வேலூர்

வேலூர்:

வேலூர் மாநகராட்சி கமிஷனர் சங்கரன் தலைமையிலான அதிகாரிகள் கடந்த 18-ந்தேதி காகிதப்பட்டறை பகுதியில் தூய்மை பணிகளை ஆய்வு செய்தனர்.

அப்போது டாஸ்மாக்கடையின் அருகே உள்ள கடைக்கு லாரியில் இருந்து பிளாஸ்டிக் மூட்டைகள் இறக்கப்பட்டன.

இதைக் கண்ட மாநகராட்சி அதிகாரிகள் லாரி மற்றும் கடையில் ஆய்வு செய்தனர். அங்கு தமிழக அரசால் தடைசெய்யப்பட்ட பிளாஸ்டிக் பொருட்கள் இருந்தன.

முதற்கட்ட விசாரணையில், புதுச்சேரியில் இருந்து 2 டன் பிளாஸ்டிக் பொருட்கள் கொண்டு வரப்பட்டது தெரியவந்தது.

அதையடுத்து மாநகராட்சி அதிகாரிகள் லாரியுடன் பிளாஸ்டிக் பொருட்களை பறிமுதல் செய்தனர். மேலும் அந்த கடைக்கு ‘சீல்' வைத்தனர்.

அதன் பின்னர் மாநகராட்சி அதிகாரிகள், லாரி உரிமையாளரிடம் நடத்திய விசாரணையில், புதுச்சேரி மாநிலத்தில் இருந்து கடந்த 3 மாதங்களாக லாரியில் பிளாஸ்டிக் பொருட்கள் தமிழகத்தின் பல்வேறு பகுதிகளில் உள்ள கடைகளில் இறக்கப்பட்டது தெரிய வந்தது.

அதையடுத்து வேலூர் மாநகரில் பிளாஸ்டிக் பொருட்கள் இறக்கப்பட்ட கடைகளின் விவரங்கள் பெறப்பட்டன.

அதில், வேலூர் சுண்ணாம்புக்கார தெருவில் உள்ள 3 கடைகளுக்கு அதிகளவு பிளாஸ்டிக் பொருட்கள் கொண்டு வரப்பட்டது தெரியவந்தது.

அதைத்தொடர்ந்து கமிஷனர் உத்தரவின்பேரில் 2-வது மண்டல சுகாதார அலுவலர் சிவக்குமார் தலைமையில் சுகாதார ஆய்வாளர் ஈஸ்வரன் மற்றும் மாநகராட்சி பணியாளர்கள் வேலூர் சுண்ணாம்புகாரத் தெருவில் உள்ள 3 கடைகளில் நேற்று திடீரென ஆய்வு செய்தனர். அப்போது ஒரு கடையில் மட்டும் தடை செய்யப்பட்ட ரூ.2 லட்சம் மதிப்பிலான 1½ டன் பிளாஸ்டிக் பொருட்கள் இருந்தன. அவற்றை மாநகராட்சி அதிகாரிகள் பறிமுதல் செய்தனர்.

மேலும் அக்கடையின் உரிமையாளருக்கு ரூ.1 லட்சம் அபராதம் விதிக்கப்பட்டது. அபராத தொகையை இன்று (வியாழக்கிழமை) செலுத்தாவிட்டால் அந்த கடைக்கு ‘சீல்' வைக்கப்படும் என்று மாநகராட்சி அதிகாரிகள் தெரிவித்தனர்.

வேலூர்:

போக்குவரத்துக்கழக அனைத்து தொழிற்சங்க கூட்டமைப்பு சார்பில் 14 வது ஊதிய ஒப்பந்தத்தை உடனடியாக நிறைவேற்றக் கோரி இன்று முதல் காலவரையற்ற வேலை நிறுத்தப் போராட்டத்தில் ஈடுபட போவதாக அறிவித்துள்ளன.

ஆனால் போக்குவரத்து தொழிலாளர்கள் அனைவரும் இன்று நடக்கும் வேலை நிறுத்த போராட்டத்தில் பங்கேற்கக் கூடாது. கண்டிப்பாக பணிக்கு வரவேண்டும். விடுமுறை எதுவும் எடுக்க அனுமதி கிடையாது.

போராட்டத்தில் ஈடுபடுபவர்கள் மீது ஒழுங்கு நடவடிக்கை எடுக்கப்படும் என போக்குவரத்துக் கழகம் எச்சரிக்கை விடுத்துள்ளது.

இதனிடைய வேலூர், திருப்பத்தூர், ராணிப்பேட்டை மாவட்டத்தில் 50 சதவீத அரசு பஸ்கள் மட்டுமே இன்று காலை முதல் இயக்கப்பட்டன. வேலூரில் இருந்து சென்னை பெங்களூரு செல்லக் கூடிய பஸ்கள் மிகக் குறைந்த அளவிலேயே இயக்கப்பட்டன. இதனால் புதிய பஸ் நிலையத்தில் பயணிகள் கடும் அவதி அடைந்தனர். வேலூர் பழைய பஸ் நிலையத்தில் இருந்து கிராமப்புறங்களுக்கு செல்லக்கூடிய அரசு டவுன் பஸ்களில் பெரும்பாலானவை ஓடவில்லை. தனியார் பஸ்கள் வழக்கம் போல் ஓடியது.

திருப்பத்தூர் நகரப்பகுதிகளில் 50 சதவீத பஸ்கள் இயக்கப்பட்டன. கிராம பகுதிகளுக்கு செல்லக்கூடிய பெரும்பாலான பஸ்கள் ஓடவில்லை. இதேபோல ராணிப்பேட்டை மாவட்டத்தில் கிராம பகுதிகளுக்கு பஸ்கள் 50 சதவீதத்துக்கு மேல் ஓடவில்லை. இதனால் பயணிகள் கடும் அவதி அடைந்தனர்.

வேலூர் ஒருங்கிணைந்த மாவட்டத்தில் 350 தனியார் பஸ்கள் உள்ளன. இந்த தனியார் பஸ்கள் அனைத்தும் வழக்கம் போல இயக்கப்பட்டன. இதனால் பொதுமக்கள் இயல்பு வாழ்க்கை பெரும் அளவில் பாதிப்பு இல்லை. நகரப் பகுதிகளுக்குச் செல்ல கூடிய பஸ்களில் கூட்டம் அதிகமாக இருந்தது.

வேலூர் ஒருங்கிணைந்த மாவட்டத்தில் 30 சதவீத பணியாளர்கள் பணிக்கு வந்தால் அனைத்து பஸ்களையும் இயக்கலாம். ஆனால் இன்று காலையில் தொழிலாளர்கள் பணிக்கு வராததால் 50 சதவீத அரசு பஸ்கள் மட்டுமே இயக்கப்பட்டன. பணிக்கு வராதவர்கள் குறித்த விவரங்களை சேகரித்து வருகிறோம் என்றனர்.

திருவண்ணாமலையில் இருந்து அனைத்து டவுன் பஸ்களும் வழக்கம்போல் இயக்கப்பட்டன.

திருவண்ணாமலையில் இருந்து இன்று 45 டவுன் பஸ்களும், 55 ரூட் பஸ்களும் இயக்கப்பட்டன.

மாவட்டம் முழுவதும் டவுன் பஸ்கள் 100 சதவீதமும், ரூட் பஸ்கள் 50 சதவீதமும் இயக்கப்பட்டன. திருவண்ணாமலையில் தனியார் பஸ்கள் இன்று அதிக அளவில் இயக்கப்பட்டன. அரசு பஸ்கள் முழுமையாக இயக்கப்படாததால் ஆட்டோக்களில் பயணம் செய்யும் மக்கள் கூட்டம் அதிகமாக காணப்பட்டது.

டவுன் பஸ்கள் அனைத்தும் இயக்கப்பட்டதால் பள்ளி மாணவ மாணவிகள் சிரமமின்றி பள்ளிகளுக்குச் சென்றனர்.

வேலூர்:

தமிழ்நாடு சத்துணவு ஊழியர் சங்கம் சார்பில் வேலூர் கலெக்டர் அலுவலகம் அருகே சாலை மறியல் போராட்டம் செய்யப்போவதாக அறிவித்திருந்தனர். அதன்படி நேற்று காலை சத்துணவு ஊழியர்கள் அங்கு திரண்டனர். அங்கு அவர்கள் கோரிக்கைகளை வலியுறுத்தி ஆர்ப்பாட்டம் செய்தனர். ஆர்ப்பாட்டத்திற்கு மாநில செயற்குழு உறுப்பினர் சுமதி தலைமை தாங்கினார். அரசு ஊழியர் சங்கத் தலைவர் சரவணராஜ் ஆர்ப்பாட்டத்தை தொடங்கி வைத்தார். சத்துணவு ஊழியர் சங்க மாவட்ட பொருளாளர் உமாராணி கோரிக்கைகள் குறித்து பேசினார்.

ஆர்ப்பாட்டத்தில், முழுநேர அரசு ஊழியராக வேண்டும். காலமுறை ஊதியம் வழங்க வேண்டும். ஓய்வு பெறும் ஊழியர்களுக்கு ரூ.5 லட்சம் வழங்க வேண்டும். சட்டரீதியான ஓய்வூதியம் வழங்க வேண்டும். உணவு மானியம் உயர்த்தி வழங்க வேண்டும் ஆகிய கோரிக்கைகளை வலியுறுத்தி கோஷங்களை எழுப்பினர்.

பின்னர் அவர்கள் கோரிக்கைகளை வலியுறுத்தி சாலை மறியலில் ஈடுபட்டனர். இதையடுத்து அவர்களை போலீசார் கைது செய்தனர்.

போராட்டத்தில் கலந்துகொண்ட 300 பேர் கைது செய்யப்பட்டனர். இதையொட்டி துணை போலீஸ் சூப்பிரண்டு திருநாவுக்கரசு தலைமையில் இன்ஸ்பெக்டர்கள் செந்தில்குமார், மதனலோகன் மற்றும் ஏராளமான போலீசார் பாதுகாப்பு பணியில் ஈடுபட்டனர்.

வேலூர் :

முன்னாள் பிரதமர் ராஜீவ்காந்தி கொலை வழக்கில் தண்டனை பெற்ற முருகன் வேலூர் மத்திய ஆண்கள் ஜெயிலிலும், அவருடைய மனைவி நளினி பெண்கள் ஜெயிலிலும் அடைக்கப்பட்டுள்ளனர். கோர்ட்டு உத்தரவுப்படி கணவன்-மனைவி 15 நாட்களுக்கு ஒருமுறை பெண்கள் ஜெயிலில் சந்தித்து பேசி வந்தனர். கொரோனா தொற்று பரவல் தடுப்பு நடவடிக்கையாக கடந்தாண்டு மார்ச் மாதம் ஜெயில் கைதிகளை அவருடைய குடும்பத்தினர், உறவினர்கள், சந்திக்க தடை விதிக்கப்பட்டது.

அதனால் நளினி-முருகன் சந்திப்பு ரத்து செய்யப்பட்டது. இதற்கிடையே கடந்த ஜனவரி முதல் ஜெயில் கைதிகளை அவர்களின் குடும்பத்தினர், உறவினர்கள், வக்கீல்கள் நேரில் சந்தித்து பேச அனுமதி அளிக்கப்பட்டது. அதனால் முருகன் கடந்த 3-ந் தேதி வேலூர் ஜெயில் சூப்பிரண்டு ருக்மணி பிரியதர்ஷினியிடம் கோரிக்கை மனு அளித்தார். மனுவை பரிசீலனை செய்த சிறைத்துறை உயர் அதிகாரிகள் முதற்கட்டமாக 30 நிமிடங்கள் இருவரும் நேரில் சந்தித்து பேச அனுமதி அளித்தனர்.

இந்த நிலையில் வேலூர் பெண்கள் ஜெயிலில் நேற்று நளினி-முருகன் சந்திப்பு நடைபெற்றது. ஆண்கள் ஜெயிலில் இருந்து முருகனை வேலூர் ஆயுதப்படை போலீசார் பலத்த பாதுகாப்புடன் பெண்கள் ஜெயிலிலுக்கு அழைத்து சென்றனர். அங்குள்ள ஒரு அறையில் வைத்து சுமார் 11 மாதங்களுக்கு பின்னர் நளினியை நேரில் சந்தித்து முருகன் பேசினார். இந்த சந்திப்பு காலை 9.35 முதல் 10.05 மணி வரை நடைபெற்றது. அதன்பின்னர் முருகன் மீண்டும் ஆண்கள் ஜெயிலில் அடைக்கப்பட்டார்.

வேலூர்:

வேலூரை அடுத்த செம்பேடு கிராமத்தை சேர்ந்தவர் மாவீரன். இவரது மனைவி பவித்ரா (வயது 23). இவர்களுக்கு திருமணமாகி 4 ஆண்டுகள் ஆகிறது. குழந்தைகள் இல்லை. இதனால் பவித்ரா மன வருத்தத்தில் இருந்து வந்ததாக கூறப்படுகிறது. இந்த நிலையில் நேற்று முன்தினம் அவர் வீட்டில் தூக்குப்போட்டு தற்கொலை செய்து கொண்டார்.

இதுகுறித்து அரியூர் போலீசில் புகார் செய்யப்பட்டது. சப்-இன்ஸ்பெக்டர் அன்பழகன் மற்றும் போலீசார் சம்பவ இடத்திற்கு சென்று பிணத்தை கைப்பற்றி அடுக்கம்பாறை அரசு மருத்துவமனைக்கு பிரேத பரிசோதனைக்காக அனுப்பி வைத்தனர். மேலும் போலீசார் வழக்குப்பதிவு செய்து விசாரணை நடத்தி வருகின்றனர்.

பவித்ராவுக்கு திருமணமாகி 4 ஆண்டுகளே ஆவதால் வேலூர் உதவி கலெக்டர் கணேஷ் மேல்விசாரணை நடத்தி வருகிறார்.