கடலூர்

பண்ருட்டி:

பண்ருட்டி கும்பகோணம் சாலையில் காமராஜ் நகர் பகுதியை சேர்ந்த செந்தில்குமார் என்பவர் பருப்பு மண்டி நடத்தி வருகிறார். வழக்கம்போல் நேற்று இரவு கடையை பூட்டிவிட்டு வீட்டுக்கு சென்றுவிட்டார்.

நள்ளிரவில் செந்தில்குமாரின் கடையின் பூட்டை உடைத்து உள்ளே புகுந்த நபர்கள் கடையில் இருந்த முந்திரி, பாதாம் உள்ளிட்ட விலை உயர்ந்த பருப்பு வகைகளை திருடினர்.

பின்னர் பக்கத்தில் உள்ள முத்து என்பவரது பழக்கடையின் பூட்டை உடைத்து உள்ளே புகுந்து அங்கும் கையில் கிடைத்த பொருட்களை திருடி உள்ளனர். அதற்கு அடுத்ததாக உள்ள துரை என்பவரது பழைய பேப்பர் கடையிலும், மற்றொரு கடையிலும் பூட்டுகளை உடைத்து கைவரிசை காட்டி உள்ளனர்.

அதே சாலையில் உள்ள வேறொரு கடைக்கு லோடு இறக்க வந்த லாரி டிரைவர் அடுத்தடுத்து 4 கடைகள் பூட்டுகள் உடைக்கப்பட்டு திறந்துகிடப்பதை கண்டு அதிர்ச்சியடைந்தார்.

இதுகுறித்து பண்ருட்டி போலீசாருக்கு தகவல் தெரிவிக்கப்பட்டது. துணை போலீஸ் சூப்பிரண்டு சபியுல்லா, இன்ஸ்பெக்டர் சந்திரன், சப்இன்ஸ்பெக்டர் புஷ்பராஜ் மற்றும் போலீசார் சம்பவ இடத்துக்கு நேரில் வந்து விசாரணை நடத்தினர்.

அந்த சாலையில் உள்ள கண்காணிப்பு கேமராவில் பதிவான காட்சிகளையும் ஆய்வு செய்தனர். அப்போது நள்ளிரவு அந்த பகுதியில் திரிந்த ஒரு நபரின் உருவம் கேமராவில் பதிவாகி இருந்தது. அந்த காட்சிகளின் அடிப்படையில் சந்தேகத்துக்கு இடமான ஒருநபரை போலீசார் பிடித்து விசாரணை நடத்தி வருகின்றனர்.

அடுத்தடுத்து 4 கடைகளில் நடந்த கொள்ளை சம்பவம் வியாபாரிகளிடையே அதிர்ச்சியை ஏற்படுத்தி உள்ளது.

கடலூர்:

கடலூர் பாதிரிகுப்பத்தில் வடக்கு மாவட்ட அ.தி.மு.க. அலுவலகம் உள்ளது. இன்று காலை வடக்கு மாவட்ட அ.தி.மு.க. செயலாளராக மீண்டும் நியமிக்கப்பட்டுள்ள முன்னாள் அமைச்சர் எம்.சி.சம்பத் மற்றும் புதிய நிர்வாகிகள் கட்சி அலுவலகத்துக்கு வந்தனர்.

அங்கு கோடைகாலத்தில் பொதுமக்கள் பயன்பெறும் வகையில் நீர் மோர் பந்தலை எம்.சி.சம்பத் திறந்துவைத்தார். இதையடுத்து எம்.சி.சம்பத் உள்ளிட்ட புதிய நிர்வாகிகளுக்கு சால்வை அணிவித்து பாராட்டும் நிகழ்ச்சி நடந்தது.

அப்போது திடீரென கடலூர் புதுபாளையம் பகுதியை சேர்ந்த எத்திராஜ், அருண் ஆகிய 2 அ.தி.மு.க. பிரமுகர்களிடையே வாக்குவாதம் ஏற்பட்டது. உடனடியாக அவர்கள் இருவரையும் சமாதானமாக போகும்படி கட்சி அலுவலகத்துக்கு வெளியே அனுப்பினர்.

ஆனால் அங்கும் அவர்களிடையே மோதல் ஏற்பட்டு ஒருவரை ஒருவர் தாக்கிகொள்ளும் சூழ்நிலை ஏற்பட்டது. இதனால் அதிர்ச்சியடைந்த அ.தி.மு.க. நிர்வாகிகள் 2 பேரையும் தடுத்து அங்கிருந்து அனுப்பிவைத்தனர்.

இந்த மோதல் சம்பவம் அ.தி.மு.க. வட்டாரத்தில் பரபரப்பை ஏற்படுத்திய நிலையில், இதுபற்றி தகவல் அறிந்த திருப்பாதிரிபுலியூர் போலீசார் சுமார் 10 பேர் அ.தி.மு.க. அலுவலகத்துக்கு பாதுகாப்பு பணிக்காக நிறுத்தப்பட்டனர். அவர்கள் அ.தி.மு.க. அலுவலக பகுதியில் தேவையில்லாமல் கூட்டம் சேருவதை தடுக்கும் பணியில் ஈடுபட்டனர்.

கடலூர்:

கடலூர் ஊராட்சி ஒன்றிய குழு கூட்டம் அதன் தலைவர் தெய்வ பக்கிரி தலைமையிலும், ஒன்றியக்குழு துணைத்தலைவர் அய்யனார், வட்டார வளர்ச்சி அலுவலர்கள் சக்தி, அசோக் பாபு ஆகியோர் முன்னிலையிலும் நடைபெற்றது.

கூட்டத்தில் நடைபெற்ற விவாதங்கள் பின்வருமாறு:-

ரமேஷ்:- எங்கள் பகுதியில் அடிக்கடி மின்தடை ஏற்படுவதால் பொதுமக்கள் கடும் அவதி அடைந்து வருகின்றனர்.

குமுதம் சேகர்:- திருமாணிக்குழி பகுதியில் பழுதடைந்த மேல்நிலை நீர்த்தேக்க தொட்டி இடிக்கப்பட்டு உள்ளது. தற்போது அந்த பகுதியில் தண்ணீர் பற்றாக் குறை நிலவி வருவதால், புதிதாக உடனடியாக மேல்நிலை நீர்த்தேக்க தொட்டி கட்டிதர வேண்டும். மேலும் அதே பகுதியில் அரசு புறம் போக்கு நிலத்தில் தனியார் சேர்ந்த நபர்கள் அத்துமீறி செம்மண் எடுத்துச் செல்வதை தடுக்க நடவடிக்கை எடுக்க வேண்டும்.

முரளி:- எங்கள் பகுதியில் 110 அடிக்கு மேல் செம்மண் குவாரிகளில் மணல் எடுப்பதால் இதனை கண்காணித்து நடவடிக்கை எடுக்க வேண்டும்.

கார்த்திகேயன்:- சட்டமன்ற கூட்டத்தொடரில் முன்னாள் முதல்-அமைச்சர் கருணாநிதி பிறந்தநாளை அரசு விழாவாக அறிவித்தும், டாக்டர் அம்பேத்கர் பிறந்த நாள் விழாவை சமத்துவ நாளாக அறிவித்ததற்கும், கவுன்சிலர்கள் கூட்டத்தில் பங்கேற்கும் தொகையை உயர்த்தி அறிவித்த முதல்-அமைச்சர் மு.க.ஸ்டாலினுக்கும் நன்றி தெரிவித்துக் கொள்கிறோம்.

ஞானசவுந்தரி:- எங்கள் பகுதியில் அங்கன்வாடி கட்டிடம் புதிதாக கட்டி தரவேண்டும்.

கிரிஜா செந்தில்:- எங்கள் பகுதியில் புதிதாக நீர்த்தேக்க தொட்டி கட்டி தரவேண்டும்

தமிழழகி அல்லாராஜ்:- எங்கள் பகுதியில் போடப்பட்டுள்ள சாலைகள் தரமற்ற சாலைகள் உள்ளது. இதனால் உடனடியாக சாலைகளை ஆய்வு செய்து நடவடிக்கை எடுக்கவேண்டும்.

சுபாஷினி :- எங்கள் பகுதிகளில் குளங்களை தூர்வாரி நீர் சேமிக்க நடவடிக்கை மேற்கொள்ள வேண்டும். பள்ளிக் கூடத்தில் சுற்றுச்சூழல் அமைப்பு நடவடிக்கை மேற்கொள்ள வேண்டும்.

இதனை தொடர்ந்து கூட்டம் நடைபெற்றுக் கொண்டிருந்தபோது தமிழழகி கணவர் அல்லாராஜ் , ஒன்றிய குழுத் தலைவரிடம் சென்று நாங்கள் வைக்கும் கோரிக்கை சம்பந்தமாக கேட்காமல் இருப்பது நியாயமா? என கேட்டார்.

அப்போது அங்கிருந்த அ.தி.மு.க. கவுன்சிலர்கள் கோரிக்கைகள் தொடர்பாகவும், கூட்டத்திலும் ஒன்றிய கவுன்சிலர் தான் பேச வேண்டும். ஆனால் நீங்கள் எப்படி இங்கு வந்து பேசுவீர்கள் என கேட்டு கடும் வாக்குவாதத்தில் ஈடுபட்டனர். இதனை தொடர்ந்து அதிகாரிகள் கவுன்சிலர் கணவரை வெளியில் அனுப்பி வைத்தனர்.

இவ்வாறு கூட்டத்தில் விவாதங்கள் நடைபெற்றன.

கடலூர்:

தமிழகத்திற்குள் நுழைந்த பிரஞ்சுகாரர்கள் சென்னையில் உள்ள புனித ஜார்ஜ் கோட்டையை கைப்பற்றினர். இதனைத் தொடர்ந்து ஆங்கிலேயர்கள் செஞ்சியை ஆண்ட மன்னர்களிடம் இருந்து கடலூரில் உள்ள புனித டேவிட் கோட்டையை வாங்கினர். பின்னர் அதனை தங்கள் தலைநகரமாகக் கொண்டு ஆட்சி செய்து வந்தனர்.

இந்த சூழலில் ஆங்கிலேயர்கள் கடலூர் துறைமுகம் பகுதியில் கடல் வழி வணிகத்தில் தீவிரமாக ஈடுபட்டு வந்தனர். இதனால் கடலூர் முதுநகர் மற்றும் துறைமுகம் பகுதிகள் வரலாற்றில் சிறப்புமிக்க இடம் பெற்றது குறிப்பிடத்தக்கது.

தொடர்ந்து காலம் செல்ல செல்ல கடலூர் திருப்பாதிரிப்புலியூர் பகுதி அசுர வளர்ச்சி அடைந்து வந்தது. இதனால் முது நகர் பகுதி வளர்ச்சி அடையாமல் இருந்து வந்தது.

கடலூரில் இருந்து விருத்தாசலம், சிதம்பரம், சீர்காழி, காட்டுமன்னார் கோவில், காரைக்கால், நாகப்பட்டினம் உள்ளிட்ட பல்வேறு இடங்களுக்கு செல்வோர் கடலூர் முதுநகர் பகுதி வழியாகவே செல்கின்றனர் என்பது குறிப்பிடத்தக்கது.

மேலும் அந்தப்பகுதியில் நாளுக்கு நாள் வாகனங்களின் எண்ணிக்கையும் அதிகரித்துக் கொண்டே உள்ளது. இதன் எதிரொலியாக அந்தப் பகுதியில் மிகுந்த போக்குவரத்து நெரிசல் ஏற்பட்டு வாகனங்கள் நீண்ட வரிசையில் அணிவகுத்து ஆமை வேகத்தில் ஊர்ந்து செல்லும் அவல நிலை ஏற்பட்டுள்ளது.

மேலும் அந்த பகுதியில் உள்ள சாலையை கடக்க முடியாமல் பாதசாரிகள் மற்றும் பொதுமக்கள் மிகவும் சிரமத்திற்கு உள்ளாகி வருகின்றனர். இந்த சூழலில் கனரக வாகனங்கள் அந்த வழியாக அதிகம் செல்வதால் வாகன ஓட்டிகள் இந்த பகுதியை கடந்து செல்லும் முன் மிகவும் சவாலாக உள்ளது. எனவே இதுகுறித்து கடலூர் மாவட்ட நிர்வாகம் உரிய நடவடிக்கை எடுத்து கனரக வாகனங்கள் செல்வதற்கு வேறு பாதை அமைத்து தர வேண்டும் என சமூக ஆர்வலர்கள் கோரிக்கை விடுத்துள்ளனர்.