கிருஷ்ணகிரி

கிருஷ்ணகிரி:

கிருஷ்ணகிரி மாவட்டம் ஊத்தங்கரை அருகே சிங்காரப்பேட்டை அம்பேத்கர் நகரில் மின்சாரம் தாக்கியதில் குழந்தை அவந்திகா (3), தாய் மகாலட்சுமி (25), பாட்டி இந்திரா (52)  உயிரிழந்தனர்.

வீட்டின் முன் துணியை காய வைக்கும்போது மின் கம்பியிலிருந்து மின்சாரம் தாக்கியதில் 3 பேர் உயிரிழந்துள்ளனர்.

இந்த சம்பவம் தொடர்பாக போலீசார் விசாரணை நடத்தி வருகின்றனர்.

கிருஷ்ணகிரி:

கிருஷ்ணகிரி மோகன்ராவ் காலனி 4-வது தெருவை சேர்ந்தவர் கண்ணன். இவரது மகன் கார்த்திக் (வயது 17) .கூலி தொழிலாளி .

இந்த நிலையில் கடந்த 4-ந்தேதி கார்த்திக், அவரது நண்பர் அதே பகுதியைச் சேர்ந்த ராஜேஷ் (18) ஆகிய இருவரும் மோட்டார் சைக்கிளில் காட்டு நாயனபள்ளி பகுதியில் சென்று கொண்டிருந்தனர். மோட்டார் சைக்கிளை கார்த்திக் ஓட்டினார்.

அப்போது திடீரென எதிர்பாராத விதமாக சாலையோரத்தில் இருந்த இரும்பு கம்பிகள் மோட்டார் சைக்கிள் மோதியது. இதில் கார்த்திக் தூக்கி வீசப்பட்டு தலையில் பலத்த காயமடைந்து சம்பவ இடத்திலேயே பரிதாபமாக இறந்தார். ராஜேஷ் படுகாயம் அடைந்தார்.

இந்த விபத்து பற்றி தகவல் கிடைத்ததும் கிருஷ்ணகிரி டவுன் போலீஸ் இன்ஸ்பெக்டர் பாஸ்கர் சம்பவ இடத்திற்கு விரைந்து சென்று கார்த்திக் உடலை மீட்டு பிரேத பரிசோதனைக்காக கிருஷ்ணகிரி அரசு ஆஸ்பத் திரிக்கு அனுப்பி வைத்தார். மேலும் காயமடைந்த ராஜேசை மீட்டு சிகிச்சைக்காக கிருஷ்ணகிரி அரசு ஆஸ்பத்திரிக்கு அனுப்பி வைத்தனர்.

இந்த விபத்து குறித்து கிருஷ்ணகிரி டவுன் போலீசார் வழக்கு பதிவு செய்து விசாரணை நடத்தி வருகிறார்கள்.

ஓசூர்:

கிருஷ்ணகிரி மாவட்டம் ஓசூர் அருகே மத்திகிரியில் உள்ள ஒரு தனியார் குடியிருப்பு பகுதியில் வசித்து வருபவர் மோகன் (வயது 35). இவரது மனைவி ரம்யா (32). இவர்களுக்கு அன்மயா (9) என்ற மகள் உள்ளனர்.

இந்த நிலையில் மோகனுக்கு சொந்தமான லாட்ஜ் கிருஷ்ணகிரியில் இருந்தது. கடன் தொல்லை காரணமாக கடந்த 10 ஆண்டுகளுக்கு முன்பு அதை விற்று விட்டார். இதையடுத்து மோகன், மத்திகிரிக்கு குடும்பத்தினருடன் வந்து, ஷேர் மார்க்கெட் தொழிலில் ஈடுபட்டு வந்தார். இதில் அவருக்கு லட்சக்கணக்கில் கடன் ஏற்பட்டது. இதனால் அவருக்கு கடன் கொடுத்தவர்கள் பணத்தை கேட்டு நெருக்கடி கொடுத்தனர். இதில் மோகன் மன உளைச்சலுக்குள்ளாகி வேதனையுடன் இருந்து வந்தார். மேலும் குடும்பம் நடத்தவும் வருமானம் இல்லாமல் அவர் மிகவும் சிரமப்பட்டு வந்ததாக கூறப்படுகிறது.

இதையடுத்து கடன் தொல்லை அதிகமாகி வந்ததால், குடும்பத்துடன் மோகன் தற்கொலை செய்து கொள்ள முடிவு செய்தார்.

அதன்படி நேற்று இரவு மோகன், மனைவி ரம்யா, மகள் அன்மயா மற்றும் தாயார் வசந்தம்மா (60) ஆகியோருக்கு வி‌ஷம் கொடுத்தார். இதில் சிறிதுநேரத்தில் அவர்கள் 3பேரும் மயங்கி விழுந்து பரிதாபமாக இறந்தனர்.

பின்னர் 3 பேரும் இறந்ததை உறுதி செய்ய மோகன், வீட்டில் அறையில் தூக்குப் போட்டு தற்கொலை செய்து கொண்டார்.

இன்று காலை நீண்ட நேரமாக மோகன் வீட்டில் இருந்து யாரும் வெளியே வராததால் சந்தேகம் அடைந்த அக்கம்பக்கத்தினர் சென்று பார்த்தனர். அப்போது ரம்யா, அன்மயா , வசந்தம்மா ஆகியோர் வி‌ஷம் குடித்த நிலையில் பிணமாக கிடந்ததையும். மோகன் தூக்கில் பிணமாக தொங்கியதை கண்டும் அதிர்ச்சி அடைந்தனர்.

உடனே இதுகுறித்து மத்திகிரி போலீசாருக்கு தகவல் கொடுத்தனர். அதன்பேரில் போலீசார் விரைந்து சென்று 4 பேரின் உடல்களையும் கைப்பற்றி பிரேத பரிசோதனைக்காக ஓசூர் அரசு ஆஸ்பத்திரிக்கு அனுப்பிவைத்தனர். மேலும், மோகன் எழுதி வைத்திருந்த உருக்கமான கடிதத்தையும் கைப்பற்றி போலீசார் விசாரித்து வருகிறார்கள்.

கிருஷ்ணகிரி:

‘மக்களை தேடி மருத்துவம்’ திட்டத்தை கிருஷ்ணகிரி மாவட்டத்தில் இன்று முதல்-அமைச்சர் மு.க.ஸ்டாலின் தொடங்கி வைத்த பிறகு நிருபர்களிடம் கூறியதாவது:-

இந்தியாவுக்கே முன்னோடியாக மக்களை தேடி மருத்துவ திட்டம்தொடங்கப்பட்டுள்ளது. இந்த திட்டத்தின் நோக்கத்தை அறிந்து மக்கள் முறையாக பயன்படுத்திக்கொள்ள வேண்டும்.

இந்த திட்டம் மூலம் சிகிச்சை தேவைப்படுபவர்களின் வீடுகளுக்கே சென்று மருத்துவ சிகிச்சை அளிக்கப்படும். 45 வயதுக்கு மேல் உள்ளவர்கள் மற்றும் இயலாமையில் உள்ளவர்களை கண்டறிந்தும் மருத்துவ சிகிச்சை வழங்கப்படும்.

மக்களை தேடி மருத்துவம் என்ற சேவையின் மூலம் இந்த ஆண்டின் இறுதிக்குள் 30 லட்சம் குடும்பத்தை சேர்ந்த 1 கோடி பேருக்கு சிகிச்சை அளிக்க திட்டமிடப்பட்டுள்ளது.

ரத்த அழுத்தம், நீரிழிவு, சிறுநீரக பிரச்சனை போன்ற 40-க்கும் மேற்பட்ட நோய்களுக்கும் சிகிச்சை அளிக்கப்பட உள்ளது. டயாலிசிஸ் சிகிச்சையும் இத்திட்டத்தில் விரைவில் சேர்க்கப்படும்.

இந்த ஆண்டு இறுதிக்குள் இந்த திட்டம் படிப்படியாக தமிழ்நாடு முழுவதும் விரிவுபடுத்தப்படும். மருத்துவத்தை தேடி மக்கள் செல்லும் சூழலை மாற்ற இந்த புதிய திட்டத்தை அரசு தொடங்கி உள்ளது. இந்த திட்டத்தில் 25 ஆயிரம் களப்பணியாளர்கள் பணியாற்றுவார்கள்.

கிருஷ்ணகிரி:

தமிழக முதல்-அமைச்சராக மு.க.ஸ்டாலின் பொறுப்பேற்றது முதல் பல திட்டங்களை செயல்படுத்தி வருகிறார். தேர்தல் பிரசாரத்தின் போது கொடுத்த வாக்குறுதிகளை ஒவ்வொன்றாக நிறைவேற்றி வருகிறார்.

பொதுவாக தேவைகளுக்காக மக்கள்தான் அரசை தேடி செல்ல வேண்டி இருக்கும். ஆனால் அரசே மக்களை நாடிச் சென்று அவர்கள் தேவையறிந்து சேவை செய்ய வேண்டும் என்பதன் அடிப்படையில் முதல்-அமைச்சர் மு.க.ஸ்டாலின் புதிதாக மக்களை தேடி மருத்துவம் என்ற திட்டத்தை அறிமுகப்படுத்தி உள்ளார்.

இந்தியாவிலேயே முதல் முறையாக கிருஷ்ணகிரி மாவட்டத்தில் ‘மக்களை தேடி மருத்துவம் திட்டம்’ இன்று (வியாழக்கிழமை) காலை தொடங்கி வைக்கப்பட்டது. இதற்கான விழா கிருஷ்ணகிரி மாவட்டம் ஓசூர் அருகே சூளகிரி ஒன்றியம் சாமனப்பள்ளி கிராமத்தில் நடைபெற்றது.

விழாவில், தமிழக முதல்-அமைச்சர் மு.க.ஸ்டாலின் கலந்து கொண்டு ‘மக்களை தேடி மருத்துவம்’ திட்டத்தை தொடங்கி வைத்தார்.

இந்த திட்டத்தின் மூலம் தற்போது அரசு மருத்துவமனைகளில் நீரிழிவுக்கும், ரத்த அழுத்தத்துக்கும் மருந்து வாங்கிச் சாப்பிட்டுக் கொண்டிருக்கிற 20 லட்சம் பேரின் வீடு தேடி சென்று மருந்து, மாத்திரைகள் கொடுக்கப்பட உள்ளது.

இந்த 20 லட்சம் பேரைத் தவிர, அரசு மருத்துவமனைகளுக்கும் வராத மலைவாழ் மக்கள், தனியார் மருத்துவமனைகளில் மருந்து வாங்கிச் சாப்பிடுகிற மக்களும் இதன் மூலம் பயன்பெற உள்ளனர்.

இதற்கு முன்னோட்டமாக திட்டம் தொடங்கப்பட்டதும், சாமனப்பள்ளி கிராமத்தில் பயனாளியின் இல்லத்திற்கே நேரடியாக சென்று மருந்துகளை மு.க.ஸ்டாலின் வழங்கினார். மற்றொரு பயனாளியின் வீட்டிற்கு சென்று பயனாளிக்கு அளிக்கப்படும் பிசியோதெரபி சிகிச்சையை முதல்-அமைச்சர் மு.க.ஸ்டாலின் பார்வையிட்டார்.

தொடர்ந்து செவிலியர் மற்றும் பிசியோதெரபி சிகிச்சையாளர்களுக்கான 3 புதிய வாகனங்களை தொடங்கி வைத்தார்.

பின்பு விழா மேடைக்கு வந்த முதல்-அமைச்சர் மு.க.ஸ்டாலின், காணொலி காட்சி மூலமாக 7 மாவட்டங்களில் மக்களை தேடி மருத்துவம் திட்டத்தை பார்வையிட்டார். பின்னர் 2 பேருக்கு மருத்துவ உபகரணங்களை மு.க.ஸ்டாலின் வழங்கினார்.

பின்பு தளி சட்டமன்ற தொகுதிக்கு உட்பட்ட பெட்டமுலாயம் மலை கிராம மலைவாழ் மக்களுக்கான 108 அவசர ஆம்புலன்சு சேவையை தொடங்கி வைக்கிறார். தொடர்ந்து மஞ்சள் காமாலை நோய்க்கான விரைவு பரிசோதனை திட்டத்தை முதல்-அமைச்சர் மு.க.ஸ்டாலின் தொடங்கி வைத்தார். அதன்பிறகு காணொலி காட்சி மூலமாக பெரு நிறுவனங்களின் சமூக பொறுப்புணர்வு நிதியின் கீழ் 1 லட்சம் தொழிலாளர்களுக்கு இலவச கொரோனா தடுப்பூசி செலுத்தும் முகாமையும் மு.க.ஸ்டாலின் தொடங்கி வைத்தார்.

நிகழ்ச்சியில் சுகாதாரத்துறை அமைச்சர் மா. சுப்பிரமணியன், அமைச்சர் காந்தி, சுகாதாரத்துறை செயலாளர் டாக்டர் ராதாகிருஷ்ணன் மற்றும் ஏராளமானோர் கலந்து கொண்டனர்.