கடலூர்

கடலூர்:

கடலூர் மாவட்டம் சாமியார்பேட்டை மற்றும் புதுப்பேட்டை கிராம மீனவர்கள் கடலுக்கு மீன்பிடிக்க செல்லாமல் போராட்டம் நடத்தி வருகின்றனர்.

தடை செய்யப்பட்டுள்ள சுருக்குமடி வலைகளை பயன்படுத்தி மீன்பிடிக்க அனுமதிக்க கூடாது என வலியுறுத்தி போராட்டத்தில் ஈடுபட்டுள்ளனர்.

கடலூர்:

கடலூர் மாவட்டத்தில் நேற்று முழு ஊரடங்கு கடைபிடிக்கப்பட்டது. இதையொட்டி கடலூர், நெல்லிக்குப்பம், பண்ருட்டி, வடலூர், குறிஞ்சிப்பாடி ஆகிய பகுதிகளில் ஊரடங்கு சரியான முறையில் கடைபிடிக்கப்படுகிறதா? அத்தியாவசிய தேவையின்றி யாரேனும் வாகனங்களில் சுற்றித்திரிகிறார்களா? என கலெக்டர் சந்திரசேகர் சாகமூரி வருவாய்த்துறை, காவல்துறை உள்பட பல்வேறு துறைகளை சேர்ந்த அதிகாரிகளுடன் நேரில் ஆய்வு மேற்கொண்டார்.

அதன்பிறகு அவர் நிருபர்களிடம் கூறியதாவது:-

மாவட்டத்தில் நகராட்சிகள், பேரூராட்சிகள் மற்றும் ஊராட்சி பகுதிகளில் கொரோனா தொற்று பரவலை தடுக்கும் வகையில் கிருமிநாசினி தெளித்து, தூய்மை பணிகள் மேற்கொள்ளப்பட்டு வருகின்றன. மேலும் பொதுமக்கள் தங்கள் பகுதிகளை தூய்மையாக வைத்துக்கொண்டு நோய் பரவாத வகையில் பராமரிக்க வேண்டும். இளைஞர்கள் மற்றும் பொதுமக்கள் கூட்டமாக அமர்ந்து பேசுவதை தவிர்த்து முககவசம் அணிந்து நோய்தொற்றை கட்டுப்பாட்டில் வைக்க அரசுக்கு முழு ஒத்துழைப்பு அளிக்க வேண்டும்.

மேலும் பொதுமக்கள் நோய்தொற்று பரவலை தடுக்கும் வகையில் தங்களையும், தங்களை சார்ந்தவர்களையும் காக்கும் வகையில் சமூக இடைவெளியை பின்பற்ற வேண்டும். அரசு அறிவித்த ஞாயிற்றுகிழமைகள் மட்டுமின்றி பிற நாட்களிலும் சமூக இடைவெளியை கடைபிடிக்க வேண்டும்.

பிறமாநிலங்கள் மற்றும் மாவட்டங்களில் இருந்து வருபவர்கள் தாங்களே முன்வந்து கொரோனா பரிசோதனை மேற்கொள்ள வேண்டும். இது தொடர்பாக மருத்துவ தகவல்களை பெற மாவட்ட கட்டுப்பாட்டு அறைக்கு 1077 என்ற கட்டணமில்லா டெலிபோன் எண்ணில் தொடர்புகொண்டு தகவல்களை பெற்றுக்கொண்டு மருத்துவம் தொடர்பான சந்தேகங்களை நிவர்த்தி செய்துகொள்ள வேண்டும் என்று கேட்டுக்கொள்கிறேன்.

கிராம கண்காணிப்புகுழு மற்றும் வருவாய்துறை, வளர்ச்சித்துறை பணியாளர்கள், மருத்துவ பணியாளர்கள் தொடர்ந்து கண்காணித்து நோய் தொற்று பரவலை கட்டுக்குள் கொண்டுவர ஒத்துழைக்குமாறு கேட்டுக்கொள்கிறேன்.

இவ்வாறு அவர் கூறினார்.

கடலூர்:

கடலூர் நகர பா.ஜ.க. சார்பில் மத்திய அரசின் கொரோனா தடுப்பு நடவடிக்கை குறித்த நிர்வாகிகளுக்கான ஆலோசனை கூட்டம் கடலூரில் நடைபெற்றது. கூட்டத்திற்கு கிழக்கு மாவட்ட தலைவர் கோவிலானூர் மணிகண்டன் தலைமை தாங்கினார். மேற்கு மாவட்ட தலைவர் கே.பி.டி. இளஞ்செழியன், மாவட்ட தலைவர் விநாயகம், கிழக்கு மாவட்ட பார்வையாளர்கள் சரவணன், சுந்தரம் ஆகியோர் முன்னிலை வகித்தனர். சிறப்பு அழைப்பாளராக இந்திய உணவு கழக இயக்குனரும், தேசிய பொதுக்குழு உறுப்பினருமான டாக்டர் எஸ்.பி. சரவணன் கலந்து கொண்டு சிறப்புரையாற்றினார்.

கூட்டத்தில் நகர, ஒன்றியங்களில் கொரோனா வைரஸ் பரவல் குறித்து பொதுமக்களிடையே கட்சியினர் விழிப்புணர்வு ஏற்படுத்த வேண்டும். மத்திய அரசின் செயல்பாடுகள் மற்றும் திட்டங்களை பொதுமக்களிடம் கொண்டு சேர்க்க வேண்டும். கொரோனா ஊரடங்கு காலத்தில் மத்திய அரசு மக்களுக்கு செய்த விரிவான தடுப்பு நடவடிக்கை குறித்து விளக்கி கூற வேண்டும். 2021-ல் நடைபெற உள்ள சட்டமன்ற தேர்தலில் கடலூர் மாவட்டத்தில் தாமரையை மலர செய்ய பாடுபடுவது என்பது உள்ளிட்ட தீர்மானங்கள் நிறைவேற்றப்பட்டன. இதில் கடலூர் தெற்கு ஒன்றிய தலைவர் பில்லாலி ரமேஷ், வடக்கு ஒன்றிய தலைவர் அருள், குறிஞ்சிப்பாடி ஒன்றிய தலைவர் ரவிச்சந்திரன், பா.ஜ.க. நிர்வாகிகள் பந்தல் பரசுராமன், மணிஇந்திரஜித் உள்பட பலர் கலந்து கொண்டனர். இதற்கான ஏற்பாடுகளை கடலூர் நகர தலைவர் வேலு வெங்கடேசன் செய்திருந்தார். முடிவில் நகர ஊடகப்பிரிவு இளையராஜா நன்றி கூறினார்.

கடலூர்:

நெய்வேலி என்.எல்.சி. இந்தியா நிறுவனத்தின் 2-ம் அனல் மின்நிலையத்தில் கடந்த 1-ந்தேதி கொதிகலன் வெடித்து தீ விபத்து ஏற்பட்டது. இதில் 6 ஒப்பந்த தொழிலாளர்கள் சம்பவ இடத்திலேயே உயிரிழந்தனர். 17 பேர் படுகாயமடைந்து சென்னையில் உள்ள தனியார் மருத்துவமனையில் சிகிச்சைக்காக அனுமதிக்கப்பட்டனர். இதில் ஜூலை 05 -ம் தேதி மேலும் ஒருவர் உயிரிழந்தார். தொடர்ந்து 16 பேர் சிகிச்சை பெற்று வந்தநிலையில் அடுத்தடுத்து 13 பேர் உயிரிழந்தனர். உயிரிழந்தவர்களில் 2 பேர் இளநிலை பொறியாளர்கள், 9 ஒப்பந்த ஊழியர்கள், 2 பேர் நிரந்தர ஊழியர்கள் ஆவார்கள்.

இந்நிலையில், இந்த விபத்தில் மேலும் ஒருவர் உயிரிழந்துள்ளதால், உயிரிழந்தோரின் எண்ணிக்கை 14 ஆக அதிகரித்தது. சென்னையில் உள்ள மருத்துவமனையில் சிகிச்சை பெற்று வந்த சுரேஷ் என்ற ஊழியர், இன்று சிகிச்சை பலனின்றி உயிரிழந்தார். மேலும், நெய்வேலி என்எல்சி-க்கு ரூ.5 கோடி அபராதம் விதித்து தேசிய பசுமை தீர்ப்பாயம் உத்தரவு பிறப்பித்துள்ளது குறிப்பிடத்தக்கது.

கடலூர்:

கொரோனா வைரஸ் பரவலை தடுப்பதற்காக தமிழகம் முழுவதும் ஊரடங்கு உத்தரவு அமலில் உள்ளது.  இந்த சூழ்நிலையை பயன்படுத்தி கடலூர் மாவட்டத்தை சேர்ந்த நபர் போலியாக ஒரு வங்கி கிளையையே உருவாக்கிய சம்பவம் அதிர்ச்சியை ஏற்படுத்தியுள்ளது. அதன் விபரம் வருமாறு

கடலூர் மாவட்டத்தை சேர்ந்தவர் கமல் பாபு (வயது 19).  கமல் பாபுவின் தந்தை 10 ஆண்டுகளுக்கு முன்பு காலமானார்.  இவரது தாயார்  எஸ்.பி.ஐ. வங்கியில் பணியாற்றி வந்துள்ளார்.   இந்நிலையில் தாய் லட்சுமி கடந்த 2 ஆண்டுகளுக்கு முன்பு பணியில் இருந்து ஓய்வு பெற்றுள்ளார்.   

இந்நிலையில் வேலையில்லாமல் சுற்றி திரிந்த கமல் பாபுவுக்கு ஊரடங்கு நேரத்தில் ஒரு யோசனை வந்துள்ளது.   அதன்படி போலியாக  எஸ்.பி.ஐ. வங்கி ஆரம்பிக்கும் எண்ணம் ஏற்பட்டது.   அதனைத்தொடர்ந்து கடந்த 3 மாதங்களுக்கு முன்பு போலி வங்கியை தொடங்கியுள்ளார்.

இந்நிலையில் பன்ருட்டியில் உள்ள ஒரு கிளையை ஒரு எஸ்பிஐ வாடிக்கையாளர் கவனித்தபோது, ​​ அவருக்க சந்தேகம் எழுந்துள்ளது.  உடனே அவர் அப்பகுதியில் உள்ள கிளை மேலாளரிடம் இந்த விஷயத்தை எடுத்துச் சென்றுள்ளார்.

அதை தொடர்ந்து கிளை மேலாளர் விசாரணை மேற்கொண்டதில் பன்ருட்டியில் எஸ்பிஐயின் இரண்டு கிளைகள் மட்டுமே செயல்படுவதாகவும், மூன்றாவது கிளை திறக்கப்படவில்லை என்றும் கூறியுள்ளார்.

மேற்படி தகவலைத் தொடர்ந்து, எஸ்பிஐ அதிகாரிகள் சம்பவ இடத்திற்குச் சென்று, எஸ்பிஐ வங்கியைப் போலவே தோற்றமளிக்கும் முழு அமைப்பும் இருப்பதைக் கண்டு அதிர்ச்சியடைந்தனர். உடனடியாக போலீசில் புகார் அளிக்கப்பட்டது.

கிளையில் எந்த பரிவர்த்தனைகளும் நடக்கவில்லை என்றும் இதுவரை யாரும் வங்கியால் ஏமாற்றப்படவில்லை என்றும் காவல்துறை தெரிவித்துள்ளது.

கடலூர்:

தமிழகத்தில் கடலோர மீனவர்கள் சுருக்குமடி வலைகள் மற்றும் இரட்டைமடி வலைகளைப் பயன்படுத்தி மீன்பிடிக்க தடை விதிக்கப்பட்டுள்ளது. ஆனாலும், பல்வேறு பகுதிகளில் தடை செய்யப்பட்ட இந்த வலைகளை பயன்படுத்தி மீன்பிடிப்பது தொடர்கிறது.

இந்த வலைகளுக்கான தடையை நீக்க வேண்டும் என சுருக்குமடி வலையை பயன்படுத்தும் மீனவர்கள் கோரிக்கை விடுத்து வந்தனர். இந்த வலையை பயன்படுத்தாத மீனவர்கள் இதற்கு எதிர்ப்பு தெரிவிக்கின்றனர். கடலூரில் சுருக்குமடி வலை தொடர்பாக இருதரப்பு மீனவர் குழுக்களிடையே பிரச்சனை ஏற்பட்டுள்ளது.

கடந்த இரு தினங்களுக்கு முன்பு சுருக்குமடி வலையில் பிடித்த மீன்களை கடலூர் மீனவர்கள் 7 வாகனம் மூலம் நாகப்பட்டினம் மாவட்டத்திற்கு எடுத்துச்சென்றனர். புதுச்சத்திரம் காவல் நிலைய எல்லைக்குட்பட்ட பகுதியில் அந்த வாகனங்களை போலீசார் உதவியுடன் மீன்வளத்துறை அதிகாரிகள் மடக்கிப் பிடித்து, மீன்களை பறிமுதல் செய்தனர்.

இந்த பரபரப்பான சூழ்நிலையில், சுருக்குமடி வலைக்கு விதிக்கப்பட்ட தடையை நீக்கக் கோரி பல்வேறு பகுதிகளில் மீனவர்கள் போராட்டத்தில் ஈடுபட்டுள்ளனர். சிதம்பரம் எம்.ஜி.ஆர் திட்டு மீனவ கிராமப் பெண்கள் திடீரென கடலில் இறங்கி போராடியதோடு, தலையில் பெட்ரோல் ஊற்றி தற்கொலை மிரட்டல் விடுத்தனர்.

மாவட்ட நிர்வாகம், மீன்வளத்துறை அலுவலகம் சுருக்குமடி வலைக்கு தடை விதித்ததற்கு கண்டனம் தெரிவித்த அவர்கள், படகுகளில் கருப்பு கொடிகளை கட்டி, தங்களது எதிர்ப்பை வெளிப்படுத்தினர். வருவாய் மற்றும் காவல்துறை அதிகாரிகள் நடத்திய பேச்சுவார்த்தையில் உடன்பாடு ஏற்பட்டதை தொடர்ந்து, மீனவர்களின் போராட்டம் கைவிடப்பட்டது. இந்த சம்பவத்தால் அங்கு பரபரப்பு ஏற்பட்டது.

இதேபோல் கடலூர் சில்வர்பீச்சில் திரண்ட மீனவர்கள், தர்ணாவில் ஈடுபட்டனர். கடலில் அனைத்து படகுகளையும் நிறுத்தி, அதில் கருப்பு கொடி கட்டி, எதிர்ப்பை தெரிவித்தனர். அதிகாரிகளின் பேச்சுவார்த்தைக்கு பிறகு போராட்டம் தற்காலிகமாக கைவிடப்பட்டது.

கடலூர் முதுநகர்:

கடலூரில் சுருக்குமடி வலையை பயன்படுத்தும் மீனவர்கள் கடந்த 1-ந் தேதி கடலுக்கு மீன்பிடிக்க செல்ல உள்ளதாக தகவல் வெளியானது. இதையடுத்து மீன்வளத்துறை அதிகாரிகள், அவர்களது படகுகளுக்கு ‘சீல்’ வைத்தனர். அப்போது கடலூர் துறைமுகத்தில் அதிகாரிகள் வந்த வாகனத்தை சிறைபிடித்து மீனவர்கள் போராட்டத்தில் ஈடுபட்டனர். இதனை தொடர்ந்து படகுகளில் இருந்த சீல் அகற்றப்பட்டது.

பின்னர் இது தொடர்பாக மாவட்ட கலெக்டர் அலுவலகத்தில் நடந்த பேச்சுவார்த்தையில் சுருக்குமடி வலைக்கான தடை நீடிப்பதாக தெரிவிக்கப்பட்டது. இதனால் நேற்று முன்தினம் கடலூர் துறைமுகத்தில் இருந்து பல மீனவர்கள் சுருக்கு மடி வலைகளை பயன்படுத்தி மீன் பிடிக்கும் படகுகளுடன் கடலுக்கு சென்று மீன்பிடித்து வந்ததாக கூறப்படுகிறது.

இதனை அறிந்த கடலூர் மீன்வளத்துறை துணை இயக்குனர் காத்தவராயன் மற்றும் அதிகாரிகள் சுருக்குமடி வலைகளை பயன்படுத்தி பிடிக்கப்பட்ட மீன்களை விற்பனைக்காக எடுத்து சென்ற லாரிகளை பறிமுதல் செய்யும் பணியில் ஈடுபட்டனர். இதில் நேற்று முன்தினம் மட்டும் 20-க்கும் மேற்பட்ட லாரிகள் கடலூர் மாவட்டத்தின் பல்வேறு பகுதிகளில் மீன்வளத்துறை அதிகாரிகளால் பறிமுதல் செய்யப்பட்டது.

இதை கண்டு ஆத்திரமடைந்த மீனவர்கள் மற்றும் வியாபாரிகள் நேற்று முன்தினம் இரவு, கடலூர் முதுநகர் மீன் வளத்துறை அதிகாரி அலுவலகத்தை முற்றுகையிட்டு போராட்டத்தில் ஈடுபட்டனர். இந்த நிலையில் பறிமுதல் செய்யப்பட்ட மீன்கள், மீன்வளத்துறை சார்பில் ஏலம் விடப்படும் என தகவல் வெளியானது.

இதற்கு எதிர்ப்பு தெரிவித்து நேற்று காலை மீண்டும் கடலூர் முதுநகர் மீன்வளத்துறை அதிகாரி அலுவலகத்தை மீனவர்கள் மற்றும் வியாபாரிகள் முற்றுகையிட்டு போராட்டத்தில் ஈடுபட்டனர். இதனை தொடர்ந்து கடலூர் துணை போலீஸ் சூப்பிரண்டு சாந்தி தலைமையிலான போலீசார் மற்றும் மீன்வளத்துறை அதிகாரிகள், மீனவர்கள் மற்றும் வியாபாரிகளுடன் பேச்சுவார்த்தையில் ஈடுபட்டனர்.

இதற்கிடையே 300-க்கும் மேற்பட்ட மீனவர்கள், சுமார் 2 மணி நேரத்திற்கும் மேலாக மீன்வளத்துறை அலுவலகத்தை முற்றுகையிட்டு போராட்டத்தில் ஈடுபட்டனர். அப்போது அவர்கள் கோரிக்கைகளை வலியுறுத்தி கோஷங்களை எழுப்பினர். இதனால் போலீசாருக்கும் மீனவர்களுக்கும் இடையே தள்ளுமுள்ளு ஏற்பட்டது. இதனால் அங்கு பதற்றமான சூழ்நிலை உருவானது.

இதன் காரணமாக அங்கு ஏராளமான போலீசார் குவிக்கப்பட்டனர். பின்னர் பேச்சுவார்த்தையின் முடிவில் பறிமுதல் செய்யப்பட்ட பெரிய லாரிகளுக்கு ரூ.50 ஆயிரம் அபராதமும், சிறிய லாரிகளுக்கு ரூ.25 ஆயிரம் அபராதமும் கட்ட வேண்டும் என மீன்வளத்துறை அதிகாரிகள் கூறினர்.

இதனை ஏற்று மீனவர்கள் மற்றும் வியாபாரிகள் தங்களது லாரிகளை மீன் வளத்துறை அதிகாரி அலுவலகத்தில் இருந்து எடுத்துச் சென்றனர். இந்த சம்பவத்தால் கடலூர் முதுநகரில் நேற்று பரபரப்பு ஏற்பட்டது.