புதுச்சேரி

புதுச்சேரி :

கொரோனா வைரஸ் தொற்று பரவுவதை தடுக்க புதுவையில் ஊரடங்கு அமலில் இருந்து வருகிறது. ஊரடங்கில் ஒரு தளர்வாக மக்கள் நடைபயிற்சி மேற்கொள்ளவும், பொழுதுபோக்கவும் பாரதி பூங்கா திறக்கப்பட்டுள்ளது.

இதன் காரணமாக வீட்டிற்குள்ளேயே முடங்கிக் கிடந்தவர்கள் தங்கள் குழந்தைகளை அழைத்துக்கொண்டு பாரதி பூங்காவுக்கு வருகின்றனர். ஆனால் அங்கு காதலர்கள் என்ற பெயரில் சிலர் நடந்துகொள்ளும் விதம் அனைவரையும் முகம் சுளிக்க வைப்பதாக உள்ளது.

வீடுகளில் ஏதாவது காரணத்தை கூறிவிட்டு வெளியே வரும் காதல் ஜோடிகள் பாரதி பூங்காவிற்குள் வந்ததும் சமூக இடைவெளி என்பதை காற்றில் பறக்கவிட்டுவிடுகிறார்கள். காற்றுபுகாதபடி கட்டிணைத்து நெருக்கமாக அமர்ந்து கொள்கின்றனர்.

தங்களை சுற்றி யார், யார் இருக்கிறார்கள்? நம்மை கவனிக்கிறார்களா? என்பதை பற்றியெல்லாம் கவலைப்படாமல் ஆபாசமாக நடந்துகொள்கிறார்கள். இவர்களது அட்டகாசத்தை யாராலும் சகிக்க முடியாது. பூங்காக்களில் சுற்றித் திரியும் காதல் ஜோடிகள் யாரும் முகக்கவசம் அணிவதில்லை என்பது இன்னும் உச்சகட்டம்.

இதையெல்லாம் காவல்துறை கண்டுகொள்வதில்லை. ரோட்டில் செல்பவர்களை மடக்கி அபராதம் விதிப்பதில் மட்டுமே குறியாக உள்ளனர். இதேபோல் பூங்காக்களில் அநாகரீகமாக நடந்துகொள்பவர்களை பிடித்து அபராதம் விதித்தால் சமூகமாவது உருப்படும். அந்த பணியினை காவல்துறையினர் செய்தால் பொதுமக்களின் பாராட்டுகளை பெறலாம்.

புதுச்சேரி:

புதுச்சேரி சமூக நலத்துறைஅமைச்சர் கந்தசாமியின் தாயார் ராஜம்மாளுக்கு கொரோனா தொற்று உறுதி செய்யப்பட்டது. தொடர்ந்து நடைபெற்ற பரிசோதனையில் அமைச்சர் கந்தசாமி, மகன் விக்னேஷ் ஆகியோருக்கும் கொரோனா தொற்று உறுதியானது. இவர்கள் ஜிப்மரில் சிகிச்சை பெற்றனர்.

இந்த நிலையில் புதுச்சேரி கல்வி மற்றும் வேளாண்துறை அமைச்சர் கமலக்கண்ணனுக்கு கொரோனா தொற்று உறுதி செய்யப்பட்டுள்ளது.

கல்வித்துறை அமைச்சர் கமலக்கண்ணன் காரைக்காலை சேர்ந்தவர். அவர், புதுச்சேரி தீயணைப்பு நிலையம் அருகேயுள்ள அரசு இல்லத்தில் தங்கியுள்ளார். அவருக்குக் காய்ச்சல், சளி தொந்தரவு ஏற்பட்டது. இதனால், சுகாதாரத்துறை சார்பில் அவருக்கு இன்று கொரோனா பரிசோதனை நடத்தப்பட்டது. அதில், கொரோனா தொற்று உறுதியானது. அதைத்தொடர்ந்து, ஜிப்மரில் இன்று மதியம் அனுமதிக்கப்பட்டுள்ளார்.

புதுச்சேரி:

உலக நாடுகளை அச்சுறுத்தி வரும் கொரோனாவால் பாதிக்கப்படுவர்களின் எண்ணிக்கை நாளுக்கு நாள் அதிகரித்த வண்ணம் உள்ளது.

இந்தியாவில் இதுவரை கொரோனாவுக்கு 21 லட்சத்துக்கும் அதிகமானோர் பாதிக்கப்பட்டுள்ளனர். கொரோனாவுக்கு 43 ஆயிரத்துக்கும் மேற்பட்டோர் உயிரிழந்துள்ளனர். 14 லட்சத்துக்கும் அதிகமானோர் டிஸ்சார்ஜ் செய்யப்பட்டுள்ளனர்.
 
இந்நிலையில், புதுச்சேரியில் இன்று ஒரே நாளில் 264 பேருக்கு கொரோனா தொற்று உறுதி செய்யப்பட்டதால் பாதிக்கப்பட்டவர்களின் எண்ணிக்கை 5,382 ஆக உயர்ந்துள்ளது. புதுச்சேரியில் இதுவரை 3,201 பேர் குணமடைந்த நிலையில் கொரோனா தொற்றால்  இதுவரை 87 பேர் உயிரிழந்துள்ளனர்.