புதுக்கோட்டை

புதுக்கோட்டை:

தமிழக சட்டமன்ற கூட்டத்தொடர் நாளை (5-ந்தேதி) தொடங்க உள்ள நிலையில் எம்.எல்.ஏ.க்கள் அனைவரும் கொரோனா பரிசோதனை செய்துகொள்ள அறிவுறுத்தப்பட்டு உள்ளது. அதன்படி நேற்று பரிசோதனை செய்துகொண்ட பெரம்பலூர் தொகுதி தி.மு.க. எம்.எல்.ஏ. பிரபாகரனுக்கு கொரோனா தொற்று உறுதி செய்யப்பட்டது.
 

புதுக்கோட்டை:

புதுக்கோட்டை மாவட்டம் நார்த்தா மலை அருகேயுள்ள கொத்தமங்கலத்துப்பட்டி கிராமத்தை சேர்ந்தவர் கலைச்செல்வன்-பழனியம்மாள் தம்பதியின் மகன் புகழேந்தி (வயது 11). நார்த்தாமலையில் உள்ள பாட்டி வீட்டிற்கு சென்றிருந்தார்.

இந்த நிலையில் கடந்த 30-ந்தேதி பசுமலைப்பட்டி யில் உள்ள துப்பாக்கி சுடும் பயற்சி மையத்தில் இருந்து பாய்ந்து வந்த தோட்டா சிறுவனின் தலையில் பாய்ந்தது. புதுக்கோட்டையில் முதலுதவி சிகிச்சை பெற்ற சிறுவன் மேல் சிகிச்சைக்காக தஞ்சை அரசு மருத்துவக்கல்லூரி மருத்துவமனைக்கு கொண்டு செல்லப்பட்டார்.

31-ந்தேதி மாலை அறுவை சிகிச்சை மூலம் டாக்டர்கள் குழுவினர் சிறுவன் தலையில் இருந்த குண்டை அகற்றினர். ஆனாலும் சிறுவனின் உடல் நிலையில் முன்னேற்றம் ஏற்படாத நிலையில் நேற்று மாலை பரிதாபமாக உயிரிழந்தார்.

இதற்கிடையே சம்பவம் தொடர்பாக கீரனூர் போலீசார் மத்திய தொழில் பாதுகாப்பு படையினர் மீது வழக்குப்பதிவு செய்தனர். மேலும் இலுப்பூர் வருவாய் கோட்டாட்சியர் தண்டாயுத பாணியை விசாரணை அதிகாரியாக நியமித்து உத்தரவிடப்பட்டது.

அவர் கடந்த 4 நாட்களாக துப்பாக்கி சுடும் பயிற்சியில் ஈடுபட்டவர்களிடம் விசாரணை நடத்தினார். அப்போது அவர்கள் தமிழக போலீசாரும் பயிற்சியில் ஈடுபட்டதாகவும், அவர்களையும் விசாரிக்க வேண்டும் என்று கூறினர்.

சம்பவம் நடந்த இடத்தையும் பார்வையிட்ட கோட்டாட்சியர் தண்டாயுதபாணி இன்று காலை புதுக்கோட்டை மாவட்ட கலெக்டர் கவிதா ராமுவிடம் விசாரணை அறிக்கையினை தாக்கல் செய்தார்.

அதில் சிறுவன் தலையில் குண்டு பாய்ந்தது தொடர்பாக இதுவரை நடத்தப்பட்ட விசாரணையில் எந்தவித முன்னேற்றமும் இல்லை. துப்பாக்கி சுடும் பயிற்சி மையத்தில் மத்திய தொழில் பாதுகாப்பு படையினர் பயன்படுத்தியது இன்சார்ட் ரக துப்பாக்கியாகும். அதில் இருந்து வெளியாகும் தோட்டா 600 மீட்டர் வரை மட்டுமே செல்லும் திறன் கொண்டது.

தமிழக போலீசார் பயன்படுத்தியது சாதாரண ரக ரைபிள் துப்பாக்கியாகும். அதிலிருந்து அதிகபட்சமாக 30 மீட்டர் வரை மட்டுமே குண்டு பாய்ந்து செல்லும். ஆனால் தற்போது துப்பாக்கி சுடும் பயிற்சி மையத்திற்கும், குண்டு பாய்ந்த சிறுவன் இருந்த இடத்திற்கும் இடைப்பட்ட தூரம் சுமார் 2 கிலோ மீட்டர் ஆகும். அப்படியானால் சிறுவன் மீது பாய்ந்தது எப்படி?

மேலும் சிறுவன் தலையில் பாய்ந்த துப்பாக்கி குண்டு அறுவை சிகிச்சை மூலம் அகற்றப்பட்டுள்ளது. அந்த குண்டை ஆய்வுக்கு அனுப்பி எந்த ரக துப்பாக்கியில் இருந்து வெளியானது என்று கண்டுபிடித்தால் மட்டுமே அடுத்தகட்ட விசாரணைக்கு செல்ல முடியும் என்று அந்த அறிக்கையில் கோட்டாட்சியர் தண்டாயுதபாணி தெரிவித்துள்ளார்.

இந்த அறிக்கையின் அடிப்படையில் அடுத்தகட்ட நடவடிக்கையை கலெக்டர் கவிதா ராமு மேற்கொள்வார் என்று தகவல் வெளியாகி உள்ளது. இதற்கிடையே நார்த்தாமலை பகுதி மக்கள் இனிமேலும் இப்படி ஒரு துயர சம்பவம் நடக்காமல் இருக்கவும், வருங்கால சந்ததியினர் பாதிக்கப்படாமல் இருக்கவும் இந்த துப்பாக்கி சுடும் பயிற்சி மையத்தை நிரந்தரமாக மூடவேண்டும் என்று ஒட்டுமொத்தமாக குரல் கொடுத்துள்ளனர்.

அறந்தாங்கி:

புதுக்கோட்டை மாவட்டம் ஆவுடையார்கோவில் தாலுகாவிற்குட்பட்ட கருங்காடு, பாண்டிபத்திரம், குளத்துக் குடியிருப்பு, பெருநாவளூர் உள்ளிட்ட சுற்று வட்டார கிராமங்களில் சுமார் 2 ஆயிரம் ஏக்கர் பரப்பளவில் விவசாயிகள் நெற்பயிர் சாகுபடி செய்து வருகின்றனர்.

இப்பகுதிகளில் ஆற்று நீர் அல்லாமல், மழை நீரை நீர் நிலைகளில் சேமித்து வைத்து அதனை நம்பியே விவசாயிகள் விவசாயம் செய்து வருகின்றனர். கடந்த ஆண்டைவிட இந்தாண்டு உரிய நேரத்தில் மழை பெய்து நீர் நிலைகள் நிரம்பியதால் விவசாயிகள் நல்ல முறையில் விவசாயம் செய்து, பயிர்கள் செழித்தன.

நெற்பயிர்கள் முற்றி இன்னும் ஓரிரு வாரங்களில் அறுவடைக்கு தயாரான நிலையில் கடந்த 3 நாட்களாக பெய்த கனமழையால் நெற்பயிர்கள் முற்றிலும் நீரில் மூழ்கி சேதமாகியுள்ளது.

இதுகுறித்து அப்பகுதி விவசாயிகள் கூறுகையில், கடந்தாண்டு பெய்த தொடர் கனமழையால் விவசாயத்தை முற்றிலும் இழந்த நாங்கள், அதற்கான பயிர்க்காப்பீடு தொகை இதுவரை கிடைக்கவில்லை, முற்றிலும் வாழ்வாதாரத்தை இழந்த நிலையில் இந்தாண்டு, கூட்டுறவு சங்கங்கள், தேசியமயமாக்கப்பட்ட வங்கிகள் போன்றவற்றில் நகைக்கடன் வாங்கி ஏக்கர் ஒன்றிற்கு 25 ஆயிரம் வரை செலவு செய்து விவசாயம் செய்தோம்.

ஆனால் இந்த முறையும் பெய்த கனமழையால் அறுவடைக்கு தயாரான பயிர்கள் நீரில் மூழ்கி முற்றிலும் சேதமாகியுள்ளது. இதனால் விவசாயிகள் நாங்கள் மிகுந்த வேதனை அடைந்துள்ளோம். மேலும் நீரில் மூழ்கி தப்பித்த ஒரு சில வயல் கதிர்களை, தண்ணீருக்குள் அறுக்கும் எந்திரம் மூலம் அறுவடை செய்ய ஒரு மணி நேரத்திற்கு ரூ.3600 வரை செலவாகிறது.

இதனால் விவசாயிகள் மிகுந்த வேதனையை சந்தித்து வருகிறோம். எனவே அரசு உடனடியாக தலையிட்டு போர்க்கால அடிப்படையில் அதிகாரிகள் மூலம் கணக்கீடு செய்து, உரிய நிவாரணம் வழங்க கேட்டுக் கொண்டனர்.