விருதுநகர்

சிவகாசி:

கடந்த 100 ஆண்டுகளுக்கு முன்னர் சிவகாசி நகராட்சியாக தரம் உயர்த்தப்பட்டது. அதன் பின்னர் தற்போது அருகில் இருந்த திருத்தங்கல் நகராட்சியை சிவகாசியோடு இணைத்து புதிய மாநகராட்சி தொடங்கப்பட்டுள்ளது.

நகர்புற உள்ளாட்சி தேர்தல் நடைபெற உள்ள நிலையில் சிவகாசி மாநகராட்சிக்கு உட்பட்ட பகுதியை அதிகாரிகள் 48 வார்டுகளாக பிரித்துள்ளனர். இதில் திருத்தங்கல் பகுதியில் 24 வார்டுகளும், சிவகாசி பகுதியில் 24 வார்டுகளும் உள்ளது.

சிவகாசி மாநகராட்சிக்கு உட்பட்ட 48 வார்டுகளில் ஆதிதிராவிட மக்கள் போட்டியிட வசதியாக 7 வார்டுகள் ஒதுக்கப்பட்டுள்ளது. இதில் 4 வார்டுகள் பெண்களுக்கும், 3 வார்டுகள் ஆண்களுக்கும் ஒதுக்கப்பட்டுள்ளது. மேலும் 20 வார்டுகள் பொது வார்டுகளாக அறிவிக்கப்பட்டுள் ளது. மேலும் 21 வார்டுகள் பெண்கள் (பொது) என அறிவிக்கப்பட்டுள்ளது. மொத்தம் உள்ள 48 வார்டுகளில் எந்தெந்த வார்டுகள் யாருக்கு என்ற விவரத்தை அதிகாரிகள் தெரிவிக்க மறுத்துவிட்டனர்.

இதுகுறித்து நகராட்சி உயர்அதிகாரி ஒருவரிடம் கேட்டபோது அவர் கூறியதாவது:-

அரசின் உத்தரவுப்படி வார்டு பிரிக்கும் பணி நடைபெற்றது. அதில் சில திருத்தம் செய்ய வாய்ப்பு இருக்கிறது. அனைத்து பணிகளும் முடிந்த பின்னர் சிவகாசி மாநகராட்சி வார்டு விவரங்கள் குறித்த தகவல் வெளியாகும் என்றார்.

சிவகாசி மாநகராட்சிக்கு தற்போது தான் முதல் தேர்தல். இந்த தேர்தலில் போட்டியிட்டு வெற்றி பெறுபவர் முதல் மேயர் என்ற பெருமை இருக்கும். இந்த நிலையில் சிவகாசி மாநகராட்சி தேர்தல் பணிகளில் அதிகாரிகள் வேகம் காட்டி வருவதை போல் அரசியல் கட்சியினரும் வேகம் காட்டி வருகிறார்கள். தி.மு.க., அ.தி.மு.க., காங்கிரஸ் உள்ளிட்ட கட்சிகள் மாநகராட்சி தேர்தலில் போட்டியிடுவது குறித்து தனித்தனியே தங்களது நிர்வாகிகளுடன் ஆலோசனை நடத்தி வருகிறது.

சிவகாசி மாநகராட்சி பதவி ஆண்களுக்கு ஒதுக்கப்பட்டுள்ளதா? பெண்களுக்கு ஒதுக்கப்பட்டுள்ளதா? என்பதை தெரிந்து கொள்ள அரசியல் கட்சியினர் ஆர்வமாக உள்ளனர்.

விரைவில் இதற்கான அறிவிப்பு வெளிவரும் என்று அதிகாரி ஒருவர் தெரிவித்தார்.

விருதுநகர்:

விருதுநகர் தொகுதி தி.மு.க. சட்டமன்ற உறுப்பினரான ஏ.ஆர்.ஆர்.சீனிவாசன் (வயது 64), பொங்கல் தொகுப்பு வழங்கும் நிகழ்ச்சி உள்ளிட்ட சில நிகழ்ச்சிகளில் கலந்து கொண்டார்.

இந்த நிலையில் அவருக்கு திடீரென உடல் நலம் பாதிக்கப்பட்டது. பரிசோதனை செய்ததில் அவருக்கு கொரோனா தொற்று இருப்பது உறுதி செய்யப்பட்டது. ஏற்கனவே 2 தவணை தடுப்பூசி செலுத்தி இருந்ததால், அவருக்கு லேசான பாதிப்புதான் என டாக்டர்கள் தெரிவித்துள்ளனர்.

ஏ.ஆர்.ஆர்.சீனிவாசன் எம்.எல்.ஏ., சமீபத்தில் நடந்த சட்டசபை கூட்டத்தில் கலந்துகொண்டார். கூட்டம் நடப்பதற்கு முன்பாக அவருக்கு எடுத்த பரிசோதனையில் கொரோனா தொற்று இல்லை என்பது குறிப்பிடத்தக்கது.

விருதுநகர்:

விருதுநகர் என்.ஜி.ஓ. காலனி கம்பர் தெருவை சேர்ந்தவர் கண்ணன் (வயது 32). இவரது மனைவி கற்பகம் (30). இவர்களுக்கு திருமணமாகி 10 ஆண்டுகள் ஆகிறது. 5 மற்றும் 1½ வயதில் குழந்தைகள் உள்ளனர்.

கண்ணன் மதுரை திருமங்கலத்தில் உள்ள வங்கியில் ஊழியராக வேலை பார்த்து வருகிறார். வங்கி ஊழியராக இருந்து வந்த அவரது தந்தை கிருஷ்ணன் இறந்ததை தொடர்ந்து, அவரது வேலை கருணை அடிப்படையில் கண்ணனுக்கு கிடைத்தது.

வேலைக்காக தினமும் விருதுநகரில் இருந்து திருமங்கலத்திற்கு கண்ணன் சென்று வந்தார். இந்த நிலையில் அவருக்கு மனைவி கற்பகத்தின் நடத்தையில் சந்தேகம் ஏற்பட்டது. இது தொடர்பாக கேட்டு மனைவியிடம் அடிக்கடி தகராறு செய்து வந்துள்ளார்.

இதனால் கணவன் -மனைவிக்கு இடையே அடிக்கடி பிரச்சினை ஏற்பட்டுள்ளது. இதே போல் இன்று காலையும் இருவருக்கும் இடையே தகராறு நடந்துள்ளது. அப்போது ஆத்திரமடைந்த கண்ணன் வீட்டில் இருந்த கத்தியை எடுத்து மனைவி கற்பகத்தை சரமாரியாக குத்தினார்.

இதில் படுகாயமடைந்த கற்பகம் சம்பவ இடத்திலேயே துடிதுடித்து இறந்தார். ஆத்திரத்தில் மனைவியை கொன்றதை நினைத்து கண்ணன் வேதனை அடைந்தார். அவர் போலீஸ் நிலையத்திற்கு சென்று சரணடைய முடிவு செய்தார்.

அப்போது கண்ணனின் 2 குழந்தைகளும் தூங்கிக் கொண்டிருந்தன. அவர்களை வீட்டிலேயே விட்டு விட்டு விருதுநகர் பாண்டியன் நகர் போலீஸ் நிலையத்திற்கு சென்று தனது மனைவியை கொலை செய்து விட்டதாக கூறி சரண் அடைந்தார்.

இதைத்தொடர்ந்து போலீசார் கண்ணனின் வீட்டுக்கு சென்றனர். அங்கு கற்பகம் ரத்த வெள்ளத்தில் பிணமாக கிடந்தார். போலீசார் வந்த பிறகே கண்ணன், அவரது மனைவியை கொலை செய்த தகவல் அக்கம், பக்கத்தினருக்கு தெரிய வந்தது.

இதையடுத்து அந்தப் பகுதியில் ஏராளமானார் திரண்டு விட்டனர். விசாரணைக்கு பின் கற்பகத்தின் உடலை போலீசார் அங்கிருந்து மீட்டு பிரேத பரிசோதனைக்காக விருதுநகர் அரசு ஆஸ்பத்திரிக்கு அனுப்பி வைத்தனர். இந்த கொலை குறித்து போலீசார் வழக்கு பதிந்து கணவர் கண்ணனை கைது செய்தனர்.

நடத்தை சந்தேகத்தில் ஏற்பட்ட தகராறில் மனைவியை கொன்று விட்டதாக வாக்குமூலம் அளித்திருப்பதாக போலீசார் தெரிவித்தனர். நடத்தை சந்தேகத்தில் மனைவியை வங்கி ஊழியர் கொலை செய்த சம்பவம் விருதுநகரில் பரபரப்பை ஏற்படுத்தியது.

சிவகாசி:

சிவகாசி அருகே உள்ள பனையடிப்பட்டி ஊராட்சி, அல்லம்பட்டியில் செயல்பட்டு வந்த பட்டாசு ஆலையில் கடந்த 5-ந் தேதி வெடி விபத்து ஏற்பட்டது. இந்த விபத்தில் ஆலையின் உரிமையாளர் கருப்பசாமி, தொழிலாளர்கள் மஞ்சளோடைப்பட்டி முனியசாமி, கன்னகுடும்பன்பட்டி காசி, கொம்மங்கிபுரம் அய்யம்மாள், தென்காசி மாவட்டம், கிழவிகுளம், காமாட்சிபுரம் செந்தில் ஆகியோர் பலியானார்கள்.

விபத்து தொடர்பாக ஏழாயிரம்பண்ணை போலீசார் வழக்குப்பதிவு செய்து விசாரணை நடத்தினர். இதில் பட்டாசு ஆலை உரிமையாளர் கருப்பசாமி, தனது தாயார் பூமாரி பெயரில் ஆலைக்கான உரிமம் பெற்றிருப்பது தெரியவந்தது.

விபத்து தொடர்பாக கருப்பசாமி, அவரது தாயார் பூமாரி, ஆறுமுகம், நாகேந்திரன், பரமேஸ்வரன் ஆகிய 5 பேர் மீது போலீசார் வழக்குப்பதிவு செய்தனர். இதில் கருப்பசாமி இறந்து விட்ட நிலையில் மற்ற 4 பேரையும் போலீசார் தேடி வந்தனர்.

இந்த நிலையில் விஜயகரிசல்குளத்தில் உறவினர் வீட்டில் தங்கியிருந்த பூமாரியை போலீசார் இன்று கைது செய்தனர். மற்ற 3 பேரையும் தேடி வருகின்றனர்.