ஈரோடு

ஈரோடு:

ஈரோடு மாவட்டம் பெருந்துறை போலீஸ் நிலைய எல்லைக்குட்பட்ட பகுதிகளில் கடந்த சில நாட்களுக்கு முன் கஞ்சா வியாபாரிகளிடம் மாமூல் வாங்கிக்கொண்டு அவர்களுக்கு ஆதரவாக ஒரு சப்-இன்ஸ்பெக்டர் செயல்படுவதாக குற்றச்சாட்டு எழுந்தது. இது தொடர்பான ஆடியோ சமூக வலைதளங்களில் வெளியாகி வைரல் ஆனது.

அதில் ஒரு போலீஸ்காரர், ஒரு சப்-இன்ஸ்பெக்டர் பெயரை குறிப்பிட்டு பெருந்துறை பணிக்கம் பாளையத்தில் கஞ்சா வியாபாரி வீட்டுக்கு சென்று அவரிடம் பணத்தை மட்டும் பறிமுதல் செய்து வியாபாரி மீது வழக்கு எதுவும் பதிவு செய்யாமல் அவரை தப்பவிட்டனர்.

அதேபோல் அடுத்தடுத்த ஆடியோக்களில் பெருந்துறை சப்-இன்ஸ்பெக்டர் ஆறுமுகம், ஊர்க்காவல் படை போலீஸ்காரர் ஒருவர் ஆகியோர் கஞ்சா வியாபாரிகளிடம் எவ்வளவு மாமூல் வாங்குகின்றனர் என்பது குறித்த விவரங்கள் தொடர்பான உரையாடல்களும் வெளியாகின.

இதுகுறித்து ஈரோடு மாவட்ட போலீஸ் சூப்பிரண்டு சசிமோகன் விசாரணை நடத்தி பெருந்துறை சப்-இன்ஸ்பெக்டர் ஆறுமுகத்தை கொடுமுடி போலீஸ் நிலையத்திற்கு பணியிட மாற்றம் செய்தார். அவருக்கு ஆதரவாக செயல்பட்டதாக இரண்டாம் நிலை காவலரான ராஜீவ்காந்தி என்பவரை மாவட்ட ஆயுதப்படைக்கு இடமாற்றம் செய்து உத்தரவிட்டார். மேலும் அவர்கள் 2 பேர் மீதும் துறை ரீதியான விசாரணை நடத்தி நடவடிக்கையும் எடுக்கப்படுகிறது.

ஈரோடு:

தஞ்சாவூர் மாவட்டம் பாபநாசம் கீழத்தெருவை சேர்ந்தவர் குமார். இவரது மகன் ரஞ்சித் (வயது 21). இவர் ஈரோடு மாவட்டம் கொடுமுடி மேற்கு அக்ரஹாரம் பகுதியில் தங்கி இருந்து கொடுமுடி மகுடேஸ்வரர் கோவிலில் பிரசாத ஸ்டாலில் வேலை பார்த்து வந்தார்.

ரஞ்சித் கும்பகோணத்தை சேர்ந்த பெண் ஒருவரை காதலித்து வந்தார். இந்நிலையில் சம்பவத்தன்று இரவு தான் காதலிக்கும் பெண்ணுடன் ரஞ்சித் வீடியோ காலில் பேசியுள்ளார்.

அப்போது ரஞ்சித் விரக்தியுடன் பேசியதாகவும், தான் தூக்குப்போட்டு தற்கொலை செய்து கொள்ளப்போவதாகவும் அவரது காதலியிடம் கூறி உள்ளார்.

இதைக்கேட்டு அதிர்ச்சி அடைந்த அந்த பெண் ரஞ்சித்துடன் வேலை பார்த்து வரும் பாண்டியன் என்பவருக்கு இது குறித்து தகவல் தெரிவித்தார். உடனடியாக பாண்டியன் ரஞ்சித்துடன் தங்கியிருக்கும் பார்த்தீபன் என்பவரிடம் இதுகுறித்து போனில் தகவல் தெரிவித்தார்.

இதையடுத்து பார்த்தீபனும் அவரது உறவினர் ஒருவரும் ரஞ்சித் தங்கியிருந்த வீட்டிற்கு சென்று பார்த்தனர். அப்போது ரஞ்சித் வீட்டில் உள்ள ஒரு அறையில் தூக்கில் தொங்கி கொண்டு இருப்பதை கண்டு அதிர்ச்சி அடைந்தனர்.

உடனடியாக அவரை மீட்டு ஆம்புலன்ஸ் மூலம் கொடுமுடி தனியார் மருத்துவமனையில் சிகிச்சைக்காக சேர்த்தனர். பின்னர் மேல் சிகிச்சைக்காக அவர் கரூரில் உள்ள அரசு மருத்துவமனைக்கு கொண்டு செல்லப்பட்டார். ரஞ்சித்தை பரிசோதித்த டாக்டர்கள் அவர் ஏற்கனவே இறந்து விட்டதாக தெரிவித்தனர்.

இதுகுறித்து கொடுமுடி போலீசார் வழக்கு பதிவு செய்து விசாரணை நடத்தி வருகின்றனர். ரஞ்சித் என்ன காரணத்திற்காக தற்கொலை செய்துக் கொண்டார் என்பது குறித்து விசாரித்து வருகின்றனர்.

கொடுமுடி:

ஈரோடு மாவட்டம் கொடுமுடி அருகே உள்ள வருந்தியா பாளையம் என்ற பகுதியில் நடந்து சென்ற ஒரு பெண்ணிடம் நகை பறித்த வழக்கில் திருப்பூரை சேர்ந்த ஜெகநாதன் (30) என்பவரை கொடுமுடி போலீசார் கைது செய்தனர். பின்னர் கோர்ட்டில் ஆஜர்படுத்தப்பட்டு அவர் கோவை சிறையில் அடைக்கப்பட்டார்.

இந்த நிலையில் ஜெகநாதனை ஜாமினில் கொண்டு வர திருப்பூர் செட்டிபாளையம் முத்துநகரை சேர்ந்த சேகர் என்பவரது மனைவி முத்துமாரி, அதே பகுதியை சேர்ந்த நாராயணன் என்பவரது மனைவி அலமேலு ஆகியோர் கொடுமுடி கோர்ட்டில் மனு செய்தனர்.

இதற்காக அவர்கள் 2 பேரும் ஆதார் அட்டை, ரேசன் கார்டு, வீட்டு வரி ரசீது, மற்றும் ஜாமீன் சான்று ஆகியவற்றை தயார் செய்து கொடுமுடி கோர்ட்டில் ஒப்படைத்தனர்.

அந்த ஆவணங்களை கோர்ட்டு ஊழியர்கள் சரி பார்த்தனர். அப்போது பல்வேறு சந்தேகங்கள் ஏற்பட்டது. குறிப்பாக கிராம நிர்வாக அலுவலர், வருவாய் ஆய்வாளர், திருப்பூர் வடக்கு தாசில்தார் ஆகியோர் கையெழுத்துகளில் சந்தேகம் ஏற்பட்டது. மேலும் அவர்கள் கொடுத்த முகவரி சான்றிதழிலும் முரண்பாடாக இருந்தது.

இதுப்பற்றி விசாரணை நடத்தி உண்மை தன்மையை அறிய கொடுமுடி கோர்ட்டு தலைமை எழுத்தர் பாக்கியம் என்பவர் கொடுமுடி போலீசில் புகார் செய்தார்.

இதையடுத்து போலீசார் நடத்திய விசாரணையில் வாலிபரை ஜாமீனில் எடுக்க முத்துமாரி, அலமேலு ஆகியோர் கொடுத்து ஆவணங்கள் போலியானவை என்று தெரியவந்தது.

இதையடுத்து கொடுமுடி இன்ஸ்பெக்டர் முருகன், போலி ஆவணம் கொடுத்த 2 பெண்கள் மீதும் 2 பிரிவுகளின் கீழ் வழக்குப்பதிவு செய்தார்.

மேலும் தனிப்படை போலீசார் இன்று திருப்பூர் சென்று அவர்கள் 2 பேரையும் கைது செய்ய நடவடிக்கை எடுத்து வருகிறார்கள்.