கேரளா

திருவனந்தபுரம்:

கேரள மாநிலம் வயநாட்டில் கனமழை தொடர்ந்து பெய்ததால் முண்டக்கை, மேப்பாடி, சூரல்மலை ஆகிய 3 இடங்களில் மிகப்பெரிய நிலச்சரிவு ஏற்பட்டது. மேலும் காட்டாற்று வெள்ளம் பெருக்கெடுத்தது.

இதன் காரணமாக அந்த பகுதிகளில் இருந்த வீடுகள் உள்ளிட்ட கட்டிடங்கள் மண்ணுக்குள் புதைந்தன. வீடுகளில் தூங்கிக் கொண் டிருந்த மக்கள் வெள்ளத்தில் அடித்துச் செல்லப்பட்டனர். மேலும் ஏராளமானோர் மண்ணுக்குள் புதைந்தனர். இந்த சம்பவத்தில் பலியான 300-க்கும் மேற்பட்டவர்களின் உடல்கள் கண்டெடுக்கப்பட்டுள்ளன.

மேலும் மாயமான 100-க்கும் மேற்பட்டவர்களை தேடும் பணி தொடர்ந்து நடந்து வருகிறது. கடற்படை, கப்பல்படை, விமானப்படை என ராணு வத்தின் முப்படை வீரர்கள் மற்றும் பேரிடர் மீட்புப்படையினர் இரவு பகல் பராமல் மீட்புப்பணியில் ஈடுபட்டு வருகின்றனர்.

பலியானவர்களின் உடல்கள் அரசு ஆஸ்பத்திரி கள், ஆரம்ப சுகாதார நிலையங்கள் உள்ளிட்ட இடங்களில் வைக்கப்பட்டுள்ளன. குடும்பத்தினர் அடையாளம் காட்டுவதன் அடிப்படையில் பலியானவர்களின் உடல்கள் உறவினர்களிடம் ஒப்படைக்கப்பட்டு வருகிறது.

நிலச்சரிவில் பெரிய பெரிய பாறைகள் உருண்டு விழுந்ததாலும், காட்டாற்று வெள்ளம் அடித்துச் சென்ற தாலும் பலியானவர்களின் உடல்கள் சிதைந்த நிலையி லேயே மீட்கப்பட்டு வரு கின்றன. பல உடல்கள் அடையாளம் காண முடியாத அளவிற்கு சின்னா பின்னமாகி இருக்கின்றன. இதனால் இறந்தவர்களை அடையாளம் காணுவதில் பெரும் சிக்கல் நிலவுகிறது.

இதன் காரணமாக ஒரு உடலுக்கு பலர் உரிமை கொண்டாடும் அரங்கமும் அரங்கேறி வருகிறது. முண்டக்கை நிலச்சரிவில் சிக்கி பலியான ஒரு சிறுமி உடலுக்கு 4 குடும்பத்தினர் உரிமை கொண்டாடி உள்ளனர். அந்த சிறுமியின் உடல் மேப்பாடி மருத்துவ மையத்தில் வைக்கப்பட்டிருந்தது. சிறுமியின் உடல் மிகவும் சிதைந்த நிலையில் இருந்துள்ளது.

முதலில் ஒரு குடும்பத்தினர் அந்த சிறுமி தங்களது குழந்தை என கூறி இருக்கின்றனர். அவர்களிடம் அந்த சிறுமியின் உடல் ஒப்படைக்கப்பட்டது. அந்த நேரத்தில் மற்றொரு குடும்பத்தினர் அந்த சிறுமியின் உடலுக்கு உரிமை கொண்டாடினர்.

இருவரது குடும்பத்தின ரையும் அதிகாரிகள் சமரசம் செய்து கொண்டிருந்தபோது, மேலும் இரு குடும்பத்தினர் அந்த சிறுமியின் உடலுக்கு உரிமை கொண்டாடினர். இதனால் மேலும் குழப்பம் ஏற்பட்டது. முதலில் உரிமை கொண்டாடிய குடும்பத்தினர் அந்த சிறுமியின் உடலை அடக்கம் செய்ய மயானத்திற்கே கொண்டு சென்று விட்டனர்.

பின்பு அவர்களிடமிருந்து மீட்டு 2-வது குடும்பத்தினரிடம் பேச்சுவார்த்தை நடத்திய போதுதான் மேலும் 2 குடும்பத்தினரும் சிறுமியின் உடலுக்கு உரிமை கொண்டாடினர்.

இந்நிலையில் முதல்-மந்திரி பினராயி விஜயன் முன்னிலையில் மக்கள் பிரதிநிதிகள் கூட்டம் நேற்று நடைபெற்றது.

அதில் சிறுமியின் உடலுக்கு 4 குடும்பத்தினர் உரிமை கொண்டாடுவது குறித்து பினராயி விஜயனின் கவனத்திற்கு கொண்டு செல்லப்பட்டது. இதன் காரணமாக சிறுமிக்கு டி.என்.ஏ. பரிசோதனை நடத்த வேண்டிய அவசியத்தை அவரிடம் அதிகாரிகள் எடுத்து கூறினர்.

அதற்கு நடவடிக்கை எடுக்குமாறு பினராயி விஜயன் பரிந்துரைத்தார். இதேபோன்று பல அடையாளம் தெரியாத உடலுக்கு ஒன்றுக்கு மேற்பட்டவர்கள் உரிமை கொண்டாடுவதால் பிரச்சனை ஏற்பட்டு வருகிறது. அதனை தீர்க்க ஒரு அமைப்பை கொண்டு வர அதிகாரிகளுக்கு பினராயி விஜயன் உத்தரவிட்டுள்ளார். 

கேரளா மாநிலம் வயநாட்டில் கடந்த 29 ஆம் தேதி கொட்டித்தீர்ந்த கனமழை காரணமாக நிலச்சரிவு ஏற்பட்டது. நள்ளரிவு வேளையில் அனைவரும் உறங்கிக் கொண்டிருந்த போது அடுத்தத்தடுத்து நிலச்சரிவு ஏற்பட்டதில் பலநூறு குடும்ங்களை சேர்ந்தவர்கள் மண்ணில் புதைந்து போயினர்.

வீடுகள் இடிந்து விழுந்தும், மரங்கள் வேறோடு சாய்ந்தும், தொடர் கனமழை போன்ற காரணங்களால் மீட்பு பணிகள் இன்னமும் முடிவுக்கு வராத சூழல் நிலவுகிறது. இன்று நான்காம் நாளை எட்டிய மீட்பு பணிகளில் இதுவரை உயிரிழந்தவர்கள் எண்ணிக்கை 316-ஐ கடந்துள்ளது.

மேலும், நிலச்சரிவில் புதைந்தவர்களை தேடுவதற்கு தெர்மல் ஸ்கேனர் பயன்படுத்தப்பட்டு வருகிறது. தெர்மல் ஸ்கேனர் கொண்டு தேடும் போது சேறு, சகதிகளில் யாரேனும் சிக்கி இருந்தால் அதனை ஸ்கேனர் காட்டிக் கொடுக்கும்.

நிலச்சரிவில் உயிரிழந்தவர்கள் உடல் பாகங்கள் சிதைந்து இருப்பது, மண்ணோடு மண்ணாக பலர் புதைந்து உயிரை பறிக் கொடுத்தது, உறக்கத்தில் பலர் உயிரைவிட்டது என வயநாடு முழுக்க மரண ஓலம் ஓங்கி ஒலிக்கிறது. இந்த நிலையில், இந்த இயற்கை அசம்பாவிதத்தை தேசிய பேரிடராக அறிவிக்கவும் கோரிக்கை விடுக்கப்பட்டு வருகிறது.

வயநாடு:

கேரள மாநிலம் வயநாடு மாவட்டத்தில் முண்டகை, சூரல்மலை மற்றும் மேப்பாடி ஆகிய கிராமங்களில் கடந்த 30-ம் தேதி பயங்கர நிலச்சரிவு ஏற்பட்டது. இந்த நிலச்சரிவில் சிக்கி நூற்றுக்கணக்கானோர் பலியாகினர். இன்னும் பலர் காணாமல் போயினர். அவர்களை தேடும் பணி நடைபெற்று வருகிறது.

இதற்கிடையில் அந்த கிராமங்கள் தவிர அதை சுற்றி இருந்த ஒரு சில குக்கிராமங்களும் நிலச்சரிவில் சிக்கி இருந்த இடம் தெரியாத அளவிற்கு சிதைந்து போயுள்ள அதிர்ச்சி தகவல் வெளியாகி உள்ளது.

அதில் ஒன்றுதான், பூஞ்சிரித்தோடு குக்கிராமம். இது முண்டகை கிராமத்தில் இருந்து சுமார் 5 கிலோ மீட்டர் தொலைவில் மலைபாங்கான இடத்தில் அமைந்து இருந்தது. இந்த குக்கிராமத்தில் 118 குடும்பத்தினர் வசித்து வந்ததாக கூறப்படுகிறது. ஒரே நாள் இரவில் அந்த குக்கிராமம் காணாமல் போனது. நிலச்சரிவுடன் ஆர்ப்பரித்து வந்த காட்டாற்று வெள்ளம் அந்த குக்கிராமத்தை மண்ணோடு மண்ணாக மூடியது.

அங்கு வசித்து வந்த மக்களின் நிலை என்ன? என்பது தெரியவில்லை. தமிழ் சினிமாவில் அஜித்குமார் நடித்த சிட்டிசன் திரைப்படத்தில் அத்திப்பட்டி என்ற கிராமம் காணாமல் போனது போல காட்சி அமைக்கப்பட்டு இருக்கும். அந்த அத்திப்பட்டியை நினைவூட்டுவது போல பூஞ்சிரித்தோடு கிராமமும் அழிந்து போயிருக்கலாம் என்று அக்கம்பக்கத்து ஊரை சேர்ந்தவர்கள் தெரிவித்தனர்.

வயநாடு:

வயநாட்டில் ஏற்பட்ட நிலச்சரிவு தொடர்பாக மேற்கொள்ள வேண்டிய மீட்பு நடவடிக்கைகள் குறித்து ஆலோசனை நடத்த அனைத்துக்கட்சி கூட்டம் முதல்-மந்திரி பினராயி விஜயன் தலைமையில் வயநாடு கலெக்டர் அலுவலகத்தில் நேற்று நடைபெற்றது. கூட்டத்துக்கு பின்னர் முதல்-மந்திரி பினராயி விஜயன் நிருபர்களிடம் கூறியதாவது:-

வயநாட்டில் மீட்பு பணிகள் தீவிரமாக நடைபெற்று வருகிறது. வயநாடு நிலச்சரிவில் சிக்கி காப்பாற்றப்பட வேண்டிய நபர்கள் அனைவரும் காப்பாற்றப்பட்டு உள்ளதாகவும், இனி அங்கிருந்து மீட்கப்பட வேண்டியவர்கள் இல்லை என்றும் ராணுவத்தினர் தெரிவித்தனர்.

நிலம்பூர் பகுதியில் சாலியாற்றில் மிதந்து வரும் உடல்கள் மீட்கப்பட்டு வருகிறது. இந்திய ராணுவம் மேற்கொண்ட மீட்பு பணி அளவிட முடியாதது.

200-க்கும் மேற்பட்டோரை காணவில்லை. முண்டகை, சூரல்மலை பகுதிகளுக்கு தேவையான பொக்லைன் எந்திரங்கள் செல்ல முடியாததால், மண்ணுக்குள் சிக்கிய உடல்களை மீட்க முடியவில்லை.

இப்போது நாம் மிகவும் கவனிக்க வேண்டிய விஷயம், பாதிக்கப்பட்ட மக்களின் எதிர்கால வாழ்க்கை குறித்து செய்ய வேண்டிய செயல்களே ஆகும். அதனை அரசு பொறுப்புடன் மேற்கொள்ளும்.

இந்த பகுதியில் சூழ்நிலை சரியில்லாத காரணத்தால் பாதிக்கப்பட்டவர்களுக்கு உதவ முன்வருபவர்கள் நேரடியாக வயநாடு வர வேண்டாம். இந்த பேரழிவை தேசிய பேரிடராக மத்திய அரசு அறிவிக்க வேண்டும்.

இவ்வாறு அவர் கூறினார்.

முன்னதாக முதல்-மந்திரி பினராயி விஜயன் கோழிக்கோட்டில் இருந்து விமானப்படை ஹெலிகாப்டர் மூலம் வயநாட்டிற்கு வந்தார். அப்போது ஹெலிகாப்டரில் இருந்தபடி வயநாட்டில் நிலச்சரிவு, வெள்ளம் பாதித்த பகுதிகளை பார்வையிட்டார். மேலும் அவர் மேப்பாடி அரசு ஆஸ்பத்திரியில் சிகிச்சை பெற்று வருபவர்களை சந்தித்து ஆறுதல் கூறினார்.

இதையடுத்து முதல்-மந்திரி பினராயி விஜயன் மேப்பாடி, சூரல்மலை பகுதிகளுக்கு சென்று மீட்பு பணிகளை பார்வையிட்டார். அங்கு பாதிக்கப்பட்ட மக்களை நேரில் சந்தித்து பேசினார். பின்னா் சூரல்மலையில் அமைக்கப்பட்ட பெய்லி பாலத்தை பார்வையிட்டார். மேலும் நடந்து வரும் மீட்பு பணிகள் குறித்து ராணுவ அதிகாரிகளிடம் கேட்டறிந்தார்.

வயநாட்டில் சூரல்மலை, முண்டகை கிராமங்களை இணைக்கும் வகையில், சூரல்மலையில் உள்ள ஆற்றின் குறுக்கே இருந்த பாலம் வெள்ளத்தில் அடித்து செல்லப்பட்டது. இதனால் கிராமங்கள் துண்டிக்கப்பட்டன. மேலும் நிலச்சரிவில் சிக்கியவர்களை மீட்கும் பணியில் தொய்வு ஏற்பட்டது. இருப்பினும், கொட்டும் மழைக்கு மத்தியில் ராணுவம், தேசிய பேரிடர் மீட்பு படையினர் கயிறு கட்டி ஆற்றை கடந்து மீட்பு பணியில் ஈடுபட்டனர்.

சூழல்மலை-முண்டகை இடையே போக்குவரத்து துண்டிக்கப்பட்டதால், பொக்லைன் உள்ளிட்ட கனரக வாகனங்கள் ஆற்றை கடந்து செல்ல முடியாத நிலை ஏற்பட்டது. இதைத்தொடர்ந்து மீட்பு பணியை துரிதப்படுத்தும் வகையில் ஆற்றின் குறுக்கே பெய்லி பாலம் அமைப்பதற்காக, டெல்லி, பெங்களூருவில் இருந்து ராணுவத்தின் பொறியியல் பிரிவினர் வரவழைக்கப்பட்டனர்.

பெய்லி பாலத்திற்கு தேவையான உபகரணங்கள் டெல்லியில் இருந்து விமானம் மூலம் கண்ணூர் விமான நிலையத்திற்கு கொண்டு வரப்பட்டது. அங்கிருந்து ராணுவ வாகனங்கள் மூலம் சூரல்மலை பகுதிக்கு கொண்டு செல்லப்பட்டது. பின்னர் இரவு, பகலாக மழையை பொருட்படுத்தாமல் ஆற்றுக்குள் இறங்கி தற்காலிக இரும்பு பாலத்தை அமைக்கும் பணியில் ராணுவத்தினர் ஈடுபட்டனர்.

ராணுவத்தின் முயற்சிக்கு பலன் கிடைத்தது. நேற்று மாலை 5.50 மணிக்கு தற்காலிக பெய்லி பாலம் அமைக்கும் பணி நிறைவடைந்தது. இதையடுத்து பெய்லி பாலத்தில் முதல் வாகனமாக ராணுவ மேஜர் ஜெனரல் மேத்யூஸ் தனது வாகனத்தில் சென்றார். தொடர்ந்து ராணுவ வாகனம், பொக்லைன் எந்திரங்கள் பாலத்தில் சென்றன.

20 மணி நேரத்திற்குள் தற்காலிக பாலத்தை ராணுவத்தினர் வெற்றிகரமாக அமைத்து உள்ளனர். இதன் நீளம் 190 அடியாகும். இந்த பாலம் 24 டன் வரை எடையை தாங்கும் வகையில் அமைக்கப்பட்டது. இதன் மூலம் சூரல்மலை-முண்டகை இடையே மீட்பு பணிக்காக வாகனங்கள் சென்று வருகின்றன.

வயநாடு:

கேரள மாநிலம் வயநாடு மாவட்டத்தில் முண்டகை, சூரல்மலை, மேப்பாடி ஆகிய கிராமங்களில் கடந்த 30-ம் தேதி அடுத்தடுத்து நிலச்சரிவு ஏற்பட்டது. அத்துடன் காட்டாற்று வெள்ளமும் கரைபுரண்டு ஓடியது. இந்த காட்டாற்று வெள்ளம் வனப்பகுதியையும் விட்டு வைக்கவில்லை. அங்கு காட்டுயானைகள், மான்கள் உள்ளிட்ட வனவிலங்குகளும் அடித்து செல்லப்பட்டன. அவை அருகில் உள்ள சாலியாற்றில் தத்தளித்து சென்றதை உள்ளூர்வாசிகள் பார்த்து உள்ளனர். குறிப்பாக போத்துக்கல் பகுதியில் உள்ள சாலியாற்றில் மான்கள் கூட்டம் அடித்து செல்லப்பட்டது.

மேலும் நிலச்சரிவு ஏற்பட்ட பகுதிகளில் ஆங்காங்கே மான்கள் செத்து கிடந்தன. அத்துடன் நிலம்பூர் பகுதியில் 3 காட்டுயானைகள் சாலியாற்றில் தத்தளித்து சென்றன.அதில் ஒரு யானை பாறை மீது ஏறி நின்றது. மீதமுள்ள 2 யானைகள் நீந்தி சென்று கரையேறின. இதனால் அவை உயிர் தப்பின.

இது தவிர திருச்சூர் மாவட்டம் அதிரப்பள்ளி அருகே காலடி தோட்ட பகுதியில் உள்ள சாலக்குடி ஆற்றில் காட்டுயானை ஒன்று செத்து ஒதுங்கி இருப்பதாக வனத்துறையினருக்கு தகவல் கிடைத்தது. அதன் பேரில் வனச்சரகர் மேத்யூ தலைமையிலான வனத்துறையினர் விரைந்து சென்று பார்வையிட்டனர். அப்போது வாழைச்சால் பகுதியில் இரும்பு பாலத்தின் அடியில் காட்டுயானையின் உடல் ஒதுங்கி கிடப்பது தெரியவந்தது.

இதுகுறித்து வனத்துறையினர் கூறும்போது, தொடர் மழையால் ஆற்றில் தண்ணீர் வரத்து அதிகமாக உள்ளது. ஆற்றை கடக்க முயன்ற போதோ அல்லது வெள்ளத்தில் அடித்து வரப்பட்டோ காட்டுயானை இறந்து இருக்கலாம். இறந்த யானைக்கு 15 வயது இருக்கும் என்றனர்.

வயநாடு:

வயநாடு நிலச்சரிவு ஏராளமானோரின் உயிரை பலிவாங்கியதோடு மட்டுமல்லாமல், பலரது வாழ்க்கையையும் கேள்விக்குறியாக்கியுள்ளது. இதில் மணப்பெண்ணின் சோகம் சொல்லி மாளாது. அது பற்றிய விவரம் வருமாறு:-

மேப்பாடியை சேர்ந்தவர் சிவண்ணன். இவருடைய மனைவி சபிதா. இவர்களுக்கு சுருதி, ஸ்ரேயா என 2 மகள்கள். சுருதி கோழிக்கோட்டில் உள்ள தனியார் ஆஸ்பத்திரியில் பணிபுரிந்து வருகிறார். ஸ்ரேயா கட்டப்பனாவில் உள்ள அரசு கல்லூரியில் பட்டப்படிப்பு படித்து வந்தார். மேப்பாடியில் ஏற்பட்ட நிலச்சரிவில் சிக்கி சிவண்ணன், சபிதா, ஸ்ரேயா ஆகிய 3 பேரும் உயிரிழந்தனர். சுருதி தனது உறவினர் வீட்டில் தங்கி இருந்ததால் உயிர் தப்பினார். இதனால் அவர் குடும்பத்தை இழந்து தவித்து வருகிறார்.

இதுகுறித்து சுருதி கண்ணீர் மல்க கூறும்போது, எனக்கு டிசம்பரில் திருமணம் நடத்த பெற்றோர் திட்டமிட்டு இருந்தனர். இதற்காக ரூ.4½ லட்சம், 15 பவுன் நகைகளை பெற்றோர் சேமித்து வைத்திருந்தனர். இவை அனைத்தும் நிலச்சரிவு மற்றும் வெள்ளத்தில் அடித்து செல்லப்பட்டன. கடந்த 6 வாரங்களுக்கு முன்பு நாங்கள் புதிய வீட்டில் குடியேறினோம். நிலச்சரிவால் அந்த வீடு இடிந்து விழும் நிலையில் உள்ளது. பெற்றோர், தங்கை இறந்து விட்டதால் எனது வாழ்க்கையே இருண்டு விட்டது என்றார்.

மற்றொரு சம்பவம்...

இதேபோல் சூரல்மலையை சேர்ந்தவர் சுஜாதா. இவருடைய மகன் ஜிகிஷ். மருமகள் சுஜிதா. பேரன் சூரஜ், பேத்தி மிருதுளா. இவர்கள் 5 பேரும் வீட்டுக்குள் இருந்தபோது, 30-ம் தேதி அதிகாலை வீட்டு முன்பு வெள்ளம் பெருக்கெடுத்து ஓடியது. நிலைமையை உணர்ந்த ஜிகிஷ் தனது குடும்பத்தினரை ஒவ்வொருவராக வீட்டில் இருந்து கயிறு கட்டி வெள்ளத்தை கடந்து சென்றார்.

அப்போது மரம் விழுந்ததில் ஜிகிஷ், சுஜிதா, சூரஜ் ஆகிய 3 பேருக்கும் காயம் ஏற்பட்டது. இருப்பினும், ஜிகிஷ் மன உறுதியுடன் தனது குடும்பத்தினரை டார்ச் லைட் வெளிச்சத்தில் மேடான பகுதிக்கு அழைத்து சென்று கொண்டிருந்தார்.

அவர்கள் சென்ற வழியில், எதிரே சற்று தூரத்தில் காட்டு யானைகள் நின்று கொண்டு இருந்தன. இதை பார்த்த ஜிகிஷ் தனது குடும்பத்தினரை அமைதியாக இருக்கும்படி கூறினார். ஒரு புறம் யானைக்கூட்டம், மறுபுறம் காட்டாற்று வெள்ளம். எங்கு சென்றாலும் ஆபத்து காத்திருந்த சூழ்நிலையில், அவர்கள் 5 பேரும் மெதுவாக நகர்ந்து சென்று அங்குள்ள காபி தோட்டத்தில் தஞ்சம் அடைந்தனர். 2 மணி நேரத்துக்கு பின்னர் காட்டு யானைகள் அங்கிருந்து சென்றன.

இதனால் வெள்ளம் மற்றும் காட்டு யானைகளிடம் இருந்து அந்த குடும்பம் உயிர் தப்பியது குறிப்பிடத்தக்கது.

கேரள மாநிலம் வயநாட்டில் கடந்த 29-ந்தேதி கனமழை பெய்தது. மேக வெடிப்பு காரணமாகக் கனமழை கொட்டித் தீர்த்ததால் வயநாடு மாவட்டத்தின் பல பகுதிகளில் நிலச்சரிவு ஏற்பட்டது. முண்டகை, சூரல்மலை, மேப்பாடி ஆகிய மலைக்கிராமங்கள் இதில் பெரிதும் பாதிக்கப்பட்டன. இந்த நிலச்சரிவில் சிக்கி 270-க்கும் மேற்பட்டோர் உயிரிழந்தனர்.

தேசிய பேரிடர் மீட்புப்படை,தீயணைப்புப் படை வனத்துறை, காவல்துறை, தன்னார்வலர்கள் என அனைவரும் ஒருங்கிணைந்து மீட்புப் பணியில் அயராது ஈடுபட்டு வருகின்றனர். தோண்டத் தோண்ட சடலங்கள் வந்த வண்ணம் உள்ள நிலையில் பலி எண்ணிக்கை மேலும் அதிகரிக்கும் என்று அஞ்சப்படுகிறது. அரபிக் கடல் சூடேற்றம் என பல்வேறு காரணிகள் இந்த கனமழை மற்றும் அதனைதொடர்ந்த நிலச்சரிவுக்கான காரணமாக சூழலியல் ஆய்வாளர்கள் முன்வைக்கின்றனர்.

நிலச்சரிவில் மக்கள் சிக்கித் தவிக்கும் காட்சிகள் அடுத்தடுத்து வெளியாகி மனதை ரணமாக்கி வரும் நிலையில் இந்திய விண்வெளி ஆராய்ச்சிக் கழகமான இஸ்ரோ, வயநாடு பகுதிகளில் முந்தைய காலங்களில் ஏற்பட்ட  நிலச்சரிவுகளையும் தற்போதய நில்சசரிவையும் ஒப்பிடும்  சாட்டிலைட் புகைப்படங்களை வெளியிட்டுள்ளது.

இஸ்ரோ தகவலின்படி, மண் சரிவு ஆரம்பப் புள்ளியில் இருந்து 8 கிலோ மீட்டர் பயணித்து முடிந்திருக்கிறது என்றும் ஒட்டுமொத்தமாக 86,000 சதுர அடி பாதிக்கப்பட்டுள்ளது.

இந்த பாதிப்புகளை இஸ்ரோவின் ஐதராபாத் தளமான நேஷனல் ரிமோட் சென்சிங் சென்டர்(NRSC) தளத்தில் இருந்து நவீன கார்டோசாட்-3 ஆப்டிகல் சாட்டிலைட் மற்றும் மேகங்களின் ஊடாக தெளிவாக பார்க்கக்கூடிய RISAT சாட்டிலைட்களை வயநாட்டில் நிலச்சரிவு ஏற்பட்ட பகுதிகளுக்கு கடந்த ஜூலை 31 ஆம் தேதி அனுப்பி, அங்கு எடுத்த படங்களை தற்போது வெளியிட்டுள்ளது. மேலும் NRSC அறிக்கைபடி, சூரல்மலை பகுதிகளில் பெய்த அதீத மழையே அதிகப்படியான நிலச்சரிவுக்கு காரணமாக அமைந்துள்ளதாக தெரிகிறது.   

திருவனந்தபுரம்:

கேரள மாநிலம் வயநாட்டில் நிலச்சரிவால் பாதிக்கப்பட்டுள்ள பகுதிகளை மக்களவை எதிர்க்கட்சித் தலைவர் ராகுல் காந்தி, காங்கிரஸ் கட்சியின் பொதுச் செயலாளர் பிரியங்கா வதேரா ஆகியோர் இன்று பார்வையிட்டனர்.

அதன்பின், நிலச்சரிவால் பாதிக்கப்பட்ட மக்களைச் சந்தித்து ராகுல் காந்தி ஆறுதல் கூறினார். அப்போது செய்தியாளர்களைச் சந்தித்த ராகுல் காந்தி பேசியதாவது:

என் தந்தையை இழந்தபோது எவ்வளவு துக்கமடைந்தேனோ அதே துக்கத்தில்தான் இப்போது இருக்கிறேன்.

இந்த துயரமான நேரத்தில் மக்களுடன் இருப்பது மிகவும் அவசியம்.

பாதிக்கப்பட்ட மக்களுக்கு தேவையான உதவிகள் வந்து சேருவதை உறுதி செய்ய வேண்டும்.

வயநாடு நிலச்சரிவு சம்பவத்தை வைத்து அரசியல் செய்ய விரும்பவில்லை.

ஒட்டுமொத்த மக்களும் வயநாடு மக்களுக்கு உதவ வேண்டும். இது தேசிய பேரிடர்தான்.

மக்களுக்கு பல்வேறு உதவிகள் தேவைப்படுகிறது. வயநாடு மக்களுக்கு உதவ நான் கடமைப்பட்டுள்ளேன்.

வயநாட்டில் மீண்டும் மீண்டும் நிலச்சரிவுகள் மற்றும் இயற்கை சீற்றங்கள் ஏற்படுவது மிகவும் கவலை அளிக்கிறது.

இதற்கு விரைவில் ஒரு விரிவான செயல் திட்டத்தை உருவாக்க வேண்டும் என தெரிவித்தார்.

கேரள மாநிலம் வயநாட்டில் 29-ந்தேதி கனமழை பெய்தது. மேக வெடிப்பு காரணமாக கனமழை கொட்டித் தீர்த்ததால் நிலச்சரிவு ஏற்பட்டது. முண்டகை, சூரல்மலை, மேப்பாடி ஆகிய மலைக்கிராமங்கள் இதில் பெரிதும் பாதிக்கப்பட்டன. இந்த நிலச்சரிவில் சிக்கி 270-க்கும் மேற்பட்டோர் உயிரிழந்தனர். மீட்புப்பணி இன்னும் துரிதமாக நடைபெற்று வருகிறது. இதனால் பலி எண்ணிக்கை இன்னும் அதிகரிக்கும் என எதிர்பார்க்கப்படுகிறது.

இந்த நிலையில் கேரள மாநில ஆளுநர் ஆரிஃப் முகமது கான், நிலச்சரிவு மீட்புப்பணி, பாதிக்கப்பட்ட கிராமங்கள் குறித்து கூறியதாவது:-

உயிரிழந்தவர்களின் பெரும்பாலான உடல்கள் கிராமத்தில் இருந்து மீட்கப்பட்டுள்ளன. கிராமங்கள் மிகப்பெரிய அளவில் பாதிக்கப்பட்டதற்கு காரணம் சாலியார் ஆறுதான். இந்த ஆறு நிலச்சரிவு காரணமாக தனது போக்கை மாற்றியது. இதனால் கிராமத்திற்குள் வெள்ளம் புகுந்து சூறையாடிவிட்டன. இருந்தபோதிலும் நிலச்சரிவால் நாசமான முதல் கிராமத்தை இன்னும் நாங்கள் சென்றடையவில்லை.

ஏனென்றால் நிலச்சரிவால் பாலம் அடித்துச் செல்லப்பட்டது. ராணுவ பொறியாளர்கள் குழு பெய்லி பிரிட்ஜ் (குறுகிய பாலம்) கட்டிக்கொண்டு வருகிறார்கள். இன்னும் சில மணி நேரங்களில் இந்த பாலம் கட்டும் பணி முடிவடையும். பாலம் கட்டப்படும் வரை சேத அளவை சரியாக மதிப்பிட முடியாது. ஏனென்றால், நிலச்சரிவால் பாதிக்கப்பட்ட முதல் இடத்தை நாங்கள் இன்னும் சென்றடையவில்லை.

முதலில் பாதிக்கப்பட்ட கிராமம் ரிமோட் (நகரத்தில் இருந்து மிகத் தொலையில் எளிதாக தொடர்பு கொள்ள முடியாத தூரத்தில்) கிராமம் கிடையாது. அது மலைப்பகுதி. இருந்தபோதிலும் ரிமோட் கிடையாது. நகரப் பகுதியின் ஒருபகுதி. 100 வருட பழமையாக குடியிருப்புகள் கொண்டது.

தற்போது மீட்புப்பணி மற்றும் நிவாரணம் முழுவீச்சில் நடைபெற்று வருகின்றன. முகாம்கள் அமைக்கப்பட்டுள்ளன. எல்லோரும் அங்கே அழைத்துச் செல்லப்படுகிறார்கள். ஆறு தன்னுடைய போக்கை மாற்றியுள்ளது. மீண்டும் பழைய இடத்திற்கு போக்கை மாற்றலாம். அதனால் பாதிக்கப்பட்டவர்கள் மட்டுமல்ல. ஆற்றங்கரையோரம் உள்ளவர்களும் முகாமுக்கு அழைத்துச் செல்லப்பட்டுள்ளனர்.

இவ்வாறு தெரிவித்தார்.

மேலும், அமித் ஷா ஏற்கனவே நிலச்சரிவு ஏற்பட வாய்ப்புள்ளதாக எச்சரிக்கை விடுத்ததாக தெரிவித்துள்ளார். ஆனால், கேரள மாநில முதல்வர் பினராயி விஜயன், 30-ந்தேதி காலையில்தான் எச்சரிக்கை விடுக்கப்பட்டது எனத் தெரிவித்துள்ளார். இந்த விசயத்தில் ஒருவர் மீது ஒருவர் பழி சுமத்துபோல் தெரிகிறதே? என்ற கேள்விக்கு "இந்த விஷயங்களைக் கணக்கிடுவதற்கு நேற்று நேரம் இல்லை. எனவே அந்தப் பிரச்சினைக்குள் நான் செல்லக்கூடிய நிலையில் இல்லை. நோயாளிகள், அவர்களது உறவினர்களை சந்திக்க, மக்களின் துக்கத்தை பகிர்ந்து கொள்ள வேண்டிய நேரம் இது..

உள்துறை மந்திரி அமித் ஷா எச்சரிக்கை விடுக்கப்பட்டதாக சொல்லிக்கொண்டிருக்கிறார். அதில் சந்தேகம் அடைய எனக்கு எந்த காரணமும் இல்லை" என்றார்.

கேரள மாநிலம் வயநாடு மாவட்டத்தில் கடந்த 29-ம் தேதி இரவில் கனமழை கொட்டியது.

அதனால் வயநாட்டில் உள்ள முண்டகை, சூரல்மலை, மேப்பாடி ஆகிய மலைக்கிராமங்களில் அடுத்தடுத்து பயங்கர நிலச்சரிவு ஏற்பட்டது. அத்துடன் காட்டாற்று வெள்ளம் கரைபுரண்டு ஓடியது. இந்த வெள்ளத்தில் சாலைகள், பாலங்கள், வீடுகள், தங்கும் விடுதிகள், கடைகள், வாகனங்கள் என அனைத்தும் அடித்து செல்லப்பட்டன.

அதிகாலை நேரம் என்பதால் அங்கு வசித்து வந்தவர்கள் அயர்ந்து தூங்கி கொண்டு இருந்தனர். அவர்கள் நடக்க போகும் விபரீதத்தை உணராத நிலையில், காட்டாற்று வெள்ளத்தில் அடித்து செல்லப்பட்டனர். பலர், மண்ணோடு மண்ணாக புதைந்தும் போயினர்.

இதுவரை நிலச்சரிவில் சிக்கி 280-க்கும் மேற்பட்டோர் உயிரிழந்துள்ளனர். இன்று 3-வது நாளாக மீட்பு பணி நடைபெற்று வருகிறது. இடையிடையே பெய்து வரும் மழையையும் பொருட்படுத்தாமல் மீட்பு பணி நடைபெற்று வருகிறது.

இந்நிலையில் வயநாட்டில் கரைபுரண்டு ஓடும் வெள்ளத்திற்கு நடுவே, தண்ணீரில் மூழ்கிய பாலத்தில் நிறைமாத கர்ப்பிணியான தனது மனைவியை கணவர் துணிச்சலாக காரில் ஏற்றி மருத்துவமனைக்கு அழைத்து செல்லும் பதைபதைக்க வைக்கும் வீடியோ காட்சிகள் தற்போது வெளியாகி பெரும் பரபரப்பை ஏற்படுத்தி உள்ளன.

கேரள மாநிலம் வயநாட்டில் ஏற்பட்ட நிலச்சரிவு நாடு முழுவதும் கவலையை ஏற்படுத்தி உள்ளது. அங்கு தோண்ட தோண்ட மனித உடல்கள் கிடைத்து வருகின்றன. கேரள மாநிலத்தில் ஏற்பட்ட மிகப்பெரிய பேரழிவாக தற்போதயை நிலச்சரிவு மாறி வருகிறது.

நிலச்சரிவால் கடுமையாக பாதிக்கப்பட்ட வயநாடு பகுதியைச் சேர்ந்த மக்களுக்கு உதவும் வகையில் நிவாரண நிதி வழங்குமாறு கேரள மாநில முதல்வர் பினராய் விஜயன் கேட்டுக் கொண்டுள்ளார்.

மேலும் அம்மாநில கவர்னர் ஆரிப் முகம்மதுகானும் அனைத்து மாநில மக்களும் இணைந்து நிலச்சரிவால் பாதிக்கப்பட்ட மக்களுக்கு உதவ வேண்டுமென கேட்டுக் கொண்டுள்ளார்.

நிலச்சரிவால் பாதிக்கப்பட்ட பகுதிகளின் நிலையை உடனடியாக அறிந்து மீட்புப் பணிகளை மேற்கொள்ள வசதியாக மாநில அமைச்சர்கள் பலரை சம்பவ இடத்திற்கு முதலமைச்சர் பினராய் விஜயன் அனுப்பி வைத்துள்ளார்.

மேலும், நிலச்சரிவு பாதிப்பு ஏற்பட்ட பகுதிகளில் மேற்கொள்ள வேண்டிய நடவடிக்கைகள் குறித்து ஆலோசனை நடத்துவதற்காக அமைச்சர்கள் கூட்டத்தையும் நேற்று நடத்தினார்.

அதுமட்டுமின்றி இன்று அனைத்து கட்சி கூட்டத்தையும் நடைபெறுகிறது. அனைத்து கட்சியினரும் அதில் பங்கேற்றுள்ளனர். 

இந்நிலையில் நிலச்சரிவு பாதிப்புகளை நேரில் பார்வையிட்டு ஆய்வு செய்வதற்காக முதலமைச்சர் பினராய் விஜயன் இன்று வயநாட்டிற்கு சென்றார்.

அங்கு நிலச்சரிவு பாதித்த பகுதிகளை பார்வையிட்டார். அங்கு மேற்கொள்ளப்பட்டு வரும் மீட்புப்பணிகள் குறித்து முகாமிட்டுள்ள அமைச்சர்களிடம் கேட்டறிந்தார்.

மேலும், மீட்புப்பணிகளை துரிதப்படுத்தவும், பாதிக்கப்பட்டவர்களுக்கு தேவையான உதவிகளை செய்யவும், அனைத்து துறை அதிகாரிகள் மற்றும் மீட்புப் படையினருக்கு ஆணை பிறப்பித்தார். அது மட்டுமின்றி நிலச்சரிவில் குடும்பத்தினரை இழந்து தவிப்பவர்களையும், காயமடைந்து மருத்துவமனையில் சிகிச்சை பெறுபவர்களையும் நேரில் சந்தித்து ஆறுதல் கூறினார்.

வயநாட்டில் நிலச்சரிவால் ஏற்பட்ட பாதிப்புகளை பார்வையிட்டு பாதித்தவர்களுக்கு ஆறுதல் கூறுவதற்காக மக்களவை எதிர்க்கட்சித் தலைவர் ராகுல்காந்தி எம்.பி., காங்கிரஸ் பொதுச்செயலாளர் பிரியங்கா காந்தி ஆகியோர் நேற்று கேரள வருவதாக இருந்தது.

ஆனால் வயநாட்டில் நிலவிய மோசமான வானிலை காரணமாக அவர்கள் வர முடியாத நிலை ஏற்பட்டது.

இந்நிலையில் அவர்கள் இருவரும் இன்று கேரள வந்தனர். கண்ணூர் விமான நிலையத்திற்கு வந்திறங்கிய அவர்கள், ஒரே காரில் வயநாட்டிற்கு புறப்பட்டுச் சென்றனர்.

அவர்கள் நிலச்சரிவு பாதித்த பகுதிகளை நேரில் சென்று பார்வையிட்டனர். மேலும் நிலச்சரிவால் பாதிக்கப்பட்டு முகாம்களில் தங்க வைக்கப்பட்டுள்ளவர்களுடன் ராகுல் காந்தி நேரில் சந்தித்து ஆறுதல் கூறினர்.