விருதுநகர்

வத்திராயிருப்பு

விருதுநகர் மாவட்டம் வத்திராயிருப்பு அருகே மேற்கு தொடர்ச்சி மலைப்பகுதியில் சதுரகிரி சுந்தரமகாலிங்கம் கோவில் அமைந்துள்ளது. இங்கு பங்குனி மாத அமாவாசையை முன்னிட்டு இன்று அதிகாலை முதலே ஆயிரக்கணக்கான பக்தர்கள் குவிந்தனர்.

தாணிப்பாறை வனத்துறை காலை 6.30 மணிக்கு கேட் திறக்கப்பட்டதும் பக்தர்களுக்கு கிருமிநாசினி கொண்டு கைகளை சுத்தம் செய்தபின்னர் மலையேறி சாமிதரிசனம் செய்ய அனுமதி வழங்கப்பட்டது.

பக்தர்கள் தாணிப்பாறை அடிவாரம் பகுதியிலிருந்து மலைப்பாதை வழியாக நடந்து சென்று சதுரகிரி சுந்தரமகாலிங்கம் கோவிலில் தரிசனம் செய்தனர். மதியம் 12.30மணியிலிருந்து 2மணிவரை பால், பழம், இளநீர், விபூதி, சந்தனம் உள்ளிட்ட 18வகையான அபிஷேக பொருட்களால் அபிஷேகம் நடந்தது.

பின்னர் சதுரகிரி சுந்தரமகாலிங்க சுவாமி சிறப்பு அலங்காரத்தில் பக்தர்களுக்கு அருள்பாலித்தார். சிறப்பு வழிபாட்டில் பக்தர்கள் கலந்து கொண்டு சாமிதரிசனம் செய்தனர்.

 பக்தர்களுக்கு தேவையான அடிப்படை வசதிகளை கோவில் நிர்வாகத்தினர் செய்திருந்தனர். தாணிப்பாறை அடிவார பகுதியில் போலீசார் பாதுகாப்பு பணியில் ஈடுபட்டனர்.

விருதுநகர்

திருச்சுழி அருகே உள்ள செம்பொன்நெருஞ்சியை சேர்ந்தவர் மீனா(வயது 23). இவருக்கும் விருதுநகர் சூலக்கரையை சேர்ந்த சங்கர் என்பவருக்கும் திருமணம் நடந்தது.

2 மாதத்தில் கருத்து வேறுபாடு காரணமாக மீனா கணவரை பிரிந்துவந்து விட்டார். அதன் பிறகு கருப்பசாமி நகரைச் சேர்ந்த முருகேசன் என்பவருடன் பழக்கம் ஏற்பட்டு திருச்சுழியில் அவருடன் 3 ஆண்டுகள் வசித்து வந்தார்.

அதன் பிறகு அவருடன் கருத்து வேறுபாடு ஏற்பட்டு நத்தகுளத்தை சேர்ந்த கார்மேகத்துடன் பழக்கம் ஏற்பட்டு சேர்ந்து வாழ்ந்து வந்தார்.

 இந்த நிலையில் கார்மேகம் வேறுபெண்ணை திருமணம் செய்யமுயன்றதை மீனா தட்டிகேட்டார். இதில் ஏற்பட்ட தகராறில் கார்மேகம் சோளக்காட்டில் வைத்து தன்னை கத்தியால் குத்தியதாக திருச்சுழி போலீசில் புகார் செய்தார். காயமடைந்த அவர் திருச்சுழி அரசு ஆஸ்பத்திரியில் சிகிச்சை பெற்று வருகிறார்.

இதுகுறித்த புகாரின்பேரில் போலீசார் வழக்குப்பதிவு செய்து விசாரணை நடத்தி வருகின்றனர்.

விருதுநகர்:

விருதுநகரில் 22 வயது இளம்பெண் பாலியல் வன்கொடுமை செய்யப்பட்ட வழக்கில் ஹரிஹரன், ஜூனத் அகமது, பிரவீன், மாடசாமி ஆகிய 4 பேர் மற்றும் 4 சிறுவர்கள் என 8 பேர் கைது செய்யப்பட்டனர்.

ஹரிஹரன் உள்ளிட்ட 4 பேர் மதுரை மத்திய சிறையிலும், சிறுவர்கள் 4 பேரும் ராமநாதபுரம் கூர்நோக்கு இல்லத்திலும் அடைக்கப்பட்டனர். விருதுநகர் பாண்டியன்நகர் போலீஸ் நிலையத்தில் பதியப்பட்டிருந்த இந்த வழக்கு, முதலமைச்சர் உத்தரவைத் தொடர்ந்து சி.பி.சி.ஐ.டி. போலீசாருக்கு மாற்றப்பட்டது.

இதையடுத்து சி.பி.சி.ஐ.டி. போலீசார் கைது செய்யப்பட்டவர்கள் மீது 6 பிரிவுகளின் கீழ் வழக்கு பதிந்தனர். மேலும் தங்களின் விசாரணையை துரிதப்படுத்தினர். முதலில் பாதிக்கப்பட்ட பெண்ணிடம் சி.பி.சி.ஐ.டி அதிகாரிகள் 2 நாட்கள் விசாரணை நடத்தினர். மேலும் கைது செய்யப்பட்டவர்களின் வீடுகளிலும் சோதனை நடத்தினர்.

இந்தநிலையில் மதுரை சிறையில் அடைக்கப்பட்டுள்ள ஹரிஹரன் உள்ளிட்ட 4 பேரையும் 7 நாள் போலீஸ் காவலில் சி.பி.சி.ஐ.டி. போலீசார் எடுத்தனர். அவர்களிடம் நேற்று முன்தினம் முதல் விசாரணை நடத்தி வருகின்றனர். இந்த விசாரணையில் விருதுநகர் மாவட்ட சி.பி.சி.ஐ.டி. போலீசார் மட்டுமின்றி, மதுரை உள்ளிட்ட 5 மாவட்ட சி.பி.சி.ஐ.டி. போலீசாரும் ஈடுபட்டுள்ளனர்.

கைதானவர்கள் கொடுத்த தகவலின் அடிப்படையில் அவர்களது குடும்பத்தினர், நண்பர்கள் என ஏராளமானவர்களிடம் விசாரணை நடத்தப்பட்டு வருகிறது. இந்தநிலையில் கைதானவர்களிடம் சி.பி.சி.ஐ.டி. போலீசார் இன்று 3-ம் நாளாக விசாரணை நடத்தி வருகின்றனர்.

பாலியல் வன்கொடுமை நடந்து வீடியோ எடுத்ததாக கூறப்படும் விருதுநகர் பெத்தனாச்சி நகரில் உள்ள மருந்து குடோனுக்கு ஹரிஹரன், ஜூனத் அகமது ஆகிய இருவரையும் போலீசார் அழைத்துச் சென்று விசாரணை நடத்தினார்கள். மேலும் சில இடங்களுக்கும் அவர்களை அழைத்துச் சென்று விசாரணை மேற்கொண்டனர்.

அப்போது மருந்து குடோனில் சில இடங்களில் மறைத்து வைக்கப்பட்டிருந்த போதை ஊசிகள் மற்றும் மருந்துகள் பறிமுதல் செய்யப்பட்டதாக கூறப்படுகிறது. ஆனால் அது தொடர்பான தகவல்களை தெரிவிக்க சி.பி.சி.ஐ.டி. போலீசார் மறுத்து விட்டனர்.

ராஜபாளையம்:

விருதுநகர் மாவட்டம் ராஜபாளையம் அருகே உள்ள சத்திரப்பட்டி, சமுசிகாபுரம், சங்கரபாண்டியபுரம், அய்யனாபுரம் போன்ற பகுதிகளில் பேண்டேஜ் மருத்துவத் துணி உற்பத்தி செய்யும் நிறுவனங்கள் உள்ளன. உலக அளவில் பேண்டேஜ் உற்பத்தியில் இப்பகுதி முக்கிய இடம் வகிக்கின்றது.

சமீப காலமாக இந்தியா முழுவதும் பருத்தி, பஞ்சு, நூல் விலை கடுமையான ஏற்றம் காரணமாக தற்போது கடுமையான சரிவை பேண்டேஜ் மருத்துவத் துணி உற்பத்தி செய்யும் நிறுவனங்கள் சந்தித்து வருகின்றன.

கடந்த மூன்று மாத காலத்திற்கு முன்பு வரை 356 கிலோ கொண்ட நூல்கண்டு ஒன்றுக்கு ரூ.56,000 வரை இருந்த நிலை மாறி, கடந்த மூன்று மாத காலத்திற்குள் கண்டு விலை ரூ.90,000 எட்டியுள்ளது.

இந்த விலை வரலாறு காணாத அளவிற்கு உயர்ந்துள்ளது. மத்திய அரசு பருத்தி ஏற்றுமதியை தடை செய்ய வேண்டும் எனவும், பஞ்சு விலையை உடனடியாக கட்டுப்பாட்டிற்குள் கொண்டுவந்து 6 மாதங்களுக்கு ஒருமுறை விலை நிர்ணயத்தை மாற்றி அமைக்கலாம் எனவும் இப்பகுதியைச் சேர்ந்த பேண்டேஜ் உற்பத்தி தொழில் அதிபர்கள் கருத்து தெரிவித்துள்ளனர்.

இந்த தொழிலை நம்பி நேரடியாகவும், மறைமுகமாகவும் 50 ஆயிரம் தொழிலாளர்கள் வாழ்க்கை நடத்தி வருகின்றனர். சுமார் 10 ஆயிரம் விசைத்தறிகளில் பேண்டேஜ் உற்பத்தி செய்யப்பட்டு உள்ளூர் மற்றும் பல்வேறு நாடுகளுக்கு இங்கிருந்துதான் அனுப்பப்பட்டு வருகின்றன.

கடந்த 3 மாத காலத்திற்கு முன்பு பேண்டேஜ் அனுப்புவதற்கு ஆர்டர் எடுத்த நிலையில் அந்த விலையிலிருந்து கடுமையான விலை உயர்ந்து தற்போது அதே விலைக்கு சரக்குகளை அனுப்ப இயலாத நிலை உள்ளதாக கவலை தெரிவித்துள்ளனர்.

இதே நிலை நீடித்தால் இந்த தொழிலில் கடுமையான பாதிப்பு இருக்கும் எனவும், சாதாரண ஏழை எளிய மக்கள் பயன்படுத்தும் பேண்டேஜ் விலை உயர்வால் ஏற்கனவே விலைவாசி உயர்வால் கஷ்டப்பட்டு கொண்டிருக்கின்ற பொதுமக்கள் இந்த விலை உயர்வால் மேலும் சிக்கலைச் சந்திக்க வேண்டிய நிலையில் உள்ளதாக தெரிவித்தனர்.

எனவே மத்திய அரசு உடனடியாக பஞ்சு விலையை குறைக்க நடவடிக்கை எடுக்கவும், மாநில அரசு மத்திய அரசிற்கு உரிய அழுத்தம் தந்து விலையை குறைக்க நடவடிக்கை எடுக்கவும் இப்பகுதி தொழிலதிபர்கள் கோரிக்கை விடுத்துள்ளனர்.

விருதுநகர் மாவட்டம் வத்திராயிருப்பு அருகே மேற்கு தொடர்ச்சி மலைப் பகுதியில் சதுரகிரி சுந்தர மகாலிங்கம் கோவில் அமைந்துள்ளது. பிரசித்தி பெற்ற இக்கோவிலுக்கு அமாவாசை, பவுர்ணமியை முன்னிட்டு 4 நாட்களுக்கு பக்தர்கள் தரிசனம் செய்ய அனுமதி வழங்கப்பட்டு வருகிறது.

அதன்படி பங்குனி மாத அமாவாசை, பிரதோ‌ஷத்தை முன்னிட்டு சதுரகிரி சுந்தரமகாலிங்கம் கோவிலுக்கு செல்ல நேற்று முதல் 4 நாட்களுக்கு அனுமதி வழங்கப்பட்டது. நேற்று திரளான பக்தர்கள் மலையேறி சாமி தரிசனம் செய்தனர்.

பிரதோ‌ஷமான இன்று காலை பக்தர்கள் தாணிப் பாறை அடிவாரத்தில் இருந்து 7 மணிக்கு மலையேற அனுமதிக்கப்பட்டனர். பிரதோ‌ஷத்தை முன்னிட்டு சுந்தர மகாலிங்கம் சுவாமிக்கு மாலை 4.30 மணியிலிருந்து 6 மணிவரை பால், பழம், இளநீர், விபூதி, சந்தனம் உள்ளிட்ட 18 வகையான அபிஷேக பொருட்களால் அபிஷேகம் நடக்கிறது. சுந்தர மகாலிங்க சுவாமி சிறப்பு அலங்காரத்தில் பக்தர்களுக்கு அருள் பாலித்தார்.

பக்தர்களுக்கு தேவையான அடிப்படை வசதிகளை கோவில் நிர்வாகத்தினர் செய்திருந்தனர். தாணிப்பாறை அடிவார பகுதியில் வத்திராயிருப்பு இன்ஸ்பெக்டர் பாலாஜி தலைமையிலான போலீசார் பாதுகாப்பு பணியில் ஈடுபட்டனர்.

விருதுநகர்:

அரசு ஆஸ்பத்திரி என்றாலே பொதுமக்கள் செல்ல தயங்கும் நிலையில் பல குறைபாடுகள் அங்குள்ளன. இதன் காரணமாக பலரும் அரசு மருத்துவமனைகளை தவிர்த்து கூடுதல் பணம் செலவானாலும் பரவாயில்லை என தனியார் மருத்துவமனைக்கு செல்கின்றனர்.

சுகாதார சீர்கேடு, போதிய கவனிப்பின்மை என அடுக்கடுக்கான புகார்களை அரசு ஆஸ்பத்திரி மீது பொதுமக்கள் கூறி வருகின்றனர். இதனை உறுதிப்படுத்தும் வகையில் அரசு ஆஸ்பத்திரி மகப்பேறு பிரிவில் பச்சிளம் குழந்தையுடன் பெண் படுத்திருந்த இரும்பு கட்டில் உடைந்து பதட்டத்தை ஏற்படுத்தி உள்ளது.

விருதுநகர் மாவட்டம் அரசு ஆஸ்பத்திரியில் தான் இந்த சம்பவம் நடந்துள்ளது. விருதுநகர் பரங்கிலி நாதபுரத்தை சேர்ந்தவர் முனியசாமி. இவரது மனைவி முத்துலட்சுமி.

இவர் 2-வது பிரசவத்திற்காக விருதுநகர் அரசு மருத்துவமனையில் அனுமதிக்கப்பட்டார். அங்கு அவருக்கு கடந்த 24-ந்தேதி ஆண் குழந்தை பிறந்தது.

தொடர்ந்து மகப்பேறு பிரிவில் குழந்தையுடன் தங்கி முத்துலட்சுமி சிகிச்சை பெற்று வந்தார். நேற்று இரவு குழந்தையுடன் அவர் படுத்திருந்த இரும்பு கட்டில் திடீரென உடைந்து விழுந்தது.

இதனால் கட்டிலில் படுத்திருந்த முத்துலட்சுமியும், குழந்தையும் கீழே விழுந்தனர். இதில் குழந்தைக்கு காயம் ஏற்பட்டது. உடனடியாக குழந்தைக்கு ஸ்கேன் எடுக்கப்பட்டது. அப்போது குழந்தையின் தலையில் காயம் இருப்பது தெரியவந்தது. இதனை தொடர்ந்து மேல் சிகிச்சைக்காக குழந்தையும், தாயும் மதுரை அரசு ஆஸ்பத்திரிக்கு அனுப்பி வைக்கப்பட்டனர். அங்கு குழந்தைக்கு தீவிர சிகிச்சை அளிக்கப்பட்டது.

இதுகுறித்து விருதுநகர் அரசு ஆஸ்பத்திரி டீன் சங்குமணி கூறுகையில், பிறந்த குழந்தையை பார்க்க வந்த பெண்ணின் உறவினர்கள் கட்டிலில் அமர்ந்துள்ளனர். அதிக எண்ணிக்கையில் அவர்கள் அமர்ந்ததால் கட்டில் உடைந்து இருக்கலாம் என தெரிகிறது.

இதுகுறித்து விசாரணை நடத்த உறைவிட மருத்துவர் டாக்டர் முருகேசன் தலைமையில் விசாரணைக்குழு அமைக்கப்பட்டுள்ளது. இந்த குழு விசாரணையை தொடங்கி உள்ளது.

மகப்பேறு பிரிவில் 30 படுக்கைகள் உள்ளன. அந்த படுக்கைகளும் உறுதியாக உள்ளதா? என்பது குறித்து குழு ஆய்வு செய்து அறிக்கை அளிக்கும். அதன் பிறகு பழுதான கட்டில்களை சீரமைக்க நடவடிக்கை எடுக்கப்படும்.

மதுரை அரசு ஆஸ்பத்திரியில் சிகிச்சை பெறும் குழந்தை நலமாக உள்ளது. தொடர்ந்து டாக்டர்களின் கண்காணிப்பில் உள்ளது என்றார்.