அரியலூர்

ஜெயங்கொண்டம்:

அரியலூர் மாவட்டம் ஜெயங்கொண்டத்தில் ஜூப்ளி ரோடு அருகே உள்ள நாச்சியார் அம்மன் கோவில் தெருவை சேர்ந்தவர் அப்துல்ரஹிம். சரக்கு வேன் டிரைவரான இவர் மிட்டாய் வியாபாரமும் செய்து வருகிறார். இவர் கடந்த 28-ந் தேதி வீட்டை பூட்டிவிட்டு தனது சகோதரியை பார்ப்பதற்காக சென்னை சென்றார்.

பின்னா் நேற்று முன்தினம் இரவு ஜெயங்கொண்டத்தில் உள்ள அவரது வீட்டிற்கு திரும்பி வந்தார். அப்போது வீட்டின் கதவு திறந்து கிடந்ததை கண்டு அதிர்ச்சி அடைந்த அவா் உள்ளே சென்று பார்த்தபோது, பீரோ மற்றும் பெட்டிகள் உடைக்கப்பட்டு, பீரோவில் இருந்த 3 கிராம் தங்க நகை, பெட்டியில் இருந்த ரூ.35 ஆயிரம் உள்ளிட்டவை திருட்டு போனது தெரியவந்தது.

இது குறித்து ஜெயங்கொண்டம் போலீசாருக்கு தகவல் தெரிவிக்கப்பட்டது. அதன்பேரில் இன்ஸ்பெக்டர் ஜெயராமன், சப்-இன்ஸ்பெக்டர் சூர்யா ஆகியோர் தலைமையிலான போலீசார் சம்பவ இடத்திற்கு வந்து பார்வையிட்டு விசாரணை மேற்கொண்டு வருகின்றனர்.

உடையார்பாளையம்:

அரியலூர் மாவட்டம் உடையார்பாளையத்தை அடுத்த பிலிச்சிக்குழி கிராமத்தை சேர்ந்தவர் ஆசைதம்பி(வயது 38). விவசாயி. இவர் நேற்று முன்தினம் தனது வெள்ளாடுகளை மேய்த்துவிட்டு வந்து, வீட்டு தாழ்வாரத்தில் ஆடுகளை கட்டிவிட்டு தூங்க சென்றுவிட்டார்.

இந்நிலையில் நள்ளிரவில் ஆடுகள் கத்தும் சத்தம் கேட்டு ஆசைதம்பி எழுந்து வந்து பார்த்தபோது, 2 மர்ம நபர்கள் ஆடுகளை திருடிச்செல்வதை கண்டு அதிர்ச்சியடைந்து கூச்சலிட்டார். சத்தம் கேட்டு அங்கு வந்த அக்கம், பக்கத்தினர் 2 பேரையும் விரட்டிப்பிடித்து உடையார்பாளையம் போலீசாரிடம் ஒப்படைத்தனர்.

போலீசார் நடத்திய விசாரணையில், அவர்கள் மீன்சுருட்டியை அடுத்த வளவநல்லூர் கிராமத்தை சேர்ந்த தாஸ்(25), சிலம்பரசன்(21) என்பது தெரியவந்தது. இது குறித்து சப்-இன்ஸ்பெக்டர் மாரியப்பன் வழக்குப்பதிவு செய்து 2 பேரையும் கைது செய்தார்.

அரியலூர்:

அரியலூர் மாவட்டத்தில் நேற்று தா.பழூர், ஜெயங்கொண்டம் ஆகிய ஊராட்சி ஒன்றியங்களுக்கு உட்பட்ட பகுதிகளில் தலா ஒருவருக்கு என மொத்தம் 2 பேர் கொரோனாவினால் பாதிக்கப்பட்டுள்ளனர். இதனால் மாவட்டத்தில் கொரோனாவினால் பாதிக்கப்பட்டவர்களின் எண்ணிக்கை 4,634 ஆக உயர்ந்துள்ளது. அதில் ஏற்கனவே 48 பேர் உயிரிழந்துள்ளனர். மாவட்டத்தில் மொத்தம் 4,553 பேர் சிகிச்சை பெற்று வீடு திரும்பியுள்ளனர். கொரோனாவிற்கு தற்போது 33 பேர் மருத்துவமனைகளில் சிகிச்சை பெற்று வருகின்றனர். மேலும் 449 பேருக்கு கொரோனா பரிசோதனை முடிவுகள் வரவேண்டியுள்ளது.

பெரம்பலூர் மாவட்டத்தில் நேற்று யாரும் புதிதாக கொரோனாவினால் பாதிக்கப்படவில்லை. ஏற்கனவே மாவட்டத்தில் 2,256 பேர் கொரோனாவினால் பாதிக்கப்பட்டுள்ளனர். அதில், 21 பேர் உயிரிழந்துள்ளனர். மேலும் மருத்துவமனைகளில் இருந்து இதுவரைக்கும் 2,234 பேர் டிஸ்சார்ஜ் ஆகிய நிலையில், ஒருவர் மட்டுமே மருத்துவமனையில் சிகிச்சை பெற்று வருகிறார். மேலும் 294 பேருக்கு கொரோனா பரிசோதனை செய்யப்பட்டுள்ளது.

விக்கிரமங்கலம்:

அரியலூர் மாவட்டம் விக்கிரமங்கலம் அருகே உள்ள கீழநத்தம் கிராமத்தை சேர்ந்தவர் கார்த்திக் (வயது 26). விவசாயியான இவர், தனி பட்டாவாக மாற்றுவதற்கு தனது நிலத்தை அளந்து கொடுக்கும்படி ஜெயங்கொண்டம் தாலுகா அலுவலகத்தில் மனு அளித்தார்.

இந்நிலையில் கீழநத்தம் பகுதி நில அளவையரான கல்லாத்தூர் பகுதியை சேர்ந்த சீனிவாசன் (47), கார்த்திக்கின் நிலத்தை அளப்பதற்கு ரூ.5 ஆயிரம் தரவேண்டும் என கேட்டுள்ளார். இதனால் மன உளைச்சலுக்கு ஆளான கார்த்திக், லஞ்சம் கொடுக்க விரும்பாமல், இது குறித்து அரியலூரில் உள்ள லஞ்ச ஒழிப்பு போலீசில் புகார் அளித்தார். இதையடுத்து நில அளவையர் சீனிவாசனை பொறி வைத்து பிடிக்க லஞ்ச ஒழிப்பு போலீசார் முடிவு செய்தனர். அதன்படி, அவர்கள் ரசாயன பொடி தடவிய பணத்தை கார்த்திக்கிடம் கொடுத்து, அதனை சீனிவாசனிடம் கொடுக்குமாறு தெரிவித்தனர்.

இந்நிலையில் நேற்று மாலை கோவிந்தபுத்தூர் அருகே உள்ள காட்டுப்பகுதியில் நிலத்தை அளந்து கொண்டிருந்தபோது சீனிவாசனிடம், கார்த்திக் ரசாயன பொடி தடவிய பணத்தை கொடுத்துள்ளார். சீனிவாசன் அதை வாங்கியபோது, அப்பகுதியில் மறைந்திருந்த லஞ்ச ஒழிப்பு போலீசார் விரைந்து வந்து, அவரை கையும், களவுமாக பிடித்து கைது செய்தனர்.