திருவண்ணாமலை

திருவண்ணாமலை அருணாசலேஸ்வரர் கோவில் பவுர்ணமி கிரி வலத்திற்கு புகழ் பெற்றது. தமிழகத்தில் கொரோனா பரவலை தொடர்ந்து கடந்த இரண்டு ஆண்டுகளுக்கும் மேலாக பவுர்ணமி கிரிவலம் செல்ல தடை விதிக்கப்பட்டு வருகிறது.

நேற்று இரவு 10.30 மணி முதல் இன்று இரவு 10.30 மணி வரை மாசிமாதபவுர்ணமி காலமாகும். இந்த பவுர்ணமிக்கு பக்தர்கள் கிரிவலம் செல்ல வரவேண்டாம் என்று மாவட்ட நிர்வாகம் சார்பில் உத்தரவிடப்பட்டிருந்தது.

இந்த நிலையில் நேற்று மாலை முதல் பக்தர்கள் அதிக அளவில் திருவண்ணாமலைக்கு வருகை தந்தனர்.அவர்கள் வழக்கம்போல் 14 கி.மீ. தூரம் நடந்து சென்று கிரிவலம் வந்தனர்.

கிரிவலப்பாதையில் போலீசார் கண்காணிப்பு பணியில் ஈடுபட்ட போதும் பக்தர்கள் கிரிவலம் செல்ல தடை விதிக்கவில்லை.இதனால் மிகவும் உற்சாகமுடன் பக்தர்கள் கிரிவலம் சென்றனர்.

இன்று காலையும் ஏராளமான பக்தர்கள் கிரிவலம் சென்றனர். கோவிலில் சாமி தரிசனம் செய்யவும் பக்தர்கள் கூட்டம் அலைமோதியது. சென்னை, கோவை, ஈரோடு, மதுரை, திருநெல்வேலி, கன்னியாகுமரி உள்பட அனைத்து மாவட்டங் களிலிருந்தும் பக்தர்கள் வருகை தந்தனர். இதனால் அனைத்து கடைகளிலும் விறுவிறுப்பாக வியாபாரம் நடைபெற்றது.

பக்தர்கள் கூட்டம் அதிகரித்த நிலையில் நேற்று இரவு நகர்ப்புற உள்ளாட்சி மன்ற தேர்தலை முன்னிட்டு வேட்பாளர்கள் பிரசாரத்தில் ஈடுபட்டதால் மாட வீதியில் போக்குவரத்து நெருக்கடி ஏற்பட்டது.

திருவண்ணாமலை:

திருவண்ணாமலை அருணாசலேஸ்வரர் கோவில் உலக அளவில் பிரசித்தி பெற்றது. இங்கு சிவபெருமான் மலையாக எழுந்தருளியிருப்பது இருப்பதாக பக்தர்கள் நம்புகின்றனர். இதனால் கோவில் வரும் பக்தர்கள் கிரிவலம் செல்வதை வழக்கமாக கொண்டுள்ளனர்.

அதிலும் மாதந்தோறும் பவுர்ணமி நேரத்தில் கிரிவலம் சென்றால் பல மடங்கு பலன் கிடைக்கும் என்று பக்தர்கள் கருதுகின்றனர். இதன் காரணமாக ஒவ்வொரு பவுர்ணமி தினத்திலும் திருவண்ணாமலையில் 5 லட்சத்துக்கும் மேற்பட்ட பக்தர்கள் திரண்டு கிரிவலம் செல்வார்கள்.

இந்த நிலையில் தமிழகத்தில் கொரோனா பரவல் காரணமாக கடந்த 2020-ம் ஆண்டு முதல் 2 ஆண்டாக திருவண்ணாமலையில் பக்தர்கள் கிரிவலம் செல்ல தடை விதிக்கப்பட்டு வருகிறது.

வருகிற மார்ச் மாதம் வந்துவிட்டால் 2 ஆண்டுகள் முடிவடைந்து மூன்றாமாண்டு தொடங்கிவிடும்.

இந்த இடைப்பட்ட காலங்களில் கார்த்திகை மாத பவுர்ணமி நாளில் கோர்ட்டு உத்தரவின் பேரில் ஒரு நாளைக்கு 10 ஆயிரம் வீதம் பக்தர்கள் வீதம் 2 நாட்கள் 20 ஆயிரம் பக்தர்கள் மட்டும் கிரிவலம் செல்ல அனுமதிக்கப்பட்டனர்.

தற்போது நகர்மன்ற உள்ளாட்சி தேர்தல காரணம்காட்டி பல்வேறு தளர்வுகள் அறிவிக்கப் பட்டுள்ளன. வேட்பாளர்கள் தீவிர பிரச்சாரத்தில் ஈடுபட்டு வருகின்றனர்.

இருந்தபோதிலும் திருவண்ணாமலையில் பவுர்ணமியை முன்னிட்டு இன்று இரவு 10.30 மணி முதல் நாளை (16-ந்தேதி) இரவு 10.30 மணி வரை பக்தர்கள் கிரிவலம் செல்ல அனுமதி இல்லை என்று மாவட்ட நிர்வாகம் சார்பில் அறிவிக்கப்பட்டுள்ளது.

இதுதொடர்பாக மாவட்ட கலெக்டர் முருகேஷ் வெளியிட்டுள்ள அறிக்கையில் பக்தர்கள் கிரிவலம் செல்ல வேண்டாம். பக்தர்கள் நலன் கருதி கொரோனா முன்னெச்சரிக்கையாக எடுக்கப்பட்டுள்ள இந்த நடவடிக்கைக்கு முழு ஒத்துழைப்பு தரவேண்டும் என்று கேட்டுக் கொண்டுள்ளார்.

திருவண்ணாமலையில் நேற்று ஞாயிறு விடுமுறை தினம் என்பதால் ஏராளமான பக்தர்கள் கிரிவலம் சென்றனர். ஆனால் இன்று பக்தர்கள் வருகை குறைவாகவே உள்ளது.

இன்று இரவு கிரிவலம் செல்ல அதிகளவில் பக்தர்கள் வரலாம் என்று கருதப்படுவதால் திருவண்ணாமலை கிரிவலப் பாதையில் தடுப்புகள் வைத்து போலீசார் கண்காணிப்பு பணியில் ஈடுபட நடவடிக்கை எடுக்கப்பட்டுள்ளது.

இதற்கிடையே திருவண்ணாமலையில் பவுர்ணமி கிரிவலம் செல்ல 2 ஆண்டுகளுக்கும் மேலாக தொடர்ந்து தடை விதிக்கப்பட்டு வருவதால் பக்தர்கள் வேதனை அடைந்துள்ளனர். பல்வேறு தளர்வுகள் அறிவிக்கப்பட்டுள்ள நிலையில் கட்டுப்பாடுகளுடன் பவுர்ணமி கிரிவலம் செல்ல அனுமதிக்க வேண்டும் என்று வேண்டுகோள் விடுத்துள்ளனர்.

வெம்பாக்கம்:

கடலூர் மாவட்டம் மாத்தூர் கிராமத்தை சேர்ந்தவர் சசிகுமார். இவரது மனைவி நர்மதா (வயது 26). இவரது மகன்கள் நித்தீஷ் (6) சித்தார்த் (4).

நர்மதாவின் கணவர் சசிகுமார் 4 வருடங்களுக்கு முன்பு சாலை விபத்தில் இறந்துவிட்டார். தொடர்ந்து மகன்களுடன் தனியாக வசித்து வந்தார்.

கடலூர் மாவட்டம் பண்ருட்டி பகுதியை சேர்ந்த தனியார் வங்கியில் நிதி வசூல் செய்யும் வினோத்குமார் (30) என்பவருடன் நர்மதாவுக்கு பழக்கம் ஏற்பட்டது. கடந்த 3 ஆண்டுகளாக இருவரும் நெருங்கி பழகி வந்தனர். இருவரும் கணவன் மனைவியாக வாழ்ந்து வந்தனர்.

இந்த நிலையில் கடந்த 4 மாதங்களுக்கு முன்பு திருவண்ணாமலை மாவட்டம் செய்யாறு அருகே உள்ள மாங்கால் கூட்டுரோடு ஷூ கம்பெனியில் நர்மதா வேலைக்கு சேர்ந்தார்.

இருவரும் மகன்களுடன் வெம்பாக்கம் அருகே மாங்கால் கூட்ரோடு அருகே உள்ள ஆக்கூர் கிராமத்தில் வாடகை வீட்டில் வசித்து வந்தனர். வினோத்குமார் அடிக்கடி குடித்து விட்டு வந்து மனைவியிடம் தகராறில் ஈடுபட்டார்.

நர்மதா நேற்று வழக்கம்போல் வேலைக்கு சென்றார். அவரது மகன்கள் இருவரும் வீட்டில் இருந்தனர். மாலையில் வேலை முடிந்து வீடு திரும்பிய போது 2-வது மகன் சித்தார்த் ரத்த வெள்ளத்தில் மயங்கிக் கிடந்தான். இதனை கண்டு நர்மதா அதிர்ச்சி அடைந்து கதறி அழுதார்.

அக்கம் பக்கத்தினர் உதவியுடன் சிறுவனை மீட்டு மாமண்டூர் அரசு ஆரம்ப சுகாதார நிலையத்திற்கு கொண்டு சென்றனர். அங்கு பரிசோதித்த டாக்டர்கள் சித்தார்த் ஏற்கனவே இறந்து விட்டதாக தெரிவித்தனர்.

இதுகுறித்து நர்மதா தூசி போலீசில் புகார் செய்தார். போலீசார் வழக்கு பதிந்து விசாரணை நடத்தினர்.

இதில் கள்ளக்காதலன் வினோத்குமார் சிறுவன் சித்தார்த்தின் இரண்டு கால்களையும் பிடித்து சுவற்றில் சுழற்றி அடித்து கொடூரமாக கொலை செய்தது தெரியவந்தது. குடிபோதையில் வீட்டிற்கு வந்த போது சிறுவனை அடித்துக் கொன்று விட்டதாக வினோத்குமார் தெரிவித்துள்ளார்.

போலீசார் வழக்கு பதிவு செய்து அவரை கைது செய்தனர். தொடர்ந்து அவரிடம் கொலைக்கு வேறு ஏதாவது காரணம் உள்ளதா? என போலீசார் விசாரணை நடத்தி வருகின்றனர்.

இந்த சம்பவம் அந்த பகுதியில் பெரும் பரபரப்பை ஏற்படுத்தியது.