காஞ்சிபுரம்

காஞ்சிபுரம்:

வளிமண்டல மேலடுக்கு சுழற்சி காரணமாக சென்னை மற்றும் புறநகரின் ஒரு சில பகுதிகளில் மழை பெய்ய வாய்ப்புள்ளது என வானிலை மையம் தெரிவித்து இருந்தது.

இந்நிலையில் இன்று அதிகாலை முதல் சென்னை மற்றும் செங்கல்பட்டு, திருவள்ளூர், காஞ்சிபுரம்  மாவட்டங்களில் தொடர்ந்து மழை பெய்து வருகிறது.

காஞ்சிபுரம் மாவட்டத்தில் தொடர்ந்து மழை பெய்து வருவதால் செம்பரம்பாக்கம் ஏரியில் நீர்வரத்து அதிகரித்துள்ளது.

செம்பரம்பாக்கம் ஏரியின் நீர்மட்டம் 23 அடியை தொட்டு உள்ளது. ஏரியின் நீர்மட்டம் அதிகரித்துள்ளதால் செம்பரம்பாக்கம் ஏரியில் இருந்து இன்று மதியம் 1 மணிக்கு உபரிநீர் திறக்கப்படுகிறது. ஏரியில் இருந்து முதற்கட்டமாக வினாடிக்கு 500 கனஅடி நீர் வெளியேற்றப்பட உள்ளது.

இதையடுத்து ஏரி கரையோரம் வசிக்கும் மக்களுக்கு வெள்ள அபாய எச்சரிக்கை விடுக்கப்பட்டுள்ளது.

ஆலந்தூர்:

சென்னை மீனம்பாக்கம் பன்னாட்டு விமான நிலையத்தில் கடந்த ஆண்டு ஜனவரி மாதம் முதல் மார்ச் மாதம் வரை வெளிநாடுகளில் இருந்து கடத்தி வரப்பட்டதாக 10 வழக்குகளில் ரூ.7.25 கோடி மதிப்புள்ள உயர்ரக கஞ்சா, போதை பவுடர்கள் சிக்கியது.

ஆனால் கொரோனா ஊரடங்கு அறிவிக்கப்பட்ட கடந்த மார்ச் மாதம் முதல் நேற்று வரை சென்னை விமான நிலையத்தில் போதை பொருட்கள் கடத்தல் பெருமளவு அதிகரித்து விட்டது.

கொரோனா ஊரடங்கு காரணமாக மார்ச் மாதம் முதல் பன்னாட்டு விமான சேவை நிறுத்தப்பட்டு, சிறப்பு விமானங்கள் மட்டுமே இயக்கப்பட்டு வருகிறது. ஆனாலும் கடந்த 9 மாதங்களாக சரக்கு விமானங்களில் போதை பொருட்கள் ஏற்றுமதி, இறக்குமதி அமோகமாக நடந்துள்ளன.

சென்னை விமான நிலையத்தில் கடந்த 9 மாதங்களில் சுங்கத் துறை இலாகா கமிஷனர் ராஜன் சவுத்ரி தலைமையிலான சுங்க இலாகா அதிகாரிகள் போதை பொருட்கள் கடத்தல் சம்பந்தமாக 100 வழக்குகள் பதிவு செய்துள்ளனா்.

இந்த வழக்குகளில் ஒரு பெண், கல்லூரி மாணவர்கள் உள்பட 20 பேர் வரை கைது செய்யப்பட்டு உள்ளனா். இந்த வழக்குகளில் ரூ.3 கோடியே 42 லட்சம் மதிப்புள்ள போதை பொருட்களை சுங்க இலாகா அதிகாரிகள் பறிமுதல் செய்துள்ளனா்.

சமீப காலமாக போதை பொருள் கடத்தும் முக்கிய முனையமாக சென்னை விமான நிலையம் மாறி உள்ளது. வெளிநாடுகள், வெளி மாநிலங்களை சேர்ந்தவர்களும் சென்னையை மையமாக வைத்து இந்த கடத்தலில் ஈடுபடுகின்றனா்.

சென்னை மற்றும் புறநகா் பகுதிகளில் இளைஞா்கள் பெருமளவு போதைக்கு அடிமையாகி இருப்பதால் விற்பனை அதிகமாக இருப்பதும், கடத்தலுக்கு சென்னை மிகவும் வசதியாக இருப்பதுவும் இதற்கு காரணம் என கூறப்படுகிறது.

இதுபற்றி சுங்க இலாகா அதிகாரிகள் கூறும்போது, சென்னை விமான நிலையத்தில் போதை பொருட்கள் கடத்தலை முழுமையாக தடுக்க தீவிர நடவடிக்கை எடுத்து வருகிறோம். இதன் காரணமாக சமீபகாலமாக போதை பொருட்கள் கடத்தல் கட்டுபடுத்தப்பட்டு உள்ளது. ஆன்-லைன் மூலம் வெளிநாடுகளில் சுலபமாக கிடைப்பதால் அவற்றை சரக்கு தபால் மூலம் கடத்திய சம்பவங்களே அதிகமாக நடைபெற்று உள்ளது என்றனர்.

காஞ்சீபுரம்:

காஞ்சீபுரம் அருகே திம்மசமுத்திரம் பாலாஜி நகரில் வசிப்பவர் சண்முகப்பிரியன் (வயது 35). இவருக்கு சரண்யா என்ற மனைவியும், கிருத்திகா, தன்ஷிகா என்ற 2 பெண் குழந்தைகளும் உள்ளனர். இவர் ஒரகடத்தில் உள்ள ஒரு தனியார் நிறுவனத்தில் மேலாளராகப் பணிபுரிந்து வருகிறார்.

இந்நிலையில் சண்முகப்பிரியன் தனது குழந்தையின் மருத்துவ பரிசோதனைக்காக வீட்டை பூட்டிவிட்டு குடும்பத் துடன் சென்னையில் உள்ள ஆஸ்பத்திரிக்கு சென்று விட்டார். சிகிச்சை முடிந்ததும் அங்குள்ள உறவினர் ஒருவர் வீட்டில் மனைவி, குழந்தைகளை தங்க வைத்துவிட்டு, அவர் பணிக்கு சென்று விட்டார்.

இதையடுத்து, தனது பணியை முடித்துவிட்டு மீண்டும் சென்னையில் உள்ள தனது மனைவி குழந்தைகளை அழைத்துக்கொண்டு நேற்றுமுந்தினம் திம்மசமுத்திரத்தில் உள்ள தனது வீட்டிற்குவந்துள்ளார்.

அப்போது வீட்டின் கதவு பூட்டு உடைக்கப்பட்டு இருந்ததை கண்டு அதிர்ச்சி அடைந்த அவர், உள்ளே சென்று பார்த்தார்.

அப்போது பீரோ உடைக்கப்பட்டு அதில் இருந்த 40 பவுன் நகை மற்றும் 1 கிலோ வெள்ளிப் பொருட்கள் திருட்டு போனதை கண்டு திடுக்கிட்டார். இதுகுறித்து சண்முகப்பிரியன் பாலுசெட்டி சத்திரம் போலீசில் புகார் செய்தார். சம்பவ இடத்துக்கு துணை போலீஸ் சூப்பிரண்டு மணிமேகலை, இன்ஸ்பெக்டர் வெற்றிச்செல்வன் மற்றும் போலீசார் விரைந்து சென்று பார்வையிட்டு ஆய்வு செய்தனர். கைரேகை நிபுணர்கள் வரவழைக்கப்பட்டு தடயங்கள் பதிவு செய்யப்பட்டது.மோப்பநாய் சிறிது தூரம் சென்று நின்றது.

அதைத்தொடர்ந்து, காஞ்சீபுரம் மாவட்ட போலீஸ் சூப்பிரண்டு டி.சண்முகப்பிரியா உத்தரவின்பேரில், தனிப்படை அமைக்கப்பட்டது. தனிப்படை போலீசார், கொள்ளை நடந்த வீட்டின் பகுதியில் உள்ள கண்காணிப்பு கேமரா காட்சி பதிவுகளை கொண்டு விசாரணை நடத்தி கொள்ளையர்களை வலைவீசி தேடி வருகின்றனர்.

இந்த கொள்ளை சம்பவம் அப்பகுதி மக்களிடையே பெரும் அச்சத்தை ஏற்படுத்தியுள்ளது.

சென்னை:

சென்னை மீனம்பாக்கம் பன்னாட்டு விமான நிலையத்துக்கு வரும் சிறப்பு விமானத்தில் சுங்க இலாகா கமிஷனர் ராஜன் சவுத்ரி தலைமையில் அதிகாரிகள், விமானத்தில் வந்த பயணிகளை தீவிரமாக கண்காணித்தனர்.

ஆலந்தூர்:

சென்னை மீனம்பாக்கம் பன்னாட்டு விமான நிலையத்துக்கு வரும் சிறப்பு விமானத்தில் பெரும் அளவில் தங்கம் கடத்தி வரப்படுவதாக விமான நிலைய சுங்க இலாகா கமிஷனர் ராஜன் சவுத்ரிக்கு ரகசிய தகவல் கிடைத்தது.

அவரது உத்தரவின்பேரில் சுங்க இலாகா அதிகாரிகள், விமானத்தில் வந்த பயணிகளை தீவிரமாக கண்காணித்தனர். அப்போது துபாயில் இருந்து சிறப்பு விமானம் சென்னை வந்தது. அதில் வந்த ராமநாதபுரத்தை சேர்ந்த முகமது ஹசன் மாலிக் (வயது 25), நாகப்பட்டினத்தை சேர்ந்த முகமது அசாருதீன் (31) ஆகியோரை சந்தேகத்தின்பேரில் நிறுத்தி விசாரித்தனர்.

அதிகாரிகளிடம் 2 பேரும் முன்னுக்குப்பின் முரணாக பேசியதால் அவர்களது உடைமைகளை சோதனை செய்தனர். அதில் எதுவும் இல்லாததால் இருவரையும் தனியறைக்கு அழைத்து சென்று சோதனை செய்தனர்.

அதில் 2 பேரும் உள்ளாடைக்குள் தங்கத்தை மறைத்து வைத்து கடத்தி வந்ததை கண்டுபிடித்தனர். அவர்களிடம் இருந்து ரூ.48 லட்சத்து 27 ஆயிரம் மதிப்புள்ள 937 கிராம் தங்கத்தை பறிமுதல் செய்தனர்.

இது தொடர்பாக 2 பேரையும் கைது செய்த சுங்க இலாகா அதிகாரிகள், மேலும் இதுபற்றி விசாரித்து வருகின்றனர்.

ஆலந்தூர்:

சென்னையை அடுத்த துரைப்பாக்கம் ஒக்கியம்பேட்டையை சேர்ந்தவர் ரமேஷ்குமார். இவரிடம் கடந்த 1½ ஆண்டுகளாக காரைக்குடி சாகவாயல் பகுதியை சேர்ந்த ராஜகோபால் (வயது 33) என்பவர் கார் டிரைவராக வேலை பார்த்து வந்தார். அதன்பிறகு திடீரென அவர் வேலையில் இருந்து நின்றுவிட்டார்.

இந்த நிலையில் தனது வீட்டில் 30 பவுன் நகைகள் மாயமாகி இருந்ததை கண்டு ரமேஷ்குமார் அதிர்ச்சி அடைந்தார். இதுபற்றி துரைப்பாக்கம் கண்ணகிநகர் போலீசில் புகார் செய்தார். அதன்பேரில் போலீசார் வழக்குப்பதிவு செய்து விசாரித்தனர்.

ரமேஷ்குமார் வீட்டில் ஏற்கனவே வேலை செய்து வந்ததால் சந்தேகத்தின்பேரில் திருப்போரூர் பகுதியில் இருந்த ராஜகோபாலை பிடித்து விசாரித்தனர். விசாரணையில் ரமேஷ்குமார் மற்றும் அவரது குடும்பத்தினர் வீட்டில் இல்லாத நேரத்தில் ராஜகோபால், கள்ளச்சாவி போட்டு கதவை திறந்து உள்ளே புகுந்து நகைகளை திருடியதை ஒப்புக்கொண்டார்.

அவரை போலீசார் கைது செய்தனர். அந்த நகைகளை விற்று அதில் கிடைத்த பணத்தில் வாங்கிய காரையும் போலீசார் பறிமுதல் செய்தனர். கைதான ராஜகோபால் சிறையில் அடைக்கப்பட்டார்.

ஆலந்தூர்:

சென்னை மீனம்பாக்கம் பன்னாட்டு விமான நிலையத்துக்கு வரும் சிறப்பு விமானத்தில் பெரும் அளவில் தங்கம் கடத்தி வரப்படுவதாக விமான நிலைய சுங்க இலாகா கமிஷனர் ராஜன் சவுத்ரிக்கு ரகசிய தகவல் கிடைத்தது. இதையடுத்து அவரது உத்தரவின்பேரில் சுங்க இலாகா அதிகாரிகள் சிறப்பு விமானத்தில் வந்த பயணிகளை கண்காணித்தனர்.

அப்போது ஏற்கனவே சவுதி அரேபியாவில் இருந்து சென்னை வந்த பயணி ஒருவரின் உடைமைகள் வந்திருந்தன. அவற்றை சுங்க இலாகா அதிகாரிகள் பிரித்து பார்த்தபோது பேரிச்சம் பழம் பெட்டிகள் இருந்தன.

அவற்றின் மீது சந்தேகம் அடைந்த சுங்க இலாகா அதிகாரிகள், அதில் ஒரு பாக்கெட்டை எடுத்து பிரித்து பார்த்தனர். அதில் பேரிச்சம் பழங்களுக்கு நடுவே தங்க கட்டிகளை மறைத்து வைத்து கடத்தி வந்ததை கண்டுபிடித்தனர்.

ரூ.15 லட்சத்து 26 ஆயிரம் மதிப்புள்ள 300 கிராம் தங்கத்தை பறிமுதல் செய்த சுங்க இலாகா அதிகாரிகள், இது தொடர்பாக மேலும் விசாரித்து வருகின்றனர்.