அரியலூர்

அரியலூர்:

அரியலூர் மாவட்டத்தில் நேற்று ஒரே நாளில் 54 பேருக்கு கொரோனா தொற்று இருப்பது உறுதி செய்யப்பட்டது. அரியலூர் நகராட்சி, அரியலூர் ஊராட்சி ஒன்றியத்துக்கு உட்பட்ட பகுதிகளில் தலா 5 பேருக்கும், திருமானூர் ஒன்றியத்துக்கு உட்பட்ட பகுதிகளில் 16 பேருக்கும், செந்துறை, ஜெயங்கொண்டம் ஆகிய ஊராட்சி ஒன்றியங்களுக்கு உட்பட்ட பகுதிகளில் தலா 9 பேருக்கும், தா.பழூர் ஒன்றியத்துக்கு உட்பட்ட பகுதியில் ஒருவருக்கும், ஆண்டிமடம் ஒன்றியத்துக்கு உட்பட்ட பகுதிகளில் 3 பேருக்கும், ஜெயங்கொண்டம் நகராட்சிக்கு உட்பட்ட பகுதிகளில் 6 பேருக்கும் என மொத்தம் 54 பேர் கொரோனாவால் பாதிக்கப்பட்டு உள்ளனர்.

இதனால் மாவட்டத்தில் பாதிக்கப்பட்டவர்களின் எண்ணிக்கை 1,345 ஆக உயர்ந்துள்ளது. இதில் 13 பேர் உயிரிழந்துள்ளனர். 1,020 பேர் சிகிச்சை பெற்று வீடு திரும்பியுள்ளனர். தற்போது 312 பேர் சிகிச்சை பெற்று வருகின்றனர். மேலும் 386 பேருக்கு பரிசோதனை முடிவுகள் வரவேண்டியுள்ளது.

விக்கிரமங்கலம்:

அரியலூர் மாவட்டம், விக்கிரமங்கலம் அருகே சாத்தம்பாடி கிராமம் உள்ளது. தற்போது மழைக்காலம் தொடங்கிய நிலையில் நேற்று முன்தினம் பெய்த கன மழையில் சாத்தம்பாடியில் உள்ள வடக்கு தெருவில் உள்ள சில வீடுகளுக்குள் மழைநீர் புகுந்தது. மழைநீர் வழிந்தோடுவதற்கு சரியான வடிகால் வசதி இல்லாததாலும், மழைநீர் செல்லுமிடத்தில் ஆக்கிரமிப்புகள் உள்ளதாலுமே மழைநீர் குடியிருப்புகளுக்குள் புகுந்ததாக அப்பகுதி மக்கள் கூறுகின்றனர்.

மேலும் வடிகால் வசதி வேண்டும் என பலமுறை அதிகாரிகளிடம் கூறியும், மனுக்கள் அளித்தும் எந்த விதமான நடவடிக்கையும் எடுக்கப்படவில்லை என்று கூறப்படுகிறது. இதனால் நேற்று ஒன்றுகூடிய வடக்குத்தெரு பொதுமக்கள், வடிகால் வசதி கேட்டு அரியலூர் முத்துவாஞ்சேரி சாலையில் தடுப்புகளை அமைத்து சாலை மறியல் செய்ய முயன்றனர்.

அப்போது சம்பவ இடத்திற்கு வந்த சாத்தம்பாடி ஊராட்சி மன்ற தலைவர் ரவிச்சந்திரன் ஆக்கிரமிப்புகளை அகற்றி, மழைநீர் வழிந்தோடுவதற்கு உடனடியாக நடவடிக்கை எடுத்தார். இதையடுத்து அப்பகுதி மக்கள் போராட்ட முடிவை கைவிட்டு கலைந்து சென்றனர். இந்த சம்பவத்தால் அப்பகுதியில் சிறிது நேரம் பரபரப்பு ஏற்பட்டது.

அரியலூர்:

அரியலூர் ரெயில்வே நிலைய சாலையில் உள்ள ரேஷன் கடையில் குடும்ப அட்டைதாரர் மற்றும் அவர்களுடைய குடும்ப உறுப்பினர்களுக்கு விலையில்லா முக கவசங்கள் வழங்கும் பணிக்கான தொடக்க நிகழ்ச்சி நேற்று நடந்தது. நிகழ்ச்சிக்கு அரியலூர் மாவட்ட கலெக்டர் ரத்னா தலைமை தாங்கினார்.

நிகழ்ச்சியில் அரசு தலைமை கொறடா தாமரை ராஜேந்திரன் கலந்து கொண்டு, குடும்ப அட்டைதாரர்கள், குடும்ப உறுப்பினர்களுக்கு தலா 2 முக கவசங்களை வழங்கி, அந்த பணியை தொடங்கி வைத்து பேசினார். நிகழ்ச்சியில் மாவட்ட வருவாய் அதிகாரி ஜெய்னுலாப்தீன் உள்ளிட்ட பலர் கலந்து கொண்டனர்.

அரியலூர்:

தமிழக முதல்-அமைச்சரின் உத்தரவின் பேரில், அரியலூர் மாவட்டம், குறுமஞ்சாவடி குடிசை மாற்று வாரிய குடியிருப்பில் இந்திய மருத்துவம் மற்றும் ஓமியோபதி துறையின் சார்பில் புதிதாக கொரோனாவுக்கான சித்த மருத்துவ சிறப்பு சிகிச்சை மையம் அமைக்கப்பட்டுள்ளது. இதனை நேற்று அரசு தலைமை கொறடா தாமரை ராஜேந்திரன் திறந்து வைத்து, மருந்துகளை பார்வையிட்டார். அப்போது கலெக்டர் ரத்னா உடனிருந்தார்.

பின்னர் அரசு கொறடா தாமரை ராஜேந்திரன் பேசுகையில், இந்த சித்தா சிறப்பு மையத்தில் 100 படுக்கைகள் அமைக்கப்பட்டு, தலா ஒரு சித்த மருத்துவர், அலோபதி மருத்துவர் மற்றும் செவிலியர்கள், பணியாளர்கள் என 10 பேர் கொரோனா நோயாளிகளுக்கு சித்த மருந்து மூலம் சிகிச்சைகள் அளிக்கவுள்ளனர். மேலும் இந்த மையத்தில் கொரோனா அறிகுறிகள் அல்லது சந்தேகத்திற்கு ஆட்படும் பட்சத்தில் மருத்துவமனைக்கு செல்ல தயங்குபவர்கள் சிகிச்சைக்காக அனுமதிக்கப்படுபவார்கள். சிகிச்சை பெறுபவர்களுக்கு நோய் எதிர்ப்பு சக்தி கொண்ட சத்தான உணவுகளும், நோய் தடுப்பு மருந்துகளும் வழங்கப்படவுள்ளது, என்றார்.

இதைத்தொடர்ந்து அரியலூர் கலெக்டர் அலுவலகத்தில் நடந்த விழாவில் ரூ.3 லட்சத்து 82 ஆயிரத்து 500 மதிப்பில் ஊரடங்கு காலத்தில் தேவைப்படும் உணவு பொருட்கள் மற்றும் மருத்துவ உபகரணங்களை மாற்றுத்திறனாளிகளுக்கு அரசு கொறடா தாமரை ராஜேந்திரன் வழங்கினார். இதில் கலெக்டர் ரத்னா, மாவட்ட மாற்றுத்திறாளி நல அலுவலர் பொம்மி மற்றும் அலுவலர்கள் கலந்து கொண்டனர்.

வி.கைகாட்டி:

அரியலூர் மாவட்டம் பெரியநாகலூர் அருகே உள்ள சின்னநாகலூர் கிராமத்தில் 17 விவசாயிகள் மின் இணைப்பு பெற்று மின் மோட்டார் மூலம் ஆழ்குழாய் கிணற்றில் இருந்து பெறப்படும் தண்ணீரை கொண்டு விவசாயம் செய்து வருகின்றனர். இந்நிலையில் கடந்த 2 வாரங்களாக மின்மாற்றி பழுதானதால், மின்சாரம் தடைபட்டுள்ளது.

இதனால் தண்ணீர் பாய்ச்ச முடியாத நிலையில், விவசாய பயிர்கள் பாதிக்கப்படுவதாக கூறி மின்வாரிய அலுவலகத்தை விவசாயிகள் அணுகியுள்ளனர். ஆனால் மின்மாற்றியை சீரமைக்க உரிய நடவடிக்கை எடுக்கப்படவில்லை என்று கூறப்படுகிறது.

இதையடுத்து அந்த மின்மாற்றியை உடனடியாக சீரமைக்கக்கோரி மின்மாற்றி உள்ள இடத்தில், விவசாயிகள் நேற்று போராட்டத்தில் ஈடுபட்டனர். இது பற்றி தகவல் அறிந்து அங்கு சென்ற கயர்லாபாத் போலீசார், மின்வாரிய அதிகாரிகளிடம் பேசி உரிய நடவடிக்கை எடுக்கப்படும் என்று தெரிவித்தனர். இதில் சமரசம் ஏற்பட்டதையடுத்து, விவசாயிகள் கலைந்து சென்றனர்.

அரியலூர்:

அரியலூர் மாவட்டம் ஆண்டிமடம் அருகே உள்ள குவாகம் கிராமத்தை சேர்ந்தவர் சரவணன். இவர் தத்தனூர் அரசு பள்ளியில் உடற்கல்வி ஆசிரியராக பணியாற்றி வருகிறார். பட்டதாரி படிப்பு முடித்து கராத்தே பயிற்சியில் நன்கு பயிற்சி பெற்றவர்.

தான் அறிந்த கலைகளை அனைத்துக் பகுதி மக்களுக்கும் சென்றடைய வேண்டும் என்ற நோக்கத்தில் ஆண்டிமடம் உள்ளிட்ட சுற்றுவட்டார கிராமங்களில் ஊர் ஊராக சென்று அந்தந்த பகுதிகளில் உள்ள மாணவ-மாணவிகளுக்கு கராத்தே, சிலம்பம், ஜிம்னாஸ்டிக், யோகா, நீச்சல் உள்ளிட்ட பல்வேறு தற்காப்பு கலைகளை இலவசமாக கற்றுக்கொடுத்து வருகிறார். ஆசிரியரின் செயலுக்கு பொதுமக்கள் பாராட்டுகள் தெரிவித்துள்ளனர்.