புதுச்சேரி

புதுச்சேரி:

உக்ரைன் மீது ரஷியா போர் தொடுத்து தீவிர தாக்குதல் நடத்தி வருகிறது. போர் நடக்கும் உக்ரைனில் சிக்கியுள்ள புதுவை மாணவ-மாணவிகளை மீட்க புதுவை அரசு தீவிர நடவடிக்கை எடுத்து வருகிறது.

இந்த நிலையில் குருசுக்குப்பம் அம்பேத்கர் தெருவை சேர்ந்த லீலாதரன் என்பவரது மகன் சேஷாதரன் (வயது 25) என்பவர் உக்ரைனில் மருத்துவம் இறுதியாண்டு படித்து வருகிறார். தற்போது உக்ரைனில் சிக்கியுள்ள அவர் ஹங்கேரி பகுதியில் தங்கியுள்ளார்.

அவரது வீட்டிற்கு முன்னாள் முதல்-அமைச்சர் நாராயணசாமி, வைத்திலிங்கம் எம்.பி., வைத்தியநாதன் எம்.எல்.ஏ., காங்கிரஸ் கட்சியின் மாநில தலைவர் ஏ.வி.சுப்பிரமணியன் ஆகியோர் நேற்று இரவு நேரில் சென்று மாணவரின் பெற்றோரை சந்தித்து ஆறுதல் கூறினர். மேலும் மத்திய அரசிடம் பேசி உக்ரைனில் சிக்கியுள்ள புதுவை மாணவர்களை மீட்க நடவடிக்கை எடுப்பதாக உறுதியளித்தனர்.

இது குறித்து முன்னாள் முதல்-அமைச்சர் நாராயணசாமி நிருபர்களிடம் கூறியதாவது:-

மத்திய அரசு தற்போது நடவடிக்கை எடுத்தாலும் உக்ரைன் நாட்டில் இருந்து இந்தியர்கள் வெளியே செல்ல முடியவில்லை. ஹங்கேரி, போலந்து பகுதிக்கு செல்கின்றனர். அங்கிருந்து தான் அவர்கள் மீட்கப்படுகின்றனர். குருசுக்குப்பம் பகுதியை சேர்ந்த மாணவர் சேஷாதரனுடன் 11 புதுவை மாணவர்கள் தங்கியுள்ளனர். புதுவை மாணவர்களை மீட்க நடவடிக்கை எடுக்க வேண்டும் என்று மத்திய வெளியுறவு துறை மந்திரியிடம் வலியுறுத்த உள்ளோம்.

இந்தியாவில் உள்ள மாணவர்களை உடனடியாக மீட்க வேண்டும் என்று பிரதமருக்கும், மத்திய மந்திரிகளுக்கும் மேலும் அழுத்தம் கொடுப்போம்.

இவ்வாறு அவர் கூறினார்.

புதுச்சேரி:

புதுவை மீன்வளத்துறை இயக்குனர் பாலாஜி விடுத்துள்ள செய்திக்குறிப்பில் கூறியிருப்பதாவது:-

தெற்கு வங்கக்கடல் பகுதியில் குறைந்த காற்றழுத்த தாழ்வுபகுதி உருவாகி உள்ளது. இது அடுத்த 24 மணிநேரத்தில் காற்றழுத்த தாழ்வு மண்டலமாக வலுப்பெற்று இலங்கை மற்றும் தமிழக கடற்கரை நோக்கி நகரக்கூடும் என்று வானிலை ஆய்வுமையம் எச்சரித்துள்ளது.

இதனால் புதுச்சேரி, காரைக்கால் மற்றும் தமிழக கடலோர பகுதிகளில் வரும் 3 நாட்களில் இடியுடன் கூடிய பலத்த மழை பெய்யக் கூடும் எனவும் அறிவுறுத்தப்பட்டுள்ளது. எனவே ஆழ்கடலில் மீன்பிடித்து கொண்டிருக்கும் மீன்பிடி படகுகள் உடனடியாக கரை திரும்புமாறு அறிவுறுத்தப்படுகிறது.

இதன்படி இன்று (வெள்ளிக்கிழமை) மத்திய மேற்கு வங்கக்கடல் மற்றும் அதனை ஒட்டிய தென்மேற்கு வங்கக்கடல் பகுதிகள், வடதமிழக மற்றும் தெற்கு ஆந்திரா கடலோர பகுதிகளில் சூறாவளி காற்று மணிக்கு 50 முதல் 60 கிலோ மீட்டர் வேகத்திலும், இடையிடையே மணிக்கு 60 கிலோ மீட்டர் வேகத்திலும் காற்று வீசக்கூடும்.

நாளை (சனிக்கிழமை) மத்திய மேற்கு வங்கக்கடல் மற்றும் அதனை ஒட்டிய தென்மேற்கு வங்கக்கடல் பகுதிகள், வடதமிழகம் மற்றும் தெற்கு ஆந்திரா கடலோர பகுதிகளில் சூறாவளி காற்று மணிக்கு 50 முதல் 60 கிலோமீட்டர் வேத்திலும் இடையிடையே மணிக்கு 70 கி.மீ. வேகத்திலும் வீசக்கூடும். நாளை மறுநாள் (ஞாயிற்றுக்கிழமை) தமிழகம் மற்றும் தெற்கு ஆந்திரா கடலோர பகுதிகளில் பலமான காற்று மணிக்கு 40 முதல் 50 கி.மீ. வேகத்திலும் இடையிடையே மணிக்கு 60 கி.மீ. வேகத்திலும் வீசக்கூடும். எனவே மேற்கண்ட நாட்களில் மீனவர்கள் மீன்பிடிக்க செல்ல வேண்டாம் என்று எச்சரிக்கப்படுகிறது.

இவ்வாறு அதில் கூறப்பட்டுள்ளது.

இதையொட்டி புதுவை துறைமுகம், காரைக்கால் துறைமுகத்தில் நேற்று 1-ம் எண் புயல் எச்சரிக்கை கூண்டுகள் ஏற்றப்பட்டுள்ளன. மீன்வளத்துறையினரும் மீனவர்களை கடலுக்கு செல்ல வேண்டாம் என்று அறிவுறுத்தி உள்ளனர்.

காரைக்கால்:

காரைக்கால் கோவில்பத்து அம்பேத்கர் நகரைச்சேர்ந்தவர் காளிதாஸ் (வயது49). இவர், காரைக்கால் செய்தி மற்றும் விளம்பரத்துறையிலும் பின்னர் காரைக்கால் என்.சி.சி.அலுவலகத்திலும் அரசு ஊழியராக (எம்.டி.எஸ்) பணியாற்றி வந்தார்.

இவருக்கு மது அருந்தும் பழக்கம் இருந்து வந்ததாக கூறப்படுகிறது. கடந்த சில நாட்களாக குடும்ப பிரச்சனை காரணமாக, வேலைக்கு செல்லாமல், அதிகம் மது அருந்தி, உணவு உட்கொள்ளாமல் இருந்து வந்ததாகவும், மனைவி மற்றும் நண்பர்களிடம், தான் தற்கொலை செய்துகொள்ளப்போவதாக புலம்பி வந்ததாக கூறப்படுகிறது.

இந்நிலையில், சம்பவத்தன்று வீட்டு அறையில், யாரும் இல்லாத நேரத்தில், புடவையில் தூக்குப்போட்டு தற்கொலை செய்துகொண்டார். இது குறித்து அவரது மனைவி செந்தாமரை, காரைக்கால் நகர காவல்நிலையத்தில் கொடுத்த புகாரின் பேரில், போலீசார் வழக்கு பதிவு செய்து விசாரித்து வருகின்றனர்.