கள்ளக்குறிச்சி

கண்டாச்சிமங்கலம்:

தியாகதுருகம் அருகே உள்ள பிரிதிவிமங்கலம் கிராமத்தைச் சேர்ந்த சுபாஷ் மனைவி ஜெயலட்சுமி(வயது 25). இவர் தற்போது தனது கணவருடன் மும்பையில் வாசினகா பகுதியில் வசித்து வருகிறார்.

இந்நிலையில் நர்சிங் தேர்வு எழுதுவதற்காக கடந்த ஒரு வாரத்துக்கு முன்பு சொந்த ஊரான பிரிதிவிமங்கலத்துக்கு வந்த ஜெயலட்சுமி தேர்வை எழுதி விட்டு கடந்த 6-ந் தேதி மும்பை செல்வதற்காக அவரது மாமனார் ராஜியிடம் கூறிவிட்டு தியாகதுருகம் பஸ் நிலையத்தில் இருந்து புறப்பட்டு சென்றார்.

 ஆனால் அவர் இதுவரை மும்பைக்கு வந்து சேரவில்லை என கூறப்படுகிறது. இது குறித்த புகாரின் பேரில் தியாகதுருகம் போலீசார் வழக்குப்பதிவு செய்து மாயமான ஜெயலட்சுமியை தேடி வருகிறார்கள்.

மூங்கில்துறைப்பட்டு:

மூங்கில்துறைப்பட்டு அருகே உள்ள வடமாமந்தூர் தக்கா பகுதியை சேர்ந்தவர் அலிமா பீ(வயது 70). இவர் நேற்று முன்தினம் மதியம் வீட்டில் ரத்த காயங்களுடன் பிணமாக கிடந்தார். மேலும் அவர் அணிந்திருந்த 5 பவுன் நகையை காணவில்லை.

இது குறித்த புகாரின் பேரில் மூங்கில்துறைப்பட்டு போலீசார் வழக்குப்பதிவு செய்து விசாரணை நடத்தி வந்தனர்.

இந்த நிலையில் சந்தேகத்தின் பேரில் அலிமா பீ பேரனான சல்மான் (26) என்பவரை போலீசார் பிடித்து விசாரணை நடத்தினர். அப்போது அவர் முன்னுக்குப்பின் முரணாக பதில் அளித்தார். இதையடுத்து அவரை போலீஸ் நிலையத்துக்கு அழைத்து சென்று கிடுக்கிப்பிடி விசாரணை நடத்தினர்.

இதில் அலிமா பீயை கொலை செய்ததை அவர் ஒப்புக்கொண்டார். தொடர்ந்து அவர் போலீசாரிடம் அளித்த வாக்குமூலத்தில் கூறியதாவது:-

செலவுக்கு பணம் இல்லாமல் இருந்தேன். இந்த நிலையில் நான் எனது பாட்டி வீட்டுக்கு சென்றேன். அப்போது அவர் வீட்டில் தனியாக இருந்தார். இதையடுத்து பாட்டியை கொலை செய்து அவரது நகையை திருட முடிவு செய்தேன். அதன்படி நான் கல்லை எடுத்து எனது பாட்டி என்றும் பாராமல் அவரை அடித்து கொலை செய்தேன்.

பின்னர் அவரின் கழுத்தில் கிடந்த 5 பவுன் நகையை திருடினேன். அந்த நகையை எனது உறவினரான சவுகத்அலி (39) என்பவரிடம் கொடுத்து அடமானம் வைத்து அதன் மூலம் கிடைத்த பணத்தை இருவரும் பிரித்து கொண்டோம்.

இவ்வாறு வாக்குமூலத்தில் சல்மான் கூறியிருந்தார்.

இதையடுத்து சல்மான் மற்றும் சவுகத்அலியை போலீசார் கைது செய்தனர். மேலும் இவர்களிடம் இருந்து நகை, 2 மோட்டார் சைக்கிள்கள், ரூ.31 ஆயிரம் ரொக்கம் ஆகியவை பறிமுதல் செய்யப்பட்டது. நகைக்காக பாட்டியை பேரனே கொலை செய்த சம்பவம் பெரும் பரபரப்பை ஏற்படுத்தி உள்ளது.

கள்ளக்குறிச்சி:

கள்ளக்குறிச்சி அருகே தியாகதுருகம் போலீஸ் சரகம் வடதொரசலூர் கிராமத்தை சேர்ந்த 16 வயது சிறுமி தியாகதுருகத்தில் உள்ள அரசினர் பெண்கள் மேல்நிலைப்பள்ளியில் 11-ம் வகுப்பு படித்து வந்தார்.

இந்த சிறுமிக்கும் அதே பகுதியைச் சேர்ந்த ஏழுமலை மகன் டிராக்டர் டிரைவர் வெங்கடேசன் (வயது 23) என்பவருக்கும் பழக்கம் ஏற்பட்டது.

இந்நிலையில் வெங்கடேசன் சிறுமியை திருமணம் செய்து கொள்வதாக ஆசை வார்த்தை கூறி உல்லாசமாக இருந்தார். இதற்கிடையில் அந்த சிறுமி கொரோனா ஊரடங்கு காரணமாக பள்ளி விடுமுறையின்போது, கேரள மாநிலம் மாகி பகுதிக்கு வீட்டு வேலைக்கு சென்றுள்ளார். அங்கு வீட்டு வேலையில் ஈடுபட்டிருந்த சிறுமி மயங்கி விழுந்துள்ளார். உடனடியாக அங்கிருந்தவர்கள் சிறுமியை அங்குள்ள மருத்துவமனைக்கு அனுப்பி வைத்தனர். அங்கு பரிசோதனை செய்த மருத்துவர்கள் சிறுமி 2 மாதம் கர்ப்பம் அடைந்துள்ளாக கூறியுள்ளனர்.

இது தொடர்பாக கேரள மாநிலம் மாகி போலீஸ் நிலையத்திற்கு புகார் அனுப்பப்பட்டுள்ளது. மாகி போலீசார் சிறுமியிடம் விசாரணை நடத்தி அங்கு வழக்குப்பதிவு செய்து, அந்த வழக்கை கள்ளக்குறிச்சி மாவட்ட போலீஸ் சூப்பிரண்டு அலுவலகத்திற்கு மாற்றியுள்ளனர்.

மாவட்ட போலீஸ் சூப்பிரண்டு அலுவலகம் மூலம் கள்ளக்குறிச்சி அனைத்து மகளிர் போலீஸ் நிலையத்திற்கு வழக்கு அனுப்பப்பட்டு நடவடிக்கை மேற்கொள்ளப்பட்டது.

இதனையடுத்து விசாரணை மேற்கொண்ட கள்ளக்குறிச்சி அனைத்து மகளிர் காவல் நிலைய ஆய்வாளர் புவனேஸ்வரி மற்றும் போலீசார் 16 வயது சிறுமியை காதலித்து கர்ப்பமாக்கிய டிராக்டர் டிரைவர் வெங்கடேசன் என்பவரை நேற்று போக்சோ சட்டத்தின் கீழ் வழக்குப்பதிவு செய்து கைது செய்து சிறையில் அடைத்தனர்.

உளுந்தூர்பேட்டை:

உளுந்தூர்பேட்டை பாத்திமா நகர் பகுதியை சேர்ந்தவர் விஸ்வேஸ்வரன்(வயது 36.) உளுந்தூர்பேட்டை அருகே உள்ள ஒரு தனியார் பெண்கள் கல்லூரியில் துணைப் பேராசிரியராக பணிபுரிந்து வரும் இவர் சம்பவத்தன்று வீட்டை பூட்டி விட்டு குடும்பத்துடன் கும்பகோணத்திற்கு சென்றார்.

பின்னர் மீண்டும் அங்கிருந்து குடும்பத்துடன் வீட்டுக்கு வந்து பார்த்தபோது வீட்டின் முன்பக்க கதவில் போடப்பட்ட பூட்டு உடைக்கப்பட்டு இருந்ததை கண்டு அதிர்ச்சி அடைந்தார். உள்ளே சென்று பார்த்தபோது பீரோவில் இருந்த பொருட்கள் ஆங்காங்கே சிதறி கிடந்தன. அதில் இருந்த ரூ.1 லட்சம் மதிப்புள்ள நகைகள் மற்றும் வெள்ளிப்பொருட்களை மர்ம நபர்கள் கொள்ளையடித்து சென்றது தெரியவந்தது.

இதுபற்றிய தகவல் அறிந்து வந்த உளுந்தூர்பேட்டை துணை போலீஸ் சூப்பிரண்டு மணிமொழியன் தலைமையிலான போலீசார் கொள்ளை நடந்த வீ்ட்டை நேரில் பார்வையிட்டு விசாரணை நடத்தினார்கள். மேலும் கைரேகை நிபுணர்கள் வரவழைக்கப்பட்டு ரேகை மற்றும் தடயங்களை சேகரிக்கப்பட்டது. மேலும் இந்த கொள்ளை சம்பவம் தொடர்பாக போலீசார் வழக்கு பதிவு செய்து நகைகளை கொள்ளையடித்து சென்ற மர்ம நபர்களை வலைவீசி தேடி வருகிறார்கள்.

கல்லூரி பேராசிரியர் வீட்டின் பூட்டை உடைத்து நகைகளை மர்ம நபர்கள் கொள்ளையடித்து சென்ற சம்பவம் உளுந்தூர்பேட்டையில் பரபரப்பை ஏற்படுத்தியுள்ளது.

திருக்கோவிலூர்:

திருக்கோவிலூர் பகுதியில் தடைசெய்யப்பட்ட லாட்டரி சீட்டுக்களை விற்று வந்த கீழையூர் பொங்கமேட்டுத்தெருவைச் சேர்ந்த பச்சமுத்து மகன் தமிழ்ச்செல்வன் (வயது 31) என்பவரை திருக்கோவிலூர் போலீஸ் இன்ஸ்பெக்டர் பாபு, சப்-இன்ஸ்பெக்டர் சிவச்சந்திரன் ஆகியோர் கைது செய்து சிறையில் அடைத்தனர்.

மேலும் இவரது குற்ற செயலை தடுக்கும் வகையில் தமிழ்செல்வனை குண்டர் தடு்ப்பு சட்டத்தில் கைது செய்ய கள்ளக்குறிச்சி மாவட்ட போலீஸ் சூப்பிரண்ட் ஜியாவுல் ஹக் மாவட்ட கலெக்டருக்கு பரிந்துரை செய்தார். இதைஏற்று கலெக்டர் ஸ்ரீதர் உத்தரவின் பேரில் தமிழ்ச்செல்வனை போலீசார் குண்டர் தடுப்பு சட்டத்தின் கீழ் கைது செய்தனர். இதுபற்றி சிறையில் இருக்கும் தமிழ்செல்வனிடம் போலீசார் தெரிவித்தனர்.