இது புதுசு

பிஎம்டபிள்யூ நிறுவனம் இந்திய சந்தையில் தனது முற்றிலும் புதிய M2 மாடலை அறிமுகம் செய்தது. புதிய பிஎம்டபிள்யூ M2 விலை ரூ. 1.03 கோடி என நிர்ணயம் செய்யப்பட்டு உள்ளது. மேம்பட்ட புதிய பிஎம்டபிள்யூ கார் நான்குவித நிறங்களில் கிடைக்கிறது.

புதிய பிஎம்டபிள்யூ M2 மாடலில் 3.0 லிட்டர் டர்போ சார்ஜ் செய்யப்பட்ட மோட்டார் வழங்கப்பட்டு இருக்கிறது. இந்த எஞ்சினுடன் 8 ஸ்பீடு ஆட்டோமேடிக் கியர்பாக்ஸ், ஆப்ஷனல் 6 ஸ்பீடு மேனுவல் கியர்பாக்ஸ் வழங்கப்படுகிறது. இந்த அப்டேட் மூலம் புது M2 மாடல் 486 ஹெச்பி பவர், 600 நியூட்டன் மீட்டர் டார்க் இழுவிசையை வெளிப்படுத்துகிறது.

இந்த கார் மணிக்கு 100 கிலோமீட்டர்கள் வேகத்தை 4 நொடிகளுக்குள் எட்டிவிடும். எனினும், காரின் அதிகபட்ச வேகம் மணிக்கு 250 கிலோமீட்டர்களாக கட்டுப்படுத்தப்பட்டு இருக்கிறது. M டிரைவர் பேக்கேஜ் பெறும் போது இந்த காரின் வேகத்தை மணிக்கு 285 கிலோமீட்டர்கள் வரை நீட்டித்துக் கொள்ளும் வசதி வழங்கப்படுகிறது.

அப்டேட் செய்யப்பட்ட பிஎம்டபிள்யூ M2 மாடல் தற்போது- போர்டிமௌ புளூ, ஃபயர் ரெட், சௌ பாலோ எல்லோ மற்றும் ஸ்கை-ஸ்கிராப்பர் கிரே போன்ற நிறங்களில் கிடைக்கிறது. 

மஹிந்திரா நிறுவனத்தின் முற்றிலும் புதிய BE 6e எலெக்ட்ரிக் மாடலை அறிமுகம் செய்துள்ளது. புதிய மஹிந்திரா BE 6e காரின் விலை ரூ. 18.9 லட்சம், எக்ஸ்-ஷோரூம் என நிர்ணயம் செய்யப்பட்டு உள்ளது. இந்த எலெக்ட்ரிக் காரின் முன்பதிவுகள் விரைவில் துவங்க உள்ள நிலையில், வினியோகம் அடுத்த ஆண்டு பிப்ரவரி அல்லது மார்ச் மாத வாக்கில் துவங்கும் என தெரிகிறது.

புதிய BE 6e மாடலின் தோற்றம் அதன் கான்செப்ட் வெர்ஷனை போன்றே காட்சியளிக்கிறது. இதன் ஸ்டைலிங் கூர்மையாக காட்சியளிக்கிறது. இந்த காரின் வெளிப்புற தோற்றம் டூயல் டோன் ஃபினிஷ் செய்யப்பட்டுள்ளதை போன்ற தோற்றம் கொண்டுள்ளது. இதில் சி வடிவ எல்.இ.டி. டி.ஆர்.எல்.கள் வழங்கப்பட்டுள்ளன.

பின்புறம் எல்.இ.டி. டெயில் லைட்கள் உள்ளன. இந்த காரின் பம்ப்பர் டிஃப்யூசர் போன்ற எஃபெக்ட் வழங்குகிறது. இந்த காரில் 19 இன்ச் ஏரோ ஆப்டிமைஸ் செய்யப்பட்ட வீல்கள் வழங்கப்பட்டுள்ளன. இந்த காரின் கிரவுன்ட் கிளியரன்ஸ் 207mm ஆகும்.

இந்த கார் 59 கிலோவாட் ஹவர் மற்றும் 79 கிலோவாட் ஹவர் என இருவித பேட்டரி ஆப்ஷன்களை சப்போர்ட் செய்யும் திறன் கொண்டுள்ளது. இதில் 79 கிலோவாட் ஹவர் யூனிட் 550 கிலோமீட்டர்கள் வரையிலான ரேஞ்ச் வழங்குகிறது. இதில் உள்ள எலெக்ட்ரிக் மோட்டார்கள் 288 ஹெச்பி பவர், 380 நியூட்டன் மீட்டர் டார்க் இழுவிசையை வெளிப்படுத்தும் திறன் கொண்டுள்ளன.

புதிய மஹிந்திரா BE 6e மாடல் மணிக்கு 100 கிலோமீட்டர் வேகத்தை 6.7 நொடிகளில் எட்டிவிடும். இத்துடன் 175 கிலோவாட் ஹவர் டிசி பாஸ்ட் சார்ஜர் மூலம் காரை 20-இல் இருந்து 80 சதவீதம் வரை 20 நிமிடங்களுக்குள் சார்ஜ் ஏற்ற முடியும். 

டாடா மோட்டார்ஸ் நிறுவனத்தின் மிகவும் பிரபல கார் மாடலாக சியரா விளங்குகிறது. இந்த நிலையில், சியரா பிராண்டிங்கை மீண்டும் பயன்பாட்டுக்கு கொண்டுவரும் முயற்சிகளில் டாடா மோட்டார்ஸ் தீவிரம் காட்டி வருகிறது. அந்த வகையில் முற்றிலும் புதிய சியரா மாடல் எலெக்ட்ரிக் மற்றும் ஐ.சி. எஞ்சின் என இருவித ஆப்ஷன்களிலும் விற்பனை செய்யப்படும்.

இதில் முதற்கட்டமாக சியரா எலெக்ட்ரிக் மாடலும் அதன்பிறகு ஐ.சி. எஞ்சின் மாடலும் அறிமுகம் செய்யப்படும். இரு மாடல்களும் அடுத்த ஆண்டின் இரண்டாவது அரையாண்டு வாக்கில் விற்பனைக்கு வரும் என்று தகவல் வெளியாகி உள்ளது. முன்னதாக கடந்த ஆகஸ்ட் மாதம் கர்வ் எலெக்ட்ரிக் மாடலும் அதன்பிறகு ஐசி எஞ்சின் மாடலும் அறிமுகம் செய்யப்பட்டது குறிப்பிடத்தக்கது.

புதிய சியரா மாடல் டாடா மோட்டார்ஸ் நிறுவனத்தின் Acti.EV ஆர்கிடெக்ச்சரில் உருவாக்கப்பட்டு இருக்கிறது. இது டாடா நிறுவனத்தின் இரண்டாம் தலைமுறை எலெக்ட்ரிக் வாகன பிளாட்பார்ம் ஆகும். இதே பிளாட்பார்மில் முன்னதாக டாடா பன்ச் மற்றும் கர்வ் எலெக்ட்ரிக் வெர்ஷன்கள் உருவாக்கப்பட்டு இருந்தது குறிப்பிடத்தக்கது.

இந்த வரிசையில் உருவாகி இருக்கும் சியரா மாடலில் இரட்டை மோட்டார் செட்டப் வழங்கப்படும் என்று தெரிகிறது. இதே போன்ற செட்டப் ஹேரியர் எலெக்ட்ரிக் வெர்ஷனிலும் வழங்கப்பட்டு இருப்பது குறிப்பிடத்தக்கது. இதனால் புதிய சியரா மாடலில் ஆல்-வீல் டிரைவ் வசதி வழங்கப்படும் என்று எதிர்பார்க்கலாம். 

ஹூண்டாய் நிறுவனம் தனது ஐயோனிக் சீரிஸ் மாடல்களில் புதிய காரை இணைத்துக் கொண்டுள்ளது. இந்த முறை ஹூண்டாய் ஐயோனிக் 9 மாடலை அறிமுகம் செய்துள்ளது. இந்த கார் மூன்றடுக்கு இருக்கைகளை கொண்டுள்ளது. இது முழு சார்ஜ் செய்தால் 620 கிலோமீட்டர்கள் வரையிலான ரேஞ்ச் வழங்கும் என சான்று பெற்றுள்ளது.

இந்த எலெக்ட்ரிக் காரில் ஏழு பேர் வரை பயணம் செய்ய முடியும். இந்த கார் இதுவரை வெளியான ஹூண்டாய் மாடல்களை விட நீண்ட வீல்பேஸ் கொண்டிருக்கிறது. இத்துடன் பாராமெட்ரிக் பிக்சல் லேம்ப்கள் மற்றும் சிறிய ப்ரோஜெக்ஷன் ஹெட்லைட்கள் வழங்கப்படுகிறது. இதன் பின்புறம் எல்இடி காம்பினேஷன் லைட்கள் வழங்கப்படுகின்றன.

வீல்களை பொருத்தவரை இந்த கார் 19 இன்ச், 20 இன்ச் மற்றும் 21 இன்ச் அளவுகளில் ஆப்ஷன் வழங்குகிறது. இதன் டாப் எண்ட் மாடலில் 21 இன்ச் கேலிகிராஃபி டிசைன் வழங்கப்படுகிறது. ஹூண்டாய் ஐயோனிக் 9 மாடல் மொத்தம் 16 நிறங்கள், ஆறு வித இன்டீரியர் டூ-டோன் ஆப்ஷன்களில் கிடைக்கிறது.

இந்த கார் 110.3 கிலோவாட் ஹவர் திறன் கொண்ட லித்தியம் அயன் பேட்டரிகளுடன் வருகிறது. இந்த கார் முழு சார்ஜ் செய்தால் 620 கிலோமீட்டர்கள் வரையிலான ரேஞ்ச் வழங்கும் என சான்று பெற்றுள்ளது. இதன் ரியர் வீல் டிரைவ் மாடலில் 160 கிலோவாட் மோட்டார் உள்ளது.

புதிய ஹூண்டாய் ஐயோனிக் 9 மாடல் கொரியா, அமெரிக்கா போன்ற நாடுகளில் அடுத்த ஆண்டு விற்பனைக்கு வருகிறது. இதைத் தொடர்ந்து ஐரோப்பிய நாடுகள் மற்றும் இதர சந்தைகளில் விற்பனைக்கு வரவுள்ளது. 

பிஎம்டபிள்யூ நிறுவனம் இந்திய சந்தையில் தனது M340i செடான் மாடலை அப்டேட் செய்தது. புதிய பிஎம்டபிள்யூ காரின் விலை ரூ. 74.9 லட்சம், எக்ஸ்-ஷோரூம் என நிர்ணயம் செய்யப்பட்டு உள்ளது. இந்த மாடல் மேம்பட்ட இன்டீரியர் மற்றும் புதிய நிறங்களில் கிடைக்கிறது. இத்துடன் அடாப்டிவ் ஏர் சஸ்பென்ஷன் ஸ்டான்டர்டு அம்சமாக வழங்கப்படுகிறது.

அதன்படி புதிய பிஎம்டபிள்யூ கார்- ஆர்க்டிக் ரேஸ் புளூ, ஃபயர் ரெட், பிளாக் சஃபையர், டான்சனைட் புளூ மற்றும் டேவிட் கிரே என ஐந்து வித நிறங்களில் கிடைக்கிறது. உள்புறத்தில் 14.9 இன்ச் இன்ஃபோடெயின்மென்ட் ஸ்கிரீன், 12.3 இன்ச் டிஜிட்டல் இன்ஸ்ட்ரூமென்ட் பேனல் வழங்கப்படுகிறது. இத்துடன் ஏசி வென்ட்கள் ரிடிசைன் செய்யப்பட்டுள்ளது.

இந்த காரில் 3.0 லிட்டர் 6 சிலிண்டர், டர்போ பெட்ரோல் எஞ்சின் மற்றும் 48 வோல்ட் மைல்டு ஹைப்ரிட் சிஸ்டம் வழங்கப்படுகிறது. இத்துடன் 8 ஸ்பீடு ஆட்டோமேடிக் கியர்பாக்ஸ் வழங்கப்படுகிறது. இந்த யூனிட் 369 ஹெச்பி பவர், 500 நியூட்டன் மீட்டர் டார்க் இழுவிசையை வெளிப்படுத்துகிறது. இந்த கார் மணிக்கு 100 கிலோமீட்டர் வேகத்தை 4.4 நொடிகளில் எட்டிவிடும். 

கியா இந்தியா நிறுவனம் தனது முற்றிலும் எஸ்யுவி பெயரை அதிகாரப்பூர்வமாக அறிவித்து இருக்கிறது. அதன்படி புதிய கியா எஸ்யுவி மாடல் சைரோஸ் என அழைக்கப்படுகிறது. கியா கார்னிவல் மற்றும் கியா EV9 மாடல்களை தொடர்ந்து அசத்தலான டிசைன், அதிநவீன தொழில்நுட்பம் கொண்ட இந்த எஸ்யுவி மாடல் கியா நிறுவனத்தின் முதல் புதிய தலைமுறை எஸ்யுவி ஆகும்.

சைரோஸ் மாடல் கியா நிறுவனத்தின் புதுவரவு மாடலாக அமைகிறது. புதிய சைரோஸ் மாடலுக்கான டீசர் அதிகாரப்பூர்வமாக வெளியிடப்பட்டு இருக்கிறது. கம்பீர தோற்றம், அதிநவீன அம்சங்கள் கொண்ட எஸ்யுவி மாடலாக சைரோஸ் உருவாக்கப்பட்டு இருக்கிறது. மேலும், இது தலைசிறந்த பாதுகாப்பை உறுதிப்படுத்தும் என்று தெரிகிறது.

அதிக இடவசதி கொண்ட இன்டீரியர், ஏராளமான கனெக்டெட் அம்சங்கள் மற்றும் அசத்தலான டிரைவிங் அனுபவத்தை சைரோஸ் வழங்கும் என்று எதிர்பார்க்கலாம். புதிய சைரோஸ் மாடலில் 1.2 லிட்டர் நான்கு சிலிண்டர்கள் கொண்ட NA பெட்ரோல் எஞ்சின், 5 ஸ்பீடு மேனுவல் மற்றும் AMT யூனிட்கள் வழங்கப்படும் என கூறப்படுகிறது.

நிசான் நிறுவனம் முற்றிலும் புதிய பேட்ரோல் மாடல் காரை இந்திய சந்தையில் அறிமுகம் செய்ய இருப்பதாக தகவல் வெளியாகி உள்ளது. இந்த கார் 2026 வாக்கில் அறிமுகம் செய்யப்பட்டு, முழுமையாக இறக்குமதி செய்யப்பட்ட யூனிட்களாக இந்தியாவுக்கு கொண்டுவரப்படும் என்று கூறப்படுகிறது. சமீபத்தில் தான் பேட்ரோல் மாடல் முழுமையாக மாற்றப்பட்டு, சர்வதேச சந்தையில் அறிமுகம் செய்யப்பட்டது.

முதற்கட்டமாக இந்த மாடல் இடது-கை ஸ்டீரிங் பயன்படுத்தும் சந்தைகளிலும் மட்டும் விற்பனைக்கு கொண்டுவரப்பட்டு இருக்கிறது. சற்று தாமதமாகவே வலது-கை ஸ்டீரிங் பயன்படுத்தும் நாடுகளில் இந்த மாடல் அறிமுகம் செய்யப்படும் என்று தெரிகிறது.

2025 ஆண்டு முதல் புதிய மாடல்களை அறிமுகம் செய்ய வேண்டும் என்று ரெனால்ட்-நிசான் திட்டம் கொண்டுள்ளன. அந்த வகையில், இந்திய சந்தையில் பேட்ரோல் மாடலை கொண்டுவருவது இந்தியாவில் நிசான் பிரான்டை சிறப்பாக நிலைநிறுத்த உதவியாக இருக்கும். ரக்கட், பாடி-ஆன்-ஃபிரேம் ரக பேட்ரோல் மாடல் எஸ்.யு.வி. பிரிவில் உறுதியான மாடலாக இருக்கிறது.

புதிய பேட்ரோல் மாடல் சர்வதேச சந்தையில் தற்போது இருவித பெட்ரோல் வி6 எஞ்சின் ஆப்ஷன்களில் கிடைக்கிறது. ஒன்று 3.8 லிட்டர் NA பெட்ரோல் யூனிட் மற்றொன்று டுவின் டர்போ சார்ஜ் செய்யப்பட்ட 3.5 லிட்டர் யூனிட் ஆகும். இரு வெர்ஷன்களில் ஒன்று இந்தியா கொண்டுவரப்படும் என்று தெரிகிறது.

மெர்சிடிஸ் பென்ஸ் இந்தியா நிறுவனம் தனது முற்றிலும் புதிய AMG G 63 எஸ்.யு.வி. மாடலின் விலை விவரங்களை அறிவித்து இருக்கிறது. புதிய பென்ஸ் எஸ்.யு.வி.-இன் விலை ரூ. 3.6 கோடி, எக்ஸ்-ஷோரூம் என நிர்ணயம் செய்யப்பட்டு உள்ளது.

புதிய AMG G 63 முதற்கட்ட பேட்ச்-இல் 120-க்கும் அதிக யூனிட்களை வாங்க ஏற்கனவே பயனர்கள் முன்பதிவு செய்துள்ளனர். புதிய G 63 மாடலில் பை-டர்போ 4.0 லிட்டர் V8 எஞ்சின், 48 வோல்ட் மைல்டு ஹைப்ரிட் சிஸ்டம் வழங்கப்படுகிறது. இத்துடன் 9 ஸ்பீடு டார்க் கன்வெர்ட்டர் கியர்பாக்ஸ் மற்றும் AMG பெர்ஃபார்மன்ஸ் 4மேடிக் வழங்கப்படுகிறது.

இத்துடன் AMG பெர்ஃபார்மன்ஸ் பேக்கஜின் கீழ் ரேஸ் ஸ்டார்ட் வசதி வழங்கப்படுகிறது. இந்த கார் மணிக்கு அதிகபட்சம் 240 கிலோமீட்டர் வேகத்தில் செல்லும் திறன் கொண்டுள்ளது. இந்த கார் மணிக்கு 100 கிலோமீட்டர்கள் வேகத்தை 4.3 நொடிகளில் எட்டிவிடும். இத்துடன் முதல் முறையாக லான்ச் கண்ட்ரோல் வசதியும் உள்ளது.

புதிய AMG G 63 மாடல் 29 வெளிப்புற நிறங்களில் கிடைக்கிறது. இத்துடன் இருக்கை மேற்கவர்களில் 31 ஆப்ஷன்கள் வழங்கப்படுகிறது. மற்ற அம்சங்களை பொருத்தவரை 12.3 இன்ச் டிரைவர் டிஸ்ப்ளே, இன்ஃபோடெயின்மென்ட் சிஸ்டம், அதிநவீன MBUX NTG7 மென்பொருள் உள்ளது.

மேலும் வயர்லெஸ் ஆண்ட்ராய்டு ஆட்டோ, ஆப்பிள் கார் பிளே, யுஎஸ்பி டைப் சி சார்ஜிங் போர்ட்கள், பர்மெஸ்டர் பிரான்டின் 18 ஸ்பீக்கர்கள் மற்றும் 3டி சரவுண்ட் சவுண்ட் சிஸ்டம், ADAS, 360 டிகிரி கேமரா, ஆக்மென்டெட் ரியாலிட்டி சார்ந்த நேவிகேஷன் சிஸ்டம் வழங்கப்படுகிறது.

மெர்சிடிஸ் பென்ஸ் நிறுவனம் தனது புதிய தலைமுறை இ கிளாஸ் மாடலை இந்திய சந்தையில் அறிமுகம் செய்தது. புதிய தலைமுறை இ கிளாஸ் மாடலின் விலை ரூ. 78 லட்சத்து 50 ஆயிரம், எக்ஸ்-ஷோரூம் என நிர்ணயம் செய்யப்பட்டு உள்ளது.

புதிய ஆறாம் தலைமுறை இ கிளாஸ் மாடல்: லாங் வீல் பேஸ் மற்றும் வலது புற ஸ்டீரிங் வீலுடன் அறிமுகமாகி இருக்கிறது. உலகின் வேறு எந்த நாட்டிலும் இந்த மாடல் இந்த வடிவில் இதுவரை அறிமுகம் செய்யப்படவில்லை என்பது குறிப்பிடத்தக்கது. புதிய பென்ஸ் இ கிளாஸ் மாடல் மூன்று வெர்ஷன்களில் கிடைக்கிறது.

பவர்டிரெயினை பொருத்தவரை இந்த கார் 2.0 லிட்டர் டர்போ பெட்ரோல் மற்றும் டீசல் எஞ்சின் ஆப்ஷன்களில் கிடைக்கிறது. இத்துடன் 48 வோல்ட் மைல்டு ஹைப்ரிட் சிஸ்டம் வழங்கப்படுகிறது. இந்த எஞ்சின்களுடன் 9-ஸ்பீடு ஆட்டோமேடிக் கியர்பாக்ஸ் வழங்கப்படுகிறது. இந்த காருடன் மெர்சிடிஸ் E450 பெட்ரோல் 4-மேடிக் வெர்ஷனும் அறிமுகம் செய்யப்பட்டது.

இந்த மாடலின் விலை ரூ. 92 லட்சத்து 50 ஆயிரம் என நிர்ணயம் செய்யப்பட்டு உள்ளது. புதிய மெர்சிடிஸ் இ கிளாஸ் மாடலின் 200 மற்றும் 220d வெர்ஷன்களுக்கான முன்பதிவு ஏற்கனவே துவங்கி நடைபெற்று வருகிறது. புதிய E450 பெட்ரோல் 4-மேடிக் மாடலுக்கான முன்பதிவுகள் நவம்பர் மாதம் துவங்க உள்ளது. இந்த கார் பிஎம்டபிள்யூ 5 சீரிஸ் மற்றும் ஆடி A6 மாடல்களுக்கு போட்டியாக அமைகிறது.

பி.எம்.டபிள்யூ. நிறுவனம் இந்திய சந்தையில் தனது CE 02 எலெக்ட்ரிக் இருசக்கர வாகனத்தை அறிமுகம் செய்து இருக்கிறது. இதன் விலை ரூ. 4.5 லட்சம், எக்ஸ்-ஷோரூம் என நிர்ணயம் செய்யப்பட்டு உள்ளது. அந்த வகையில், இந்திய சந்தையில் கிடைக்கும் விலை உயர்ந்த இருசக்கர வாகனங்களில் ஒன்றாக இது இருக்கிறது.

இதுதவிர, பி.எம்.டபிள்யூ. நிறுவனம் இந்தியாவில் அறிமுகம் செய்திருக்கும் இரண்டாவது ஆல்-எலெக்ட்ரிக் இருசக்கர வாகனம் இது ஆகும். முன்னதாக பி.எம்.டபிள்யூ. CE 04 மாடல் இந்தியாவில் அறிமுகம் செய்யப்பட்டது.

ஏற்கனவே சர்வதேச சந்தையில் விற்பனைக்கு கிடைக்கும் பி.எம்.டபிள்யூ. CE 02 மாடல் ஓசூரில் உள்ள டி.வி.எஸ். ஆலையில் உற்பத்தி செய்யப்படுகிறது. இந்த எலெக்ட்ரிக் இருசக்கர வாகனத்தில் 11 கிலோவாட் எலெக்ட்ரிக் மோட்டார் மற்றும் 3.92 கிலோவாட் ஹவர் பேட்டரி கொண்டுள்ளது.

இந்த ஸ்கூட்டரில் உள்ள மோட்டார் 11/15 கிலோவாட்/ஹெச்பி பவர் மற்றும் 55 நியூட்டன் மீட்டர் டார்க் இழுவிசையை வெளிப்படுத்துகிறது. இந்த வாகனம் முழு சார்ஜ் செய்தால் 95 கிலோமீட்டர்கள் வரை செல்லும் திறன் கொண்டுள்ளது.

ரோல்ஸ் ராய்ஸ் நிறுவனம் இந்திய சந்தையில் தனது கலினன் பேஸ்லிப்ட் மாடலை அறிமுகம் செய்தது. புதிய கலினன் பேஸ்லிப்ட் மாடலின் விலை ரூ. 10 கோடியே 50 லட்சம் என துவங்குகிறது. இதே காரின் பிளாக் பேட்ஜ் வெர்ஷனின் விலை ரூ. 12 கோடியே 25 லட்சம் என நிர்ணயம் செய்யப்பட்டு உள்ளது.

புதிய மேம்பட்ட எஸ்யுவி மாடல் கலினன் சீரிஸ் II என அழைக்கப்படுகிறது. சர்வதேச சந்தையில் இந்த ஆண்டு மே மாதத்தில் இந்த கார் அறிமுகம் செய்யப்பட்டது. இந்த காரில் புதிய ஸ்டைலிங், ரிவைஸ்டு இன்டீரியர் மற்றும் மேம்பட்ட தொழில்நுட்பம் வழங்கப்படுகிறது.

கலினன் சீரிஸ் II மாடலில் மெல்லிய ஹெட்லேம்ப்கள், L வடிவ எல்இடி டேடைம் ரன்னிங் லைட்கள், ரிடிசைன் செய்யப்பட்ட கிரில் வழங்கப்படுகிறது. காரின் பின்புறம் புதிய தோற்றம், ஸ்டெயின்லெஸ் ஸ்டீல் ஸ்கிட் பிளேட் வழங்கப்படுகிறது. இந்த காரின் சக்கரங்களும் புதிதாக வழங்கப்பட்டு இருக்கிறது.

புதிய கலினன் பேஸ்லிப்ட் மாடலில் 6.75 இன்ச் டுவின் டர்போ சார்ஜ் செய்யப்பட்ட வி12 எஞ்சின் வழங்கப்படுகிறது. இந்த எஞ்சின் 571 ஹெச்பி பவர், 850 நியூட்டன் மீட்டர் டார்க் இழுவிசையை வெளிப்படுத்தும் திறன் கொண்டுள்ளது.

இதே எஞ்சின் பிளாக் பேட்ஜ் வெர்ஷனில் 600 ஹெச்பி பவர், 900 நியூட்டன் மீட்டர் டார்க் இழுவிசையை வெளிப்படுத்துகிறது. இந்த எஞ்சினுடன் 8 ஸ்பீடு ஆட்டோமேடிக் கியர்பாக்ஸ் வழங்கப்படுகிறது.

கியா நிறுவனம் தனது அதிகம் விற்பனையாகும் கரென்ஸ் எம்பிவி மாடலை அடுத்த ஆண்டு அப்டேட் செய்ய இருக்கிறது. காஸ்மெடிக் மாற்றங்கள் செய்யப்பட்ட புதிய கரென்ஸ் மாடலுடன், கியா இந்தியா நிறுவனம் கரென்ஸ் EV மாடலையும் அறிமுகம் செய்ய திட்டமிட்டுள்ளதாக தகவல் வெளியாகி உள்ளது.

இதனிடையே கியா கரென்ஸ் EV மாடல் டெஸ்டிங் செய்யப்படும் படங்கள் இணையத்தில் வெளியாகி உள்ளன. இதில் கரென்ஸ் EV மாடல் அதன் ஐசி எஞ்சின் வெர்ஷனை விட வித்தியாசமாக இருக்கும் என்று தெரியவந்துள்ளது.

கரென்ஸ் EV மாடலின் பிளாட்பார்ம், பாடி மற்றும் பெரும்பாலான இன்டீரியர் அதன் ஸ்டான்டர்டு மாடலில் இருப்பதை போன்றே வழங்கப்படும். எனினும், ஸ்டைலிங் அடிப்படையில் காரின் முன்புறம் சிறு மாற்றங்கள் செய்யப்பட்டு இருக்கும் என எதிர்பார்க்கலாம். இந்த மாடல் வெளியீட்டுக்கு முன் கியா நிறுவனம் தனது EV9 பிளாக்ஷிப் மாடலை அறிமுகம் செய்ய இருக்கிறது.

வருகிற அக்டோபர் 3 ஆம் தேதி கியா நிறுவனம் தனது EV9 ஃபிளாக்ஷிப் மாடலை அறிமுகம் செய்கிறது. புதிய கரென்ஸ் EV மாடலின் பவர்டிரெயின் விரைவில் அறிமுகம் செய்யப்பட இருக்கும் கிரெட்டா EV மாடலில் இருப்பதை போன்றே வழங்கப்படும் என்று தெரிகிறது.