கடலூர்

பண்ருட்டி:

கடலூர் மாவட்டம் பண்ருட்டி ஒன்றியம் காடாம்புலியூர் அடுத்த நடுபிள்ளையார்குப்பம் கிராமத்தில் அமைந்துள்ளது. ரேணுகா பரமேஸ்வரி அம்மன் கோவில். இது மிகவும் பிரசித்தி பெற்றது. இங்கு ஏராளமான பொருட்செலவில் திருப்பணிகள் செய்யப்பட்டு நேற்று காலை மகா கும்பாபிஷேகம் நடைபெற்றது

இதனை முன்னிட்டு அமைக்கப்பட்டிருந்த யாக சாலையில் 5ஆம் தேதி முதல் யாகசாலை பூஜைகள் வெகு விமர்சையாக நடந்தது.நேற்று காலை மூன்றாவது கால யாகசாலை பூஜை நடந்தது. தொடர்ந்து ஒன்பது மணிக்கு மேல் கலச நீர் ஊர்வலமாக எடுத்துச்செல்லப்பட்டு கருவறை விமான கலசம் புனித நீர் ஊற்றி மகா கும்பாபிஷேகம் நடந்தது. கூடியிருந்த பக்தர்கள் ஓம்சக்தி, ஓம்சக்தி என விண்ணதிரக் கோஷமிட்டனர்.

கடலூர்:

தென்மேற்கு வங்க கடல் அதனை ஒட்டிய வட இலங்கை கடலில் வளிமண்டல மேலடுக்கு சுழற்சி நிலவி வருவதால் தமிழகத்தின் பல இடங்களில் இடியுடன் கூடிய மழை பெய்யும் என வானிலை ஆய்வு மையம் அறிவித்துள்ளனர்.

இதனை தொடர்ந்து கடலூர் மாவட்டத்தில் கோடை வெயில் மற்றும் அக்னி நட்சத்திரம் தொடங்கி உள்ள நிலையில் சுட்டெரிக்கும் வெயில் அடித்து வருவதால் பொதுமக்கள் கடும் அவதி அடைந்தனர். மேலும் சில நாட்களுக்கு முன்பு 100 டிகிரிக்கு மேல் கடலூர் மாவட்டத்தில் வெயிலின் அளவு பதிவானது குறிப்பிடத்தக்கதாகும்.

இந்த நிலையில் நேற்று நள்ளிரவு கடலூர், நெல்லிக்குப்பம், நடுவீரப்பட்டு, பாலூர் உள்ளிட்ட பல்வேறு பகுதிகளில் லேசான காற்றுடன் தொடங்கி சூறாவளி காற்றாக மாறிய நிலையில் மழை பெய்து வந்தது.

அப்போது கடலூர் மற்றும் நெல்லிக்குப்பம் சுற்றுவட்டார பகுதியில் சூறாவளி காற்று பலமாக வீசியதால் நள்ளிரவு 12.30 மணிக்கு மேல் மின்தடை ஏற்பட்டு கடலூர் மற்றும் நெல்லிக்குப்பம் பகுதி இருளில் மூழ்கியது. இதனை தொடர்ந்து மின்சார துறை சார்பில் மின் பணியாளர்கள் உடனடியாக மின்தடை ஏற்பட்டதைத் தொடர்ந்து ஆய்வு செய்தனர்.

அப்போது பல இடங்களில் மின் ஒயர்கள் அறுந்தும், இன்குபேட்டர் சேதமடைந்ததால் ஆங்காங்கே மின்தடை ஏற்பட்டது தெரியவந்தது. இதனைத்தொடர்ந்து மின்சாரத் துறை ஊழியர்கள் துரிதமாக செயல்பட்டு கடலூர் மற்றும் நெல்லிக்குப்பம் உள்ளிட்ட பல்வேறு நகர பகுதிகளில் முதற்கட்டமாக அரைமணி நேரம் முதல் ஒரு மணி நேரத்திற்குள் மின் வினியோகம் செய்யப்பட்டு வந்தது.

ஆனால் கடலூர், நெல்லிக்குப்பம் சுற்றுவட்டார பகுதியில் உள்ள கிராம பகுதியில் அதிகாலை 4 மணிக்கு மேல் ஒவ்வொரு பகுதியாக மின்சாரம் வழங்கப்பட்டு வந்தது. இதன் காரணமாக கடலூர் மற்றும் நெல்லிக்குப்பம் பகுதி மக்கள் மின்தடை காரணமாக கடும் அவதி அடைந்து வந்தனர்.

சூறாவளி காற்று மற்றும் மழை பெய்த காரணத்தினால் வழக்கத்தைவிட வெயிலின் தாக்கத்தால் ஏற்பட்ட புழுக்கம் குறைந்து குளிர்ந்த காற்று வீசியதால் பொதுமக்கள் சற்று மகிழ்ச்சி அடைந்ததை காண முடிந்தது. மேலும் கடலூர் நெல்லிக்குப்பம் மற்றும் சுற்றுவட்டார பகுதியில் மின் பாதிப்புகள் தொடர்பாக ஊழியர்கள் தொடர்ந்து சம்பவ இடத்திற்கு சென்று பார்வையிட்டு வருகின்றனர்.

புவனகிரி:

தமிழகம் முழுவதும் கடந்த ஆண்டு வடகிழக்கு பருவமழை கைகொடுத்ததால் நீர்நிலைகள் ஓரளவு நிரம்பியது. இந்த தண்ணீரை வைத்து நெற்பயிர் சாகுபடி செய்து அறுவடை முடிந்துள்ளது.

தற்போது விளைநிலங்களில் விவசாயிகள் உளுந்து மற்றும் எள் சாகுபடி செய்துள்ளனர். புவனகிரி மற்றும் சேத்தியாத்தோப்பு பகுதிகளில் தற்போது உளுந்து அறுவடை முடிந்துள்ளது. கடந்த சில நாட்களாக கோடை வெயில் வறுத்தெடுத்து வருகிறது. எனவே மக்கள் கோடை வெயில் கோரதாண்டவத்துக்கு தாக்குபிடிக்க முடியாமல் வீட்டுக்குள் முடங்கினர். தொடர்ந்து வெயில் வாட்டி வதைத்ததால் எப்போது மழை பெய்யும் என்று பொதுமக்கள் எதிர்பார்த்திருந்தனர்.

அதன்படி அக்னி நடத்திரம் தொடங்கிய நாள் முதல் தமிழகத்தில் பல்வேறு இடங்களில் பரவலாக மழைபெய்து வருகிறது. இதைபோல புவனகிரி, தம்பிக்கு நள்ளான் பட்டினம், தெற்கு திட்டை உள்ளிட்ட 20க்கும் மேற்பட்ட கிராமங்களில் நேற்று மாலை பலத்த சூறாவளி காற்றுடன் கனமழை பெய்தது. இந்த மழை சுமார் ½ மணி நேரம் கொட்டி தீர்த்தது. இதனால் ஓரளவு வெப்பம் தணிந்தது.

இதுகுறித்து விவசாயிகள் கூறுகையில், தற்போது புவனகிரி பகுதியில் எள் சாகுபடி செய்யப்பட்டுள்ளது. அதோடு ஒருசில குறுவை நாற்று நட்டுள்ளனர். இந்த கோடை மழை எள் மற்றும் குறுவை நாற்றுக்கு உகந்தது. தொடர்ந்து மழை பெய்தால் ஓரளவு நிலத்தடி நீர்மட்டம் உயர வாய்ப்பு உள்ளது என்று தெரிவித்தனர்.

இதேபோல சேத்தியாத்தோப்பு, எறும்பூர், வளைய மாதேவி, பின்னலூர், வீரமுடையாநத்தம், ஆனைவாரி, குமாரகுடி, சாத்தமங்கலம் உள்ளிட்ட கிராமங்களில் இடியுடன் பலத்த மழை கொட்டி தீர்த்தது.

இதன் காரணமாக அந்த பகுதி விவசாயிகள் மகிழ்ச்சியடைந்தனர்.

பண்ருட்டி:

கடலூர் மாவட்டம் பண்ருட்டி சாமியார் தர்கா பகுதியை சேர்ந்தவர் முருகன். கட்டிட தொழிலாளி. அவரது மனைவி லட்சுமி (வயது 45). இவர்களுக்கு 1 மகனும், 1 மகளும் உள்ளனர்.

நேற்று வீட்டில் இருந்த லட்சுமி மார்க்கெட்டுக்கு சென்று வருவதாக கூறி விட்டு சென்றார். அதன்பின்னர் அவர் வீடு திரும்பவில்லை. அதிர்ச்சி அடைந்த முருகன் தனது மனைவியை உறவினர்கள் மற்றும் பல்வேறு இடங்களில் தேடினார். எங்கு தேடியும் அவர் கிடைக்கவில்லை.

இது குறித்து முருகன் பண்ருட்டி போலீஸ் நிலையத்தில் புகார் செய்தார். போலீஸ் இன்ஸ்பெக்டர் சந்திரன் வழக்கு பதிவு செய்து லட்சுமி என்ன ஆனார் எங்கு சென்றார். கடத்தப்பட்டாரா என்பது குறித்து விசாரித்து வருகிறார்.

காட்டுமன்னார் கோவில்:

கடலூர் மாவட்டம் காட்டுமன்னார்கோவில் அருகே லால்பேட்டையில் வீராணம் ஏரி உள்ளது. இந்த ஏரியின் நீர்மட்டம் 47.50 அடியாகும்.

இந்த ஏரி மூலம 44,856 ஏக்கர் நிலம் பாசனவசதி பெறுகிறது. அதோடு சென்னை மாநகரின் குடிநீருக்கு முக்கிய ஆதரமாக உள்ளது.

இந்த ஏரிக்கு பருவகாலங்களில் பெய்யும் மழை மேட்டூர் அணை மூலம் தண்ணீர் வரத்து இருக்கும். கடந்த ஆண்டு வடகிழக்கு பருவமழை கொட்டி தீர்த்ததால் வீராணம் ஏரி 3 முறை நிரம்பி வழிந்தது. இந்த தண்ணீரை வைத்து தற்போது நெற்பயிர் சாகுபடி அறுவடை முடிந்துள்ளது.

கடந்த சில நாட்களாக கோடைவெயில் வறுத்தெடுத்து வருவதால் வீராணம் ஏரியின் நீர்மட்டம் படிப்படியாக குறைந்து வந்தது. தற்போது நீர்பிடிப்பு பகுதியிலும் மழை ஓய்ந்தது. இதனால் நீர்வரத்து குறைந்து விட்டது. கடந்த 4ந்தேதி ஏரிக்கு வடவாறு மூலம் 224 கனஅடி நீர் வந்தது. அது தற்போது 174 கனஅடியாக குறைந்தது.

ஏரியின் நீர்மட்டம் 42.05 அடியாக உள்ளது. சென்னை மாநகர் குடிநீருக்காக 67 கனஅடி நீர் அனுப்பப்படுகிறது. இதுகுறித்து பொதுபணித்துறை அதிகாரிகள் கூறுகையில், தொடர்ந்து வீராணம் ஏரி நீர்மட்டம் குறைந்து வந்தால் சென்னைக்கு குடிநீர் அனுப்புவதில் சிக்கல் ஏற்படும் என்று தெரிவித்தனர்.