கார்

மாருதி சுசுகி நிறுவனம் முற்றிலும் புதிய ஆல்டோ மாடல் காரை இந்திய சந்தையில் ஆகஸ்ட் 18 ஆம் தேதி அறிமுகம் செய்ய இருப்பதாக தகவல் வெளியாகி உள்ளது. இந்த எண்ட்ரி லெவல் ஹேச்பேக் மாடல் முற்றிலும் புது பிளாட்பார்ம் மற்றும் புதிய பவர்டிரெயின் கொண்டு இருக்கும் என கூறப்படுகிறது. ஆல்டோவை தொடர்ந்து செப்டம்பர் மாத வாக்கில் கிராண்ட் விட்டாரா மாடலின் வெளியீடு நடைபெற இருக்கிறது.

மூன்றாம் தலைமுறை ஆல்டோ மாடல் மாருதி நிறுவனத்தின் மாட்யுலர் ஹார்டெக்ட் பிளாட்பார்மில் உருவாக்கப்பட்டு இருக்கும் என கூறப்படுகிறது. இதே பிளாட்பார்மில் ஏற்கனவே எஸ் பிரெஸ்ஸோ, செலரியோ, வேகன் ஆர், எர்டிகா மற்றும் XL6 போன்ற மாடல்கள் உருவாக்கப்பட்டுள்ளன.

இந்தியாவில் புதிய ஹேச்பேக் மாடல் இருவித என்ஜின் ஆப்ஷன்களில் கிடைக்கும் என கூறப்படுகிறது. அந்த வகையில், இந்த மாடலில் 796சிசி பெட்ரோல் என்ஜின் மற்றும் K10C 1.0 லிட்டர் டூயல் ஜெட் யூனிட் வழங்கப்படலாம். இதே என்ஜின் சமீபத்திய மாருதி சுசுகி எஸ் பிரெஸ்ஸோ மாடலிலும் வழங்கப்பட்டு இருந்தது குறிப்பிடத்தக்கது.

இந்த என்ஜின் 48 ஹெச்.பி. பவர், 69 நியூட்டன் மீட்டர் டார்க் இழுவிசையை வெளிப்படுத்துகிறது. K10C என்ஜின் 67 ஹெச்.பி. பவர், 89 நியூட்டன் மீட்டர் டார்க் இழுவிசையை வெளிப்படுத்தும் திறன் கொண்டிருக்கிறது.

மஹிந்திரா அண்ட் மஹிந்திரா நிறுவனம் தனது ஸ்கார்பியோ N மாடலின் ஆட்டோமேடிக் மற்றும் 4 வீல் டிரைவ் வேரியண்ட்கள் விலையை அறிவித்து இருக்கிறது. அதன்படி பெட்ரோல் ஆட்டோமேடிக் மாடல் விலை ரூ. 15 லட்சத்து 45 ஆயிரம் என துவங்குகிறது. இதன் டாப் எண்ட் மாடல் விலை ரூ. 20 லட்சத்து 95 ஆயிரம் ஆகும்.

டீசல் ஆட்டோமேடிக் வேரியண்ட்களின் விலை ரூ. 15 லட்சத்து 95 ஆயிரம் என துவங்குகிறது. இதன் டாப் எண்ட் மாடல் விலை ரூ. 21 லட்சத்து 45 ஆயிரம் ஆகும். அனைத்து விலைகளும் எக்ஸ்-ஷோரூம் அடிப்படையில் குறிப்பிடப்பட்டு உள்ளது. இவை அறிமுக விலை ஆகும். இந்த மாடலுக்கான முன்பதிவு ஜூலை 30 ஆம் தேதி தொடங்குகிறது. முன்பதிவு கட்டணம் ரூ. 25 ஆயிரம் ஆகும்.

ஷிப்ட் ஆன் ஃபிளை 4 வீல் டிரைவ் சிஸ்டம் ஸ்கார்பியோ N டீசல் வேரியண்டில் மட்டுமே வழங்கப்படுகிறது. புதிய ஸ்கார்பியோ N பெட்ரோல் வேரியண்ட் விலை கடந்த மாதமே அறிவிக்கப்பட்டு விட்டது. அதன்படி இவற்றின் விலை ரூ. 11 லட்சத்து 99 ஆயிரம் என துவங்குகிறது.

புதிய ஸ்கார்பியோ N மாடலில் 2 லிட்டர், நான்கு சிலிண்டர்கள் கொண்ட எம் ஸ்டேலியன் டர்போ பெட்ரோல் என்ஜின், 2.2 லிட்டர் எம் ஹாக், நான்கு சிலிண்டர்கள் கொண்ட டீசல் என்ஜின் வழங்கப்பட்டு இருக்கிறது. இந்த என்ஜின்கள் முறையே 200 ஹெச்.பி. பவர், 380 நியூட்டன் மீட்டர் டார்க் மற்றும் 130 ஹெச்.பி. பவர் வெளிப்படுத்துகின்றன.

சிட்ரோயன் நிறுவனம் இந்தியாவில் அதிகம் எதிர்பார்க்கப்பட்ட C3 ஹேச்பேக் மாடலை அறிமுகம் செய்தது. புதிய சிட்ரோயன் C3 விலை இந்தியாவில் ரூ. 5 லட்சத்து 71 ஆயிரம் என நிர்ணயம் செய்யப்பட்டு உள்ளது. இந்த மாடல் பத்து வித நிறங்கள், இரண்டு வேரியண்ட்களில் கிடைக்கிறது. இத்துடன் இருவித பவர்டிரெயின் ஆப்ஷன்களிலும் கிடைக்கிறது.

வெளிப்புறத்தில் புதிய சிட்ரோயன் C3 மாடலில் ஸ்ப்லிட் ஹெட்லேம்ப் டிசைன், சிக்னேச்சர் டூயல் ஸ்லாட் குரோம் கிரில், ஃபாக் லைட்கள், சில்வர் நிற ஸ்கிட் பிளேட்கள், 15 இன்ச் ஸ்டீல் வீல்கள், வீல் கவர்கள், சதுரங்க வடிவம் கொண்ட டெயில் லைட்கள் உள்ளன. இத்துடன் பம்பரில் நம்பர் பிளேட் பொருத்தப்பட்டு இருக்கிறது.

காரின் உள்புறம் 2022 சிட்ரோயன் C3 மாடல் 10 இன்ச் தொடுதிரை வசதி கொண்ட இன்போடெயின்மெண்ட் சிஸ்டம், வயர்லெஸ் ஆப்பிள் கார்பிளே, ஆண்ட்ராய்டு ஆட்டோ கனெக்டிவிட்டி, உயரத்தை அட்ஜஸ்ட் செய்யக் கூடிய டிரைவர் சீட், ரிமோட் கீலெஸ் எண்ட்ரி, நான்கு ஸ்பீக்கர்கள், ஸ்டீரிங் மவுண்ட் செய்யப்பட்ட கண்ட்ரோல்கள், டில்ட் அட்ஜஸ்ட் வசதி கொண்ட ஸ்டீரிங் வழங்கப்பட்டு உள்ளது.

என்ஜினை பொருத்தவரை சிட்ரோயன் C3 மாடலில் 1.0 லிட்டர் NA பெட்ரோல் மோட்டார், 5 ஸ்பீடு மேனுவல் யூனிட், 1.0 லிட்டர் டர்போ பெட்ரோல் என்ஜின், 6 ஸ்பீடு மேனுவல் யூனிட் வழங்கப்பட்டு இருக்கிறது. இந்த என்ஜின்கள் முறையே 109 ஹெச்.பி. பவர், 190 நியூட்டன் மீட்டர் டார்க் மற்றும் 81 ஹெச்.பி. பவர், 115 நியூட்டன் மீட்டர் டார்க் இழுவிசையை வெளிப்படுத்துகிறது.

விலை விவரங்கள்:

சிட்ரோயன் C3 லைவ்: ரூ. 5 லட்சத்து 71 ஆயிரம்

சிட்ரோயன் C3 ஃபீல் ரூ. 6 லட்சத்து 62 ஆயிரம்

சிட்ரோயன் C3 ஃபீல் வைப் பேக் ரூ. 6 லட்சத்து 78 ஆயிரம்

சிட்ரோயன் C3 ஃபீல் டூயல் டோன் ரூ. 6 லட்சத்து 78 ஆயிரம்

சிட்ரோயன் C3 ஃபீல் டூயல் டோன் வைப் பேக் ரூ. 6 லட்சத்து 93 ஆயிரம்

சிட்ரோயன் C3 டர்போ ஃபீல் டூயல் டோன் வைப் பேக் ரூ. 8 லட்சத்து 06 ஆயிரம்

அனைத்து விலைகளும் எக்ஸ்-ஷோரூம் அடிப்படையில் குறிப்பிடப்பட்டு உள்ளது.

இந்திய சந்தையில் புதிய சிட்ரோயன் C3 கார் கியா சொனெட், நிசான் மேக்னைட், டாடா பன்ச், ரெனால்ட் கைகர், டொயோட்டா அர்பன் குரூயிசர், ஹோண்டா WR-V மற்றும் மஹிந்திரா XUV300 போன்ற மாடல்களுக்கு போட்டியாக அமைகிறது.

கியா இந்தியா நிறுவனம் இந்திய சந்தையில் ஐந்து லட்சம் கார்களை விற்று புது மைல்கல் எட்டியுள்ளது. 2020 மற்றும் 2021 ஆண்டுகளில் ஏற்பட்ட கொரோனா வைரஸ் பெருந்தொற்று காலக்கட்டத்திலும் இந்த மைல்கல் எட்டி இருப்பது குறிப்பிடத்தக்க விஷயமாகும். இந்திய சந்தையில் வலுவான இடத்தை பிடிக்க கியா நிறுவனம் தற்போது மஹிந்திராவுக்கு போட்டியாளராக உள்ளது.

2017 வாக்கில் இந்திய எண்ட்ரியை அறிவித்த கியா இந்தியா ஜனவரி 2019 முதல் உற்பத்திக்கான டிரையல் பணிகளை துவங்கியது. இதற்காக ஆந்திர பிரதேச மாநிலத்தின் அனந்தபூர் பகுதியில் 536 ஏக்கர் பரப்பளவில் நிலத்தை கையகப்படுத்தியது. தற்போது கியா நிறுவனம் ஆண்டுக்கு மூன்று லட்சம் கார்களை உற்பத்தி செய்யும் திறன் கொண்டு இருக்கிறது. மேலும் வாகனங்களுக்கான தட்டுப்பாடு அதிகரித்து வருவதை அடுத்து, உற்பத்தியை விரிவுப்படுத்தவும் கியா நிறுவனம் முடிவு செய்து உள்ளது.

தற்போது கியா நிறுவனத்தின் குறைந்த விலை மாடலாக கியா சொனெட் இருந்து வருகிறது. எனினும், இந்நிறுவனம் முதலில் அறிமுகம் செய்த கியா செல்டோஸ் மாடலின் வெற்றி இந்திய சந்தையில் அந்நிறுவனம் தடம் பதிக்க உதவியது. செல்டோஸ் மாடல் ஏராளமான அம்சங்கள், அசத்தல் பவர்டிரெயின் ஆப்ஷன்களை சரியான விலையில் விற்பனைக்கு வந்தது. இதன் காரணமாக அமோக வரவேற்பை பெற்றது.

2020 ஆண்டு கியா நிறுவனம் கார்னிவல் எம்பிவி மற்றும் கியா சொனெட் சப்-4 மீட்டர் எஸ்யுவி மாடல்களை இந்திய சந்தையில் அறிமுகம் செய்தது. கியா சொனெட் மாடல் அந்நிறுவன விற்பனையை மேலும் வலுப்படுத்தியது. ஆரம்பத்தில் கியா செல்டோஸ், அதன் பின் சொனெட் என அந்நிறுவன மாடல்கள் தொடர்ந்து நல்ல வரவேற்பை பெற்று வருகின்றன. இந்த நிலையில், தான் புதிதாக கியா கரென்ஸ் மாடல் அறிமுகம் செய்யப்பட்டது.

கியா கரென்ஸ் பெற்ற வெற்றியை கொண்டு முன்னணி ஆட்டோமொபைல் உற்பத்தியாளர்களான மஹிந்திரா மற்றும் டாடா மோட்டார்ஸ் உடன் கியா இந்தியா போட்டியை ஏற்படுத்துகிறது.

மாருதி சுசுகி நிறுவனம் 2022 எஸ் பிரெஸ்ஸோ மாடலை இந்திய சந்தையில் அறிமுகம் செய்து இருக்கிறது. புதிய மாருதி எஸ் பிரெஸ்ஸோ மாடலின் விலை ரூ. 4 லட்சத்து 25 ஆயிரம், எக்ஸ்-ஷோரூம் என நிர்ணயம் செய்யப்பட்டு உள்ளது. ஐந்து வேரியண்ட்களில் அறிமுகம் செய்யப்பட்டு உள்ள எஸ் பிரெஸ்ஸோ மாடல் தற்போது ஐடில் ஸ்டார்ட்/ஸ்டாப் வசதி கொண்ட K10C பெட்ரோல் என்ஜின் தொழில்நுட்பம் கொண்டு இருக்கிறது.

இது அடுத்த தலைமுறை என்ஜின் ஆகும். இது 66 ஹெச்.பி. பவர், 89 நியூட்டன் மீட்டர் டார்க் இழுவிசையை வெளிப்படுத்துகிறது. இத்துடன் 5 ஸ்பீடு மேனுவல் மற்றும் AMT டிரான்ஸ்மிஷன் வசதி வழங்கப்பட்டு உள்ளது. இந்த காரின் AMT வெர்ஷன்கள் லிட்டருக்கு 25.30 கி.மீ. மைலேஜ் வழங்குகிறது. மேனுவல் டிரான்ஸ்மிஷன் கொண்ட மாடல்கள் லிட்டருக்கு 34.76 கி.மீ. மைலேஜ் வழங்குகின்றன.

விலை விவரங்கள்:

மாருதி சுசுகி எஸ் பிரெஸ்ஸோ Std. MT ரூ. 4 லட்சத்து 25 ஆயிரம்

மாருதி சுசுகி எஸ் பிரெஸ்ஸோ LXi MT ரூ. 4 லட்சத்து 95 ஆயிரம்

மாருதி சுசுகி எஸ் பிரெஸ்ஸோ VXi MT ரூ. 5 லட்சத்து 15 ஆயிரம்

மாருதி சுசுகி எஸ் பிரெஸ்ஸோ VXi+ MT ரூ. 5 லட்சத்து 49 ஆயிரம்

மாருதி சுசுகி எஸ் பிரெஸ்ஸோ VXi (O) AGS ரூ. 5 லட்சத்து 65 ஆயிரம்

மாருதி சுசுகி எஸ் பிரெஸ்ஸோ VXi+ (O) AGS ரூ. 5 லட்சத்து 99 ஆயிரம்

அனைத்து விலைகளும் எக்ஸ்-ஷோரூம் அடிப்படையில் குறிப்பிடப்பட்டு உள்ளது.

ஹூண்டாய் நிறுவனம் முற்றிலும் புதிய ஸ்டார்கேசர் எம்பிவி மாடலை சர்வதேச சந்தையில் அறிமுகம் செய்து இருக்கிறது. இந்த மாடல் மாருதி எர்டிகா மற்றும் கியா கரென்ஸ் போன்ற மாடல்களுக்கு நேரடி போட்டியை ஏற்படுத்தும். முதற்கட்டமாக இந்தோனேசியாவில் அறிமுகமாகி இருக்கும் ஸ்டார்கேசர் அதன் பின் மற்ற நாடுகளிலும் விற்பனைக்கு வரும்.

வெளிப்புறம் ஸ்டார்கேசர் மாடல் ஸ்டாரியா சார்ந்த முன்புறம் கொண்டு இருக்கிறது. ஹூண்டாய் ஸ்டாரியா மாடல் அளவில் பெரிய ஆடம்பர எம்பிவி மாடல் ஆகும். இது சர்வதேச சந்தையில் மட்டும் விற்பனை செய்யப்பட்டு வருகிறது. ஸ்டார்கேசர் மாடலில் அதிநவீன தோற்றம், பொனெட் லைன் மீது ஃபுல்-விட்த் எல்இடி டிஆர்எல் கொண்டிருக்கிறது. முன்புற கிரில் செவ்வக வடிவம் கொண்டு இருக்கிறது. இதில் எல்இடி ஹெட்லேம்ப்கள் செங்குத்தாக பொருத்தப்பட்டு உள்ளன. பின்புறம் டெயில் லேம்ப்கள் உள்ளன.

காரினுள் ஆறு பேர் அமரும் வகையிலான இருக்கைகள் உள்ளன. கேபின் முழுக்க அதிகளவு சவுகரியம் வழங்கும் வகையில் நேர்த்தியாக டிசைன் செய்யப்பட்டு உள்ளதாக ஹூண்டாய் தெரிவித்து இருக்கிறது. இத்துடன் எட்டு அங்குல தொடுதிரை வசதி கொண்ட இன்போடெயின்மெண்ட் சிஸ்டம், டிஜிட்டல் இன்ஸ்ட்ரூமெண்ட் கிளஸ்டர், வயர்லெஸ் சார்ஜர், ரூப் மவுண்ட் செய்யப்பட்ட ஏர்கான் வெண்ட்கள் உள்ளன.

இந்தோனேசிய சந்தையில் இந்த கார் 1.5 லிட்டர் பெட்ரோல் என்ஜின் பெற்று இருக்கிறது. இந்த என்ஜின் 113 ஹெச்.பி. பவர், 144 நியூட்டன் மீட்டர் டார்க் இழுவிசையை வெளிப்படுத்துகிறது. இத்துடன் CVT மற்றும் 6 ஸ்பீடு மேனுவல் கியர்பாக்ஸ் வழங்கப்பட்டு இருக்கிறது.

மாருதி சுசுகி நிறுவனத்தின் தேர்வு செய்யப்பட்ட விற்பனை மையங்களில் அரினா மற்றும் நெக்சா கார் மாடல்களுக்கு அதிக சலுகைகள் வழங்கப்படுகின்றன. இவை தள்ளுபடி, எக்சேன்ஜ் போனஸ் மற்றும் கார்ப்பரேட் தள்ளுபடி வடிவில் வழங்கப்படுகின்றன.

ஜூலை மாத சலுகைகளின் படி மாருதி சுசுகி செலரியோ மாடலுக்கு ரூ. 54 ஆயிரத்து 500 வரையிலான பலன்கள் வழங்கப்படுகிறது. 1.0 லிட்டர் வேகன்ஆர் மாடலுக்கு ரூ. 44 ஆயிரத்து 500 வரையிலான பலன்களும், 1.2 லிட்டர் வேகன்ஆர் மாடலுக்கு ரூ. 29 ஆயிரத்து 500 வரையிலான சலுகை மற்றும் தள்ளுபடி வழங்கப்படுகிறது. மாருதி சுசுகி ஸ்விப்ட் மாடலை வாங்குவோருக்கும் ரூ. 29 ஆயிரத்து 500 மதிப்பிலான பலன்கள் கிடைக்கும்.

மாருதி சுசுகி எஸ் பிரெஸ்ஸோ மாடலை வாங்குவோருக்கும் ரூ. 29 ஆயிரத்து 500 வரையிலான பலன்கள் கிடைக்கிறது. ஆல்டோ 800, ஈகோ மாடல்களை வாங்குவோருக்கும் ரூ. 29 ஆயிரத்து 500 மதிப்பிலான பலன்கள் கிடைக்கும். டிசையர் மாடலை வாங்குவோருக்கு ரூ. 19 ஆயிரத்து 500 வரை சேமிக்க முடியும்.

நெக்சா பிராண்டின் கீழ் விற்பனை செய்யப்படும் மாருதி சுசுகி எஸ் கிராஸ் மாடலுக்கு ரூ. 52 ஆயிரம் வரையிலான பலன்கள் வழங்கப்படுகிறது. இக்னிஸ் மாடலை வாங்குவோருக்கு ரூ. 37 ஆயிரம் வரையிலான பலன்களும், சியாஸ் மாடலை வாங்குவோருக்கு ரூ. 29 ஆயிரம் வரையிலான பலன்கள் வழஙஅகப்படுகிறது. XL6 மற்றும் பலேனோ மாடல்களுக்கு எந்த பலன்களும் அறிவிக்கப்படவில்லை.

டாடா மோட்டார்ஸ் நிறுவனம் இந்திய சந்தையில் நெக்சான் XM+ (S) புது வேரியண்ட்டை அறிமுகம் செய்து இருக்கிறது. புதிய நெக்சான் XM+ (S) மாடலின் விலை ரூ. 9 லட்சத்து 75 ஆயிரம் என துவங்குகிறது. புதிய நெக்சான் XM+ (S) வேரியண்ட் ஏற்கனவே விற்பனை செய்யப்பட்டு வந்த நெக்சான் XZ மாடலுக்கு மாற்றாக அறிமுகம் செய்யப்பட்டு உள்ளது.

புதிய நெக்சான் XM+ (S) வேரியண்ட் பெட்ரோல் மற்றும் டீசல் என்ஜின், மேனுவல் மற்றும் ஆட்டோமேடிக் கியர்பாக்ஸ் ஆப்ஷன்களில் கிடைக்கிறது. இதன் பெட்ரோல் மேனுவல் மாடல் விலை ரூ. 9 லட்சத்து 75 ஆயிரம் என துவங்குகிறது. ஆட்டமேடிக் மாடல் விலை ரூ. 10 லட்சத்து 40 ஆயிரம் ஆகும். நெக்சான் XM+ (S) டீசல் மேனுவல் மாடல் விலை ரூ. 11 லட்சத்து 05 ஆயிரம் என துவங்குகிறது. இதன் ஆட்டோமேடிக் மாடல் விலை ரூ. 11 லட்சத்து 70 ஆயிரம் ஆகும்.

நெக்சான் XM+ (S) வேரியண்ட்டில் 7 இன்ச் ஹார்மன் டச் ஸ்கிரீன் இன்போடெயின்மெண்ட் சிஸ்டம், ஆப்பிள் கார் பிளே மற்றும் ஆண்ட்ராய்டு ஆட்டோ கனெக்டிவிட்டி வழங்கப்பட்டு இருக்கிறது. இத்துடன் ஷார்க் ஃபின் ஆண்டெனா, கூல்டு கிளவ் பாக்ஸ், ரியர் ஏ.சி. வெண்ட்கள், 12 வோல்ட் பவர் சாக்கெட் வழங்கப்பட்டு உள்ளது.

வேரியண்ட்களில் மாற்றம் செய்யப்பட்டு இருப்பதை அடுத்து டாடா நெக்சான் XM+ (S) வேரியண்ட் தற்போது XE, XM, XM(S), XM+(S), XZ+, XZ+(HS), XZ+(O) மற்றும் XZ+(P) என மொத்தம் எட்டு வேரியண்ட்களில் கிடைக்கிறது.

ஜப்பான் நாட்டு கார் உற்பத்தியாளரான நிசான், இந்திய சந்தையில் புதிய நிசான் மேக்னைட் ரெட் எடிஷன் எஸ்.யு.வி. மாடலை அறிமுகம் செய்தது. புதிய நிசான் மேக்னைட் ரெட் எடிஷன் விலை ரூ. 7 லட்சத்து 86 ஆயிரத்து 500 என நிர்ணயம் செய்யப்பட்டு உள்ளது. நிசான் மேக்னைட் ரெட் எடிஷன் XV வேரிண்டின் மூன்று ட்ரிம்களிலும் கிடைக்கிறது.

நிசான் மேக்னைட் ரெட் எடிஷன் விலை விவரங்கள்:

நிசான் மேக்னைட் MT XV ரெட் எடிஷன் ரூ. 7 லட்சத்து 86 ஆயிரத்து 500

நிசான் மேக்னைட் டர்போ XV ரெட் எடிஷன் ரூ. 9 லட்சத்து 24 ஆயிரத்து 500

நிசான் மேக்னைட் டர்போ CVT XV ரெட் எடிஷன் ரூ. 9 லட்சத்து 99 ஆயிரத்து 900

அனைத்து விலைகளும் எக்ஸ்-ஷோரூம் அடிப்படையில் குறிப்பிடப்பட்டு உள்ளன.

புதிய நிசான் மேக்னைட் ரெட் எடிஷன் மாடலின் கிரில், முன்புற பம்ப்பர் கிளாடிங், வீல் ஆர்ச், பக்கவாட்டில் பாடி கிளாடிங் உள்ளிட்டவைகளில் மீது ரெட் அக்செண்ட்கள் வழங்கப்பட்டு இருக்கிறது. இத்துடன் பாடி கிராபிக்ஸ், பின்புற டெயில்கேட்டில் குரோம் கார்னிஷ், இலுமினேட் செய்யப்பட்ட டோர் சில்கள், ரெட் எடிஷன் பேட்ஜ் உள்ளது. இத்துடன் வயர்லெஸ் சார்ஜிங், எல்.இ.டி. டி.ஆர்.எல்.கள், ஆம்பியண்ட் லைட்டிங் வழங்கப்பட்டு இருக்கிறது.

நிசான் மேக்னைட் XV வேரியண்டில் 8 இன்ச் டச் ஸ்கிரீன் மற்றும் வயர்லெஸ் ஆப்பிள் கார்பிளே, ஆண்ட்ராய்டு ஆட்டோ, புஷ் பட்டன் ஸ்டார்ட், ஷார்க் ஃபின் ஆண்டெனா மற்றும் ஏர் பியூரிஃபயர் உள்ளிட்டவை வழங்கப்பட்டு உள்ளது. இத்துடன் ஏராளமான ஏர்பேக், ஏ.பி.எஸ்., இ.பி.டி., வெஹிகில் டைனமிக்ஸ் கண்ட்ரோல், டிராக்‌ஷன் கண்ட்ரோல் சிஸ்டம், பிரேக் அசிஸ்ட் மற்றும் ஹில் ஸ்டார்ட் அசிஸ்ட் போன்ற அம்சங்கள் உள்ளன.

நிசான் மேக்னைட் ரெட் எடிஷன் மாடலில் 1.0 லிட்டர் NA பெட்ரோல் மேனுவல், 1.0 லிட்டர் டர்போ பெட்ரோல் மேனுவல் மற்றும் 999 சிசி, மூன்று சிலிண்டர்கள் கொண்ட பெட்ரோல் என்ஜின் ஆப்ஷன்களில் கிடைக்கிறது. இவற்றுடன் 5 ஸ்பீடு மேனுவல் கியர்பாக்ஸ், CVT ஆட்டோமேடிக் கியர்பாக்ஸ் ஆப்ஷன்கள் வழங்கப்படுகிறது.

டாடா மோட்டார்ஸ் நிறுவனம் டாடா நெக்சான் EV பிரைம் மாடலை இந்திய சந்தையில் அறிமுகம் செய்து இருக்கிறது. புதிய நெக்சான் EV மாடலில் சமீபத்தில் அறிமுகமான நெக்சான் EV மேக்ஸ் மாடலில் வழங்கப்பட்ட புது அம்சங்கள் வழங்கப்பட்டு உள்ளது.

அதன்படி டாடா நெக்சான் EV பிரைம் மாடலில் மல்டி-மோட் ரிஜென், ஆட்டோமேடிக் பிரேக் லேம்ப் ஆக்டிவேஷன், குரூயிஸ் கண்ட்ரோல், டையர் பிரெஷர் மாணிட்டரிங் சிஸ்டம், ஸ்மார்ட்வாட்ச் இண்டகிரேட் செய்யப்பட்ட கனெக்டிவிட்டி அம்சம் உள்ளது. இந்தியாவில் நெக்சான் EV மாடலின் விலை ரூ. 60 ஆயிரத்தில் இருந்து ரூ. 1 லட்சத்து 31 ஆயிரம் வரை உயர்த்தப்பட்டு இருக்கிறது. டாடா நெக்சான் EV மாடல் தான் தற்போது நெக்சான் EV பிரைம் என பெயர் மாற்றம் செய்யப்பட்டு உள்ளது.

"நெக்சான் EV மாடல் அறிமுகமானது முதல் இந்திய எலெக்ட்ரிக் வாகன சந்தையில் நாட்டின் ஒட்டு மொத்த கவனத்தையும் ஈர்த்து இருக்கிறது. எலெக்ட்ரிக் வாகனம் வாங்க நினைப்போரின் முதல் தேர்வாக இந்த மாடல் தான் இருக்கிறது. சந்தையில் நெக்சான் EV மாடல் 65 சதவீத பங்குகளை பெற்று இருக்கிறது."

"நெக்சான் EV பிரைம் மாடலுடன் எங்கள் குறிக்கோளை மேலும் உறுதிப்படுத்தி தொடர்ந்து புது மாடல்களை அறிமுகம் செய்வோம். புது சாப்ட்வேர் அப்டேட் மூலம் பயனர்கள் டாடா எலெக்ட்ரிக் வாகன அனுபவத்தில் எதை எதிர்பார்க்க வேண்டும் என்பதில் புது எல்லையை உருவாக்கி இருக்கிறோம்," என டாடா நிறுவனத்தின் விவேக் ஸ்ரீவஸ்தவா தெரிவித்தார். 

ஹூண்டாய் மோட்டார் நிறுவனம் ஐயோனிக் ஹைப்ரிட் மற்றும் பிளக்-இன் ஹைப்ரிட் வாகனங்களை ரிகால் செய்வதாக அறிவித்து இருக்கிறது. மொத்தம் 10 ஆயிரத்து 575 யூனிட்கள் ரிகால் செய்யப்பட உள்ளன. இவை அனைத்தும் 2017 மற்றும் 2018 வாக்கில் உற்பத்தி செய்யப்பட்டவை ஆகும். பாதிக்கப்பட்ட யூனிட்கள் தீ விபத்தை ஏற்படுத்த காரணமாகி விடும் அபாயம் கொண்டுள்ளன.

முன்னதாக 2018 வாக்கில் இந்த மாடல்கள் ரிகால் செய்யப்பட்டன. எனினும், அப்போது இவை முறையாக சரி செய்யப்படவில்லை. இதன் காரணமாக இந்த யூனிட்களில் தீ விபத்து ஏற்படும் வாய்ப்பு அதிகரித்து இருக்கிறது. வாகனங்களின் காண்டாக்ட்களில் லூஸ் கனெக்‌ஷன் இருப்பதால், எலெக்ட்ரிக் ரெசிஸ்டன்ஸ் ஏற்படும் வாய்ப்பு அதிகம் ஆகும். இந்த சூழல் பாகங்களை எளிதில் சூடாக்கி, தீப்பிடிக்க செய்யலாம்.

பாதிக்கப்பட்ட வாகனங்கள் நவம்பர் 16, 2016 முதல் ஆகஸ்ட் 16, 2017-க்குள் உற்பத்தி செய்யப்பட்டவை ஆகும். ரிகால் செய்யப்படும் ஐயோனிக் பிளக்-இன் ஹைப்ரிட் மாடல் ஆகஸ்ட் 10, 2017 முதல் ஆகஸ்ட் 11, 2017-க்குள் உற்பத்தி செய்யப்பட்டவை ஆகும். முதன் முதலில் இந்த பிரச்சினை 2018 மார்ச் மாத வாக்கில் கண்டறியப்பட்டது குறிப்பிடத்தக்கது.

டாடா மோட்டார்ஸ் நிறுவனம் 2023 நிதியாண்டின் முதல் காலாண்டில் மட்டும் 3 லட்சத்து 16 ஆயிரத்து 443 வாகனங்களை விற்பனை செய்து இருக்கிறது. கடந்த ஆண்டு இதே காலக்கட்டத்தில் டாடா மோட்டார்ஸ் நிறுவனம் மொத்தத்தில் 2 லட்சத்து 14 ஆயிரத்து 250 யூனிட்களையே விற்பனை செய்து இருந்தது.

இதில் பயணிகள் வாகன விற்பனை 2 லட்சத்து 12 ஆயிரத்து 914 யூனிட்கள் ஆகும். இது கடந்த ஆண்டு வெறும் 1 லட்சத்து 16 ஆயிரத்து 780 யூனிட்களாக இருந்தது. இந்த நிதியாண்டின் முதல் காலாண்டில் சர்வதேச சந்தையில் ஏற்பட்டு இருக்கும் வளர்ச்சியை ஒட்டி ஏற்பட்ட மாற்றங்களை குறிக்கிறது.

உள்நாட்டில் டாடா மோட்டார்ஸ் நிறுவனம் கடந்த மாதத்தில் மட்டும் 45 ஆயிரத்து 197 தனியார் வாகனங்களை விற்பனை செய்து இருக்கிறது. ஏப்ரல் முதல் ஜூன் மாதம் வரையிலான காலக்கட்டத்தில் மொத்தம் 1 லட்சத்து 30 ஆயிரத்து 125 யூனிட்கள் விற்பனை செய்யப்பட்டன. இதில் எஸ்.யு.வி.-க்கள் மட்டும் 68 சதவீதம் வளர்ச்சியை பதிவு செய்தன. இதே காலக்கட்டத்தில் டாடா மோட்டார்ஸ் நிறுவனம் 9 ஆயிரத்து 283 எலெக்ட்ரிக் வாகனங்களை விற்பனை செய்து இருக்கிறது.