செங்கல்பட்டு

செங்கல்பட்டு:

செங்கல்பட்டு மருத்துவக் கல்லூரி மருத்துவமனை வெளியிட்டுள்ள செய்திக்குறிப்பில் கூறியிருப்பதாவது:-

செங்கல்பட்டு மருத்துவக் கல்லூரி மருத்துவமனையில் கொரோனா நோய் தொற்று கண்டறியும் ஆர்.ஐ. பி.சி.ஆர். பரிசோதனை மையம் சுமார் 1500 சதுரடி பரப்பளவில் அமைக்கப்பட்டு பொதுமக்களின் பயன்பாட்டிற்கு கொண்டுவரப்பட்டுள்ளது.
இந்த மையத்தில் நாள் ஒன்றுக்கு சுழற்சி முறையில் 100 பரிசோதனைகள் வரை மேற்கொள்ளமுடியும்.

இவ்வாறு அதில் கூறப்பட்டுள்ளது.

செங்கல்பட்டு:

செங்கல்பட்டு மாவட்டத்தில் கொரோனா தொற்று நோய் பரவலை தடுக்க அரசு அதிகாரிகள் பல்வேறு நடவடிக்கைகளை எடுத்து வருகின்றனர்.

அதன் தொடர்ச்சியாக, மாற்றுத்திறனாளிகள் நலத்துறை சார்பில் ஊரடங்கு காலத்தில் விடுதிகள், பராமரிப்பு இல்லங்களில் தங்கி இருக்கும் மாற்றுத்திறனாளிகள் தரையில் தவழ்ந்து செல்லும் போது நோய் தொற்றிலிருந்து பாதுகாக்க கையுறைகள், கால்களுக்கு கால் உறைகள், முட்டிப் பட்டைகள், முககவசங்கள், கிருமி நாசினிகள் ஆகிய பாதுகாப்பு கவசங்கள் அடங்கிய தொகுப்பு பைகளை செங்கல்பட்டு மாவட்ட அலுவலகத்தில் கலெக்டர் ஜான் லூயிஸ் நேற்று வழங்கினார்.

மேலும் வீடுகளில் வசிக்கும் மாற்றுத்திறனாளிகளுக்கும் இந்த தொகுப்பினை, நடமாடும் சிகிச்சை ஊர்தி மூலமாக வழங்க மாவட்ட நிர்வாகம் ஏற்பாடு செய்துள்ளதாக மாவட்ட கலெக்டர் தெரிவித்தார். நிகழ்ச்சியில், மாவட்ட மாற்றுத்திறனாளிகள் நல அலுவலர் சுப்பிரமணியன் உடனிருந்தார்.

செங்கல்பட்டு:

செங்கல்பட்டு மாவட்டத்தில் நேற்று மேலும் 3 பேருக்கு கொரோனா உறுதி செய்யப்பட்டு உள்ளது. இதனால் நோற்தொற்று ஏற்பட்டவர்களின் எண்ணிக்கை 53 ஆக உயர்ந்துள்ளது. 498 பேர் வீட்டில் தனிமைபடுத்தப்பட்டு கண்காணிக்கப்பட்டு வருகிறார்கள். மவாட்டத்தில் இதுவரை 1417 பேரிடம் பரிசோதனைக்காக மாதிரிகள் எடுக்கப்பட்டுள்ளது.

செங்கல்பட்டு:

செங்கல்பட்டு கலெக்டர் ஜான்லூயிசை தி.மு.க. எம்.பி., க.செல்வம், செய்யூர் எம்.எல்.ஏ., ஆர்.டி. அரசு, திருப்போரூர் எம்.எல்.ஏ., எல். இதயவர்மன் ஆகியோர் சந்தித்து கோரிக்கை மனு ஒன்றை கொடுத்தனர்.

அதில், செய்யூர், திருப்போரூர் ஆகிய தொகுதிகளில் பல ஆயிரம் ஏக்கரில் பயிரிடப்பட்ட தர்பூசணி பயிர்கள் அறுவடைக்கு தயாராகியுள்ள நிலையில், ஊரடங்கு உத்தரவு காரணமாக வியாபாரிகள் யாரும் வாங்க முன்வராமல் வீணாகி வருவதால் விவசாயிகள் நஷ்டம் அடைந்து வருகின்றனர். எனவே தர்பூசணி பழங்களை அரசே நேரடியாக கொள்முதல் செய்து விற்பனை செய்யவேண்டும் என்று தெரிவித்து இருந்தனர்.

மேலும் திருப்போரூர், செய்யூர் பகுதியில் உள்ள அரசு நேரடி நெல் கொள்முதல் நிலையங்களில் பல நாட்களாக நெல் மூட்டைகள் கொள்முதல் செய்யாமல் தேங்கியுள்ளது.

எனவே தேங்கியுள்ள நெல் மூட்டைகளை உடனடியாக கொள்முதல் செய்து அரசு குடோனுக்கு அனுப்ப வேண்டும்.

ஊரடங்கால் பாதிக்கப்பட்ட கல்பாக்கம் மற்றும் அதனை சுற்றியுள்ள கிராம மக்களுக்கு கல்பாக்கம் அணுமின் நிலையத்தின் மூலம் நிவாரணப் பொருட்கள் வழங்கவேண்டும் என்றும் தெரிவித்துள்ளனர். மனு தொடர்பாக உரிய நடவடிக்கை எடுப்பதாக கலெக்டர் தெரிவித்ததாக அவர்கள் தெரிவித்தனர்.

செங்கல்பட்டு:

செங்கல்பட்டு மாவட்டத்தில் கொரோனா வைரஸ் பரவாமல் தடுப்பது குறித்த ஆலோசனை கூட்டம் மாவட்ட கலெக்டர் அலுவலகத்தில் நடந்தது. கூட்டத்துக்கு மாவட்ட கலெக்டர் ஜான் லூயிஸ் தலைமை தாங்கினார். இதில் மாவட்ட போலீஸ் சூப்பிரண்டு கண்ணன், மாவட்ட வருவாய் அலுவலர் பிரியா, சுகாதார துறை துணை இயக்குனர் செந்தில்குமார் மற்றும் அரசு துறை அலுவலர்கள் கலந்துகொண்டனர்.

பின்னர் மாவட்ட கலெக்டர் ஜான்லூயிஸ் கூறியதாவது:-

செங்கல்பட்டு மாவட்டத்தில் கொரோனா வைரஸ் உறுதி செய்யப்பட்ட 28 பேர் மற்றும் அவர்களுடன் தொடர்புடையவர்கள் வசித்த பகுதிகள் தனிமைப்படுத்தப்பட்டு, நோய் பரவல் காக்கப்பட்ட பகுதிகளாக மாற்றப்பட்டு உள்ளது. இந்த பகுதிகளில் வருவாய்த்துறை, மருத்துவத்துறை, உள்ளாட்சித் துறை மற்றும் காவல்துறை மூலம் தனித்தனி குழுக்கள் அமைத்து கண்காணிக்கப்பட்டு வருகிறது.

வீடுகளில் தனிமைப்படுத்தப்பட்டு உள்ளவர்கள் அந்த பகுதியில் உள்ள கடைகளுக்கு வந்து செல்வதாக புகார்கள் வந்துள்ளதால், மாவட்டம் முழுவதும் தனிமைப்படுத்தப்பட்டவர்கள் வசிக்கும் பகுதியில் உள்ள கடைகள் அனைத்தும் இன்று (சனிக்கிழமை) முதல் மூடப்படும்.

அந்த பகுதி மக்களுக்கு 3 நாட்களுக்கு ஒருமுறை மட்டுமே பழம், காய்கறிகள் அடங்கிய பை ஒன்று ரூ.100 வீதம் வாகனங்கள் மூலம் அவர்களது வீட்டுக்கே சென்று வினியோகம் செய்யப்படும். மளிகை சாமான் மற்றும் மருந்து, மாத்திரைகளும் தேவைப்படும் வீட்டுக்கே நேரடியாக சென்று வழங்கிடவும் நடவடிக்கை எடுக்கப்பட்டு உள்ளது.

ஒத்துழைப்பு வழங்க வேண்டும்

ஒவ்வொரு முறையும் அத்தியாவசிய பொருட்கள் கொண்டு செல்லும் வாகனங்கள் இந்த பகுதிக்கு உள்ளே செல்லும்போதும், வெளியே வரும் போதும் கிருமி நாசினி தெளிக்கப்படும். கொரோனா வைரஸ் நோய் தொற்று பாதிக்கப்பட்டுள்ள நபர்கள் வசித்த வீடுகளில் தினம் 5 முறை கிருமி நாசினி தெளிக்கப்படுகிறது.

பால் வினியோகம் செய்யும் வெளி நபர்கள் எவரும் தனிமைப்படுத்தப்பட்டுள்ள பகுதிக்குள் செல்லாத வண்ணம் அப்பகுதி தன்னார்வலர்கள் மூலம் உரிய நடவடிக்கை மேற்கொள்ளப்படும். மாவட்ட நிர்வாகத்தின் இந்த முன்னெச்சரிக்கை நடவடிக்கைகளுக்கு அந்த பகுதி பொதுமக்கள் ஒத்துழைப்பு வழங்க வேண்டும்.

இவ்வாறு அவர் கூறினார்.