கடலூர்

கடலூர்:

கடலூர் மஞ்சக்குப்பம் பகுதியை சேர்ந்தவர் 13 வயது மாணவி. இவள், மஞ்சக்குப்பம் வேணுகோபாலபுரத்தில் உள்ள அரசு மகளிர் மேல்நிலைப்பள்ளியில் 8-ம் வகுப்பு படித்து வருகிறாள். சம்பவத்தன்று வீட்டில் இருந்த மாணவியை திடீரென காணவில்லை. இதனால் அதிர்ச்சி அடைந்த பெற்றோர் மற்றும் உறவினர்கள் பல்வேறு இடங்களில் தேடி பார்த்தும், மாணவி கிடைக்கவில்லை.

இந்த நிலையில் மாணவியின் உறவினர் ஒருவருடைய வாட்ஸ்-அப் எண்ணுக்கு, மாணவி கடலூர் புதுப்பாளையத்தை சேர்ந்த டிரைவரான பிரசாந்த் (வயது 21) என்பவரை திருமணம் செய்து கொண்டது போன்ற புகைப்படம் வந்தது. இதை பார்த்து அதிர்ச்சி அடைந்த உறவினர், உடனே மாணவியின் பெற்றோரிடம் தெரிவித்தார். இதையடுத்து மாணவியின் தாய், தனது மகளை புதுப்பாளையத்தை சேர்ந்த பிரசாந்த் கடத்தி சென்று திருமணம் செய்து விட்டதாக கடலூர் புதுநகர் போலீஸ் நிலையத்தில் புகார் கொடுத்தார். அதன் பேரில் போலீசார் வழக்குப்பதிவு செய்து மாணவியை கடத்தி சென்ற பிரசாந்தை தேடினர். அப்போது புதுப்பாளையத்தில் மாணவியுடன் நின்று கொண்டிருந்த பிரசாந்தை போலீசார் மடக்கி பிடித்து கைது செய்தனர். மேலும் சிறுமியை மீட்டு, அவரது பெற்றோரிடம் ஒப்படைத்தனர்.

கடலூர் மாவட்டம் விருத்தாசலம் சட்டமன்ற தொகுதியில் அ.ம.மு.க. கூட்டணி சார்பில் தே.மு.தி.க. வேட்பாளராக அக்கட்சியின் பொருளாளர் பிரேமலதா விஜயகாந்த் போட்டியிடுகிறார்.

இந்த நிலையில் விருத்தாசலத்தில் நேற்று பிரேமலதா விஜயகாந்த் நிருபர்களுக்கு பேட்டி அளித்தார். அப்போது அவர் கூறியதாவது:-

விருத்தாசலத்தில் கடந்த 10 நாட்களாக அனைத்து பகுதிகளுக்கும் நேரடியாக சென்று மக்களை சந்தித்து முரசு சின்னத்திற்கு வாக்கு சேகரித்து வருகிறேன். ஏற்கனவே விஜயகாந்த் வெற்றி பெற்ற தொகுதிதான் இது. அவர் மக்களுக்காக எவ்வளவு செய்திருக்கிறார் என்பது அனைவருக்கும் தெரியும். அவர் செய்த நலத்திட்டங்களை மக்களே என்னிடம் தெரிவிக்கின்றனர்.

அது நிச்சயமாக வாக்குகளாக மாறும். எனக்கு அமோக வரவேற்பு உள்ளது. அம்மா மக்கள் முன்னேற்ற கழகம், தே.மு.தி.க., கோகுலம் மக்கள் கட்சி, எஸ்.டி.பி.ஐ. ஆகிய கட்சிகள் கூட்டணி அமைத்து தேர்தலில் போட்டியிடுகின்றோம். அப்படி இருக்கும்போது விருத்தாசலத்தில் சுயேச்சையாக போட்டியிடும் ஒரு பெண்ணிற்கு குக்கர் சின்னம் ஒதுக்கப்பட்டுள்ளது.

கூட்டணி கட்சியை சேர்ந்த அந்த சின்னம் இருக்கக்கூடாது என தேர்தல் அலுவலரிடம் புகார் தெரிவித்துள்ளோம். ஆனால் இதுவரை முடிவு வரவில்லை. விரைவில் நல்ல முடிவு வரும் என எதிர்பார்க்கிறோம்.

நான் வேட்புமனு தாக்கல் செய்த அன்று மட்டும் தான் சுதீஷ் உடன் இருந்தார். அதன்பிறகு உடனே ஊருக்கு கிளம்பி விட்டார். அப்படி இருக்கும்போது எனக்கு கொரோனா பரிசோதனை செய்யவேண்டும் என்று கூறி நான் பிரசாரத்தில் இருந்தபோது என்னை வலியுறுத்தியது கண்டிக்கத்தக்கது.

நான் ஏற்கனவே கொரோனா பரிசோதனை செய்துவிட்டு தான் பிரசாரத்திற்கு வந்துள்ளேன்.

கொரோனா தடுப்பு ஊசி இரண்டு முறை போட்டுள்ளேன். எனக்கு எந்த அறிகுறியும் இல்லை என தெளிவாக சொல்லியும் நீங்கள் பரிசோதனைக்கு வரவேண்டும் என கூறி என் பிரசாரத்தை தடை செய்யவே அவர்கள் முயற்சி எடுத்தனர். அதை நாங்கள் கண்கூடாகவே பார்த்தோம். ஆனால் நாங்கள் சட்டத்திற்கும், நீதிக்கும் உட்பட்டவர்கள்.

அதனால் கொரோனா பரிசோதனை செய்து கொண்டேன். 5 மணி நேரத்தில் ரிசல்ட் கொடுப்பதாக தெரிவித்தனர். ஆனால் மறு நாள் ஆகியும் ரிசல்ட் வரவில்லை. என்னை பிரசாரத்திற்கு போகவிடாமல் தடுக்க வேண்டும் என்ற எண்ணம் அவர்களுக்கு இருந்தது எனக்கு தெளிவாக தெரிந்தது. நான் ஏற்கனவே தனியாரிடம் பரிசோதனை செய்து கொண்டேன். அதில் நெகட்டிவ் என்று வந்ததை தெரிந்து கொண்ட பிறகு நெகட்டிவ் என சான்றிதழ் கொடுத்தனர். வேட்பாளர் என்பவர் மக்களை சந்திக்க வேண்டும். மக்களை சந்திக்கும் என்னை யாராலும் தடுக்க முடியாது.

விருத்தாசலத்தை தனி மாவட்டமாக அறிவிப்பது தான் எங்களுடைய முதல் வாக்குறுதியாகும். என் குரல் ஒட்டுமொத்த பெண்களின் குரலாக நிச்சயமாக சட்டசபையில் ஒலிக்கும். விருத்தாசலம் தொகுதிக்கு பிரசாரம் செய்ய நிச்சயம் விஜயகாந்த் வருவார்.

இவ்வாறு அவர் கூறினார்.

சேத்தியாத்தோப்பு:

சேத்தியாத்தோப்பு அனைத்து மகளிர் போலீஸ் சப்-இன்ஸ்பெக்டர் இளவரசி மற்றும் போலீசார் மிராலூர் பஸ் நிறுத்தம் அருகில் ரோந்துப்பணி மேற்கொண்டனர். அப்போது அங்கு வாலிபர் ஒருவர், சிறுமியுடன் நின்று கொண்டிருந்தார். இவர்களை பார்த்ததும் போலீசாருக்கு சந்தேகம் ஏற்பட்டது.
உடனடியாக அந்த வாலிபரிடம் விசாரணை நடத்தினர். விசாரணையில் அவர், பரங்கிப்பேட்டையை சேர்ந்த சங்கர் மகன் வீரமணி(வயது 24) என்பதும், சேத்தியாத்தோப்பு பகுதியை சேர்ந்த 17 வயதுடைய சிறுமியை அவர் கடத்தி வந்ததும் தெரியவந்தது.

இதையடுத்து வீரமணியை போலீசார் கைது செய்தனர். சிறுமி மீட்கப்பட்டு பெற்றோரிடம் ஒப்படைக்கப்பட்டார்.