புதுக்கோட்டை

புதுக்கோட்டை:

புதுக்கோட்டை கலெக்டர் அலுவலகம் மற்றும் மத்திய, மாநில அரசு அலுவலகங்களில் பிரதமர் நரேந்திர மோடி புகைப்படத்தை வைக்க வேண்டும் என புதுக்கோட்டை மாவட்ட பா.ஜ.க. தொழில் பிரிவினர் கலெக்டர் அலுவலகத்தில் மனு கொடுத்தனர். இதுகுறித்து உரிய நடவடிக்கை எடுக்காவிட்டால் போராட்டம் நடத்தப்படும் எனவும் அறிவித்திருந்தனர்.

அதனைத்தொடர்ந்து கடந்த சில தினங்களுக்கு முன்பு பிரதமரின் புகைப்படத்துடன் கலெக்டர் அலுவலகம் வந்த பா.ஜ.க.வினரிடம் புதுக்கோட்டை வருவாய் கோட்டாட்சியர் தண்டாயுதபாணி பேச்சுவார்த்தை நடத்தி சமாதானப்படுத்தினார். மேலும், 27-ந் தேதிக்குள் அரசு அலுவலகங்களில் பிரதமரின் புகைப்படம் வைக்க அனுமதிக்கப்படும் என தெரிவித்தார்.

இந்தநிலையில் நேற்று பா.ஜ.க.வின் தொழில் பிரிவு மாவட்ட தலைவர் சீனிவாசன் தலைமையில் நிர்வாகிகள் புதுக்கோட்டை வருவாய் கோட்டாட்சியர் அலுவலகத்திற்கு பிரதமர் மோடியின் புகைப்படத்துடன் நேற்று வந்திருந்தனர். பின்னர் அவர்கள், வருவாய் கோட்டாட்சியரை சந்தித்து தங்களது கோரிக்கை தொடர்பாக கேட்டனர். அதற்கு அவர், பிரதமரின் புகைப்படம் வைப்பது தொடர்பாக அரசின் உயர் அதிகாரிகளுக்கு கடிதம் அனுப்பியிருப்பதாக தெரிவித்தார்.

அந்த கடிதம் இன்று (அதாவது நேற்று) தான் அனுப்பப்பட்டதாகவும், அரசு அலுவலகங்களில் பிரதமரின் புகைப்படத்தை வைக்க கோரியும் கோர்ட்டு அருகே பா.ஜ.க.வினர் மோடி புகைப்படத்துடன் சாலை மறியலில் ஈடுபட்டனர். இதுகுறித்து தகவல் அறிந்த டவுன் போலீஸ் துணை சூப்பிரண்டு செந்தில்குமார், டவுன் இன்ஸ்பெக்டர் செல்வி மற்றும் போலீசார் விரைந்து வந்து, அவர்களிடம் பேச்சுவார்த்தை நடத்தி போராட்டத்தை கைவிட வலியுறுத்தினர்.

ஆனால், போராட்டத்தை கைவிட மறுத்து தொடர்ந்து சாலை மறியலில் ஈடுபட்டதால் பா.ஜ.க.வினரை போலீசார் கைது செய்தனர். மொத்தம் 22 பேர் கைது செய்யப்பட்டு அருகே உள்ள ஆயுதப்படை திருமண மண்டபத்தில் தங்க வைக்கப்பட்டனர். பின்னர் அனைவரும் மாலையில் விடுவிக்கப்பட்டனர். இந்த சாலை மறியலால் அப்பகுதியில் சிறிது நேரம் போக்குவரத்து பாதிக்கப்பட்டது.

அறந்தாங்கி:

புதுக்கோட்டை மாவட்டம், அறந்தாங்கி அருகே நாகுடியில் கல்லணை கால்வாய் கோட்ட செயற்பொறியாளர் அலுவலகம் உள்ளது. இந்த அலுவலகத்தில் உதவி என்ஜினீயராக பணியாற்றி வருபவர் தென்னரசு (வயது 45). இந்தநிலையில், அறந்தாங்கியை சேர்ந்த விவசாயி பிரபாகரன், தனது விவசாய நிலத்தில் ஆழ்துளை கிணறு அமைப்பதற்காக மின்சார வாரிய அலுவலகத்தில் மின் இணைப்பு பெற விண்ணப்பித்திருந்தார். அதற்கு கல்லணை கால்வாய் கோட்ட செயற்பொறியாளர் அலுவலகத்தில் தடையில்லா சான்றிதழ் வாங்கி வரும்படி மின்சார வாரிய அதிகாரிகள் தெரிவித்துள்ளனர். அதைத்தொடர்ந்து பிரபாகரன், அந்த அலுவலகத்தை நாடினார்.

அப்போது அங்கு பணியில் இருந்த உதவி என்ஜினீயர் தென்னரசு, தடையில்லா சான்றிதழ் வழங்க பரிந்துரைக்க ரூ.5 ஆயிரம் லஞ்சம் தருமாறு பிரபாகரனிடம் கேட்டார். லஞ்சம் கொடுக்க விரும்பாத அவர், இதுகுறித்து புதுக்கோட்டை லஞ்ச ஒழிப்பு போலீஸ் நிலையத்தில் புகார் அளித்தார். இதையடுத்து துணை போலீஸ் சூப்பிரண்டு மணிகண்டன் தலைமையில் இன்ஸ்பெக்டர் தமிழரசி மற்றும் போலீசார் நாகுடிக்கு சென்று மறைந்திருந்து கண்காணித்தனர். அப்போது கல்லணை கால்வாய் கோட்ட செயற்பொறியாளர் அலுவலகத்தில் வைத்து என்ஜினீயர் தென்னரசுவிடம், பிரபாகரன் ரூ.5 ஆயிரம் லஞ்ச பணத்தை கொடுத்தபோது, மறைந்திருந்த லஞ்ச ஒழிப்பு போலீசார் விரைந்து சென்று தென்னரசுவை கையும், களவுமாக பிடித்து கைது செய்தனர். அவரிடம் இருந்து லஞ்சமாக வாங்கிய பணம் பறிமுதல் செய்யப்பட்டது. தொடர்ந்து அலுவலகத்தில் வைத்து அவரிடம் விசாரணை நடத்தினர். கைதான அவரை சிறையில் அடைக்க போலீசார் நடவடிக்கை எடுத்தனர். மேலும் உதவி பொறியாளர் தென்னரசு மீது துறைரீதியான நடவடிக்கை எடுக்கப்பட உள்ளதாக கூறப்படுகிறது.

ஆலங்குடி:

புதுக்கோட்டை மாவட்டம் ஆலங்குடி அருகே உள்ளது வன்னியன்விடுதி கிராமம். இந்த ஊரைச்சேர்ந்தவர் ரமேஷ் (வயது 40), விவசாயி. இவரது மனைவி தமிழரசி (34). கர்ப்பிணியான இவர் கடந்த வாரம் ஆலங்குடி அரசு ஆஸ்பத்திரியில் பிரசவத்துக்காக அனுமதிக்கப்பட்டார்.

அரிமளம்:

புதுக்கோட்டை மாவட்டம், அரிமளத்தை அடுத்த கே.புதுப்பட்டி அருகே கீழாநிலைக்கோட்டை ஸ்ரீராம் நகரில் வெடி தொழிற்சாலை உள்ளது. இங்கு கடந்த 2017-ம் ஆண்டு ஜனவரி 1-ந்தேதி, வெடி விபத்து ஏற்பட்டது. இதில் அதன் உரிமையாளர் உள்ளிட்ட 5 பேர் உயிரிழந்தனர். இதனால் அங்கு தொழிற்சாலை நடத்த மாவட்ட நிர்வாகம் தடை விதித்திருந்தது.

எனினும் சிவகாசி உள்ளிட்ட பகுதிகளில் இருந்து வெடி தயாரிப்பதற்கான மூலப்பொருட்களை வாங்கி வந்து, இந்த தொழிற்சாலையில் பதுக்கி வைத்து, அனுமதியின்றி வெடிகள் தயாரித்து விற்பனை செய்யப்பட்டு வந்தது. அதுமட்டுமின்றி இந்த தொழிற்சாலையில் பட்டாசுகளையும் பதுக்கி வைத்து விற்பனை செய்து வந்ததாக கூறப்படுகிறது. மேலும் இங்கு சிறிய ரக பட்டாசுகள், வாணவெடிகள் தயாரிக்கப்பட்டு வந்தது.

இந்நிலையில், நேற்று முன்தினம் இங்கு தயாரிக்கப்பட்ட வெடிகளை அருகில் உள்ள தரை மட்ட கிணற்றில் பதுக்கி வைத்திருந்தனர். இந்த நிலையில் இரவு 11 மணி அளவில் அங்கு வைக்கப்பட்டிருந்த வெடிகள் திடீரென வெடித்தன. அப்போது, அங்கு ஏராளமான வெடிகள் இருந்ததால் ‘டமார்’, ‘டமார்’ என பயங்கர சத்தத்துடன் வெடித்தன. வெடித்த வேகத்தில் தரைமட்ட கிணற்றில் சுற்றி கட்டப்பட்டிருந்த கருங்கற்கள் நீண்ட தூரம் தூக்கி வீசப்பட்டன.

இந்த கற்கள் அருகே உள்ள 15-க்கும் மேற்பட்ட ஓட்டுவீடுகள் மீது விழுந்ததில் ஓடுகள் உடைந்தன. இதனால் 15 வீடுகள் சேதமடைந்தன. மேலும் அரசு சார்பில் அமைக்கப்பட்டுள்ள மண்புழு உரம் தயாரிக்கும் கட்டிடத்தின் ஆஸ்பெட்டாஸ் சீட் முழுமையாக சேதம் அடைந்தது. வெடி, வெடித்தபோது சுமார் 5 கிலோமீட்டர் சுற்றளவிற்கு சத்தம் கேட்டது. இரவு நேரம் என்பதால் பொதுமக்கள் வீட்டிற்குள் இருந்ததால் காயம் இன்றி தப்பினர். இந்த வெடிவிபத்தில் அசம்பாவித சம்பவங்கள் ஏதும் ஏற்படவில்லை.

வெடிகளை பதுக்கி வைத்தது தொடர்பாக கே.புதுப்பட்டி போலீசார் வழக்குப்பதிவு செய்து அந்த பகுதியை சேர்ந்த குணசேகரன் மகன்கள் வீரப்பன் (வயது 30), விஜயகுமார் (25), விக்னேஸ்வரன் (23), அண்ணாமலை (22) ஆகிய 4 பேரை கைது செய்து விசாரணை நடத்தி வருகின்றனர். இந்த சம்பவம் அப்பகுதியில் பரபரப்பை ஏற்படுத்தியது.

கறம்பக்குடி:

புதுக்கோட்டை மாவட்டம், கோட்டப்பட்டி கிராமத்தை சேர்ந்தவர் செல்வம் (வயது 41). இவரது மனைவி சங்கீதா (36). இவர்களுக்கு வேணி (13) என்ற மகளும், யோகேஸ்வரன் (6) என்ற மகனும் உள்ளனர். இவர்கள் குடும்பத்துடன் மகாராஷ்டிர மாநிலம் மும்பையில் தங்கி பெட்டிக்கடை நடத்தி வருகின்றனர்.


இந்நிலையில் செல்வத்தின் மகன் யோகேஸ்வரனுக்கு வருகிற 28-ந் தேதி பிறந்தநாள் வருகிறது. ஆண்டுதோறும் மகனுடன் பிறந்த நாளை கொண்டாடி மகிழ்ந்த பெற்றோர் இந்த ஆண்டு கொரோனா ஊரடங்கால், சேர்ந்து கொண்டாட முடியாத நிலை ஏற்படுமோ என வருந்தினர். இருப்பினும் எப்படியாவது கறம்பக்குடி சென்று மகன் பிறந்த நாளை கொண்டாடுவது என முடிவு செய்தனர். விமான கட்டணம் செலுத்த முடியாத நிலையில், அவர்களுக்கு சொந்தமான ஸ்கூட்டரில் கறம்பக்குடிக்கு செல்வது என முடிவு செய்தனர்.

அதன்படி கடந்த 21-ந் தேதி மும்பையில் இருந்து ஸ்கூட்டரில் புறப்பட்டு 23ந்தேதி இரவு கறம்பக்குடி வந்து சேர்ந்தனர். 7 மாதத்திற்கு மேலாக பெற்றோரை பார்க்காத குழந்தைகள் ஆவலுடன் ஓடிவந்து பெற்றோரை கட்டித்தழுவினர். மகனின் பிறந்தநாளை கொண்டாட 1,400 கிலோ மீட்டருக்கு மேல் ஸ்கூட்டரில் பயணம் செய்து கறம்பக்குடி வந்த தம்பதியை அப்பகுதி கிராம மக்கள் ஆச்சரியத்துடன் பார்த்து பாராட்டு தெரிவித்தனர்.

அன்னவாசல்:

அன்னவாசல் அருகே காலாடிப்பட்டி, வீரப்பட்டி, சென்னப்பநாயக்கன்பட்டி, புதூர், குளவாய்ப்பட்டி, குடுமியான்மலை, முக்கண்ணாமலைப்பட்டி உள்ளிட்ட பகுதிகளில் பல ஏக்கரில் நிலக்கடலை சாகுபடி செய்யப்பட்டுள்ளது. தற்போது, அறுவடை தொடங்கியுள்ளது.

வழக்கமாக, நிலக்கடலையை எண்ணெய் ஆலைக்காக ஏஜென்டுகள், விவசாயிகளை நேரடியாக சந்தித்து கொள்முதல் செய்வர். நடப்பாண்டில் நிலக்கடலை நல்ல விளைச்சல் உள்ளதால், விவசாயிகளே நேரிடையாக பொதுமக்களிடம் நிலக்கடைலையை விற்பனை செய்ய துவங்கியுள்ளனர். அன்னவாசல் சுற்றுவட்டார பகுதிகளில் கிராம சந்தைகள் மற்றும் தெருவோரப் பகுதிகளில், மண் நீக்கப்பட்டு, சுத்தம் செய்யப்பட்ட நிலக்கடலையை விவசாயிகள், வியபாரிகள், சரக்குவாகனம், இருசக்கர வாகனம், தள்ளுவண்டி, சைக்கிள் போன்ற வாகனங்களில் கூவி, கூவி விற்பனை செய்கின்றனர்.

இதுகுறித்து, அன்னவாசல் விவசாயிகள் கூறும்போது, தற்போது, நிலக்கடலை விளைச்சல் அதிகரித்துள்ளது. இதனால், எண்ணெய் ஆலைக்கான ஏஜென்டுகள் நிலக்கடலை கேட்டு அதிகம் வரவில்லை. ஒரு சிலர் வந்தாலும், குறைந்த விலைக்கு கேட்கின்றனர். இதனால், பொதுமக்களிடம் நேரிடையாக சென்று விற்பனை செய்கிறோம். படி ஒன்று ரூ.20-க்கும், 3-படி ரூ.50-க்கும் விற்பனை செய்கின்றோம் என்றார்.