விளையாட்டு

பெங்களூரு:

இந்திய கிரிக்கெட் அணியின் முன்னாள் கேப்டன் அனில் கும்பிளே தனது டுவிட்டர் பக்கத்தில் வெளியிட்டு இருக்கும் ஒரு வீடியோ பதிவில், ‘கொரோனா வைரசுக்கு எதிரான போராட்டத்தில் நாம் அனைவரும் ஒருங்கிணைந்து செயல்பட வேண்டியது அவசியமானதாகும்.

இது ஒரு டெஸ்ட் போட்டி போன்றதாகும். டெஸ்ட் போட்டி வெறும் 5 நாட்கள் தான் நடைபெறும். ஆனால் இது நீண்டதாக உள்ளது. டெஸ்ட் போட்டியில் ஒவ்வொரு அணிக்கும் தலா 2 இன்னிங்ஸ் மட்டுமே உண்டு. ஆனால் இதில் அதனை காட்டிலும் அதிகமாக இருக்கலாம். முதல் இன்னிங்சில் நாம் சற்று முன்னிலையில் இருக்கிறோம் என்பதற்காக மெத்தனமாக இருக்கக்கூடாது. ஏனெனில் 2-வது இன்னிங்ஸ் உண்மையில் மிகவும் கடினமாக இருக்கலாம்.

இந்த போராட்டத்தில் நாம் முழுமையான வெற்றியை பெற வேண்டும். கொரோனாவுக்கு எதிரான போரில் தன்னலம் பார்க்காமல் ஈடுபட்டு இருக்கும் டாக்டர்கள், நர்சுகள், சுகாதார பணியாளர்கள், போலீசார் உள்ளிட்ட அனைத்து தரப்பினருக்கும் இந்த தருணத்தில் நன்றி தெரிவித்து கொள்கிறேன்’ என்று குறிப்பிட்டுள்ளார். 

புதுடெல்லி:

கொரோனா வைரஸ் தாக்கம் காரணமாக உலகம் முழுவதும் கிரிக்கெட் போட்டிகள் பாதிக்கப்பட்டுள்ளது.

கடந்த மார்ச் மாதத்திலிருந்து எந்தவொரு சர்வதேச கிரிக்கெட் போட்டி தொடரும் நடைபெறவில்லை.

இதன் காரணமாக ஒவ்வொரு நாட்டு கிரிக்கெட் சங்கத்துக்கும் அதிகமாக வருவாய் இழப்பு ஏற்பட்டுள்ளது. இதை எப்படி ஈடு செய்வது என்பது குறித்து, அவைகள் ஆலோசனை செய்து வருகின்றன. இதற்கிடையே கொரோனா வைரஸ் தாக்கத்திற்கு பிறகு 2 அணிகளை தயார் செய்ய இங்கிலாந்து, ஆஸ்திரேலிய கிரிக்கெட் வாரியங்கள் திட்டமிட்டுள்ளன.

அதாவது டெஸ்ட் போட்டிக்கு ஒரு அணியும், ஒருநாள் போட்டி மற்றும் 20 ஓவருக்கு இன்னொரு அணியையும் தயார் செய்வது என்று முடிவு செய்துள்ளன. இதன்மூலம் தொடர்ந்து போட்டிகளை நடத்தி வருவாயை பெற்று விடலாம் என்று கருதி இந்த முடிவை எடுத்துள்ளன.

இங்கிலாந்து, ஆஸ்திரேலியா போலவே இந்திய கிரிக்கெட் வாரியமும், 2 அணிகளை களமிறக்க தயாராகியுள்ளது. இது தொடர்பாக இந்திய கிரிக்கெட் வாரிய நிர்வாகி ஒருவர் கூறியதாவது:-

2 அணிகளை களமிறக்க ஆஸ்திரேலியா, இங்கிலாந்து ஏற்கனவே முடிவு எடுத்துள்ளன. தேவைப்பட்டால் இந்திய கிரிக்கெட் வாரியமும், கொரோனா வைரஸ் பாதிப்புக்கு பிறகு 2 அணிகளை களத்தில் இறக்க தயாராக இருக்கிறது.

இவ்வாறு அவர் கூறினார்.

மெல்போர்ன்:

கொரோனா வைரஸ் அச்சுறுத்தலால் உலகம் முழுவதும் விளையாட்டுகள் கடுமையாக பாதிக்கப்பட்டுள்ளன.

ஒலிம்பிக் போட்டி மற்றும் ஐரோப்பிய கால்பந்து ஆட்டம் ஒரு ஆண்டுக்கு தள்ளி வைக்கப்பட்டது. இதேப்போல பிரெஞ்சு ஓபன் டென்னிஸ் போட்டியும் ஒத்திவைக்கப்பட்டது. விம்பிள்டன் டென்னிஸ் ரத்தானது.

இந்தியாவில் பணம் கொழிக்கும் விளையாட்டான ஐ.பி.எல். 20 ஓவர் கிரிக்கெட் காலவரையின்றி. ஒத்திவைக்கப்பட்டது.

20 ஓவர் உலக கோப்பை கிரிக்கெட் போட்டியை ஆஸ்திரேலியாவில் அக்டோபர் 18-ந் தேதி முதல் நவம்பர் 15-ந் தேதி வரை நடத்த திட்டமிடப்பட்டு உள்ளது.

கொரோனா வைரஸ் அச்சுறுத்தல் காரணமாக செப்டம்பர் 30 தேதி வரை வெளிநாட்டினர் ஆஸ்திரேலியா வர அந்நாடு தடை விதித்துள்ளது. இதனால் 20 ஓவர் உலக கோப்பையின் நிலை கேள்விக்குறியாக இருக்கிறது.

இந்த நிலையில் ஆஸ்திரேலியாவில் 20 ஓவர் உலக கோப்பை போட்டி நடைபெறுவது கடினமானது என்று அந்நாட்டு முன்னணி வீரர்களில ஒருவரான டேவிட் வார்னர் கூறியுள்ளார்.

இதுதொடர்பாக அவர் இன்ஸ்டாகிராம் மூலம் இந்திய வீரர் ரோகித்சர்மா விடம் கூறியதாவது;

கொரோனா வைரசின் அச்சுறுத்தல் காரணமாக ஆஸ்திரேலியாவில் இந்த ஆண்டு 20 ஓவர் உலக கோப்பை போட்டி நடைபெறாது என்று நினைக்கிறேன். ஒவ்வொரு நாட்டு வீரர்களும் (16 அணிகள்) ஒன்றிணைவது கடினமானது.

இவ்வாறு வார்னர் கூறியுள்ளார்.

புதுடெல்லி:

கொரோனா வைரஸ் அச்சுறுத்தல் காரணமாக கடந்த மார்ச் மாதம் மத்தியில் இருந்து சர்வதேச கிரிக்கெட் போட்டிகள் அனைத்தும் தள்ளி வைக்கப்பட்டும், ரத்து செய்யப்பட்டும் இருக்கின்றன. கொரோனா பிரச்சினை தணிந்ததும் கிரிக்கெட் போட்டிகளை உரிய பாதுகாப்புடன் மீண்டும் தொடங்குவதில் எல்லா கிரிக்கெட் வாரியங்களும் முனைப்பு காட்டி வருகின்றன.

நோய் தொற்றில் இருந்து அனைத்து தரப்பினரையும் பாதுகாக்கும் பொருட்டு ரசிகர்கள் அனுமதியின்றி பூட்டிய ஸ்டேடியத்தில் கிரிக்கெட் போட்டிகளை நடத்தலாமா? என்று ஆலோசனை நடத்தப்பட்டு வருகிறது. ரசிகர்கள் இல்லாவிட்டாலும் பரவாயில்லை, போட்டி நடந்தால் போதும் என்ற நிலைக்கு பல நாட்டு வீரர்கள் வந்து விட்டனர். எனவே கொரோனா பாதிப்பு குறைந்ததும் ரசிகர்கள் இல்லாமல் காலி மைதானத்தில் போட்டிகள் அரங்கேற அதிக வாய்ப்புள்ளது.

இந்த நிலையில் இந்திய கிரிக்கெட் அணியின் கேப்டன் விராட்கோலி ஸ்டார் ஸ்போர்ட்ஸ் சேனல் நிகழ்ச்சி ஒன்றில் பங்கேற்று பேசுகையில் கூறியதாவது:-

தற்போதைய சூழ்நிலையை பார்க்கையில் ரசிகர்கள் இல்லாமல் கிரிக்கெட் போட்டி நடத்தப்படுவதற்கான சாத்தியம் இருக்கிறது. ஆனால் இதனை ஒவ்வொரு வீரரும் எப்படி எடுத்துக்கொள்வார்கள் என்பது உண்மையிலேயே எனக்கு தெரியவில்லை. ஏனெனில் ஆர்வம் மிக்க ரசிகர்கள் கூட்டத்திற்கு முன்னிலையில் விளையாடி நாங்கள் எல்லாம் பழக்கப்பட்டு விட்டோம். போட்டியில் வீரர்கள் மிகுந்த தீவிரம் காட்டுவார்கள் என்பது தெரியும். ஆனால் வீரர்களை பார்த்து ரசிகர்கள் எழுப்பும் ஆரவாரம், உற்சாகம் மற்றும் ஆட்டத்துக்குரிய பதற்றம் போன்ற உணர்வுகள் ரசிகர்கள் இல்லாத ஸ்டேடியத்தில் கிடைக்காது. அதுபோன்ற உணர்ச்சிகளை உருவாக்குவது என்பது மிகவும் கடினமாகும்.

ரசிகர்கள் இல்லை என்றாலும் போட்டி நடைபெற தான் செய்யும். ஆனால் மைதானத்தில் ரசிகர்கள் இருக்கும் சூழலில் நடக்கும் மாயாஜாலங்கள் அவர்கள் இல்லாத நிலையில் நடக்குமா? என்பது சந்தேகம் தான். நாங்கள் எப்பொழுதும் போல் கிரிக்கெட் போட்டியை சிறப்பாகவே விளையாடுவோம். ஆனால் அதுபோன்ற மாயாஜாலத் தருணங்களை கொண்டு வருவது என்பது கடினமானதாகும். நான் நேர்மறையான சிந்தனையுடனும், மகிழ்ச்சியுடனும் எனது வாழ்க்கையை எதிர்நோக்கி வருகிறேன். இதனால் நான் எப்போது களத்துக்கு திரும்பினாலும், எந்த இடத்தில் விட்டுச்சென்றேனா? அந்த இடத்தில் இருந்து தொடங்க சிறப்பான நிலையில் இருப்பேன் என்பது எனக்கு தெரியும்.

இவ்வாறு அவர் கூறினார்.