சிவகங்கை

சிவகங்கை:

10-ம் வகுப்பு பொதுத்தேர்வு முடிவுகள் நேற்று வெளியாகின. சிவகங்கை மாவட்டத்தில் சிவகங்கை, தேவகோட்டை மற்றும் திருப்பத்தூர் ஆகிய 3 கல்வி மாவட்டங்கள் உள்ளன. இந்த 3 கல்வி மாவட்டங்களில் 284 பள்ளிகள் உள்ளன.

இந்த பள்ளிகளில் 10-ம் வகுப்பில் படித்த 9,117 மாணவர்கள், 9,031 மாணவிகள் என மொத்தம் 18,148 மாணவ- மாணவிகள் அரசு பொதுத்தேர்வு எழுதினர். இவர்கள் அனைவரும் தேர்ச்சி பெற்றுள்ளனர்.

இதன்படி சிவகங்கை மாவட்டத்தில் 10-ம் வகுப்பு பொதுத்தேர்வில் மாணவ- மாணவிகள் 100 சதவீதம் தேர்ச்சி பெற்றுள்ளனர்.

இந்த தகவலை மாவட்ட முதன்மை கல்வி அதிகாரி பாலுமுத்து தெரிவித்துள்ளார்.

சிவகங்கை:

சிவகங்கை மாவட்ட வேலைவாய்ப்பு மற்றும் தொழில்நெறி வழிகாட்டும் மையம் மூலம் ஒவ்வொரு வாரமும் வெள்ளிக்கிழமைதோறும் அலுவலக அளவில் சிறிய அளவிலான வேலைவாய்ப்பு முகாம்களும், 3 மாதத்திற்கு ஒரு முறை மாவட்ட அளவிலான பெரிய வேலைவாய்ப்பு முகாம்களும் நடத்தப்பட்டு இளைஞர்களுக்கு வேலைவாய்ப்பு அளிக்கப்பட்டு வந்தது.

தற்போது கொரோனா வைரஸ் தொற்று காரணமாக முகாம்கள் நடத்த இயலாத நிலை ஏற்பட்டுள்ளது. இருப்பினும் வேலைதேடும் இளைஞர்களுக்கு உதவும் வகையில் தமிழக அரசால் தற்போது இணையதளம் வாயிலாக வேலைவாய்ப்பு முகாம்கள் நடத்தும் வகையில் புதிதாக இணையதளம் ஒன்று தொடங்கப்பட்டு உள்ளது. தனியார் துறையில் வேலைதேடும் இளைஞர்கள் தங்கள் கல்வித்தகுதிக்கு பொருத்தமான வேலையை எளிதில் தேர்வு செய்யும் வகையில் https://www.tnp-r-iv-at-e-j-obs.tn.gov.in என்ற வலைதளத்தை உருவாக்கி உள்ளது.

இந்த வலைதளத்தில் வேலை தேடும் இளைஞர்கள் தங்கள் கல்வித்தகுதி மற்றும் சுயவிவரங்களை பதிவு செய்து தங்களுக்கு பொருத்தமான பணி வாய்ப்பினை பெறலாம். இந்த வலைதளத்தில் மாவட்டம் வாரியாக, கல்வித்தகுதிமற்றும் சம்பளம் வாரியாக மற்றும் தொழில் வாரியாக பணிகளைதேர்வு செய்யும் வசதி உள்ளது. இதற்கு கட்டணம் எதுவும் செலுத்த தேவையில்லை.

மேற்காணும் இணையதளத்தில் தமிழக அளவில் இதுவரை 747 வேலையளிப்பவர்களும், 31,283 வேலைநாடுனர்களும் பதிவுசெய்துள்ளனர்.சிவகங்கை மாவட்டத்தில் 12 வேலையளிப்பவர்களும் 493 வேலைநாடும் இளைஞர்களும் பதிவு செய்துள்ளனர்.

இதுவரை பதிவு செய்யாதவர்கள் இந்த வாய்ப்பினை பயன்படுத்தி தங்களின் விவரங்களை மேற்காணும் இணையதளத்தில் பதிவுசெய்து பயன்பெறலாம்.

இவ்வாறு அதில் கூறப்பட்டு உள்ளது.

தேவகோட்டை:

சிவகங்கை மாவட்டம் தேவகோட்டையை அடுத்த திருவேகம்பத்து பகுதியில் திராணி என்ற கிராமத்தை சேர்ந்தவர், சுப்பிரமணி. அவருடைய மகன் சக்திவேல் (வயது 24). பி.பி.ஏ. பட்டதாரி. வெளிநாட்டில் வேலைக்கு செல்ல ஏற்பாடு செய்து வந்தார்.

அதே கிராமத்தை சேர்ந்தவர் கண்ணன். இவருடைய மகன் மணிவேல் (25). இவர் குடிபோதையில் தகராறு செய்து வந்துள்ளார். நேற்று முன்தினம் நள்ளிரவிலும் வீட்டில் தகராறு செய்துள்ளார்.

அப்போது பக்கத்து வீட்டில் வசிக்கும் சக்திவேல் மொட்டை மாடியில் நின்று சண்டையை வேடிக்கை பார்த்துக்கொண்டிருந்தாராம். இதனால் ஆத்திரமடைந்த மணிவேல், கத்தியை எடுத்துச் சென்று சக்திவேலை சரமாரியாக குத்திவிட்டு தப்பி ஓடியதாக தெரியவருகிறது. சக்திவேல் அலறல் கேட்டு அக்கம்பக்கத்தினர் ஓடிவந்தனர். அதற்குள் ரத்தவெள்ளத்தில் சக்திவேல் அங்கு பிணமாக கிடந்தார். அவரது உடலை பார்த்து குடும்பத்தினர் கதறியது பெரும் சோகத்தை ஏற்படுத்தியது.

இதுகுறித்து தகவல் அறிந்த திருவேகம்பத்து போலீசார் சம்பவ இடத்தை பார்வையிட்டனர். சக்திவேலின் உடலை கைப்பற்றி பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர். மேலும் இதுதொடர்பாக போலீசார் வழக்குப்பதிவு செய்து அங்குள்ள காட்டுப்பகுதியில் நின்றிருந்த மணிவேலை கைது செய்தனர்.

இதுபற்றி போலீஸ் விசாரணையில், சக்திவேலுக்கும் மணிவேலுக்கும் சிறுவயதில் இருந்தே பிடிக்காதாம். மேலும் மணிவேலுவின் தங்கையை சக்திவேல் காதலித்து வந்துள்ளார். இதனால் அவரை மணிவேல் கண்டித்துள்ளார். இதனாலும் முன்விரோதம் இருந்துள்ளது.

இந்தநிலையில் சம்பவத்தன்று குடும்ப தகராறை வேடிக்கை பார்த்ததால் மணிவேல் ஆத்திரம் அடைந்து, சக்திவேலை கத்தியால் குத்தி கொலை செய்துள்ளதாக தெரியவந்தது என்று போலீசார் தெரிவித்தனர்.

கைதான மணிவேலை தேவகோட்டை கோர்ட்டில் போலீசார் ஆஜர்படுத்தி சிறையில் அடைத்தனர்.

திருப்பத்தூர்:

சிவகங்கை மாவட்டம் திருப்பத்தூர், பிள்ளையார்பட்டி, கம்பனூர், தென்கரை ஆகிய வன பகுதியில் உள்ள ஏராளமான மான்கள் தண்ணீர் தேடி சாலையை கடக்கும்போது விபத்தில் சிக்கியும், நாய்களிடம் கடிபட்டும் இறக்கும் சம்பவம் தொடர்ந்து நடந்து வருகிறது.

இதுதவிர தற்போது காடு மற்றும் விவசாய நிலங்களை அழித்து, அவற்றில் முள்வேலி அமைத்து வீடு கட்டி வருவதால் காட்டில் வாழும் மான்கள், மலைபாம்பு ஆகியவை தொடர்ந்து ஊருக்குள் வருகின்றன. இந்நிலையில் திருப்பத்தூர் அருகே தம்பிபட்டி பகுதியில் புள்ளி மான் ஒன்று தண்ணீர் தேடி ஊருக்குள் வந்தபோது அங்கிருந்த நாய்கள் அதை விரட்டி சென்று கடித்தன. இதில் அந்த புள்ளி மான் இறந்தது.

இதுகுறித்து தகவல் அறிந்த திருப்பத்தூர் வனத்துறையினர் சம்பவ இடத்திற்கு வந்து இறந்த புள்ளி மானை கைப்பற்றி திருப்பத்தூர் கால்நடை மருத்துவர் முன்னிலையில் உடல்கூறு பரிசோதனை செய்து வனச்சரக அலுவலக வன பகுதியில் புதைத்தனர்.