெறும் என தெரிவித்தார்.
புதுவையில் நேற்று 2 ஆயிரத்து 164 பேருக்கு கொரோனா தொற்று பரிசோதனை நடத்தப்பட்டது.
புதிதாக 96 பேருக்கு தொற்று உறுதி செய்யப்பட்டது. இதில் புதுவையில் 60, காரைக்காலில் 32, ஏனாமில் 2, மாகியில் 2 பேர் புதிதாக தொற்றுடன் சிகிச்சை பெற்று வருகின்றனர். புதுவையில் தற்போது 205, காரைக்காலில் 47, ஏனாமில் ஒருவர், மாகியில் 4 பேர் நோய் தொற்றுடன் மருத்துவமனையில் சிகிச்சை பெற்று வருகின்றனர். புதுவையில் 9, ஏனாமில் ஒருவர், மாகியில் 3 பேர் என 13 பேர் குணமடைந்து வீடு திரும்பினர். புதுவை மாநிலத்தில் ஒட்டுமொத்தமாக இதுவரை 40 ஆயிரத்து 836 பேர் கொரோனா தொற்றால் பாதிக்கப்பட்டுள்ளனர்.
இதில் 257 பேர் தொற்றுடன் தற்போது மருத்துவமனைகளில் சிகிச்சையில் உள்ளனர். 39 ஆயிரத்து 402 பேர் குணமடைந்து வீடு திரும்பியுள்ளனர். புதுவையில் 316, காரைக்காலில் 143, ஏனாமில் 11, மாகியில் 28 பேர் என 498 பேர் அவரவர் வீடுகளில் தனிமைப்படுத்தப்பட்டுள்ளனர். புதுவை மாநிலத்தில் தற்போது 755 பேர் கொரோனா தொற்றுடன் சிகிச்சை பெற்று வருகின்றனர். புதுவை மாநிலத்தில் கொரோனாவுக்கு 679 பேர் பலியாகியுள்ளனர்.
இத்தகவல் சுகாதாரத்துறை வெளியிட்டுள்ள செய்திக்குறிப்பில் குறிப்பிடப்பட்டுள்ளது.
பா.ஜனதா தேர்தல் அறிக்கையை மத்திய நிதி மந்திரி நிர்மலாசீத்தாராமன் ஆனந்தா இன் ஓட்டலில் இன்று வெளியிட்டார். அப்போது அவர் பேசியதாவது:
தேர்தல் வாக்குறுதிகளை நிறைவேற்ற நிதி தேவைப்படும். அதனால் தான் நிதி மந்திரியை அனுப்பி வைத்துள்ளார்கள். அது உண்மைதான். மறுக்கவும் கூடாது.
தேர்தல் அறிக்கையில் புதுவையில் 51 சதவீதம் பெண்கள் வாக்குறுதியை நிறைவேற்ற கடமைப்பட்டுள்ளோம். பெண்களுக்கு வாக்குறுதிகள் சொல்லவே வந்துள்ளேன். பா.ஜனதாவில் பெண்களுக்கு உரிய முக்கியத்துவம் தரப்படும்.
2008-ல் பா.ஜனதாவில் 33 சதவீதம் பெண்களுக்கு இடஒதுக்கீடு வழங்க தீர்மானம் நிறைவேற்றப்பட்டது. கட்சியில் கிராமப்புறத்தில் இருந்து உயர்மட்ட பதவி வரை வழங்க முடிவு செய்யப்பட்டது.
அப்போது முதல் தற்போது வரை பெண்களுக்கு மரியாதை தரும் கட்சியாக உள்ளது.
அரசியலில் பெண்களா? என குடும்பத்தில் யோசிப்பர். இடஒதுக்கீடு மூலம் உரிய அங்கீகாரம் கொடுத்து நான் உயர் பதவிக்கு வந்துள்ளேன். பெண்களின் வளர்ச்சிக்கு முக்கியத்துவம் தரும் கட்சி. தற்போது நிதி மந்திரியாக நான் இங்கு வந்திருக்க முடியாது.
2-வது பெண் நிதி மந்திரி. ஆனால், முதலில் இருந்தவர் யார்? பிரதமராக இருந்தபோது நிதி மந்திரியாகவும், பாதுகாப்பு துறை மந்திரியாகவும் இருந்தார்.
ஆனால், பா.ஜனதாவில் நான் பிரதமராக இல்லை, எனக்கு அந்த பதவிகளை கொடுத்தனர். பெண்களை முன்னேற்ற வேண்டும், வாய்ப்பு தர வேண்டும், ஆதரவு தர வேண்டும் என பா.ஜனதா நினைக்கும் கட்சி. இதனால்தான் பெண்களுக்கு முக்கியத்துவம் அளித்து தேர்தல் அறிக்கை தயாரிக்கப்பட்டுள்ளது.
பல மாநிலங்களில் அளித்த வாக்குறுதிகள்போல இங்கும் அளிக்கப்பட்டுள்ளது. பல மாநிலத்தில் வாக்குறுதிகளை நிறைவேற்றியுள்ளோம். அதே போல இந்த வாக்குறுதிகள் புதுவையிலும் நிறைவேற்றப்படும்.
அடித்தட்டு மக்களிடம் பெற்ற கோரிக்கைகள் வாக்குறுதிகளாகி உள்ளது. பிரதமர் மோடிக்கு நல்ல பெயர் வந்துவிடக்கூடாது என பல திட்டங்களை புதுவையில் நிறைவேற்றவில்லை.
மக்களுக்காக இதனை செய்திருக்க வேண்டாமா? உங்கள் நலனுக்காகவா மக்கள் தேர்வு செய்தார்கள். ரேஷன்கடையை மூடினால் என்ன மாதிரி ஆட்சி? மீனவர்கள், ஏழைகளுக்கு வீடு கட்டும் திட்டத்தை மோடி செயல்படுத்தினார். ஆனால், இதனை நிறைவேற்றவில்லை. புதுவையில் சுற்றுலா, கல்வி, மருத்துவமனைக்காக அதிகமானவர்கள் வந்து சென்றனர்.
ஆனால், தற்போது அந்த நிலை இல்லை. பிரதமர் மோடி சிறந்த மாநிலமாக புதுவையை மாற்றுவோம் என வாக்குறுதி அளித்துள்ளார். அதற்கு தேவையான அனைத்தையும் நிறைவேற்றக்கூடியதுதான் தேர்தல் அறிக்கை.
மீன்வளத்துறைக்கு தனி அமைச்சகம் அமைத்தது பிரதமர். முன்னாள் முதல்-அமைச்சர் நாராயணசாமி ராகுலிடம் மொழிமாற்றம் செய்தது போல மக்கள் குறைகளை திரித்து சொல்லவில்லை. மீனவர்கள் விரும்பியதை சொல்லியுள்ளோம்.
விவசாயிகள் போல மீனவர்களுக்கும் நலத்திட்டங்கள் நிறைவேற்றப்படும். புதுவையில் துறைமுகம் ஆழம் குறையாமல் இருக்க வேண்டும். 2009 முதல் துறைமுகம் தூர்வாரப்படவில்லை. இந்த துறைமுகம் கட்டப்படும்.
மீன்பிடி இறங்கு தளம் அமைக்கப்படும். விவசாயிகளுக்கு வழங்கப்படுவது போல மீனவர்களுக்கும் உதவித்தொகை வழங்கப்படும். மற்ற மாநிலங்கள்போல புதுவை முன்னேற வேண்டும் என்ற ஆசை பிரதமருக்கு உள்ளது. அதனால்தான் என்னை புதுவைக்கு அனுப்பி வைத்துள்ளார்.
மத்தியிலும் பா.ஜனதா, மாநிலத்திலும் பா.ஜனதா ஆட்சி வர வேண்டும். அப்படி வந்தால்தான் தடைபட்டு வந்த நிலை மாறி, முழு வேகத்தில் முன்னேறும் வாய்ப்பு உள்ளது.
தொண்டர்கள் தளர்ச்சியடையாமல் வீடு, வீடாக சென்று தேர்தல் அறிக்கையை எடுத்துக்கூறி ஏன் தாமரை மலர வேண்டும் என எடுத்து கூற வேண்டும். பா.ஜனதா ஆட்சிக்கு வந்தால்தான் புதுவையின் தனித்தன்மை மேம்பாடு அடையும்.
இவ்வாறு அவர் பேசினார்.
