புதுச்சேரி

புதுச்சேரி:

புதுச்சேரி காலாப்பட்டில் யூகோ வங்கி உள்ளது. இந்த வங்கியில் கடந்த 2016-ம் ஆண்டு போலி பத்திரம் மூலம் முதலியார்பேட்டையை சேர்ந்த ஓட்டல் உரிமையாளரான கணேசன் என்பவருக்கு ரூ.6 லட்சம் கடன் வழங்கப்பட்டது.

இதற்கு முன்னாள் வங்கி மேலாளர் தென்னரசு உடந்தையாக இருந்தது தெரியவந்தது. இதுகுறித்து புதுச்சேரி சி.பி.சி.ஐ.டி. போலீசார் வழக்குப்பதிவு செய்து விசாரணை நடத்தினார்கள்.

இந்த வழக்கு விசாரணை புதுச்சேரி தலைமை குற்றவியல் நீதிமன்றத்தில் நீதிபதி மோகன் முன்னிலையில் நடைபெற்று வந்தது. இந்த வழக்கில் விசாரணை முடிந்தநிலையில் நேற்று தீர்ப்பு வழங்கப்பட்டது.

இதில் குற்றம்சாட்டப்பட்ட கணேசன், தென்னரசு ஆகியோருக்கு தலா 3 ஆண்டுகள் கடுங்காவல் தண்டனையும், ரூ.25 ஆயிரம் அபராதமும் விதித்து நீதிபதி மோகன் தீர்ப்பு அளித்தார்.

இந்த வழக்கில் அரசு தரப்பில் பிரவீன்குமார் ஆஜரானார்.

காரைக்கால்:

காரைக்கால் திருநள்ளாறை அருகே சேத்தூர், பண்டாரவாடை கிராமத்தை சேர்ந்தவர் தீபா(வயது29). இவர் மயிலாடுதுறை பகுதி காவேரி நகரை சேர்ந்த யபேஷ்(30) என்பரை கடந்த சில ஆண்டுகளாக காதலித்து வந்ததார்.

இந்நிலையில், யபேஷ் தீபாவை திருமணம் செய்துகொள்வதாக ஆசை வார்த்தைகள் கூறி பலமுறை பலாத்காரம் செய்ததாக கூறப்படுகிறது. தொடர்ந்து, யபேஷ் தீபாவை திருமணம் செய்துகொள்ள மறுத்துவிட்டார். இதனால் கோபம் அடைந்த தீபா யபேஷிடம் இருவரும் சேர்ந்திருக்கும் புகைப்படங்களை வெளியிடுவேன் என கூறி மிரட்டியதாக கூறப்படுகிறது.

ஆத்திரமடைந்த யபேஷ் தீபாவை கொலை செய்து விடுவேன் என கொலை மிரட்டல் விடுத்ததாக கூறப்படுகிறது. இதனை தொடர்ந்து தீபா காரைக்கால் அனைத்து மகளிர் போலீஸ் நிலையத்தில் புகார் அளித்தார்.

அதன்பரில் வழக்கு பதிவு செய்த போலீசார், யபேஷை கைது செய்தனர். மேலும் யபேஷ் சகோதிரி ஜபசீலி (37), ஜபசீலி கணவர் இன்பராஜ் (39) ஆகிய 2 பேர் மீது வழக்கு பதிவு செய்து விசாரணை மேற்கொண்டு வருகின்றனர்.

புதுச்சேரி:

புதுவை பே‌ஷன் டாட் ஹைடெக் கம்ப்யூட்டரைஸ்டு தையல் பயிற்சி நிறுவனம் சார்பில் அரியாங்குப்பம் அகில பாண்டுரங்கன் திருமண மண்டபத்தில் பெண்கள் தின விழா நடந்தது.

சபாநாயகர் ஏம்பலம் செல்வம், பாஸ்கரன் எம்.எல்.ஏ. ஆகியோர் முன்னிலை வகித்தனர்.

இதில், கவர்னர் தமிழிசை கலந்துகொண்டு தையல் பயிற்சி பெற்ற ஏழை மாற்றுத்திறனாளி பெண்களுக்கு தையல் எந்திரம் மற்றும் சான்றிதழ்கள் வழங்கி பேசினார். அப்போது அவர் பேசியதாவது:-

புதுவையின் வளர்ச்சிக்காக மீண்டும் விமான சேவை தொடங்கப்பட்டிருக்கிறது. வாழ்க்கையில் முன்னேற வேண்டுமென்றால் பெண்கள் எதற்காகவும் மரியாதையை விட்டுக்கொடுக்க கூடாது.

பெண்களை குறைவாக நினைக்கும் சமுதாய சிந்தனை இன்றும் இருந்து கொண்டுதான் இருக்கிறது. பெண்களுக்கான முழு அதிகாரமும் உரிமையும் கொடுக்கப்படவேண்டும் என்பதற்காக அதன் பிரதிநிதியாக நான் இந்த நிகழ்வில் கலந்து கொள்கிறேன்.

பெண்களுக்கு யார் மரியாதை கொடுக்க மறுக்கிறார்களோ, அவமதிக்கிறார்களோ அவர்கள் தலைகுனியும் அளவுக்கு பெண் சமூகம் முன்னேற்றம் அடைய வேண்டும்.

பெண்கள் தலை நிமிர வேண்டும் என்பது என்னுடைய ஆவல். பல வேலைகளை ஒரே நேரத்தில் செய்யக்கூடிய திறமை ஆண்களைவிட பெண்களுக்கு அதிகம். பெண்களுக்கு பொருளாதார அதிகாரம் கிடைக்கும் போது தன்னம்பிக்கை வந்துவிடும். பெண்கள் வாழ்க்கையில் முன்னேறுவதற்கு பொருளாதார சுதந்திரம் வேண்டும். அதை கைத்தொழில்கள் நமக்கு அளிக்கும். பெண்கள் யாருக்காகவும் தலைகுனிய கூடாது. தலை நிமிர்ந்து இருக்க வேண்டும். அது தன்னம்பிக்கையினால் இருக்கவேண்டும்.

இவ்வாறு அவர் பேசினார்.

புதுச்சேரி:

புதுவையில் கடந்த ஆண்டு கொரோனா தாக்கம் அதிகமாக இருந்தது. தினமும் நூற்றுக்கணக்கானோர் பாதிக்கப்பட்டு வந்தனர். கடந்த டிசம்பர் மாதம் கொரோனா பாதிப்பு சற்று குறைந்து இருந்தது.

இந்த நிலையில் புதுவையில் புத்தாண்டு கொண்டாட்டத்துக்கு அரசு அனுமதி வழங்கியதை தொடர்ந்து கொரோனா தொற்று மீண்டும் அதிகரிக்க தொடங்கியது.

வெளி மாநிலங்களில் இருந்து புதுவைக்கு புத்தாண்டு கொண்டாட வந்தவர்களால்தான் கொரோனா தொற்று அதிகரித்ததாக குற்றச்சாட்டுகள் எழுந்தது.

ஜனவரி மாதத்துக்கு பின் புதுவையில் கொரோனா தொற்று மீண்டும் குறைய தொடங்கியது. ஒரு நாள் பாதிப்பு 10-க்கும் கீழ் சென்றது. ஒரு சில நாட்களில் தொற்று இல்லாமல் இருந்து வந்தது.

இந்த நிலையில் 222 பேருக்கு கொரோனா பரிசோதனை மேற்கொள்ளப்பட்டது. இதில் ஒருவருக்கு கூட தொற்று பாதிப்பு கண்டறியப்படவில்லை.

வீட்டில் தனிமைப்படுத்தப்பட்டு இருந்தவர்களும் குணமடைந்தனர். இதனால் புதுவை மாநிலம் கொரோனா தொற்று இல்லாத மாநிலமாக மாறி உள்ளது.

அரசு மற்றும் சுகாதாரத்துறை எடுத்த பல்வேறு நடவடிக்கை காரணமாக புதுவை கொரோனா இல்லாத மாநிலமாக மாறியதால் பொதுமக்கள் மகிழ்ச்சி அடைந்துள்ளனர்.

நேற்று முன்தினம் புதுவையில் ஆயிரம் பேர் முதல் தவணை தடுப்பூசியையும், 919 பேர் 2-வது தவணை தடுப்பூசியையும், 105 பேர் பூஸ்டர் தடுப்பூசியும் செலுத்தி உள்ளனர்.

இதுவரை 16 லட்சத்து 36 ஆயிரத்து 901 டோஸ் தடுப்பூசிகள் செலுத்தப்பட்டுள்ளது.