நாகப்பட்டினம்

பொறையாறு:

பொறையாறு துணை மின்நிலையத்தில் வருகிற 14-ந்தேதி(செவ்வாய்க்கிழமை) மாதாந்திர பராமரிப்பு பணிகள் நடைபெறுகிறது. எனவே இந்து துணை மின்நிலையத்தில் இருந்து மின்வினியோகம் பெறும் பொறையாறு, தரங்கம்பாடி, சந்திரபாடி, திருக்கடையூர், பிள்ளைபெருமாநல்லூர், திருமெய்ஞானம், சங்கரன்பந்தல், குட்டியாண்டியூர், பெருமாள் பேட்டை, வெள்ளை கோவில், புதுப்பேட்டை, தாழம்பேட்டை, மாணிக்கப்பங்கு, என்.என்.சாவடி, கண்னப்பமூலை, அனந்தமங்கலம், காழியப்பநல்லூர், திருக்களாச்சேரி, ஆயப்பாடி, காட்டுச்சேரி, மாங்குடி, தில்லையாடி, திருவிடைக்கழி, எடுத்துக்கட்டிசாத்தனூர், கண்னங்குடி, கிள்ளியூர், டி.மணல்மேடு, மாத்தூர் ஆகிய பகுதிகளுக்கும் மற்றும் அதனை சார்ந்த கிராமங்களுக்கும் 14-ந்தேதி காலை 9 மணி முதல் மாலை 5.30 மணி வரை மின் வினியோகம் இருக்காது.

இந்த தகவலை செம்பனார்கோவில் மின் உதவி செயற்பொறியாளர் அப்துல்வகாப் மரைக்காயர் தெரிவித்துள்ளார்.

நாகூர்:

நாகை மாவட்டம் நாகூர் அருகே உள்ள மேலவாஞ்சூர் காமகோடி நகரை சேர்ந்த பதுருதீன் மகன் அசாருதீன்(வயது 19). இவர், கேரளாவில் உள்ள ஓட்டலில் வேலை பார்த்து வந்தார். ஊரடங்கு காரணமாக கடந்த சில மாதங்களுக்கு முன்பு ஊருக்கு வந்தார். கடந்த சில நாட்களுக்கு முன்பு இவர் பனங்குடி அரிசி சேமிப்பு கிடங்கின் பின்புறம் உள்ள கருவேல மரக்காட்டில் ரத்த காயங்களுடன் பிணமாக கிடந்தார்.

இதுகுறித்து தகவல் அறிந்த நாகூர் போலீஸ் இன்ஸ்பெக்டர் ராதாகிருஷ்ணன் மற்றும் போலீசார் அங்கு சென்று அசாருதீன் உடலை கைப்பற்றி விசாரணை நடத்தினர். முதல் கட்ட விசாரணையில் மர்ம நபர்கள் அசாருதீனை கத்தியால் குத்திக்கொலை செய்தது தெரியவந்தது. இதுதொடர்பாக போலீசார் வழக்குப்பதிவு செய்து கொலையாளிகளை வலைவீசி தேடி வந்தனர்.

கொலையாளிகளை பிடிக்க தனிப்படை அமைத்து நாகை மாவட்ட போலீஸ் சூப்பிரண்டு செல்வநாகரெத்தினம் உத்தரவிட்டார். இதைத்தொடர்ந்து தனிப்படை போலீசார் நடத்திய விசாரணையில் கடந்த மாதம்(ஜூன்) நடந்த கொலைக்கு பழிக்குப்பழியாக அசாருதீனை சிலர் தீர்த்து கட்டியது அம்பலமாகி உள்ளது.

இதுதொடர்பாக மேலவாஞ்சூர் சமத்துவபுரம் செண்பக தெருவை சேர்ந்த வடிவேல் மகன் விஜயகுமார்(33), பனங்குடி சன்னமங்கலம் காலனி தெருவை சேர்ந்த சண்முகம் மகன் அஜித்குமார்(23) ஆகிய 2 பேரை போலீசார் கைது செய்தனர்.

இவர்களிடம் நடந்த விசாரணையில் தெரியவந்த விவரங்கள் குறித்து போலீசார் கூறியதாவது:-

நாகூரை அடுத்த நரிமணம் விசாலாட்சியம்மன் கோவில் வடக்கு தெருவை சேர்ந்தவர் செந்தில்(42). இவர் மேலவாஞ்சூர் கிழக்கு கடற்கரை சாலையில் பஞ்சர் கடை நடத்தி வந்தார். இவர் கடந்த மாதம் 23-ந் தேதி மோட்டார் சைக்கிளில் முட்டம் சாலை பகுதியில் சென்று கொண்டிருந்தபோது மர்ம நபர்களை கொண்ட கும்பல் மோட்டார் சைக்கிளை வழிமறித்து செந்திலை அரிவாளால் வெட்டிக்கொலை செய்து விட்டு தப்பி சென்றது.

இந்த கொலை வழக்கு தொடர்பாக தேடப்பட்டு வந்த மேலவாஞ்சூரை சேர்ந்த அகஸ்தியர்(55), அவருடைய மகன் கலியபெருமாள்(25), செல்வம்(40), பனங்குடியை சேர்ந்த மணிகண்டன்(22) ஆகிய 4 பேர் கடந்த மாதம் 24-ந் தேதி தஞ்சை கோர்ட்டில் சரண் அடைந்தனர்.

செந்தில் படுகொலை செய்யப்பட்டதற்கு அகஸ்தியர் மற்றும் அவருடைய மகனை பழிக்குப்பழி வாங்க வேண்டும் என செந்திலின் நண்பர்கள் திட்டம் தீட்டி வந்தனர். இந்த நிலையில் கடந்த 7-ந் தேதி இரவு பனங்குடி அரிசி சேமிப்பு கிடங்கின் பின்புற பகுதியில் உள்ள கருவேல மரக்காடு பகுதிக்கு அசாருதீன் வந்தார். இவர், அகஸ்தியர் வீட்டில் வாடகைக்கு குடியிருந்து வந்தவர்.

இவருக்கும் அந்த பகுதியில் நின்று கொண்டிருந்த செந்திலின் நண்பர்கள் விஜயகுமார், அஜித்குமார் உள்ளிட்டோருக்கும் வாக்குவாதம் ஏற்பட்டது. அப்போது விஜயகுமார், அஜித்குமார் உள்ளிட்டோர் அசாருதீனிடம், ‘நீ தான் செந்திலை கொலை செய்ய திட்டம் வகுத்து கொடுத்தாயா? என கேட்டு கத்தியால் அசாருதீனின் நெஞ்சு மற்றும் வயிறு பகுதியில் குத்தி விட்டு தப்பி ஓடிவிட்டனர். இதில் சம்பவ இடத்திலேயே அசாருதீன் இறந்ததாக போலீசார் தெரிவித்தனர்.

இந்த கொலையில் வேறு யாருக்காவது தொடர்பு உள்ளதா? என்பது குறித்து போலீசார் தொடர்ந்து தீவிர விசாரணை மேற்கொண்டு வருகிறார்கள். பழிக்குப்பழியாக இந்த கொலை நடந்து இருப்பது அந்த பகுதியில் பரபரப்பை ஏற்படுத்தி உள்ளது. 

மயிலாடுதுறை:

தமிழக சட்டப்பேரவையில் விதி 110ன் கீழ் நாகை மாவட்டத்தில் இருந்து பிரித்து மயிலாடுதுறை தனி மாவட்டமாக கடந்த மார்ச் மாதம் முதலமைச்சர் எடப்பாடி பழனிசாமி அறிவித்தார். புதிதாக உருவான மயிலாடுதுறையும் சேர்த்து தமிழகத்தில் மாவட்டங்களின் எண்ணிக்கை 38 ஆனது.

இந்த நிலையில், மயிலாடுதுறை மாவட்ட காவல்துறை கண்காணிப்பாளராக ஸ்ரீநாதா ஐபிஎஸை நியமித்து தமிழக அரசு உத்தரவிட்டுள்ளது. மேலும் மயிலாடுதுறை மாவட்ட எல்லைகளை உருவாக்க சிறப்பு அதிகாரியாக லலிதா ஐஏஎஸ் நியமனம் செய்யப்பட்டுள்ளார்.

திருவெண்காடு:

நாகை மாவட்டம் பூம்புகார் மீனவர் கிராமத்தில் 2 ஆயிரத்திற்கும் மேற்பட்ட மீனவ குடும்பங்கள் வசித்து வருகின்றனர். இந்த கிராமத்தில் சுமார் 60-க்கும் மேற்பட்ட விசைப்படகு மீனவர்கள் சுருக்குமடி மற்றும் இரட்டைமடி வலைகளை கொண்டு மீன்பிடி தொழில் செய்து வருகின்றனர். இந்த வலைகளை கொண்டு மீன்பிடிக்க கூடாது என மத்திய, மாநில அரசுகள் தடைவிதித்துள்ளன. இந்தநிலையில் நேற்றுமுன்தினம் சுருக்குமடி வலைகளை பயன்படுத்தி 40-க்கும் மேற்பட்ட விசைப்படகு மீனவர்கள் கடலில் மீன்பிடிக்க சென்றன. தகவல் அறிந்த மீன்வளத்துறை மற்றும் போலீசார் தடை செய்யப்பட்ட வலைகளை கொண்டு மீன்பிடித்த மீன்களை ஏற்றிச்சென்ற வாகனங்களை கருவிழந்தநாதபுரம் பகுதியில் பறிமுதல் செய்தனர்.

இந்தநிலையில் நேற்று பூம்புகார் துறைமுகத்தில் திரளான மீனவ பெண்களும், ஆண்களும் கூடினர். அதனை தொடர்ந்து சுருக்குமடி வலைகளை பயன்படுத்தி மீன்பிடி தொழில் செய்ய அனுமதிக்க வேண்டி மத்திய, மாநில அரசுகளை வலியுறுத்தி மீனவர்கள் கைகளில் கருப்புக்கொடிகளை ஏந்தி ஆர்ப்பாட்டத்தில் ஈடுபட்டனர். மேலும் துறைமுகத்தில் நிறுத்தப்பட்டிருந்த படகுகளில் கருப்புக்கொடிகளை கட்டி எதிர்ப்பு தெரிவித்தனர். இதனால் பூம்புகார் துறைமுகத்தில் பரபரப்பு ஏற்பட்டது.

இதேபோல் பொறையாறு நண்டலாறு சோதனைச்சாவடி அருகே சந்திரபாடி பகுதி மீனவர்கள் நேற்று கையில் கருப்புக்கொடி ஏந்தி திடீரென சாலை மறியலில் ஈடுபட்டனர். தகவல் அறிந்த நாகை மாவட்ட கலெக்டர் பிரவீன் நாயர் சம்பவ இடத்துக்கு விரைந்து சென்று போராட்டக்காரர்களிடம் பேச்சுவார்த்தை நடத்தினார். அதனை தொடர்ந்து மீனவர்கள், போராட்டத்தை தற்காலிகமாக ஒத்தி வைத்தனர். இதில் மீனவ பஞ்சாயத்தார்கள், மீனவர்கள் திரளாக கலந்து கொண்டனர். இதையொட்டி மாவட்ட போலீஸ் சூப்பிரண்டு செல்வநாகரத்தினம் தலைமையில் ஏராளமான போலீசார் பாதுகாப்பு பணியில் ஈடுபட்டனர்.

பொறையாறு:

நாகை மாவட்டம் செம்பனார்கோவில் அருகே குரங்குபுத்தூரில் அரசுக்கு சொந்தமான டாஸ்மாக் மதுக்கடை உள்ளது. நேற்று முன்தினம் இரவு வழக்கம்போல் கடையை பூட்டி விட்டு மேற்பார்வையாளர் சிவசுப்பிரமணியம் மற்றும் விற்பனையாளர் வேல்முருகன் ஆகியோர் வீட்டுக்கு சென்று விட்டனர். நேற்று காலை மதுக்கடையின் பூட்டு உடைக்கப்பட்டு இருப்பதாக அந்த பகுதியை சேர்ந்தவர்கள் செம்பனார்கோவில் போலீஸ் நிலையத்துக்கு தகவல் தெரிவித்தனர். தகவலின்பேரில் போலீசார் மற்றும் மேற்பார்வையாளர் சிவசுப்பிரமணியம் ஆகியோர் கடைக்கு வந்து பார்த்தபோது ரூ.2 லட்சத்து 40 ஆயிரம் மதிப்புள்ள மதுபாட்டில்களை காணவில்லை. மர்ம நபர்கள் கடையின் பூட்டை உடைத்து மதுபாட்டில்களை திருடிச்சென்றது தெரியவந்தது. மேலும் மர்ம நபர்கள் கடையில் கண்காணிப்பு கேமராவுடன் இணைக்கப்பட்டிருந்த கணினி பாகங்களை அருகே உள்ள காவிரி ஆற்றில் வீசிவிட்டு தப்பி சென்றது தெரியவந்தது. இதுதொடர்பாக போலீசார் வழக்குப்பதிவு செய்து மர்ம நபர்களை வலைவீசி தேடி வருகிறார்கள்.

கொள்ளிடம்:

நாகை மாவட்டம் கொள்ளிடம் அருகே உள்ள மாதிரவேளூர் ஊராட்சி பட்டியமேடு கிராமத்தை சேர்ந்தவர் ராஜதுரை(வயது 58). கூலித்தொழிலாளி. இவரது மனைவி உஷா(52). இவர்களது மகள் விமலா(17). உஷாவும், விமலாவும் வாய்பேச முடியாத மற்றும் காது கேட்காத மாற்றுத்திறனாளிகள் ஆவர்.

உஷா, தனது சேமிப்பு பணத்தை அனைத்தையும் ஒரு பிளாஸ்டிக் பையில் வைத்து சுருட்டி, அதனுடன் ½ பவுன் தோட்டையும் வைத்து தனது வீட்டின் பின்புறம் பள்ளம் தோண்டி புதைத்து வைத்துள்ளார். இந்த நிலையில் கடந்த 2016-ம் ஆண்டு நவம்பர் 8-ந் தேதி மத்திய அரசு பழைய ரூ.1000, ரூ.500 நோட்டுகள் செல்லாது என அறிவித்தது. இந்த செய்தி குறித்து உஷாவுக்கு எந்த விவரமும் தெரியவில்லை. இந்த நிலையில் ராஜதுரை வீடு கட்டுவதற்காக, பின்புறம் பள்ளம் தோண்டினார்.

அப்போது மண்ணுக்குள் இருந்து பிளாஸ்டிக் பை ஒன்று வெளியில் வந்தது. அதனை வெளியே எடுத்து பார்த்தபோது அந்த பையில் மத்திய அரசு செல்லாது என அறிவித்த பழைய 1000, 500 ரூபாய் நோட்டுகள் மொத்தம் 35 ஆயிரத்து 500 இருந்தது தெரிய வந்தது. அதை வாங்கிய உஷா, அந்த பணம் தனது மகள் திருமணத்திற்காக தான் பத்திரமாக சேர்த்து வைத்துள்ளதாக சைகை மூலம் அவர்களிடம் தெரிவித்துள்ளார்.

அதைக்கேட்ட தொழிலாளர்கள் இந்த ரூபாய் நோட்டுகள் செல்லாது என மத்திய அரசு 4 ஆண்டுகளுக்கு முன்னரே அறிவித்து விட்டது என தெரிவித்ததும் உஷா அதிர்ச்சி அடைந்தார். எனது மகள் திருமணத்திற்காக சேமித்து வைத்த இந்த ரூபாய் நோட்டுகளை மாற்றி தர நடவடிக்கை எடுக்க வேண்டும் என அவர் கண்ணீர் மல்க சைகை மூலம் தமிழக அரசுக்கு கோரிக்கை விடுத்தார்.

நாகப்பட்டினம்:

நாகை அக்கரைப்பேட்டை மீன்பிடி துறைமுகத்தில் இருந்து 100-க்கும் மேற்பட்ட விசைப்படகு மற்றும் பைபர் படகுகளில் மீனவர்கள் கடலுக்கு மீன்பிடிக்க சென்று வருகின்றனர். நேற்று முன்தினம் மாலை செல்வம் என்பவர் தனக்கு சொந்தமான பைபர் படகில் சக மீனவர்களுடன் கடலுக்கு மீன்பிடிக்க சென்றார்.

பைபர் படகில் குறைந்த தூரம் மட்டுமே சென்று மீன்பிடிக்க முடியும் என்பதால் குறிப்பிட்ட தூரம் சென்றவுடன் கடலில் வலையை விரித்து மீன்களுக்காக அவர்கள் காத்திருந்தனர். அப்போது இடி மின்னலுடன் மழை பெய்யத்தொடங்கியது. இதையடுத்து சோகமடைந்த மீனவர்கள், அவசர அவசரமாக கரைக்கு திரும்ப முற்பட்டனர்.

அப்போது அவர்கள், தாங்கள் கடலில் விரித்த வலையை இழுத்தனர். அப்போது அவர்களால் வலையை இழுக்க முடியவில்லை. மீனவர்கள் வலையை இழுத்தபோது எதிர் திசையில் படகு இழுத்து செல்லப்பட்டது. இதனால் மீனவர்கள் அதிர்ச்சியடைந்தனர். தொடர்ந்து அவர்கள் போராடி வலையை இழுத்தபோது ராட்சத மீன் அவர்கள் விரித்த வலையில் சிக்கியிருப்பது தெரிய வந்தது.

மிகுந்த போராட்டத்துக்கிடையே ஒருவழியாக மீனை படகுக்கு கொண்டு வந்தனர். அப்போதுதான் அந்த மீன் ஆழ்கடலில் மட்டுமே கிடைக்கக்கூடிய ஏற்றுமதி ரக மீன் என்பது தெரியவந்தது. 15 அடி நீளமும், 250 கிலோ எடை கொண்டதாகவும் அந்த மீன் இருந்தது.

இதையடுத்து படகை கரைக்கு கொண்டு வந்த மீனவர்கள், சக மீனவர்களின் உதவியுடன் அந்த மீனை படகில் இருந்து வெளியே எடுத்து வந்தனர். இதுகுறித்த தகவல் அறிந்ததும் ஏராளமானோர் நாகை கடற்கரைக்கு வந்து பிடிபட்ட ராட்சத மீனை பார்வையிட்டு சென்றனர்.

இந்த மீன் ஏற்றுமதி செய்யப்பட்டால் கிலோ 300-க்கு விற்பனை செய்யப்படும் என்றும், தற்போது ஊரடங்கு காலத்தில் அது சாத்தியமில்லாததால், கிலோ ரூ.100-க்கு குறைவாகவே விற்பனையானது என்றும் மீனவர்கள் தெரிவித்தனர். விசைப்படகுகளிலேயே பெரும்பாலும் சிக்கக்கூடிய இந்த மீன் பைபர் படகில் கிடைத்ததால் மகிழ்ச்சியடைந்து உள்ளதாக சக மீனவர்கள் தெரிவித்தனர்.

காரைக்கால்: