புதுக்கோட்டை

ஆலங்குடி:

புதுக்கோட்டை மாவட்டம் ஆலங்குடி அருகே உள்ள வடவாளம் கிராமத்தை சேர்ந்தவர் ஞானபிரகாசம், முன்னாள் ஊராட்சி தலைவர். தற்போது அவரது மனைவி ஊராட்சி மன்ற தலைவராக உள்ளார்.

கடந்த சில நாட்களுக்கு முன்பு ஞானபிரகாசம் அப்பகுதியில் சென்ற போது மர்மநபர்கள் சிலர் அவரை வழிமறித்து சரமாரி தாக்கியதோடு, அரிவாளால் தலையில் வெட்டினர். இதில் பலத்த காயமடைந்த அவர் புதுக்கோட்டை அரசு மருத்துவக்கல்லூரி மருத்துவமனையில் சிகிச்சை பெற்று வருகிறார்.

இதுகுறித்து ஞானபிரகாசம் சம்பட்டிவிடுதி போலீசில் புகார் செய்தார். புகாரில் வடவாளம் கிராம நிர்வாக அலுவலர் அம்பிகா தூண்டுதலின் பேரில் அவரது ஆதரவாளர்கள் தன்னை தாக்கியதாக தெரிவித்து இருந்தார்.

வடவாளம் கிராம நிர்வாக அதிகாரி அம்பிகா பணிகளை சரிவர செய்யவில்லை என்று ஞானபிரகாசம் தொடர்ந்து புகார் தெரிவித்து வந்துள்ளார். இது தொடர்பான பிரச்சனையில் ஞானபிரகாசம் தாக்கப்பட்டதாக தெரிகிறது.

இதனிடையே ஞானபிரகாசத்தின் ஆதரவாளர்கள் இச்சடி புதுக்கோட்டை-தஞ்சாவூர் சாலையில் சாலை மறியல் போராட்டத்தில் ஈடுபட்டனர். இதில் 500-க்கும் மேற்பட்டோர் பங்கேற்றனர். ஆலங்குடி டி.எஸ்.பி. முத்துராஜா தலைமையிலான போலீசார் சென்று பேச்சுவார்த்தை நடத்தினர். அப்போது பொதுமக்கள், கிராம நிர்வாக அதிகாரி அம்பிகா மீது உரிய நடவடிக்கை எடுக்க வேண்டும் என்றனர்.

புதுக்கோட்டை தாசில்தார் மற்றும் வருவாய்த்துறை அதிகாரிகளும் சென்று பேச்சுவார்த்தை நடத்தினர். அப்போது வி.ஏ.ஓ. அம்பிகா மீது துறைரீதியான நடவடிக்கை எடுக்கப்படும் என்று கூறியதையடுத்து பொதுமக்கள் மறியலை கைவிட்டு கலைந்து சென்றனர்.

இந்தநிலையில் வடவாளம் கிராம நிர்வாக அதிகாரி அம்பிகா, கந்தர்வக்கோட்டை தாலுகா கோமாபுரம் கிராம நிர்வாக அதிகாரியாக பணியிட மாற்றம் செய்யப்பட்டார். இதற்கான உத்தரவை புதுக்கோட்டை வருவாய் கோட்டாட்சியர் தண்டாயுதபாணி பிறப்பித்துள்ளார்.

புதுக்கோட்டை:

காவிரி-வைகை-குண்டாறு நதிகளை இணைக்கும் திட்டத்தை தமிழக அரசு அறிவித்தது. இந்த திட்டம் செயல்படுத்தப்பட்டால் காவிரி டெல்டா மாவட்டங்களில் வெள்ள அபாயம் நீங்கும். உபரிநீர் மூலம் கரூர், திருச்சி, புதுக்கோட்டை, சிவகங்கை, ராமநாதபுரம், விருதுநகர், தூத்துக்குடி ஆகிய 7 மாவட்டங்களைச் சேர்ந்த 3,37,717 எக்டேர் (8.30 லட்சம் ஏக்கர்) நிலங்கள் பாசன வசதி பெறும். மேலும் 50 லட்சம் விவசாயிகள் பயன்பெறுவர்.

இத்திட்டத்தை ரூ.14 ஆயிரம் கோடியில் செயல்படுத்தப்போவதாக முதல்-அமைச்சர் எடப்பாடி பழனிசாமி அறிவித்துள்ளார். மேலும் திட்டப்பணிக்காக புதுக்கோட்டை குன்னத்தூரில் இருந்து கவிநாடு வெள்ளாறு வரை 52 கி.மீ.க்கு நிலம் கையகப்படுத்த நடவடிக்கை எடுக்கப்பட்டு வருகிறது.

இதனிடையே காவிரி- குண்டாறு இணைப்பு திட்டம் மற்றும் பல்வேறு திட்டப்பணிகளை தொடங்கிவைக்க வேண்டுமென முதல்-அமைச்சர் எடப்பாடி பழனிசாமி டெல்லி சென்று பிரதமர் நரேந்திர மோடியை சந்தித்து அழைப்பு விடுத்தார்.

இந்த நிலையில் வருகிற 14-ந்தேதி சென்னை வரும் பிரதமர் நரேந்திர மோடி பல்வேறு வளர்ச்சி பணிகளை தொடங்கி வைப்பதுடன், காவிரி-வைகை-குண்டாறு இணைப்பு திட்டத்தையும் தொடங்கி வைக்கிறார். இத்தகவலை தமிழக மக்கள் நல் வாழ்வுத்துறை அமைச்சர் டாக்டர் சி.விஜயபாஸ்கர் புதுக்கோட்டை மாவட்டம் விராலிமலை மதயானைப்பட்டியில் நடைபெற்ற நிகழ்ச்சியின்போது தெரிவித்தார்.

மேலும் அவர் கூறுகையில், புதுக்கோட்டை மாவட்ட மக்களின் 100 ஆண்டு கால கனவு திட்டமான காவிரி-வைகை-குண்டாறு இணைப்பு திட்டத்தை நிறைவேற்றுவதற்காக தமிழக முதல்-அமைச்சர் எடப்பாடி பழனிசாமி பல்வேறு முயற்சிகளை தொடர்ந்து மேற்கொண்டு வந்தார்.

அதன்பலனாக தற்போது அந்த திட்டம் நிறைவேற போகிறது. இதையடுத்து முதற்கட்டமாக இந்த திட்டத்திற்காக முதல்-அமைச்சர் எடப்பாடி பழனிசாமி ரூ.300 கோடி நிதியை ஒதுக்கினார். அதன் மூலம் கரூர், புதுக்கோட்டை மாவட்டங்களில் நிலங்கள் கையப்படுத்துதல் உள்ளிட்ட பணிகள் தொடங்கி நடைபெற்று வருகிறது.

இந்த திட்டத்தை பிரதமர் நரேந்திர மோடி வருகிற 14-ந்தேதி சென்னையில் நடைபெறும் நிகழ்ச்சியில் காணொளி காட்சி மூலம் அடிக்கல் நாட்டி தொடங்கி வைக்க உள்ளார். அதன் பிறகு முதல்-அமைச்சர் எடப்பாடி பழனிசாமி நேரில் வந்து திட்டப்பணிகளை தொடங்கி வைக்கிறார்.

இதன் மூலம் வறட்சியான மாவட்டமாக இருந்த புதுக்கோட்டை பசுமையான மாவட்டமாக மாறும். 100 ஆண்டு கால கனவுத்திட்டம் தற்போது நிறைவேற உள்ளது. இதற்காக விவசாயிகள் மற்றும் பொதுமக்கள் அரசுக்கு நன்றி தெரிவித்துள்ளனர்.

காவிரி-குண்டாறு இணைப்பு செயல்படுத்தப்பட உள்ளதையடுத்து புதுக்கோட்டை மற்றும் 7 மாவட்ட விவசாயிகள் மகிழ்ச்சியடைந்துள்ளனர்.

இவ்வாறு அவர் கூறினார்.

அறந்தாங்கி:

புதுக்கோட்டை மாவட்டம், அறந்தாங்கி அருகே ஆவணத்தாங்கோட்டையை சேர்ந்தவர் மீனாம்பாள் (வயது 65). இவரது மகன் இறந்ததால் மீனாம்பாளின் வீட்டில் மருமகள் லதா மட்டும் வசித்து வந்தார். லதாவுக்கும், மீனாம்பாளுக்கும் மனக்கசப்பு இருந்ததால் வீட்டின் தாழ்வாரத்தில் மீனாம்பாள் தனியாக சமைத்து சாப்பிட்டு வந்தார்.

இந்த நிலையில் மீனாம்பாள் அறந்தாங்கியில் வசித்து வரும் இளைய மகள் விமலாவின் வீட்டிற்கு சென்றிருந்த நேரத்தில் திடீரென ஏற்பட்ட உடல் நலக்குறைவால் அங்கேயே இறந்து விட்டார். இதையடுத்து அவரது உறவினர்கள் மீனாம்பாளின் உடலை ஆவணத்தாங்கோட்டையில் உள்ள அவரது சொந்த வீட்டிற்கு எடுத்து வந்தனர்.

வீட்டிற்கு கொண்டு வந்தபோது, உடலை வீட்டிற்குள் லதா அனுமதிக்க மறுத்தார். இதனால் பக்கத்து வீட்டினர் சம்மதத்தின் பேரில் அங்கு வைத்து இறுதி சடங்கு நடந்தது.

பின்னர் மீனாம்பாளின் உடலை எடுத்து சென்று இளஞ்செழியன் குடும்பத்தினர் மற்றும் உறவினர்கள் தகனம் செய்தனர்.