நாகப்பட்டினம்

நாகப்பட்டினம்:

நாகை அக்கரைப்பேட்டை மீன்பிடி துறைமுகத்தில் கருவாடு காயவைக்கும் தளங்கள் உள்ளன. இங்கு 100-க்கும் மேற்பட்டவர்கள் கருவாடு தயாரிக்கும் பணியில் ஈடுபட்டு வருகின்றனர். நெத்திலி, வாளை, கிழங்காமீன், ஓட்டாம்பாறை, பூக்கெண்டை, திருக்கை, சேதமடைந்த வஞ்சிரம் உள்ளிட்ட பல்வேறு வகையான மீன்களில் கருவாடு தயாரிக்கின்றனர். இங்கு தயாரிக்கப்படும் கருவாடு திருவாரூர், தஞ்சை, திருச்சி, மயிலாடுதுறை, சேலம், வேலூர் மற்றும் ஆந்திரா மாநிலம் உள்ளிட்ட பல்வேறு பகுதிகளுக்கு அனுப்பி வைக்கப்படுகிறது.

அக்கரைப்பேட்டை கருவாடு காயவைக்கும் தளத்தில் நாள் ஒன்றுக்கு 500 கிலோ முதல் 1 டன் வரையிலான அளவிற்கு கருவாடு தயாரிக்கப்படுகிறது. சராசரியாக நாள் ஒன்றுக்கு ரூ.1 கோடிக்கு கருவாடு வர்த்தகம் நடைபெறும்.

இதுதவிர கோழித்தீவனத்துக்காக பாறை, சிறிய வகை சங்கரா, வாவல்பொடி, நண்டுப்பொடிகள் உள்ளிட்ட வலையில் சிக்கி, சேதமடைந்த மீன்களிலும் கருவாடு தயாரிக்கப்படுகிறது. ஒரு மூட்டை கோழித்தீவன கருவாடு ரூ.25-ல் இருந்து ரூ.40 வரை வெளியூர்களில் இருந்து வியாபாரிகள் வாங்கி செல்கின்றனர். நாள் ஒன்றுக்கு 1000 மூட்டை கோழி தீவனத்துக்கான கருவாடுகள் இங்கு தயார் செய்யப்பட்டு ஏற்றுமதி செய்யப்பட்டு வருகின்றன.

கொரோனா முழு ஊரடங்கு காலத்தில் முற்றிலும் முடங்கிப்போன கருவாடு தயாரிக்கும் தொழிலானது, தற்போது மீண்டும் தொடங்கி மும்முரமாக நடைபெற்று வருகிறது. கருவாடு உற்பத்தியில் கேரள மாநிலம் தலச்சேரிக்கு அடுத்த நிலையில் இருப்பது நாகை மாவட்டம். இங்கு தயார் செய்யப்படும் கருவாடுகளுக்கு அதிக வரவேற்பு உள்ளது. அடைமழை காலங்களில், அன்றாட உணவு தேவையில் முக்கியத்துவம் பெற்றிருந்த மாவத்தல், கொத்தவரை வத்தல், சுண்டைக்காய் வத்தல், பாகற்காய் வத்தல் மற்றும் வடகம் வரிசையில் அசைவப்பிரியர்களின் முக்கிய உணவாக கருவாடு இருக்கிறது. கடந்த சில நாட்களுக்கு முன்பு நாகையில் சூறைக்காற்றுடன் கன மழை பெய்தபோது, இந்த கருவாடு உற்பத்தி பாதிக்கப்பட்டாலும், தற்போது வெளுத்து வாங்கும் வெயிலில் சிறப்பாக தயாரிப்பு பணிகள் நடைபெற்று வருகிறது.

மழைகாலங்களில் கருவாடு உற்பத்தி முற்றிலும் பாதிக்கும். அப்போது சேமித்து வைத்த கருவாடுகள் விற்பனை செய்யப்படும். அந்த நாட்களில் கருவாட்டின் விலையும் வழக்கத்தை விட சற்று அதிகமாக இருக்கும். மேலும் புயல் காலங்கள் என்றால், கொட்டகைகள் இடிந்து, அதில் உள்ள கருவாடுகள் அனைத்தும் வீணாகும். எனவே வடகிழக்கு பருவமழை தொடங்க உள்ள நிலையில் மழை காலங்களில் சேதமடையும் கருவாட்டிற்கு அரசு உரிய நிவாரணம் வழங்க வேண்டும் என உற்பத்தியாளர்கள் கோரிக்கை விடுத்துள்ளனர்.

வேதாரண்யம்:

வேதாரண்யம் அருகே செம்போடை வடக்கு கிராமத்தை சேர்ந்தவர் ஆறுமுகம் (வயது 50) இவருக்கும், அதே ஊரை சேர்ந்த இவரது உறவினர் விவசாயி அஞ்சப்பன் (63) என்பவருக்கும் இடையே சொத்து பிரச்சினையால் முன்விரோதம் இருந்து வந்துள்ளது.

இந்தநிலையில் சம்பவத்தன்று ஆறுமுகம் மற்றும் அவருடைய மனைவி ராஜசெல்வி (45) ஆகியோர் தங்களின் மாந்தோப்பில் வேலை பார்த்து கொண்டு இருந்துள்ளனர். அப்போது அங்கு வந்த அஞ்சப்பன் மற்றும் அவருடைய மகன் வெங்கடேசன் ஆகிய 2 பேரும் சேர்ந்து ஆறுமுகத்தையும், அவரது மனைவியையும் தரக்குறைவாக பேசி, கத்தியை காட்டி கொலை மிரட்டல் விடுத்ததுடன், கம்பாலும், கம்பியாலும் தாக்கினர்.

இதில் காயம் அடைந்த ஆறுமுகம், அவருடைய மனைவி ராஜசெல்வி ஆகியோர் வேதாரண்யம் அரசு மருத்துவமனையில் சிகிச்சை பெற்று வருகிறார்கள். இதுகுறித்து ஆறுமுகம் அளித்த புகாரின் பேரில் வேதாரண்யம் போலீஸ் சிறப்பு சப்-இன்ஸ்பெக்டர் மதியழகன் மற்றும் போலீசார் வழக்குப்பதிவு செய்து அஞ்சப்பனை கைது செய்து, வேதாரண்யம் கோர்ட்டில் ஆஜர்படுத்தினர். இதில் தலைமறைவான வெங்கடேசனை வலைவீசி தேடி வருகிறார்கள்.