ஈரோடு

சென்னிமலை:

சென்னிமலை பேரூராட்சியில் 15 வார்டுகள் உள்ளது. இந்த வார்டுகளில் வசிக்கும் பொதுமக்களுக்கு காவிரி ஆற்று குடிநீர் வினியோகம் செய்யப்பட்டு வருகிறது. இதற்காக ஆங்காங்கே மேல்நிலை தொட்டிகள் கட்டப்பட்டு குடிநீர் வினியோகம் செய்வதற்காக குழாய்கள் அமைக்கப்பட்டு உள்ளன.

இந்த நிலையில் சென்னிமலையில் தினசரி மார்க்கெட் அருகே காமாட்சி அம்மன் கோவில் செல்லும் வழியில் காவிரி ஆற்று குடிநீர் குழாய் உடைந்து தண்ணீர் வீணாக சாக்கடைக்கு செல்கிறது. இதுகுறித்து அந்த பகுதியை சேர்ந்த பொதுமக்கள் கூறுகையில், ‘குடிநீர் குழாய் உடைந்து கடந்த 2 மாதங்களாக இரவு, பகலாக தண்ணீர் வீணாக வெளியேறி சாக்கடை கால்வாயில் கலக்கிறது. இந்த தண்ணீர் செல்லும் பாதையில் புற்கள் கூட முளைத்து வளர்ந்து விட்டது.

குழாய் உடைந்து தண்ணீர் வெளியேறுவது குறித்து நாங்கள் பலமுறை சென்னிமலை பேரூராட்சி அலுவலகத்தில் அதிகாரி களிடம் புகார் தெரிவித்து விட்டோம். ஆனால் இதுவரை எந்தவித நடவடிக்கையும் எடுக்கவில்லை. ஒவ்வொரு மாதமும் வீட்டு குடிநீர் இணைப்புக்காக ரூ.150 வரியாக பேரூராட்சிக்கு செலுத்துகிறோம். ஆனால் போதுமான குடிநீர் எங்களுக்கு கிடைக்காத பட்சத்தில் குழாய் உடைந்து இப்படி தண்ணீர் வீணாக செல்வது வேதனையாக உள்ளது,’ என்றனர்.

சத்தியமங்கலம்:

சத்தியமங்கலம் வேளாண்மை உற்பத்தியாளர்கள் கூட்டுறவு சங்கத்தில் வாரந்தோறும் திங்கள் மற்றும் வெள்ளிக்கிழமைகளில் வாழைத்தார் ஏலம் நடைபெற்று வருவது வழக்கம்.

சத்தியமங்கலம் சுற்றுவட்டாரப் பகுதிகளில் உள்ள அரசூர், பெரியூர், உக்கிரம், செண்பகபுதூர், பவானிசாகர், சக்கரசம் பாளையம், கே.என்.பாளையம், அரியப்பம் பாளையம் உள்ளிட்ட பல்வேறு பகுதிகளைச் சேர்ந்த 100-க்கும் மேற்பட்ட விவசாயிகள் 2,056 வாழைத்தார்களை ஏலத்திற்கு கொண்டு வந்தனர்.

இதில் செண்பகப்புதூரைச் சேர்ந்த விவசாயி சஞ்சீவி என்பவர் தனது தோட்டத்தில் விளைந்த ஆளுயர 2 தேன் வாழைத்தார்களை விற்பனைக்குக் கொண்டுவந்தார். இந்த ஆளுயர தேன் வாழைத்தாரில் 18 சீப்புகள் மற்றும் 300-க்கும் மேற்பட்ட வாழைக்காய்கள் இருந்தன.

இந்த வாழைத்தாரை ஏலம் எடுக்க வியாபாரிகள் இடையே கடும் போட்டி நிலவியது. விவசாயி சஞ்சீவி கொண்டு வந்த இந்த 2 வாழைத்தாரில் ஒரு வாழைத்தார் ரூ. 1000-க்கும், மற்றொரு வாழைத்தார் ரூ. 800-க்கும் ஏலம் போனது.

ஈரோடு:

கொரோனா பரவுவதை கட்டுப்படுத்த கடந்த மார்ச் மாதம் முதல் நாடு முழுவதும் முழு ஊரடங்கு அமல்படுத்தப்பட்டது. தமிழகத்தில் நடப்பு மாதம் 30-ந் தேதி வரை பல்வேறு தளர்வுகளுடன் ஊரடங்கு நீட்டிக்கப்பட்டு உள்ளது. இந்த தளர்வுகளால் பொதுமக்கள் இயல்பு வாழ்க்கைக்கு திரும்பி வருகிறார்கள்.

இந்தநிலையில் ஈரோடு மாவட்டத்தில் தினமும் சுமார் 100 பேர் கொரோனாவுக்கு புதிதாக பாதிக்கப்பட்டு வருகிறார்கள். எனவே கொரோனா பரவுவதை தடுக்க பொதுமக்களும் விழிப்புணர்வுடன் இருக்க வேண்டும் என்றும், முகக்கவசம் அணிதல், கைகளை அடிக்கடி சோப்பு போட்டு கழுவுதல், சமூக இடைவெளியை முறையாக கடைபிடித்தல் போன்ற நடைமுறைகளை கட்டாயம் கடைபிடிக்க வேண்டும் என்றும் சுகாதாரத்துறை சார்பில் தொடர்ந்து அறிவுறுத்தப்பட்டு வருகிறது.

இந்தநிலையில் தமிழ்நாடு சுகாதாரத்துறை சார்பில் நேற்று வெளியிடப்பட்ட பட்டியலில் ஈரோடு மாவட்டத்தில் புதிதாக 98 பேருக்கு கொரோனா தொற்று உறுதி செய்யப்பட்டு உள்ளது. இதனால் மாவட்டத்தில் கொரோனாவால் பாதிக்கப்பட்டவர்களின் மொத்த எண்ணிக்கை 10 ஆயிரத்து 393 ஆக உயர்ந்தது. இதில் நேற்று ஒரே நாளில்101 பேர் குணமடைந்தார்கள். இதுவரை மொத்தம் 9 ஆயிரத்து 468 பேர் கொரோனாவில் இருந்து மீண்டு உள்ளனர். தற்போது வரை மொத்தம் 124 பேர் கொரோனாவுக்கு பலியாகி உள்ளனர்.

தாளவாடி:

ஈரோடு மாவட்டம் தாளவாடியை அடுத்த முதியனூர் கிராமத்தை சேர்ந்தவர் சிவண்ணா (வயது 30). இவருடைய மனைவி குமாரி (27). இவர்களுக்கு 2 குழந்தைகள் உள்ளனர்.

சிவண்ணா வீட்டுக்கு எதிரே உள்ள வீட்டில் வசித்து வருபவர் தினேஷ். தாளவாடியில் உள்ள வேளாண்துறை அலுவலகத்தில் தற்காலிக டிரைவராக தினேஷ் பணியாற்றி வருகிறார். இவருக்கு திருமணமாகி மனைவியும், 6 மாத கைக்குழந்தையும் உள்ளது.

எதிரெதிரே வீடு என்பதால் சிவண்ணா மனைவி குமாரியும், தினேசும் சாதாரணமாக பழகி வந்து உள்ளனர். பின்னர் இந்த பழக்கம் கள்ளக்காதலாக மாறி உள்ளது.

இதனால் கடந்த சில வாரங் களுக்கு முன்பு வீட்டை விட்டு வெளியேறி தினேசுடன் குமாரி சென்றார். இதைத்தொடர்ந்து 2 பேரும் தாளவாடியில் ஒரு வாடகை வீட்டில் குடும்பம் நடத்தி வந்ததாக கூறப்படுகிறது.

இதற்கிடையே முதியனூரில் உள்ள தனது தாய் வீட்டுக்கு குமாரி சென்றார். இதனை அறிந்த சிவண்ணா நேற்றுமுன்தினம் அங்கு சென்று, குழந்தைகள் நலன் கருதி தன்னுடன் குடும்பம் நடத்த வருமாறு அழைத்தார். இதைத்தொடர்ந்து சிவண்ணாவின் வீட்டுக்கு குமாரி சென்றார்.

இந்தநிலையில் நேற்றுமுன்தினம் இரவு சிவண்ணா வீட்டிற்கு வந்த தினேஷ், தன்னுடன் குமாரி இருந்த புகைப்படத்தை வெளியிட்டு விடுவதாக மிரட்டியதாக தெரிகிறது. இதனால் மனமுடைந்த குமாரி நள்ளிரவில் வீட்டில் தூக்குப்போட்டு தற்கொலை செய்து கொண்டார்.

ஆத்திரம் அடைந்த அவருடைய உறவினர்கள் மற்றும் பொதுமக்கள் குமாரியின் பிணத்தை தினேஷ் வீட்டின் முன்பு வைத்து நேற்று போராட்டத்தில் ஈடுபட்டனர். மேலும் தினேஷ் வீட்டின் ஜன்னல் கண்ணாடிகளையும் கல்வீசி தாக்கினர்.

உடனே போலீசார் சம்பவ இடத்துக்கு விரைந்து சென்று தினேசை விரைவில் கைது செய்துவிடுவோம் என்றனர். இதையடுத்து குமாரியின் உடலை போலீசார் மீட்டு பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர். மேலும் தலைமறைவான தினேசை வலைவீசி தேடி வருகிறார்கள்.