ஈரோடு

ஈரோடு :

தமிழகத்தில் கொரோனா பரவல் மீண்டும் அதிகரிக்க தொடங்கி உள்ளது. மேலும் உருமாறிய ஒமைக்காரன் தொற்றும் சென்னை உள்பட பல்வேறு பகுதிகளில் பரவி உள்ளது. இதனால் தமிழக அரசு பல்வேறு கட்டுப்பாடுகள் விதித்து வருகிறது.

மேலும் இரவு நேர ஊரங்கு மற்றும் ஞாயிற்றுக்கிழமைகளில் முழு ஊரங்கு பிறப்பித்துள்ளது. இந்த நிலையில் சுற்றுலா தலங்களில் ஞாயிற்றுக் கிழமைகளில் அதிகளவு மக்கள் கூடுவார்கள்.

இதை தவிர்க்கும் வகையில் நாளை சுற்றுலா தலங்களுக்கும் பொது மக்கள் செல்ல தடை விதிக்கப்பட்டுள்ளது.

ஈரோடு மாவட்டம் பவானி கூடுதுறைக்கு தினமும் ஏராளமான பொதுமக்கள் வந்து புனித நீராடுவார்கள். மேலும் தங்கள் முன்னோர்களுக்கு திதி மற்றும் பரிகாரங்கள் செய்ய தமிழகம் ழுமுவதும் இருந்து மக்கள் அதிகளவு வருவார்கள்.

இந்த நிலையில் கொரோனா பரவல் காரணமாக நாளை முழு ஊரங்கு அமல்படுத்தப்படுகிறது. இதையொட்டி இன்று (சனிக்கிழமை) மற்றும் நாளை (ஞாயிற்றுக்கிழமை) 2 நாட்களுக்கு பவானி கூடுதுறையில் பக்தர்கள் புனித நீராடவும், பரிகாரம் செய்யவும் தடை விதிக்கப்பட்டுள்ளது.

மேலும் சங்கமேஸ்வரர் கோவிலுக்கு செல்லவும் அனுமதி இல்லை என அதிகாரிகள் தெரிவித்தனர்.

இதையொட்டி கூடுதுறை ஆற்றுக்கு செல்லும் வழி அடைக்கப்பட்டு அறிவிப்பு பலகை வைக்கப்பட்டுள்ளது. மேலும் பொதுமக்கள் செல்லாத வகையில் போலீஸ் பாதுகாப்பு போடப்பட்டு கண்காணிக்கப்பட்டு வருகிறது.

சத்தியமங்கலம் அருகே உள்ள பவானிசாகர் அணை பகுதியில் பொழுது போக்கு பூங்கா அமைக்கப்பட்டுள்ளது. இந்த பூங்காவுகாவுக்கு சனிக்கிழமை மற்றும் ஞாயிற்றுக் கிழமைகளில் சுற்றுலா பயணிகள் ஏராளமானோர் வருவார்கள்.

நாளை முழு ஊரடங்கையொட்டி இன்று (சனிக்கிழமை) முதல் மறு உத்தரவு வரும் வரை பவானிசாகர் பூங்காவுக்கு மக்கள் செல்ல அனுமதி இல்லை என அதிகாரிகள் தெரிவித்துள்ளனர். இதையொட்டி அணை பூங்கா நுழைவு வாயில் அடைக்கப்பட்டு அறிவிப்பு பலகை வைக்கப்பட்டுள்ளது.

இதேபோல் கோபி அடுத்த கொடிவேரி தடுப்பணையில் குளிப்பதற்கும், கண்டு ரசிப்பதற்கும் ஏராளமான பொதுமக்கள் வருவார்கள். மேலும் சனி, ஞாயிறு மற்றும் முக்கிய நாட்களில் அதிகளவில் சுற்றுலா பயணிகள் வருவார்கள். தடுப்பணையில் தண்ணீர் அதிகளவு கொட்டி வந்ததால் தடை விதிக்கப்பட்டு இருந்தது.

இந்த நிலையில் நீண்ட நாட்களுக்கு பிறகு கடந்த சில நாட்களுக்கு முன்பு கொடிவேரி தடுப்பணையில் குளிக்க அனுமதி அளிக்கப்பட்டது. இதையொட்டி பொதுமக்கள் அதிளவில் வந்து குளித்து மகிழ்ந்து சென்றனர்.

இந்த நிலையில் முழு ஊரடங்கையொட்டி கொடிவேரி தடுப்பணையில் மக்கள் குளிக்கவும், கண்டு கழிக்கவும் தடை விதிக்கப்பட்டுள்ளது.

ஈரோடு:

ஒடிசா மாநிலம் ராச்சிபூர் மாவட்டம் தானியாபார் கிராமத்தைச் சேர்ந்தவர் ஸ்ரீமதிதாலேய் (வயது 26). இவரது தங்கை புஷ்பாதாலேய் (24). அக்கா தங்கை இருவரும் கடந்த 4 மாதங்களுக்கு முன்பு ஈரோடு மாவட்டம் மொடக்குறிச்சி அடுத்த எழுமாத்தூர் தொட்டி பாளையம் பகுதியில் உள்ள ஒரு மில்லில் தங்கி வேலை பார்த்து வந்தனர்.

இந்நிலையில் ஸ்ரீமதிதாலேய் கடந்த சில நாட்களாக யாரிடமும் பேசாமல் சோகமாக இருந்துள்ளார். இதுகுறித்து அவரது தங்கை அக்காவிடம் கேட்டுள்ளார். அதற்கு ஸ்ரீமதிதாலேய் தான் ஒருவரை காதலித்ததாகவும் அவர் தன்னை ஏற்றுக்கொள்ளவில்லை என்று கூறியுள்ளார்.

இதனையடுத்து அக்காவை புஷ்பாதாலேய் சமாதானப்படுத்தியுள்ளார். இந்நிலையில் சம்பவத்தன்று ஸ்ரீமதிதாலேய் வேலைக்கு விடுப்பு எடுத்து அறையில் தங்கி இருந்தார்.

பின்னர் அவர் அவரது தங்கை மற்றும் அறையில் தங்கி இருந்தவர்கள் இரவில் தூங்க சென்று விட்டனர். அதிகாலையில் புஷ்பாதாலேய் எழுந்து பார்த்தபோது அக்கா ஸ்ரீமதிதாலேய் தூக்குபோட்டு தொங்கி கொண்டு இருப்பதை கண்டு அதிர்ச்சி அடைந்தார்.

உடனே அருகில் இருந்தவர்கள் உதவியுடன் அவரை மீட்டு சிகிச்சைக்காக ஈரோடு அரசு ஆஸ்பத்திரிக்கு கொண்டு சென்றனர். அவரை பரிசோதித்த டாக்டர்கள் வரும் வழியிலேயே ஸ்ரீமதிதாலேய் இறந்து விட்டதாக தெரிவித்தனர்.

இதுகுறித்து மொடக்குறிச்சி போலீசார் வழக்கு பதிவு செய்து விசாரணை நடத்தி வருகின்றனர்.

கோபி:

ஈரோடு மாவட்டம் கோபிசெட்டிபாளையம் அண்ணாமலை வீதியை சேர்ந்தவர் மெகபூப் பாஷா. இவரது மகள் சாஹினா பீவி (வயது 30). இவர் கோவை அரசு சட்ட கல்லூரியில் பி.எல். இறுதி ஆண்டு படித்து வந்தார்.

இவருக்கும் முகமது உவைஸ் என்பவருக்கும் கடந்த சில ஆண்டுகளுக்கு முன்பு திருமணம் நடந்தது. இவர்களுக்கு ஒரு மகன் உள்ளார். இந்நிலையில் சாஹினா பீவி மற்றும் அவரது கணவர் முகமது உவைஸ்க்கு இடையே கருத்து வேறுபாடு ஏற்பட்டது.

இதனால் கடந்த 2018-ம் ஆண்டு சாஹினா பீவி கணவரை பிரிந்து அவரது தாய் வீட்டில் தங்கி கல்லூரிக்கு சென்று வந்தார்.

இந்த நிலையில் கணவன்-மனைவிக்கு இடையே கோவை குடும்ப நல கோர்ட்டில் விவாகரத்து உறுதியானது. இதனால் சாஹினா பீவி தன் மகனை எப்படி காப்பாற்றுவது என மன வருத்தத்தில் இருந்து வந்தார்.

இந்த நிலையில் சம்பவத்தன்று சாஹினா பீவி தேர்வுக்கு படிப்பதாக கூறி தனது வீட்டின் 2-வது மாடியில் உள்ள அறைக்கு சென்றார். அப்போது அவரை டீ குடிக்க அழைத்தனர். நீண்ட நேரம் அழைத்தும் அவர் கீழே இறங்கி வரவில்லை.

இதனால் சந்தேகம் அடைந்த அவரது தந்தை மெகபூப் பாஷா சென்று பார்த்தார். அப்போது அவர் இருந்த அறை உள்பக்கமாக தாழிடப்பட்டிருந்தது. இதையடுத்து கதவை திறந்து பார்த்தபோது சாஹினா பீவி தூக்குப்போட்டு தொங்கி கொண்டிருந்தார்.

அக்கம் பக்கம் இருந்தவர்கள் உதவியுடன் அவரை மீட்டு ஆம்புலன்ஸ் மூலம் கோபிசெட்டிபாளையம் அரசு மருத்துவமனைக்கு கொண்டு சென்றனர். அங்கு சாஹினா பீவியை பரிசோதனை செய்த டாக்டர்கள் வரும் வழியிலேயே அவர் இறந்து விட்டதாக தெரிவித்தனர்.

இது குறித்து கோபிசெட்டிபாளையம் போலீசார் வழக்கு பதிவு செய்து விசாரணை நடத்தி வருகிறார்கள்.

அம்மாபேட்டை:

ஈரோடு மாவட்டம் அம்மாபேட்டை ரோஜா நகரை சேர்ந்தவர் தணிகாசலம். இவரது மகள் மீரா (வயது 29). இவருக்கும் அதே பகுதியை சேர்ந்த அபினேசன் என்பவருக்கும் கடந்த 2020-ம் ஆண்டு திருமணம் நடைபெற்றது.

இந்நிலையில் மீரா கர்ப்பம் அடைந்தார். இதையடுத்து கடந்த சில மாதங்களுக்கு முன்பு அவருக்கு வளைகாப்பு நடத்தி அவரது தந்தை தணிகாசலம் வீட்டிற்கு அழைத்து சென்றார்.

இந்நிலையில் கடந்த மாதம் 16-ந்தேதி மீராவுக்கு பிரசவ வலி ஏற்பட்டது. இதையடுத்து அவரை ஈரோட்டில் உள்ள ஒரு தனியார் ஆஸ்பத்திரியில் சேர்த்தனர்.

அப்போது மீராவிற்கு சுகப்பிரசவத்தில் ஆண் குழந்தை பிறந்தது. அதன் பின்பு வீட்டுக்கு அழைத்து வந்தனர். இந்நிலையில் வீட்டில் இருந்த மீரா நேற்று மாலை 5 மணியளவில் மூச்சு திணறல் ஏற்படுவதாக தனது தந்தை தணிகாசலத்திடம் கூறினார்.

அதற்கு தணிகாசலம் மருத்துவமனைக்கு செல்லலாம் என மீராவை அழைத்துள்ளார். அதற்கு அவர் சிறிது நேரம் ஓய்வு எடுத்தால் சரியாகிவிடும் என்று கூறிவிட்டு படுத்துக் கொண்டார்.

பின்னர் இரவு 7 மணி அளவில் தணிகாசலமும் அவரது மனைவி செண்பகவள்ளியும் சென்று மகள் மீராவை பார்த்தனர். அவர் மயக்க நிலையில் இருந்துள்ளார்.

இதையடுத்து உடனடியாக மீராவை மீட்டு ஆம்புலன்ஸ் மூலம் பெருந்துறை மருத்துவ கல்லூரி மருத்துவமனைக்கு அழைத்து சென்றனர். அங்கு பரிசோதித்த டாக்டர் ஏற்கனவே மீரா இறந்து விட்டதாக தெரிவித்தார்.

இது குறித்து தணிகாசலம் கொடுத்த புகாரின் பேரில் அம்மாபேட்டை போலீசார் வழக்குப்பதிவு செய்து தீவிர விசாரணை நடத்தி வருகின்றனர். மேலும் குழந்தை பிறந்து 20 நாட்களில் தாய் இறந்ததால் மருத்துவத்துறையினரும் இது குறித்து விசாரணை நடத்தி வருகின்றனர்.

இந்த சம்பவம் அம்மாபேட்டை பகுதியில் பெரும் சோகத்தை ஏற்படுத்தியுள்ளது.