திருவண்ணாமலை

சேத்துப்பட்டு:

திருவண்ணாமலை மாவட்டம் சேத்துப்பட்டு ஒன்றியம் ஆத்தூரை கிராமத்தை சேர்ந்தவர் முருகன் கூலித்தொழிலாளி. இவரது மனைவி அம்பிகா. மகன் பிரகாஷ்ராஜ் (வயது 22). திருவண்ணாமலையில் நடந்த உறவினர் திருமணத்திற்கு பிரகாஷ், அவருடைய தாய் அம்பிகாவை மோட்டார்சைக்கிளில் அழைத்து சென்றார்.

திரும்பி வரும்போது திருவண்ணாமலையில் வேகத்தடையில் மோட்டார்சைக்கிள் ஏறி இறங்கியபோது பின்னால் இருந்த அம்பிகா கீழே விழுந்து விட்டார். இதில் காயம் அடைந்த அவரை அங்குள்ள அரசு ஆஸ்பத்திரியில் சேர்த்துவிட்டு, பிரகாஷ்ராஜ் ஆத்தூரை கிராமத்துக்கு வந்தார்.

தாய் அம்பிகா கீழேவிழுந்து அடிபட்டுவிட்டதால் மனமுடைந்த அவர் வீட்டில் தனது உடலில் மண்எண்ணெய் ஊற்றி தீ வைத்துக்கொண்டார். இதில் உடல் கருகிய அவரை அக்கம் பக்கத்தில் இருந்தவர்கள் மீட்டு திருவண்ணாமலை அரசு ஆஸ்பத்திரியில் சேர்த்தனர்.

பின்னர் மேல் சிகிச்சைக்காக சென்னைக்கு அனுப்பி வைக்கப்பட்டார். ஆனால் வழியிலேயே அவர் இறந்துவிட்டார். இதுகுறித்து சேத்துப்பட்டு போலீஸ் இன்ஸ்பெக்டர் பிரபாவதி வழக்குப்பதிவு செய்து விசாரணை நடத்தி வருகிறார்.

திருவண்ணாமலை:

திருவண்ணாமலை மாவட்டத்தில் ஆண்டுக்கு ஆண்டு குழந்தைகள் திருமணங்கள் நடைபெறுவது அதிகரித்து வருகிறது. இந்தியாவில் ஆணின் திருமண வயது 21 ஆகவும், பெண்ணுக்கு 18 ஆகவும் நிர்ணயம் செய்யப்பட்டுள்ளது. ஆனால் பெற்றோரின் அவசரத்தாலும், பல்வேறு காரணங்களாலும் 18 வயது நிரம்பாத சிறுமிகளுக்கு திருமணம் செய்து வைக்கும் பழக்கம் நடைமுறையில் உள்ளது. குழந்தை திருமணம் சமூகத்தின் அவலம் என்று தெரிந்தும், சிலர் இச்செயலில் ஈடுபட்டு வருகின்றனர்.

இம்முறை திருமணத்தினால் ஒரு குழந்தையே குழந்தையை பெற்று எடுப்பதால் 23 சதவீதத்துக்கும் அதிகமாக குழந்தைகளுக்கு ஊட்டச்சத்து குறைபாடு மற்றும் நோயால் பாதிக்கப்படுகிறது என்று மருத்துவ வல்லுனர்கள் தெரிவிக்கின்றனர். கடந்த 2020-ம் ஆண்டில் திருவண்ணாமலை மாவட்டத்தில் 239 குழந்தை திருமணங்கள் தடுத்து நிறுத்தப்பட்டு உள்ளது.

அதுமட்டுமின்றி கடந்த ஜனவரி மாதம் முதல் நேற்று வரை என 6 மாதங்களில் 115 குழந்தை திருமணங்கள் தடுத்து நிறுத்தப்பட்டு உள்ளது. அதாவது ஜனவரி மாதத்தில் 30-ம், பிப்ரவரி மாதத்தில் 20-ம், மார்ச் மாதத்தில் 15-ம், ஏப்ரல் மாதத்தில் 27-ம், மே மாதத்தில் 19-ம், ஜூன் மாதத்தில் நேற்று வரை என 4 குழந்தைகள் திருமணம் தடுக்கப்பட்டு உள்ளது.

இந்த குழந்தை திருமணம் தடுக்கும் பணியில் சமூக நலத்துறையினர், சைல்டு லைன் அலுவலர்கள் மற்றும் போலீசார் ஈடுபட்டு வருகின்றனர். தடுத்து நிறுத்தப்பட்ட திருமணங்களில் இருந்து பாதிக்கப்பட்ட பெரும்பாலான சிறுமிகள் பாதுகாப்பு இல்லத்தில் ஒப்படைக்கப்பட்டு உள்ளனர்.

மேலும் சிலரின் பெற்றோரிடம் பத்திரத்தில் எழுதி வாங்கி கொண்டு தொடர்ந்து அதிகாரிகள் கண்காணித்து வருகின்றனர். அதிகாரிகளுக்கு தெரிந்தே 115 திருமணங்கள் தடுக்கப்பட்டு உள்ள நிலையில் தெரியாமல் எத்தனை திருமணங்கள் நடந்தது என்று தெரியவில்லை.

திருவண்ணாமலை மாவட்டத்தில் நடைபெறும் குழந்தை திருமணங்களை தடுக்க மாவட்ட நிர்வாகத்தின் சார்பில் பல்வேறு விழிப்புணர்வு நடவடிக்கை எடுக்கப்பட்டு வருகின்றது. இருப்பினும் குழந்தை திருமணம் குறையவில்லை. எனவே இதுகுறித்து மாவட்ட நிர்வாகம் கிராமம் வாரியாக கூடுதல் விழிப்புணர்வு ஏற்படுத்த வேண்டும் என சமூக ஆர்வலர்கள் கோரிக்கை விடுத்துள்ளனர்.

வெம்பாக்கம்:

தூசி கிராமத்தில் உள்ள வள்ளுவர் தெருவை சேர்ந்தவர் சங்கரலிங்கம் (வயது 54). இவர் மருத்துவம் படிக்காமல் பொது மக்களுக்கு ஆங்கில மருத்துவ முறையில் சிகிச்சை அளிப்பதாக அதிகாரிகளுக்கு புகார்கள் சென்றன.

இது குறித்து வெம்பாக்கம் அரசு மருத்துவமனை டாக்டர் பாண்டியன் தூசி போலீசில் புகார் செய்தார். அதன் பேரில்  போலீசார் சம்பவ இடத்துக்கு சென்று விசாரணை நடத்தினர். அப்போது சங்கரலிங்கம், டிப்ளமோ பாரா மெடிக்கல் படித்து பொதுமக்களுக்கு சிகிச்சை அளித்தது தெரியவந்தது. இதனையடுத்து போலீசார் போலி டாக்டர் சங்கரலிங்கத்தை கைது செய்தனர்.

மேலும் அவரிடம் போலீசார் தீவிர விசாரணை நடத்தி வருகின்றனர்.

வெம்பாக்கம்:

திருவண்ணாமலை மாவட்டம் வெண்பாக்கம் தாலுகா தூசி அருகே உள்ள வடக்கல்பாக்கம் கிராமத்தை சேர்ந்தவர் பாபு கூலி தொழிலாளி.

இவருக்கும் செய்யார் தாலுகா கீழ்ப்பந்தை கிராமத்தைச் சேர்ந்த தனலட்சுமி என்பவருக்கும் கடந்த 21.6.2021 அன்று வடக்கல்பாக்கம் கிராமத்தில் உள்ள கோவிலில் திருமணம் நடந்தது. அதன்பின் தனது மனைவி தனலட்சுமி மாயமாகிவிட்டார் என்று தூசி போலீஸ் நிலையத்தில் பாபு புகார் கொடுத்தார்.

புகார் மீது தூசி போலீஸ் இன்ஸ்பெக்டர் அண்ணாதுரை சப்-இன்ஸ்பெக்டர் சிலம்பரசன் ஆகியோர் வழக்கு பதிவு செய்து மாயமான தனலட்சுமியை தேடி வருகின்றனர். மேலும் திருமணமான 6 நாளில் புதுப்பெண் மாயமாகி விட்டதால் அக்கிராமத்தில் பரபரப்பாக உள்ளது.

செங்கம்:

செங்கம் அருகே உள்ள பக்கரிபாளையம் பகுதியில் கஞ்சா விற்பனை நடப்பதாக போலீஸ் சூப்பிரண்டு பவன்குமார்ரெட்டிக்கு ரகசிய தகவல் கிடைத்தது.

போலீஸ் சூப்பிரண்டு உத்தரவின் பேரில் தனிப்பிரிவு போலீசார் பக்கிரிபாளையம் பகுதியில் கஞ்சா விற்பனையில் ஈடுபட்டிருந்த நேரு (வயது19) என்ற வாலிபரை கைது செய்தனர். அவரிடம் இருந்த கஞ்சா பாக்கெட்களை பறிமுதல் செய்து விசாரணை நடத்தி வருகின்றனர்.

ஆரணி:

ஆரணி கொசப்பாளையம் தாண்டவராயன் தெருவைச் சேர்ந்த ரவிசங்கரின் மகன் மோகன்ராஜ் (வயது 29). இவரின் பெற்றோர் ஏற்கனவே உயிரிழந்து விட்டனர். மோகன்ராஜ் செய்யாறு சிப்காட் பகுதியில் உள்ள ஒரு நிறுவனத்தில் ஊழியராக வேலை பார்த்து வந்தார். அவருக்கு இன்னும் திருமணம் ஆகவில்லை.

அவர், தற்போது சின்னபட்டுநூல்காரர் தெருவில் வாடகை வீட்டில் தனியாக வசித்து வந்தார். திருமணமாகாத ஏக்கம் மற்றும் பெற்றோர் இல்லாத வருத்தம் போன்ற காரணங்களால் மனமுடைந்து காணப்பட்ட அவர் நேற்று காலை வீட்டின் மின்விசிறியில் சேலையால் தூக்குப்போட்டு தற்கொலை செய்து கொண்டார்.

இதுகுறித்து ஆரணி டவுன் போலீஸ் சப்-இன்ஸ்பெக்டர் ரகு மற்றும் போலீசார் வழக்குப்பதிவு செய்து விசாரணை நடத்தி வருகின்றனர்.

திருவண்ணாமலை:

திருவண்ணாமலை மாவட்டத்தில் தற்போது கொரோனா தொற்று குறைந்து வருகிறது. மாவட்டத்தில் நேற்று முன்தினம் 145 கொரோனாவால் பாதிக்கப்பட்டிருந்த நிலையில் நேற்று மேலும் 137 பேருக்கு தொற்று உறுதி ஆனது. இதனால் தொற்று பாதித்தவர்களின் எண்ணிக்கை 49 ஆயிரத்து 13 ஆக உயர்ந்துள்ளது. இதில், 47 ஆயிரத்து 386 பேர் சிகிச்சை பெற்று குணமடைந்து உள்ளனர். தற்போது ஆயிரத்து 35 பேர் மருத்துவமனையில் சிகிச்சை பெற்று வருகின்றனர்.

மேலும் நேற்று கொரோனாவுக்கு ஒருவர் உயிரிழந்தார். இதுவரை மாவட்டம் முழுவதும் 592 பேர் தொற்றால் பாதிக்கப்பட்டு உயிரிழந்து உள்ளனர் என்று சுகாதாரத்துறை அதிகாரிகள் தெரிவித்தனர்.