கடலூர்:
கொரோனா வைரஸ் பரவலை தடுப்பதற்காக தமிழகம் முழுவதும் ஊரடங்கு உத்தரவு அமலில் உள்ளது. இந்த சூழ்நிலையை பயன்படுத்தி கடலூர் மாவட்டத்தை சேர்ந்த நபர் போலியாக ஒரு வங்கி கிளையையே உருவாக்கிய சம்பவம் அதிர்ச்சியை ஏற்படுத்தியுள்ளது. அதன் விபரம் வருமாறு
கடலூர் மாவட்டத்தை சேர்ந்தவர் கமல் பாபு (வயது 19). கமல் பாபுவின் தந்தை 10 ஆண்டுகளுக்கு முன்பு காலமானார். இவரது தாயார் எஸ்.பி.ஐ. வங்கியில் பணியாற்றி வந்துள்ளார். இந்நிலையில் தாய் லட்சுமி கடந்த 2 ஆண்டுகளுக்கு முன்பு பணியில் இருந்து ஓய்வு பெற்றுள்ளார்.
இந்நிலையில் வேலையில்லாமல் சுற்றி திரிந்த கமல் பாபுவுக்கு ஊரடங்கு நேரத்தில் ஒரு யோசனை வந்துள்ளது. அதன்படி போலியாக எஸ்.பி.ஐ. வங்கி ஆரம்பிக்கும் எண்ணம் ஏற்பட்டது. அதனைத்தொடர்ந்து கடந்த 3 மாதங்களுக்கு முன்பு போலி வங்கியை தொடங்கியுள்ளார்.
இந்நிலையில் பன்ருட்டியில் உள்ள ஒரு கிளையை ஒரு எஸ்பிஐ வாடிக்கையாளர் கவனித்தபோது, அவருக்க சந்தேகம் எழுந்துள்ளது. உடனே அவர் அப்பகுதியில் உள்ள கிளை மேலாளரிடம் இந்த விஷயத்தை எடுத்துச் சென்றுள்ளார்.
அதை தொடர்ந்து கிளை மேலாளர் விசாரணை மேற்கொண்டதில் பன்ருட்டியில் எஸ்பிஐயின் இரண்டு கிளைகள் மட்டுமே செயல்படுவதாகவும், மூன்றாவது கிளை திறக்கப்படவில்லை என்றும் கூறியுள்ளார்.
மேற்படி தகவலைத் தொடர்ந்து, எஸ்பிஐ அதிகாரிகள் சம்பவ இடத்திற்குச் சென்று, எஸ்பிஐ வங்கியைப் போலவே தோற்றமளிக்கும் முழு அமைப்பும் இருப்பதைக் கண்டு அதிர்ச்சியடைந்தனர். உடனடியாக போலீசில் புகார் அளிக்கப்பட்டது.
அதனைத் தொடர்ந்து போலியாக எஸ்பிஐ வங்கி கிளை நடத்தி வந்த கமல் பாபு உட்பட 3 பேரை போலீசார் கைது செய்தனர். ரப்பர் ஸ்டாம்ப் தயாரிக்கும் நிறுவனத்தை வைத்திருக்கும் மணிக்கம் (52), அச்சகத்தின் உரிமையாளரான குமார் (42) ஆகியோர் கைது செய்யப்பட்டனர்.
போலியாக ஆரம்பிக்கப்பட்ட கிளையில் இருந்து எழுதுபொருள் பொருட்கள் மற்றும் போலி ஆவணங்களை போலீசார் பறிமுதல் செய்து கட்டிடம் சீல் வைக்கப்பட்டது.
கிளையில் எந்த பரிவர்த்தனைகளும் நடக்கவில்லை என்றும் இதுவரை யாரும் வங்கியால் ஏமாற்றப்படவில்லை என்றும் காவல்துறை தெரிவித்துள்ளது.
