திருவண்ணாமலை

கண்ணமங்கலம்:

நிவர் புயல் காரணமாக கண்ணமங்கலம், சந்தவாசல், படவேடு, அனந்தபுரம் மற்றும் அதைச்சுற்றி உள்ள பல்வேறு கிராமங்களில் பயிரிடப்பட்டு அறுவடைக்கு தயாராக இருந்த வாழை மரங்கள் வேரோடு சாய்ந்தன. நெற்பயிர்கள் தண்ணீரில் மூழ்கியதால் விவசாயிகள் மிகவும் வேதனையடைந்துள்ளனர். மேலும் தென்னை மரங்கள் உள்பட பல்வேறு மரங்கள் வேரோடு சாய்ந்துள்ளது.

சுமார் 1 லட்சத்துக்கும் மேலான வாழை மரங்கள் பல்வேறு கிராமங்களில் சேதமடைந்து விட்டதாகவும், இதன் மதிப்பு சுமார் ரூ.50 லட்சம் இருக்கும் என விவசாயிகள் தெரிவித்தனர். அரசு உரிய நஷ்ட ஈடு வழங்க வேண்டும் என விவசாயிகள் கோரிக்கை விடுத்துள்ளனர்.

கலசபாக்கம் அருகே நாயுடு மங்கலம் கூட்ரோடு, நாயுடுமங்கலம் சோடா கடை ஆகிய பகுதிகளில் பலத்த காற்று வீசியதால் திருவண்ணாமலை மெயின் ரோட்டில் உள்ள பெரிய புளிய மரங்கள் சாலையில் வேருடன் சாய்ந்து விழுந்தது. அப்போது திருவண்ணாமலை நோக்கி வந்த மினி லாரி மரத்தின் அடியில் சிக்கிக்கொண்டது. இதுபற்றி தகவல் அறிந்த கலசபாக்கம் போலீசார் மற்றும் மீட்பு குழுவினர் உடனடியாக சம்பவ இடத்துக்கு சென்று பொக்லைன் எந்திரம் மூலம் மீட்பு பணியில் ஈடுபட்டனர். மினி லாரி டிரைவர் அதிர்ஷ்டவசமாக உயிர் தப்பினார். இதனால் அப்பகுதியில் போக்குவரத்து பாதிக்கப்பட்டது.

இதே போன்று கலசபாக்கம் ஒன்றியத்துக்கு உட்பட்ட காஞ்சி, கடலாடி, கேட்டவரம்பாளையம், அரிதாரிமங்கலம், சீராம்பாளையம் உள்பட 10-க்கும் மேற்பட்ட இடங்களில் மரங்கள் சாய்ந்து போக்குவரத்து பாதிப்பு ஏற்பட்டது. கடலாடி போலீசார் மற்றும் மீட்பு குழுவினர் சென்று மரங்களை அப்புறப்படுத்தினர்.

செங்கத்தில் நிவர் புயல் காரணமாக நேற்று முன்தினம் நள்ளிரவு முதல் மழை விட்டுவிட்டு பெய்து கொண்டிருந்தது. இதனால் நேற்று பகல் நேரத்தில் பொதுமக்கள் நடமாட்டம் மிக குறைவாகவே காணப்பட்டது. புயல் காற்று வீசியதில் குப்பநத்தம், கிளையூர் பகுதிகளில் பயிரிடப்பட்டிருந்த வாழை பயிர்கள் அடியோடு சாய்ந்தது.

அதேபோல் செங்கத்தில் இருந்து பரமனந்தல் செல்லும் சாலையில் காந்திநகர் அருகே சாலை நடுவே புளியமரம் ஒன்று சாய்ந்தது. இதனை அதிகாரிகள் அப்பகுதி மக்களின் உதவியுடன் வெட்டி அகற்றினர்.

அதேபோல செங்கம் அடுத்த புதுப்பாளையம் அருகே உள்ள வீரானந்தல்-சாமாலை சாலையில் புளியமரம் ஒன்று வீடுகளின் மீது சாய்ந்தது. இதில் 2 வீடுகளின் முன் பகுதி சேதமடைந்தது. மேலும் புளியமரம் விழுந்ததில் 3 மின்கம்பங்கள், ஒரு டிரான்ஸ்பார்மர் சேதமடைந்தது. பகல் நேரத்தில் புயலின் தாக்கம் காரணமாக விட்டுவிட்டு செங்கம் மற்றும் சுற்றுப் பகுதிகளில் சாரல் மழை பெய்தது. அதேபோல் ஜமுனாமரத்தூர் பகுதியில் பெய்த மழையின் காரணமாக குப்பநத்தம் அணை மற்றும் செங்கம் பகுதியில் உள்ள பல்வேறு ஏரிகளுக்கு தண்ணீர் வரத்து தொடங்கியுள்ளது. சில தினங்களுக்கு முன்பாக குப்பநத்தம்அணை திறக்கப்பட்ட நிலையில் மீண்டும் குப்பநத்தம் அணைக்கு நீர் வர தொடங்கி உள்ளதாக அப்பகுதி மக்கள் தெரிவித்தனர்.

திருவண்ணாமலை:

திருவண்ணாமலை மாவட்டத்தில் நிவர் புயல் காரணமாக நேற்று முன்தினம் முதல் தொடர் மழை பெய்தது. நேற்று சில பகுதிகளில் சாரல் மழையும், மிதமான மழையும் பெய்தது. இந்த மழையின் காரணமாக பொதுமக்கள் இயல்பு வாழ்க்கை மிகவும் பாதிக்கப்பட்டது. நிவர் புயலால் சில இடங்களில் வீடுகள் இடிந்து சேதம் ஏற்பட்டு உள்ளது. 72 குடிசை வீடுகள் பகுதியாகவும், 14 குடிசை வீடுகள் முழுமையாகவும் சேதம் ஏற்பட்டு உள்ளது. மேலும் ஓட்டு வீடு, சீட்டு வீடுகள் 24 வீடுகள் பகுதியாகவும், 3 வீடுகள் முழுமையாகவும் சேதம் ஏற்பட்டு உள்ளது. மேலும் 7 மாடுகள், 4 கன்றுகள், 7 ஆடுகள் உயிரிழந்து உள்ளன.

திருவண்ணாமலை மாவட்டத்தில் நிலையான மருத்துவ முகாம்கள் 9-ம், நடமாடும் மருத்துவ முகாம்கள் 11-ம் அமைக்கப்பட்டு உள்ளது. இதன் மூலம் 100-க்கும் மேற்பட்டவர்கள் பயன்பெற்று உள்ளனர். மேலும் மாவட்டத்தில் 267 நிவாரண முகாம்கள் அமைக்கப்பட்டு அதில் 7846 பேர் தங்க வைக்கப்பட்டு உள்ளனர். மேலும் அவா்களுக்கு தேவையான அடிப்படை வசதிகள் மற்றும் உணவு பொருட்கள் மாவட்ட நிர்வாகத்தின் மூலம் வழங்கப்பட்டு வருகிறது.

பலத்த காற்றினால் 66 மரங்களும், 237 மின் கம்பங்களும் சாய்ந்து உள்ளன. அதுமட்டுமின்றி மழையிலான மாவட்டத்தின் பல்வேறு பகுதிகளில் நெல், வாழை உள்பட 2 ஆயிரத்து 272.58 ஹெக்டர் பரப்பில் பயிர்கள் சேதம் ஏற்பட்டு உள்ளது.

தொடர் மழையின் காரணமாக மாவட்டத்தில் உள்ள ஏரி மற்றும் குளங்களுக்கு நீர்வரத்து ஏற்பட்டு உள்ளது. பொதுப்பணித் துறைக்கு சொந்தமாக 697 ஏரிகள் உள்ளது. இதில் 13 ஏரிகள் 100 சதவீதம் நிரம்பி உள்ளது. 75 சதவீதத்திற்கு மேல் 24 ஏரிகளும், 50 சதவீதத்திற்கு மேல் 109 ஏரிகளும், 25 சதவீதத்திற்கு மேல் 251 ஏரிகளும், 25 சதவீதத்திற்கு கீழ் 300 ஏரிகளும் நிரம்பி உள்ளது. அதேபோல் ஊரக வளர்ச்சித் துறையில் 1257 ஏரிகள் உள்ளது. இதில் 45 ஏரிகள் 100 சதவீதம் நிரம்பி உள்ளது. 75 சதவீதத்திற்கு மேல் 213 ஏரிகளும், 50 சதவீதத்திற்கு மேல் 337 ஏரிகளும், 26 சதவீதத்திற்கு மேல் 239 ஏரிகளும், மற்ற ஏரிகள் 25 சதவீதத்திற்கு கீழ் தண்ணீர் நிரம்பி உள்ளது.

வந்தவாசி:

நிவர் புயல் காரணமாக திருவண்ணாமலை மாவட்டம் வந்தவாசி பகுதியில் காற்றுடன் பலத்த மழை பெய்தது. மழைகாரணமாக வந்தவாசி அடுத்துள்ளது பாதிரி ஏரி நிரம்பி உள்ளது. இந்த ஏரிக்கு அருகில் சவுரிபாளையம் என்ற இடத்தில் 150-க்கும் மேற்பட்ட குடும்பங்கள் குடிசை வீடுகளில் வசித்து வருகின்றனர். பாதிரி ஏரி நிரம்பி வெளியேறும் தண்ணீர் செல்லும் கால்வாய் பகுதி தூர்ந்துபோய் அடைப்பு ஏற்பட்டுள்ளதால் ஏரியில் இருந்து வெளியேறும் தண்ணீர் அங்குள்ள குடியிருப்பு பகுதிக்குள் புகுந்தது. இதனால் குடிசை வீடுகள் தண்ணீரில் மிதக்கின்றன. இதன்காரணமாக குடிசை வீடுகளில் வசிக்கும் பொதுமக்கள் மிகுந்த சிரமத்திற்குள்ளாகி இருக்கிறார்கள்.

புயல் மழைக்காரணமாக குடிசை மற்றும் தண்ணீர் தேங்கும் பகுதிகளில் வசிக்கும் மக்கள், பாதுகாப்பான இடங்களில் தங்கவைக்கப்பட்டு, அவர்களுக்கு உணவு அளிக்கப்பட்டு வருகிறது. ஆனால் இந்தப்பகுதி மக்களை யாரும் கண்டுகொள்ளவில்லை என பொதுமக்கள் தெரிவித்தனர். எனவே, குடிசைகளை சூழ்ந்துள்ள நீரை அப்புறப்படுத்த வேண்டும், அரசு தங்களுக்கு உதவி செய்ய வேண்டும் என கோரிக்கை விடுத்துள்ளனர்.

பலத்த காற்றுடன் பெய்த மழை காரணமாக வந்தவாசி அரசு மருத்துவமனையில் அவசர சிகிச்சை வார்டுக்கு செல்லும் வழியில் உள்ள 40 ஆண்டு பழமையான மரம் சாய்ந்து விழுந்தது. அதேபோன்று மேல்மருவத்தூர் சாலை, புலிவாய், தெய்யார், வல்லம், கிருஷ்ணாபுரம், கூத்தம்பட்டு, தாலுகா அலுவலகம், வங்காரம், சத்யா நகர், நம்பேடு, நடுக்குப்பம் ஆகியபகுதிகளில் மரங்கள் சாய்ந்து விழுந்தன. மேல்மருவத்தூர் சாலையில் மின்கம்பத்தின் மீது மரம் விழுந்ததால் மின்சாரம் பாதிக்கப்பட்டது. தகவலறிந்த நகராட்சி, வருவாய்த் துறை, தீயணைப்புத் துறை, காவல்துறையினர் ஒருங்கிணைந்து, மரங்களை அகற்றும் பணியில் ஈடுபட்டனர்.

ஆரணியை அடுத்த மாமண்டூர் காலனி பகுதியை சேர்ந்த பாக்கியநாதன் என்பவருடைய வீட்டின் மீது மரம் முறிந்து விழுந்தது. வீட்டில் இருந்த பாக்கியநாதன் அவருடைய மனைவி, இரண்டு குழந்தைகள் அதிர்ஷ்ட வசமாக உயிர் தப்பினர். தகவல் அறிந்ததும் மீட்பு குழுவினர் சென்று மரத்தை அகற்றினர்.

மேலும் தகவல் அறிந்ததும் அமைச்சர் சேவூர் எஸ்.ராமச்சந்திரன், ஆரணி வருவாய் கோட்டாட்சியர் (பொறுப்பு) பி.ஜெயராமன், தாசில்தார் செந்தில்குமார் ஆகியோர் சென்று நிவாரண பொருட்கள் மற்றும் மளிகை பொருட்களை வழங்கினர். அமைச்சர் தனது சொந்த பணத்தில் இருந்து நிதி உதவி வழங்கினார். அ.தி.மு.க. ஒன்றிய செயலாளர் பி.ஆர்.ஜி.சேகர், முன்னாள் மாவட்ட கவுன்சிலர் மாமண்டூர் பி.சுப்பிரமணி ஆகியோர் உடனிருந்தனர்.

நிவர் புயல் காரணமாக பலத்த காற்றுடன் மழை பெய்தது. போளூரில் 88 மி.மீ மழை பதிவாகி இருந்தது. இந்த மழைகாரணமாக மாம்பட்டு, வசூர் கிராமங்களில் வாழைமரங்கள், தென்னை மரங்கள் நாசமாயின. அரியாத்தூர் கிராமத்தில் ராதிகா, தனலட்சுமி, தருமன் ஆகியோரின் வீடுகள் சேதமடைந்தன. இதேபோல் கரைப்பூண்டியில் பாபு, கரிக்காத்தூரில் மின்னல் கொடி, புத்திராம்பத்தில் பஞ்சமூர்த்தி, பொத்தரையில் கங்கா, துரிஞ்சிகுப்பத்தில் தருமன், புதுப்பாளையத்தில் முருகய்யன், பெரியகரம் ரவிச்சந்திரன் ஆகியோரின் வீடுகளும், படவேடு கிராமத்தில் செல்வகுமார், வெங்கடேசன், கோமதி ஆகிய மூன்று பேரின் வீடுகள் என 13 வீடுகள் சேதமடைந்தன.

நேற்று முன்தினம் இரவு போளூர் சுயம்பு லட்சுமி நரசிம்மசாமி மலைக்கோவில் பகுதியில் ராட்சத பாறை ஒன்று திடீரென பயங்கர சத்தத்துடன் உருண்டு வந்தது. அப்போது அங்கிருந்த பெரிய மரத்தின்மீது பாறை மோதி நின்றுவிட்டது. மலை அடிவாரத்தில் பல வீடுகள் உள்ளன. பாறை மரத்தின்மீது மோதி நின்றதால் பெரிய சேதம் தவிர்க்கப்பட்டது.

செய்யாறு தாலுகாவில் பாராசூர், நாவல்பாக்கம், மாளிகைபட்டு, புளியரம்பாக்கம், ஏனாதவாடி, அருகாவூர் பெருங்கட்டூர், ராமகிருஷ்ணாபுரம் வெம்பாக்கம் தாலுகாவில் வடஇலுப்பை, புகை சமுத்திரம், நாட்டேரி, பிரம்மதேசம், வெங்களத்தூர், கீழ்நெல்லி, சித்தாத்தூர் உள்ளிட்ட 50-க்கும் மேற்பட்ட கிராமங்களில் தொடர் மழையின் காரணமாக நெற்பயிர்கள் நீரில் மூழ்கி சேதமடைந்துள்ளது. மேலும் அறுவடை செய்யப்பட்ட நெல் களங்களில் நனைந்து சேதமடைந்துள்ளன.

வந்தவாசியை அடுத்த வங்காரம், கீழ்வெள்ளியூர், கண்டவராட்டி, சாத்தப்பூண்டி ஆகிய பகுதிகளில் அறுவடைக்கு தயாராக இருந்த நெற்பயிர்கள் நீரில் மூழ்கியதால் விவசாயிகள் வேதனை அடைந்துள்ளனர். அரசு உடனடியாக நிவாரணம் வழங்க வேண்டும் என்று பாதிக்கப்பட்ட விவசாயிகள் அரசுக்கு கோரிக்கை விடுத்துள்ளனர்.

திருவண்ணாமலையை அடுத்த சேரியந்தல், அய்யப்பன் நகர் உள்ளிட்ட பகுதிகளில் உள்ள அங்கன்வாடி கட்டிடங்களில் மழை நீர் புகுந்தது. திருவண்ணாமலை தாலுகாவில் 2 மாடுகள் உயிரிழந்து உள்ளது. மேலும் ஒரு குடிசை வீடும் சேதமடைந்து உள்ளது. புயல் எச்சரிக்கையையொட்டி மாவட்ட நிர்வாகம் மூலம் ஏற்பாடு செய்யப்பட்ட நிவாரண முகாம்களில் ஆயிரகணக்கானோர் தங்க வைக்கப்பட்டு உள்ளனர். அவர்களுக்கு முகாம்களிலேயே உணவு சமைத்து வழங்கப்பட்டு வருகிறது.

திருவண்ணாமலை மாவட்டத்தில் அதிகபட்சமாக சேத்துப்பட்டில் 130.2 மில்லி மீட்டர் மழை பதிவாகி உள்ளது. மற்ற பகுதிகளில் பெய்த மழையின் அளவு மில்லி மீட்டரில் வருமாறு:-

கீழ்பென்னாத்தூர்- 119.2, வந்தவாசி- 112.2, வெம்பாக்கம்- 109.5, கலசபாக்கம்- 99, ஜமுனாமரத்தூர்- 92.1, போளூர்- 88.5, ஆரணி- 84.2, திருவண்ணாமலை- 69.2, செய்யாறு- 65, தண்டராம்பட்டு- 62.4, செங்கம்- 28.4.

கண்ணமங்கலம்:

திருவண்ணாமலை மாவட்டம் கண்ணமங்கலம் அருகே படவேடு பகுதியில் செண்பகத்தோப்பு அணை உள்ளது. இதன் கொள்ளளவு 62 அடி உயரமாகும். இந்த அணை கட்டும் பணி 2007-ம் ஆண்டு நிறைவு பெற்றது. ஆனால் ஷட்டர்கள் இயங்காததால் தண்ணீர் சேமிக்க முடியாமல் போனது. இதனால் இப்பகுதி விவசாயிகள் கோரிக்கையை ஏற்று தமிழக முதல்-அமைச்சர் எடப்பாடி பழனிசாமி ஷட்டர் சீரமைக்க ரூ.16 கோடி நிதி ஒதுக்கீடு செய்தார். இதையடுத்து ஷட்டர்கள் அமைக்கும் பணி நிறைவு பெற்றது.

இந்த நிலையில் நிவர் புயல் மழை காரணமாக நேற்று அணையில் 55 அடி உயரத்துக்கு தண்ணீர் தேங்கியது.

இதையடுத்து அணையின் பாதுகாப்பு கருதி நேற்று அமைச்சர் சேவூர் எஸ்.ராமச்சந்திரன் உபரிநீரை திறந்து வைத்தார். அப்போது கலெக்டர் சந்தீப் நந்தூரி, பன்னீர்செல்வம் எம்.எல்.ஏ., ஆவின் துணைத்தலைவர் பாரி பாபு, படவேடு ஊராட்சி மன்ற தலைவர் சீனிவாசன், பொதுப்பணித்துறை அலுவலர்கள் உடனிருந்தனர்.

உபரி நீர் திறந்து விடப்பட்டதால் கமண்டல நதி, நாகநதி கரையோரம் வசிக்கும் மக்களுக்கு வெள்ள அபாய எச்சரிக்கை வருவாய்த்துறை மூலம் அறிவிக்கப்பட்டுள்ளது.

தற்போது அணைக்கு 6 ஆயிரம் கன அடி தண்ணீர் வருகிறது. எனவே அணையின் பாதுகாப்பு கருதி 7 ஷட்டர்கள் வழியாக 6 ஆயிரம் கன அடி தண்ணீர் உபரிநீராக வெளியேற்றப்படுகிறது என பொதுப்பணித்துறை அலுவலர்கள் தெரிவித்தனர்.

போளூர்:

போளூரை அடுத்த அரும்பலூர் கிராமத்தை சேர்ந்தவர் குள்ளம்மாள். சமீபத்தில் பெய்த மழையால் இவரது வீடு வலுவிழந்து காணப்பட்டது. இந்த நிலையில் நேற்று முன்தினம் காளி (வயது 60) என்ற கூலித்தொழிலாளி குள்ளம்மாள் வீட்டை ஒட்டி நின்று கொண்டு இருந்தார். அப்போது குள்ளமாள் வீட்டின் சுவர் திடீரென இடிந்து விழுந்தது. இதில் காளி சிக்கி படுகாயம் அடைந்தார்.

உடனடியாக அக்கம் பக்கம் இருந்தவர்கள் விரைந்து சென்று காளியை இடிபாடுகளிலிருந்து மீட்டு கொம்மனந்தல் அரசு மருத்துவ மனையில் சேர்த்தனர். அங்கு முதலுதவி அளித்தபின் அவர் திருவண்ணாமலை அரசு மருத்துவமனையில் சேர்க்கப்பட்டார். பின்னர் அவர் மேல் சிகிச்சைக்காக சென்னை ராஜுவ் காந்தி அரசு மருத்துவமனைக்கு கொண்டு செல்லப்பட்டார். அங்கு அவர் சிகிச்சை பலனின்றி இறந்து விட்டார். இது குறித்து போளூர் சப்இன்ஸ்பெக்டர் சங்கர் வழக்குப்பதிவு செய்து விசாரணை நடத்தி வருகிறார்.

ஆரணி:

வேலூர் தொரப்பாடியை அடுத்த மேட்டுப்பகுதியைச் சேர்ந்தவர் பலராமன். இவரின் மகன் தினேஷ் (வயது 17). இவர், பிளஸ்-1 படித்து வந்தார். இவரும், அண்ணன் கணேசும் களம்பூரை அடுத்த அரியாத்தூர் கிராமத்தில் உள்ள பாட்டி சிவகாமிஅம்மாளை பார்ப்பதற்காக வந்தனர்.

அந்தக் கிராமத்தைச் சேர்ந்தவரும், நண்பருமான விக்னேஷ் என்ற விக்கி என்பவருடன் தினேஷ் சேர்ந்து ஒரு மொபட்டில் நேற்று மாலை அரியாத்தூரில் இருந்து புறப்பட்டு கூடலூர் கூட்ரோடை நோக்கி வந்து கொண்டிருந்தனர். கூடலூர் கூட்ரோட்டுக்கு முன்னாலேயே கட்டுப்பாட்டை இழந்து ஓடிய மொபட் சாலையோரம் இருந்த ஒரு பனைமரத்தில் மோதி இருவரும் கீழே விழுந்தனர். மொபட்டை ஓட்டிய தினேஷ் சம்பவ இடத்திலேயே உயிரிழந்தார். பின்னால் அமர்ந்திருந்த விக்கி லேசான காயத்துடன் உயிர் தப்பினார்.

இந்த விபத்து குறித்து தகவல் அறிந்த களம்பூர் போலீஸ் சப்-இன்ஸ்பெக்டர் விநாயகம், அவரின் வீட்டுக்கு சென்று தினேசின் பிணத்தைக் கைப்பற்றி பிரேதப் பரிசோதனைக்காக ஆரணி அரசு மருத்துவ மனைக்கு அனுப்பி வைத்தார். விபத்து குறித்து வழக்குப்பதிவு செய்து விசாரணை நடத்தி வருகிறார்.