கார்

மாருதி சுசுகி நிறுவனம் சில தினங்களுக்கு முன்பு தான் தனது ஆல்டோ ஹேச்பேக் மாடலின் மூன்று வேரியண்ட்களை நிறுத்தியது. தற்போது இந்த வரிசையில் எஸ் பிரெஸ்ஸோ மாடலும் சேர்ந்து இருக்கிறது. மாருதி சுசுகி எஸ் பிரெஸ்ஸோ மாடலின் ஆறு வேரியண்ட்களின் விற்பனை தற்போது நிறுத்தப்பட்டு விட்டது. புது மாற்றங்களை அடுத்து மாருதி எஸ் பிரெஸ்ஸோ மாடலின் விலை ரூ. 3 லட்சத்து 99 ஆயிரம் என துவங்குகிறது.

எஸ் பிரெஸ்ஸோ மாடலின் LXi, VXi, VXi AMT, மற்றும் VXi CNG போன்ற வேரியண்ட்களின் விற்பனையை மாருதி சுசுகி நிறுவனம் சத்தமின்றி நிறுத்திவிட்டது. தற்போது ரெகுலர் வேரியண்ட்கள் நிறுத்தப்பட்டதை அடுத்து எஸ் பிரெஸ்ஸோ ஹேச்பேக் மாடல் 8 வேரியண்ட்களில் கிடைக்கிறது. எஸ் பிரெஸ்ஸோ ஹேச்பேக் ஆட்டோமேடிக் மாடல்களின் விலை ரூ. 5 லட்சத்து 19 ஆயிரத்தில் இருந்து துவங்குகிறது.

இந்திய சந்தையின் எண்ட்ரி லெவல் ஹேச்பேக் பிரிவில் எஸ் பிரெஸ்ஸா மாடல் மாருதி சுசுகி நிறுவனத்தின் இரண்டாவது மாடல் ஆகும். எஸ் பிரெஸ்ஸோ மாடலை சிறிய எஸ்யுவி-ஆக மாற்றுவதற்கு மாருதி சுசுகி நிறுவனம் ஏராளமான நடவடிக்கைகளை மேற்கொண்டு விட்டது. எனினும், இது எண்ட்ரி லெவல் பிரிவில் கிடைக்கும் மாருதி சுசுகி கார் தான்.

எஸ் பிரெஸ்ஸோ மாடலில் 998சிசி K10B என்ஜின் வழங்கப்பட்டு இருக்கிறது. இந்த என்ஜினின் பெட்ரோல் வேரியண்ட் 67 ஹெச்.பி. பவர், 90 நியூட்டன் மீட்டர் டார்க் இழுவிசையை வெளிப்படுத்துகிறது. CNG பயன்படுத்தும் போது இந்த என்ஜின் 58 ஹெச்.பி. பவர், 78 நியூட்டன் மீட்டர் டார்க் இழுவிசையை வெளிப்படுத்துகிறது.

ஹூண்டாய் நிறுவனம் தனது மேம்பட்ட டக்சன் மாடலுக்கான புதிய டீசரை வெளியிட்டு இருக்கிறது. 30 நொடிகள் வீடியோ வடிவில் இந்த டீசர் வெளியிடப்பட்டு உள்ளது. டீசர் வீடியோவின் படி புதிய ஹூண்டாய் டக்சன் மாடலின் எக்ஸ்டீரியர் வெளியாகி உள்ளது. இந்தியாவில் புதிய ஹூண்டாய் டக்சன் மாடலின் வெளியீடு ஜூலை 13 ஆம் தேதி நடைபெற இருக்கிறது.

சமீப ஆண்டுகளில் இந்திய சந்தையில் எஸ்.யு.வி. மாடல்கள் விற்பனை கணிசமாக அதிகரித்து வருவதை அடுத்து புதிய தலைமுறை டக்சன் மாடல் அமோக வரவேற்பை பெறும் என ஹூண்டாய் நிறுவனம் நம்பிக்கை தெரிவித்து உள்ளது. புதிய டக்சன் மாடல் ஹூண்டாய் நிறுவனத்திற்கு பெரும் வெற்றியை தேடிக் கொடுத்து இருக்கிறது.

உலகம் முழுக்க இதுவரை 7 லட்சம் மாடல்கள் இதுவரை விற்பனை செய்யப்பட்டு உள்ளன. ஒருபுறம் ஐரோப்பா மறுபுறம் ஜப்பான் என இரண்டு புறங்களிலும் இந்த பிரிவு வாகனங்கள் விற்பனையில் ஹூண்டாய் இத்தகைய விற்பனையை பதிவு செய்து இருப்பதாக பெரிய விஷயமாகவே பார்க்கப்படுகிறது.

2022 ஹூண்டாய் டக்சன் மாடலில் 2.0 லிட்டர் டர்போ சார்ஜ் செய்யப்பட்ட பெட்ரோல் மற்றும் டீசல் என்ஜின் ஆப்ஷன்கள் வழங்கப்படும் என தெரிகிறது. இதன் பெட்ரோல் என்ஜின் 154 ஹெச்.பி. பவர், 192 நியூட்டன் மீட்டர் டார்க் இழுவிசையை வெளிப்படுத்துகிறது. இதன் டீசல் என்ஜின் 184 ஹெச்.பி. பவர், 417 நியூட்டன் மீட்டர் டார்க் இழுவிசையை வெளிப்படுத்துகிறது.

ஹூண்டாய் நிறுவனம் இந்திய சந்தையில் அல்கசார் மாடலின் புதிய பேஸ் வேரியண்ட்-ஐ அறிமுகம் செய்து இருக்கிறது. இந்த வேரியண்ட் பிரெஸ்டிஜ் எக்சிக்யுடிவ் என அழைக்கப்படுகிறது. புது வேரியண்ட் பெட்ரோல் மற்றும் டீசல் என்ஜின் ஆப்ஷன்களில் கிடைக்கிறது. இதில் டீசல் என்ஜினுடன் ஆட்டோமேடிக் கியர்பாக்ஸ் ஆப்ஷனும் வழங்கப்படுகிறது. இது தற்போதைய எக்சிக்யுடிவ் வேரியண்டை விட ரூ. 55 ஆயிரம் வரை விலை குறைவு ஆகும்.

புதிய ஹூண்டாய் அல்கசார் விலை விவரங்கள்:

அல்கசார் பிரெஸ்டிஜ் எக்சிக்யுடிவ் 7 சீட்டர் பெட்ரோல் மேனுவல் ரூ. 15 லட்சத்து 89 ஆயிரம்

அல்கசார் பிரெஸ்டிஜ் எக்சிக்யுடிவ் 7 சீட்டர் டீசல் மேனுவல் ரூ. 16 லட்சத்து 30 ஆயிரம்

அல்கசார் பிரெஸ்டிஜ் எக்சிக்யுடிவ் 7 சீட்டர் டீசல் ஆட்டோமேடிக் ரூ. 17 லட்சத்து 77 ஆயிரம்

அல்கசார் பிரெஸ்டிஜ் எக்சிக்யுடிவ் 6 சீட்டர் டீசல் மேனுவல் ரூ. 16 லட்சத்து 30 ஆயிரம்

அனைத்து விலைகளும் எக்ஸ்-ஷோரூம் அடிப்படையில் குறிப்பிடப்பட்டு உள்ளது.

புதிய அல்கசார் வேரியண்டில் இன்போடெயின்மெண்ட் மட்டுமே மாற்றப்பட்டு இருக்கிறது. முந்தைய மாடலில் 10.25 இன்ச் டச் ஸ்கிரீனுக்கு மாற்றாக அளவில் சிறிய 8 இன்ச் யூனிட் வழங்கப்பட்டு இருக்கிறது. இதே போன்ற யூனிட் தான் புதிய ஐ20 மற்றும் கிரெட்டா மாடல்களிலும் வழங்கப்பட்டு இருக்கிறது.

மேலும் இதில் புளூ லின்க் கனெக்டெட் அம்சங்கள் நீக்கப்பட்டு உள்ளன. இவை தவிர பெரும்பாலான இதர அம்சங்களில் எந்த மாற்றங்களும் மேற்கொள்ளப்படவில்லை. அந்த வகையில் இந்த மாடலில் பானரோமிக் சன்ரூப், எல்இடி ஹெட்லேம்ப்கள் உள்ளன. இதன் பெட்ரோல் மாடல் 7 சீட்டர் வடிவிலும், டீசல் மாடல் 7 மற்றும் 6 சீட்டர் வடிவில் கிடைக்கிறது.

இந்தியாவில் இயங்கி வரும் தேர்வு செய்யப்பட்ட ரெனால்ட் டீலர்ஷிப்களில் அசத்தல் தள்ளுபடி மற்றும் சலுகை வழங்கப்படுகிறது. வாடிக்கையாளர்கள் தள்ளுபடி, எக்சேன்ஜ் போனஸ், கார்ப்பரேட் தள்ளுபடி மற்றும் லாயல்டி போனஸ் வடிவில் இவற்றை பெற்றுக் கொள்ள முடியும்.

அதன்படி ரெனால்ட் டிரைபர் மாடலை வாங்குவோருக்கு ரூ. 10 ஆயிரம் தள்ளுபடி, ரூ. 20 ஆயிரம் எக்சேன்ஜ் போனஸ், ரூ. 10 ஆயிரம் கார்ப்பரேட் தள்ளுபடி மற்றும் லாயல்டி போனஸ் ரூ. 44 ஆயிரம் வழங்கப்படுகிறது. ரெனால்ட் கைகர் மாடலை வாங்குவோருக்கு ரூ. 10 ஆயிரம் தள்ளுபடி, ரூ. 55 ஆயிரம் லாயல்டி பலன்கள் வழங்கப்படுகின்றன.

ரெனால்ட் க்விட் மாடலுக்கு ரூ. 5 ஆயிரம் தள்ளுபடி, ரூ. 10 ஆயிரம் எக்சேன்ஜ் போனஸ், ரூ. 10 ஆயிரம் கார்ப்பரேட் தள்ளுபடி, ரூ. 37 ஆயிரம் லாயல்டி தள்ளுபடி வழங்கப்படுகிறது. இதே காரின் 1.0 லிட்டர் வேரியண்டிற்கு ரூ. 35 ஆயிரம் தள்ளுபடி, ரூ. 15 ஆயிரம் எக்சேன்ஜ் போனஸ், ரூ. 10 ஆயிரம் கார்ப்பரேட் தள்ளுபடி, ரூ. 37 ஆயிரம் லாயல்டி போனஸ் வழங்கப்படுகிறது.

இந்தியாவின் முன்னணி கார் உற்பத்தியாளரான மாருதி சுசுகி விரைவில் ஆல்டோ K10 ஹேச்பேக் காரை மீண்டும் அறிமுகம் செய்ய இருக்கிறது. சமீபத்தில் தான் மாருதி சுசுகி நிறுவனம் தனது ஆல்டோ மாடல் சில வேரியண்ட்களின் விற்பனையை நிறுத்தியது.

2020 வாக்கில் பி.எஸ்.6 புகை விதிகள் அமலுக்கு வந்த பின் விற்பனை நிறுத்தப்பட்ட நிலையில், தற்போது மீண்டும் ஆல்டோ K10 மாடல் அறிமுகம் செய்யப்படலாம் என தகவல் வெளியாகி உள்ளது. இந்த மாடலுக்கு இன்னும் வரவேற்பு இருப்பதோடு, இதற்கு போட்டியாக அதிக மாடல்கள் இல்லாத காரணத்தால், மீண்டும் இதனை அறிமுகம் செய்ய மாருதி சுசுகி முடிவு செய்திருப்பதாக கூறப்படுகிறது.

ஆல்டோ மாடல்களை மாற்றியமைத்து வரும் மாருதி சுசுகி நிறுவனம் சத்தமின்றி Std, LXi மற்றும் LXi CNG வேரியண்ட்களின் விற்பனையை நிறுத்தி இருக்கிறது. மூன்று வேரியண்ட்களின் விற்பனை நிறுத்தப்பட்டு இருப்பதை அடுத்து ஆல்டோ 800சிசி மாடல் விலை தற்போது ரூ. 3 லட்சத்து 39 ஆயிரம், எக்ஸ்-ஷோரூம் என துவங்குகிறது. தற்போது ஆல்டோ மாடல் LXi (o) வேரியண்டில் மட்டுமே கிடைக்கிறது.

ஆல்டோ K10 மாடலை மீண்டும் கொண்டு வருவதன் மூலம் மாருதி சுசுகி நிறுவனம் தனது வாகன விற்பனையை அதிகப்படுத்த முயற்சிக்கும். தற்போது ஆல்டோ மற்றும் எஸ் பிரெஸ்ஸோ மாடல்கள் சேர்ந்து ஆண்டுக்கு 2 லட்சத்து 12 ஆயிரம் யூனிட்கள் வரை விற்பனையாகி வருகின்றன. இன்று வரை மாருதி சுசுகி நிறுவனத்தின் அதிகம் விற்பனையாகும் மாடலாக ஆல்டோ விளங்குகிறது.

இந்திய சந்தையில் ஆல்டோ மாடல் 2000-ஆவது ஆண்டு முதல் முறையாக அறிமுகம் செய்யப்பட்டது. இதன் முதல் தலைமுறை மாடல் 2012 வரை விற்பனை செய்யப்பட்டு வந்தது. இரண்டாம் தலைமுறை ஆல்டோ மாடல் அதன் பின் விற்பனைக்கு வந்தது. இந்தியாவில் இதுவரை சுமார் 43 லட்சம் ஆல்டோ ஹேச்பேக் யூனிட்களை விற்பனை செய்து இருக்கிறது. 2005 முதல் 2018 வரை நாட்டின் பிரபல கார் மாடலாக ஆல்டோ விளங்கி வந்தது.

ரெனால்ட் இந்தியா நிறுவனம் கைகர் மாடல் உற்பத்தியில் 50 ஆயிரம் யூனிட்களை கடந்து அசத்தி இருக்கிறது. ரெனால்ட் கைகர் 50 ஆயிரமாவது யூனிட் சென்னையில் உள்ள ரெனால்ட் ஆலையில் இருந்து வெளியிடப்பட்டது. உற்பத்தியில் புதிய மைல்கல்லை கொண்டாடும் வகையில் ரெனால்ட் நிறுவனம் கைகர் மாடலை புதிதாக ஸ்டெல்த் பிளாக் நிறத்தில் அறிமுகம் செய்து இருக்கிறது.

சர்வதேச சந்தையில் அறிமுகம் செய்யப்படுவதற்கு முன்பே இந்தியாவில் அறிமுகமான மூன்றாவது கார் மாடலாக ரெனால்ட் கைகர் இருந்தது. இந்த மாடலின் சர்வதேச வெளியீடு இந்தியாவில் தான் நடைபெற்றது. தற்போது இந்த மாடல் தென் ஆப்ரிக்கா, இந்தோனேசியா, கிழக்கு ஆப்ரிக்கா, சிச்சில்ஸ், மொரிஷியஸ், பூட்டான், பெர்முடா மற்றும் புரூனெய் போன்ற நாடுகளிலும் கிடைக்கிறது.

"தலைசிறந்த டிசைன், ஸ்மார்ட் அம்சங்கள், அதீத பாதுகாப்பு, தரம் மற்றும் செயல்திறன் என அனைத்து பிரிவுகளிலும் சிறந்த மதிப்பீட்டை கொண்டிருக்கும் ரெனால்ட் கைகர் வாடிக்கையாளர்கள் மத்தியில் நல்ல வரவேற்பை பெற்று இருக்கிறது. இந்திய சந்தையில் அதிக போட்டி நிறைந்த காம்பேக்ட் எஸ்.யு.வி. பிரிவில் 50 ஆயிரம் யூன்ட்கள் உற்பத்தியாகி இருக்கிறது."

"இந்திய சந்தையில் எங்களின் வளர்ச்சிக்கு மிக முக்கிய பங்கு வகிக்கும் மாடல்களில் ரெனால்ட் கைகர் ஒன்று. ரெனால்ட் கைகர் மாடல் தொடர்ந்து நல்ல வரவேற்பை பெறுவதோடு இந்தியா மட்டுமின்றி சர்வதேச சந்தையிலும் பிராண்டு வளர்ச்சிக்கு வித்திடும் என எதிர்பார்க்கிறோம்," என்று ரெனால்ட் இந்தியா சி.இ.ஒ. மற்றும் நிர்வாக இயக்குனர் வெங்கட்ராமன் மமலிப்பல்லே தெரிவித்தார்.

ஜாகுவார் நிறுவனம் சமீபத்தில் அறிமுகம் செய்த F பேஸ் SVR எடிஷன் 1998 மாடலுக்கான முன்பதிவை துவங்கி இருக்கிறது. இது ஜாகுவார் ஹை பெர்பார்மன்ஸ் எஸ்.யு.வி.-யின் முதல் லிமிடெட் எடிஷன் மாடல் ஆகும். இந்த மாடலை எஸ்.வி. பிஸ்போக் வல்லுனர்கள் உருவாக்கினர் மொத்தத்தில் 394 யூனிட்கள் மட்டுமே உற்பத்தி செய்யப்பட உள்ளன.

இவை அனைத்தும் ஜாகுவார் ரேசிங் பாரம்பரியத்தை தழுவி உருவாக்கப்பட்டு இருக்கின்றன. 1998 ஆம் ஆண்டு சர்வதேச ஸ்போர்ட்ஸ் ப்ரோடோடைப் சாம்பியன்ஷிப் பட்டத்தை XJR-9 மாடல் வென்றதற்கு பெருமை சேர்க்கும் வகையில், புதிய லிமிடெட் எடிஷன் மாடல் இவ்வாறு அழைக்கப்படுகிறது.

லிமிடெட் எடிஷன் மாடலில் விசேஷமான பார்முலேட் செய்யப்பட்ட மிட்நைட் அம்திஸ்ட் கிளாஸ் பெயிண்ட் செய்யப்பட்டு உள்ளது. மேலும் இதில் ஆப்ஷனல் ஷேம்பெயின் கோல்டு சாட்டின் ஃபோர்ஜ்டு அலாய் வீல்கள் உள்ளன.மேலும் சன்செட் கோல்டு சாட்டின் எக்ஸ்டீரியர், இண்டீரியர் டீடெயிலிங் 'One of 394' எஸ்.வி. பிஸ்போக் கமிஷனிங் கிராபிக் இடம்பெற்று இருக்கிறது.

மேலும் சன்செட் கோல்டு சாட்டின் ஜாகுவார் லீப்பர், டெயில்கேட்டில் ஸ்க்ரிப்ட், முன்புற விங் பேனல் மீது லேசர் இட்ச் செய்யப்பட்ட எடிஷன் 1998 லோகோ இடம்பெற்று இருக்கிறது. இந்த மாடலில் ஜாகுவார் நிறுவனத்தின் 5.0 லிட்டர் வி8 சூப்பர் சார்ஜ் செய்யப்பட்ட பெட்ரோல் என்ஜின் வழங்கப்பட்டு உள்ளது. இந்த கார் மணிக்கு 100 கி.மீ. வேகத்தை நான்கு நொடிகளில் எட்டி விடும்.

ஜப்பான் நாட்டு ஆட்டோமொபைல் உற்பத்தியாளரான டொயோட்டா, நேற்று தான் புதிய அர்பன் குரூயிசர் ஹைரைடர் மாடலை இந்திய சந்தையில் அறிமுகம் செய்தது. இந்த மாடலுக்கான முன்பதிவு ஏற்கனவே துவங்கி நடைபெற்று வருகிறது. புதிய ஹைரைடர் மாடலுக்கான முன்பதிவு கட்டணம் ரூ. 25 ஆயிரம் என நிர்ணயம் செய்யப்பட்டு உள்ளது.

இந்தியாவில் டொயோட்டா அர்பன் குரூயிசர் ஹைரைடர் மாடல் நியோ டிரைவ் மற்றும் செல்ஃப் சார்ஜிங் ஹைப்ரிட் எலெக்ட்ரிக் இரண்டு பவர்டிரெயின் ஆப்ஷன்களில் கிடைக்கிறது. நியோ டிரைவ் மாடல் நான்கு வேரியண்ட்கள் - E, S, G மற்றும் V என நான்கு வேரியண்ட்களில் கிடைக்கிறது. செல்ப் சார்ஜிங் ஹைப்ரிட் எலெக்ட்ரிக் மாடல் S. G மற்றும் V என மூன்று வேரியண்ட்களில் கிடைக்கிறது.

ஹைப்ரிட் பவர்டிரெயினில் 1.5 லிட்டர் அட்கின்சன் சைக்கிள் பெட்ரோல் என்ஜின் மற்றும் சிங்கில் எலெக்ட்ரிக் மோட்டார், லித்தியம் அயன் பேட்டரி உள்ளது. இந்த என்ஜின் 87 ஹெச்.பி. பவர், 122 நியூட்டன் மீட்டர் டார்க் இழுவிசையை வெளிப்படுத்துகிறது. இதன் என்ஜின் மற்றும் மோட்டார் ஒன்றிணைந்த செயல்திறன் 114 ஹெச்.பி. ஆக உள்ளது. இத்துடன் e-CVT கியர்பாக்ஸ் வழங்கப்பட்டு இருக்கிறது.

1.5 லிட்டர் மைல்டு ஹைப்ரிட் யூனிட் 100.5 ஹெச்.பி. திறன், 135 நியூட்டன் மீட்டர் டார்க் இழுவிசைய வெளிப்படுத்துகிறது. இத்துடன் 5 ஸ்பீடு மேனுவல் மற்றும் 6 ஸ்பீடு டார்க் கன்வெர்ட்டர் ஆட்டோமேடிக் கியர்பாக்ஸ் வழங்கப்பட்டு இருக்கிறது. டொயோட்டா அர்பன் குரூயிசர் ஹைரைடர் மாடல் 2 வீல் டிரைவ் மற்றும் 4 வீல் டிரைவ் ஆப்ஷன்களில் கிடைக்கிறது. 

பி.எம்.டபிள்யூ. நிறுவனம் இந்தியாவில் 6 சீரிஸ் 50 ஜாரெ எம் எடிஷன் காரை அறிமுகம் செய்தது. பி.எம்.டபிள்யூ. நிறுவனத்தின் M பிரிவு 50 ஆவது ஆண்டு விழாவை கொண்டாடும் வகையில் தான் இந்த ஸ்பெஷல் ஜாரெ எடிஷன் மாடல்கள் அறிமுகம் செய்யப்பட்டு வருகின்றன.

முன்னதாக பி.எம்டபிள்யூ. 3 சீரிஸ் ஜாரெ எம் எடிஷன் மாடல் அறிமுகம் செய்யப்பட்ட நிலையில், ஜாரெ ஸ்பெஷல் எடிஷனில் இரண்டாவது மாடலாக பி.எம்.டபிள்யூ. 6 சீரிஸ் ஜாரெ எம் எடிஷன் அறிமுகம் செய்யப்பட்டுள்ளது. ஸ்பெஷல் எடிஷன் 50 ஜாரெ எம் எடிஷனில், பி.எம்.டபிள்யூ. பாரம்பரிய மோட்டார் ஸ்போர்ட் லோகோவை தழுவிய M சின்னம் வழங்கப்பட்டு இருக்கிறது.

இது வழக்கமான பி.எம்.டபிள்யூ. லோகோவுக்கு பதிலாக காரின் இருபுறங்களிலும் பொருத்தப்பட்டு இருக்கிறது. ஸ்பெஷல் எடிஷன் மாடல் டான்சனைட் புளூ மெட்டாலிக், M கார்பன் பிளாக், பெர்னினா கிரே ஆம்பர் எபெக்ட் மற்றும் மினரல் வைட் என நான்கு நிறங்களில் கிடைக்கிறது.

பி.எம்.டபிள்யூ. 6 சீரிஸ் ஸ்பெஷல் எடிஷன் மாடலில் 2 லிட்டர் ட்வின் டர்போ பெட்ரோல் என்ஜின் வழங்கப்பட்டு இருக்கிறது. இந்த என்ஜின் 258 ஹெச்.பி. பவர், 400 நியூட்டன் மீட்டர் டார்க் இழுவிசையை வெளிப்படுத்துகிறது. இத்துடன் 8 ஸ்பீடு ஆட்டோமேடிக் டிரான்ஸ்மிஷன் வழங்கப்பட்டு உள்ளது. இந்த கார் மணிக்கு 100 கிலோமீட்டர் வேகத்தை 6.5 நொடிகளில் எட்டி விடும். 

மாருதி சுசுகி நிறுவனம் 2022 பிரெஸ்ஸா மாடலை இந்திய சந்தையில் அறிமுகம் செய்தது. புதிய பிரெஸ்ஸா மாடல் விலை ரூ. 7 லட்சத்து 99 ஆயிரம், எக்ஸ்-ஷோரூம் என நிர்ணயம் செய்யப்பட்டு உள்ளது. இந்தியாவில் அதிகம் விற்பனையாகி வரும் எஸ்.யு.வி. மாடல்களில் ஒன்றாக மாருதி சுசுகி விட்டாரா பிரெஸ்ஸா இருந்து வருகிறது. தற்போது இதன் மேம்பட்ட மாடல் மாருதி சுசுகி பிரெஸ்ஸா பெயரில் அறிமுகம் செய்யப்பட்டு உள்ளது.

இந்திய சந்தையில் மாருதி சுசுகி விட்டாரா பிரெஸ்ஸா மாடல் இதுவரை 7 லட்சத்து 50 ஆயிரத்திற்கும் அதிக யூனிட்கள் விற்பனைாகி உள்ளன. புதிய 2022 பிரெஸ்ஸா மாடலில் பல்வேறு புது அம்சங்கள் வழங்கப்பட்டுள்ளன. காரின் வெளிப்புறம் அழகிய எல்.இ.டி. ஹெட்லேம்ப்கள், முன்புற பம்ப்பரில் புல் பார் எபெக்ட், பக்கவாட்டுகளில் புதிய அலாய் வீல்கள் உள்ளன. ரூஃப் பகுதியில் புளோட்டிங் எபெக்ட் உள்ளது.

இதன் டெயில்கேட் புதிதாக வழங்கப்பட்டு இருக்கிறது. புதிய மாடல் முந்தைய விட்டாரா பிரெஸ்ஸாவை விட சற்றே பெரியதாக காட்சியளிக்கிறது. கேபின் பகுதியில் 9 இன்ச் இன்போடெயின்மெண்ட் யூனிட் வழங்கப்பட்டு இருக்கிறது. இதில் உள்ள ஏ.சி. வெண்ட்கள் டேஷ்போர்டின் கீழ் மாற்றப்பட்டு இருக்கிறது.

புதிய மாருதி சுசுகி பிரெஸ்ஸா மாடலில் 1.5 லிட்டர் K12C பெட்ரோல் மோட்டார் வழங்கப்பட்டு இருக்கிறது. இந்த என்ஜின் 103 ஹெச்.பி. பவர், 138 நியூட்டன் மீட்டர் டார்க் இழுவிசையை வெளிப்படுத்துகிறது. கூடுதலாக மைல்டு ஹைப்ரிட் மோட்டார் உள்ளது. இது 3 ஹெச்.பி. பவர் வெளிப்படுத்துகிறது. இத்துடன் 6 ஸ்பீடு ஆட்டோமேடிக் டார்க் கன்வெர்ட்டர் ஆப்ஷன், 5 ஸ்பீடு மேனுவல் டிரான்ஸ்மிஷன் ஆப்ஷன்கள் வழங்கப்படுகிறது.

இந்தியாவில் 2022 மாருதி சுசுகி பிரெஸ்ஸா மாடல் கியா சொனெட், டாடா நெக்சான், ஹூண்டாய் வென்யு, நிசான் மேக்னைட், ரெனால்ட் கைகர் மற்றும் மஹிந்திரா XUV300 போன்ற மாடல்களுக்கு போட்டியாக அமைகிறது. புதிய 2022 மாருதி சுசுகி பிரெஸ்ஸா மாடலின் டாப் எண்ட் மாடல் விலை ரூ. 13 லட்சத்து 96 ஆயிரம், எக்ஸ்-ஷோரூம் என நிர்ணயம் செய்யப்பட்டு உள்ளது.

அரசு திட்டங்கள் காரணமாக சிறிய கார்கள் பயனற்று போகும் பட்சத்தில் அவற்றின் விற்பனை நிறுத்தப்படும் என மாருதி சுசுகி நிறுவன தலைவர் ஆர்.சி. பார்கவா தெரிவித்து இருக்கிறார்.

இந்தியாவில் விற்பனை செய்யப்படும் பயணிகள் வாகனங்களில் ஆறு ஏர்பேக் கட்டாயம் பொருத்தப்பட வேண்டும் என்ற விதி அமலுக்கு வர இருக்கிறது. இதன் காரணமாக இந்தியாவில் கார்களின் விலை அதிகரிக்கும் வாய்ப்புகள் உண்டு என தனியார் நிறுவனத்திற்கு அளித்த பேட்டி ஒன்றில் ஆர்.சி. பார்கவா தெரிவித்தார்.

இது போன்ற திட்டங்கள் சிறு கார்களை பயனற்று போகச் செய்யும் பட்சத்தில் அவற்றின் விற்பனையை மாருதி சுசுகி நிறுத்தி விடும். இதன் காரணமாக மாருதி சுசுகி நிறுவனத்தின் எதிர்காலத்தை கேள்விக்குறியாக்கி விடும் என கூறப்பட்டது. எனினும், மாருதி சுசுகி நிறுவன லாபம் சிறிய கார்களின் விற்பனையை சார்ந்து இருக்கவில்லை என தெரிவித்தார்.

"எங்களின் லாபம் சிறிய கார்களை நம்பி இருக்கவில்லை. மக்கள் தவறான கண்ணோட்டம் கொண்டுள்ளனர். நாங்கள் ஆல்டோ போன்ற மாடல்களை லாபம் இன்றி தான் விற்பனை செய்கிறோம். கார் சந்தையில் இருந்து சிறிய கார்கள் மறையும் பட்சத்தில் இந்த துறை வேலைவாய்ப்புகள் வெகுவாக குறைந்து விடும்," என ஆர்.சி. பார்கவா தெரிவித்தார். 

மஹிந்திரா நிறுவனம் இந்தியாவில் அதிகம் எதிர்பார்க்கப்பட்ட ஸ்கார்பியோ N மாடலை அறிமுகம் செய்தது. புதிய மஹிந்திரா ஸ்கார்பியோ N மாடலின் விலை ரூ. 11.99 லட்சம் என துவங்குகிறது. இந்த மாடலின் முன்பதிவு ஜூலை 30 ஆம் தேதி காலை 11 மணிக்கு ஆன்லைன் மற்றும் மஹிந்திரா விற்பனை மையங்களில் துவங்க இருக்கிறது. வினியோகம் பண்டிகை காலக்கட்டத்தில் துவங்க இருக்கிறது.

இந்திய சந்தையில் புதிய மஹிந்திரா ஸ்கார்பியோ N மாடல் - Z2, Z4, Z6, Z8 மற்றும் Z8L என மொத்தம் ஐந்து வித வேரியண்ட்களில் கிடைக்கிறது. புதிய தலைமுறை மஹிந்திரா ஸ்கார்பியோ N மாடல் டாடா ஹேரியர், டாடா சஃபாரி, ஹூண்டாய் கிரெட்டா மற்றும் ஹூண்டாய் அல்கசார் போன்ற மாடல்களுக்கு இந்திய சந்தையில் போட்டியாக அமைகிறது.

விலை விவரங்கள்:

மஹிந்திரா ஸ்கார்பியோ N Z2 பெட்ரோல் மேனுவல் ரூ. 11 லட்சத்து 99 ஆயிரம்

மஹிந்திரா ஸ்கார்பியோ N Z2 டீசல் மேனுவல் ரூ. 12 லட்சத்து 49 ஆயிரம்

மஹிந்திரா ஸ்கார்பியோ N Z4 பெட்ரோல் மேனுவல் ரூ. 13 லட்சத்து 49 ஆயிரம்

மஹிந்திரா ஸ்கார்பியோ N Z4 டீசல் மேனுவல் ரூ. 13 லட்சத்து 99 ஆயிரம்

மஹிந்திரா ஸ்கார்பியோ N Z6 டீசல் மேனுவல் ரூ. 14 லட்சத்து 99 ஆயிரம்

மஹிந்திரா ஸ்கார்பியோ N Z8 பெட்ரோல் மேனுவல் ரூ. 16 லட்சத்து 99 ஆயிரம்

மஹிந்திரா ஸ்கார்பியோ N Z8 டீசல் மேனுவல் ரூ. 17 லட்சத்து 49 ஆயிரம்

மஹிந்திரா ஸ்கார்பியோ N Z8L பெட்ரோல் மேனுவல் ரூ. 18 லட்சத்து 99 ஆயிரம்

மஹிந்திரா ஸ்கார்பியோ N Z8L டீசல் மேனுவல் ரூ. 19 லட்சத்து 49 ஆயிரம்

புதிய மஹிந்திரா ஸ்கார்பியோ N மாடல் - டார்மேக், ஸ்னோ, மட் மற்றும் டெசர்ட் என பல்வேறு டிரைவ் மோட்களை கொண்டிருக்கிறது. இந்த எஸ்.யு.வி. மாடல் மூன்றாம் தலைமுறை பாடி ஆன் ஃபிரேம் பிளாட்பார்மில் உருவாக்கப்பட்டு இருக்கிறது. இது காருக்கு ஆஃப் ரோடிங் வசதி மற்றும் அதிவேகமாக பயணிக்கும் போதும் சிறப்பான கண்ட்ரோல் வழங்குகிறது.

இந்த மாடலில் எம் ஸ்டேலியன் பெட்ரோல் என்ஜின் வழங்கப்பட்டு இருக்கிறது. இந்த என்ஜின் 200 பி.எஸ். பவர், 380 நியூட்டன் மீட்டர் டார்க் இழுவிசையை வெளிப்படுத்துகிறது. இத்துடன் எம் ஹாக் டீசல் என்ஜின் ஆப்ஷனும் வழங்கப்பட்டு இருக்கிறது. இந்த என்ஜின் 175 பி.எஸ். பவர், 400 நியூட்டன் மீட்டர் டார்க் இழுவிசையை வெளிப்படுத்துகிறது. இத்துடன் 6 ஸ்பீடு மேனுவல், ஆட்டோ கியர்பாக்ஸ், ஷிப்ட் பை வயர் தொழில்நுட்பம் உள்ளிட்டவை வழங்கப்பட்டு இருக்கிறது.