கிருஷ்ணகிரி

மத்தூர்:

கிருஷ்ணகிரி மாவட்டம் மத்தூர் போலீஸ் நிலையம் முன்பு நிறுத்தப்பட்டிருந்த பெண் போலீஸ்காரர் ரமணி என்பவருக்கு சொந்தமான மோட்டார் சைக்கிளை கடந்த சில மாதங்களுக்கு முன்பு மர்ம நபர்கள் திருடிச்சென்றனர். இதே போல், மத்தூர் பஸ் நிலையம் மற்றும் அதே பகுதியில் உள்ள திருமண மண்டபத்தின் முன்பு நிறுத்தப்பட்டிருந்த 2 மோட்டார் சைக்கிள்கள் திருட்டு போனது.

இது தொடர்பான புகார்களின் பேரில், மத்தூர் போலீசார் வழக்குப்பதிவு செய்து விசாரணை நடத்தி வருகின்றனர். மோட்டார் சைக்கிள் திருட்டில் ஈடுபட்டவர்களை பிடிக்க, ஊத்தங்கரை துணை போலீஸ் சூப்பிரண்டு ராஜபாண்டி மேற்பார்வையில், மத்தூர் இன்ஸ்பெக்டர் ரவி தலைமையில் தனிப்படை அமைக்கப்பட்டது.

தனிப்படை போலீசார், சம்பவம் நடந்்த இடங்களில் இருந்த கண்காணிப்பு கேமராவில் பதிவான காட்சிகளை ஆய்வு செய்தனர். அதில், 2 பேர் மோட்டார் சைக்கிள்களை திருடிச் சென்ற காட்சிகள் பதிவாகி இருந்தது. விசாரணையில், அனுமன்தீர்த்தம் பகுதியை சேர்ந்த தணிகாச்சலம் (வயது 35), வெங்கடேசன் (30) ஆகியோர் மோட்டார் சைக்கிள்கள் திருட்டில் ஈடுபட்டது தெரிந்தது.

தணிகாச்சலம், தர்மபுரி மாவட்டம் மொரப்பூரில் உள்ள தனியார் கல்லூரியில் உதவி பேராசிரியராக பணியாற்றி வருகிறார். வெங்கடேசன், அனுமன்தீர்த்தம் பகுதியில் பூக்கடை நடத்தி வருகிறார். அவர்கள் 2 பேரையும் கைது செய்த போலீசார், அவர்களிடமிருந்து 3 திருட்டு மோட்டார் சைக்கிள்களை மீட்டனர்.

ஓசூர்:

கிருஷ்ணகிரி மாவட்டம் ஓசூர் அருகே சானமாவு மற்றும் போடூர்பள்ளம் ஆகிய வனப்பகுதிகளில் யானைகள் முகாமிட்டுள்ளன.

தற்போது கோடை காலம் தொடங்கி விட்டதால் உணவு, தண்ணீரை தேடி காட்டு யானைகள் வனப்பகுதியையொட்டி உள்ள கிராமங்களில் புகுந்து அட்டகாசம் செய்து வருகின்றன.

இந்த யானைகள், தனித்தனியாகவும், கூட்டமாகவும் இரவு நேரங்களில் அருகில் உள்ள கிராமங்களுக்குள் புகுந்து விவசாயப் பயிர்களை தொடர்ந்து சேதப்படுத்தி வருகின்றன. இதனால், விவசாயிகளும், பொதுமக்களும் மிகவும் பீதி அடைந்துள்ளனர்.

இந்த நிலையில், ஓசூர் அருகே தொரப்பள்ளி பக்கமுள்ள திருச்சிப்பள்ளி கிராமத்தை சேர்ந்த ராஜப்பா (60) என்ற விவசாயி இன்று அதிகாலையில் வீட்டைவிட்டு வெளியே வந்தார். அப்போது அங்கு பதுங்கியிருந்த ஒற்றை யானை திடீரென அவரை துரத்திச் சென்று, கால்களால் மிதித்தது இதில், ராஜப்பா சம்பவ இடத்திலேயே பரிதாபமாக உயிரிழந்தார். பின்னர், அந்த யானை மீண்டும் காட்டுக்குள் சென்று பதுங்கி விட்டது. இறந்துபோன ராஜப்பாவிற்கு, பாப்பம்மா என்ற மனைவியும், 2 மகன்களும் உள்ளனர். யானை மிதித்து விவசாயி பலியான சம்பவம், கிராம மக்களிடையே சோகத்தை ஏற்படுத்தியுள்ளது.

ஓசூர்:

ஓசூர் டவுன் போலீசார், பஸ் நிலையம் பகுதியில் ரோந்து சென்றனர். அப்போது, அங்கு பெட்டிக்கடையில் தடை செய்யப்பட்ட புகையிலை பொருட்கள் விற்ற கவுதம் (45) என்பவரை போலீசார் கைது செய்தனர். மேலும் அவரிடமிருந்து ரூ.1,300 மதிப்புள்ள தடை செய்யப்பட்ட புகையிலை பொருட்கள் பறிமுதல் செய்யப்பட்டன.

கிருஷ்ணகிரி:

ஊத்தங்கரை அருகே உள்ள லக்கம்பட்டியை சேர்ந்தவர் மாரியப்பன் (வயது 60). இவர் அந்த பகுதியில் உள்ள மரத்தில் தூக்குப்போட்டு தற்கொலை செய்து கொண்டார். இது குறித்து தகவல் அறிந்ததும் ஊத்தங்கரை போலீசார் விரைந்து சென்று உடலை கைப்பற்றி பிரேத பரிசோதனைக்காக ஊத்தங்கரை அரசு ஆஸ்பத்திரிக்கு அனுப்பி வைத்தனர். முதியவர் தற்கொலை செய்து கொண்டதற்கான காரணம் குறித்து போலீசார் விசாரணை நடத்தி வருகிறார்கள்.

கிருஷ்ணகிரி:

கிருஷ்ணகிரி அருகே உள்ள காட்டிநாயனப்பள்ளி ஊராட்சிக்குட்பட்ட பகுதியில் பெரியார் நினைவு சமத்துவபுரம் உள்ளது.

இந்த சமத்துவபுரம் வளாகத்தில் மார்பளவு பெரியார் சிலை உள்ளது. இந்த சிலைக்கு நேற்று அதிகாலை மர்ம நபர்கள் டயரை கொழுத்தி, பெரியார் சிலையை சேதப்படுத்தியுள்ளதாக, அப்பகுதியில் வசிப்பவர்கள் போராட்டத்தில் ஈடுபட்டனர்.

அத்துடன் மாவட்ட திக சார்பில் சாலை மறியல் போராட்டமும் நடந்தது. இந்த சம்பவம் பெரும் பரபரப்பை ஏற்படுத்தியது.

இதுகுறித்து காட்டி நாயனப்பள்ளி கிராம நிர்வாக அலுவலர் சரவணன், மகாராஜகடை போலீசில் புகார் அளித்தார். அதன் பேரில், போலீஸ் இன்ஸ்பெக்டர் கணேஷ் குமார் வழக்கு பதிவு செய்து, விசாரணை நடத்தியதில், பெரியார் சிலை எரிந்து நாசமானதற்கு காரணம் அதே சமத்துவபுரத்தில் வசித்து வரும் கூலி தொழிலாளியான முருகவேல் (வயது38) என்பது தெரியவந்தது. இதையடுத்து அவரை போலீசார் கைது செய்து, நீதிமன்றத்தில் ஆஜர்படுத்தி சிறையில் அடைத்தனர்.

இது குறித்து போலீசில் முருகவேல் அளித்துள்ள வாக்குமூலத்தில், தான் அதிகாலை குளிர்காய பெரியார் சிலை அருகில் டயரை கொளுத்தினேன். அது எரிந்ததில், பெரியார் சிலைக்கு அணிவிக்கப்பட்டிருந்த காய்ந்து போன பூமாலையில் தீ பற்றிக் கொண்டது. இதனால் சிலை சேதம் அடைந்தது. யாராவது பார்த்து விடுவார்களோ என்ற பயத்தில் அங்கிருந்து நானும் எனது வீட்டிற்கு சென்றுவிட்டேன். பின்னர், அனைவரும் போராட்டத்தில் ஈடுபட்டனர்.

அவர்களுடன் நானும் சேர்ந்து போராட்டத்தில் ஈடுபட்டேன். அப்போது போலீசாரிடம், அதிகாலை இருசக்கர வாகனத்தில் வந்த 2 பேர் சிலைக்கு தீ வைத்துவிட்டு தப்பியதை நான் பார்த்தேன் என கூறினேன்.

பின்னர், என்னை தனியாக அழைத்து சென்று போலீசார் விசாரணை நடத்தினர். அப்போது உண்மையை நான் ஒப்புக் கொண்டேன் என்று தெரிவித்துள்ளார்.

கிருஷ்ணகிரி:

கிருஷ்ணகிரி அடுத்த கத்தாழை மேடு பகுதியில் சமத்துவபுரத்தில் வைக்கப்பட்டு இருந்த பெரியாரின் சிலைக்கு நள்ளிரவில் மர்மநபர்கள் தீ வைத்துள்ளனர்.

பெரியாரின் வெண்கல சிலைக்கு தீவைக்கப்பட்ட சம்பவத்தை கண்டித்து 50-க்கும் மேற்பட்ட பொதுமக்கள் போராட்டம் நடத்தினர். இதனால் அப்பகுதியில் பரபரப்பு ஏற்பட்டது.

தீவைப்பு சம்பவம் குறித்து போலீசார் விசாரணை நடத்தி வருகின்றனர்.

கிருஷ்ணகிரி:

கிருஷ்ணகிரி மாவட்டம் பர்கூர் சட்டசபை தொகுதிக்கு உட்பட்ட ஆந்திர மாநில எல்லையான குருவிநாயனப்பள்ளி, வேப்பனப்பள்ளி தொகுதிக்கு உட்பட்ட அரியனப்பள்ளி சோதனைச்சாவடிகளில் நேற்று மாவட்ட தேர்தல் அலுவலரும், கலெக்டருமான ஜெயசந்திரபானுரெட்டி ஆய்வு செய்தார்.

பின்னர் கலெக்டர் கூறியதாவது:-

கிருஷ்ணகிரி மாவட்ட எல்லையையொட்டி, ஆந்திரா, கர்நாடக மாநில எல்லையோரங்களில் 11 இடங்களில் சோதனைச்சாவடிகள் அமைக்கப்பட்டு உள்ளன. இங்கு போலீசார் மற்றும் தேர்தல் அலுவலர்கள் தீவிர வாகன சோதனையில் ஈடுபட்டு வருகின்றனர்.

வேப்பனப்பள்ளி தொகுதிக்குட்பட்ட ஆந்திர மாநில எல்லை,, கர்நாடக எல்லையான நேரலகிரி, ஓசூர் தொகுதிக்குட்பட்ட மத்திகிரி, கொத்தகொண்டப்பள்ளி டி.வி.எஸ்., பூனப்பள்ளி, கர்னூர், பாகலூர், கக்கனூர் ஆகிய இடங்களில் சோதனைச்சாவடிகள் அமைக்கப்பட்டுள்ளன. இதேபோல் பர்கூர் தொகுதிக்குட்பட்ட ஆந்திர மாநில எல்லையான வரமலகுண்டா, குருவிநாயனப்பள்ளி, தளி தொகுதிக்குட்பட்ட கர்நாடக மாநில எல்லையான கும்ளாபுரம் மற்றும் கெம்பட்டி ஆகிய இடங்களில் சோதனைச் சாவடிகள் அமைக்கப்பட்டுள்ளன.

இந்த சோதனைச்சாவடிகளில் வாகனங்கள் முழுமையாக கண்காணிக்கப்பட்டு வருகிறது. குறிப்பாக மது கடத்தலை தடுக்க தீவிரமாக கண்காணிக்க வேண்டும் என அலுவலர்களுக்கு அறிவுறுத்தப்பட்டுள்ளது.

இவ்வாறு அவர் கூறினார்.

இந்த ஆய்வின்போது கிருஷ்ணகிரி சட்டசபை தொகுதி உதவி தேர்தல் நடத்தும் அலுவலர் செந்தில்குமார் மற்றும் அலுவலர்கள் உடனிருந்தனர்.