அரியலூர்

அரியலூர்:

அரியலூர் மாவட்டம் செந்துறை அருகிலுள்ள சிறுகடம்பூர் கிராமத்தில் உள்ள சுப்பிரமணியர் கோவிலில், மூன்றாவது ஆண்டாக பால்குட திருவிழா நடைபெற்றது.

பால்குடம் திருவிழாவை முன்னிட்டு, ஐம்பதுக்கும் மேற்பட்ட பக்தர்கள் காப்பு கட்டி சுப்ரமணியர் செல்லியம்மன் கோவில் அருகிலுள்ள ஏரியிலிருந்து பால்குடம், காவடி எடுத்தனர்.

அவர்கள் ஊரின் முக்கிய வீதிகள் வழியாக மேளதாளங்கள் முழங்க நடனமாடியபடி ஊர்வலமாக கோவிலை வந்தடைந்தனர். பின்னர் வள்ளி, தெய்வானை, சுப்ரமணியருக்கு பக்தர்கள் கொண்டு வந்த பாலைக்கொண்டு சிறப்பு அபிஷேகம் நடைபெற்றது.

பின்னர் பல்வேறு மலர்கள் கொண்டு அலங்கரிக்கப்பட்டு தீபாராதனை காட்டப்பட்டது.

இதேபோல் செந்துறை பகுதியிலுள்ள உஞ்சினி, நல்லாம்பாளையம், செந்துறை உள்ளிட்ட பல்வேறு கிராமங்களில் முருகன் கோவில்களில் சுவாமிகளுக்கு பால், தயிர், தேன் உட்பட பல்வேறு பொருட்களால் சிறப்பு அபிஷேகம் நடைபெற்று, தீபாராதனை காண்பிக்கப்பட்டது.

அரியலூர்:

அரியலூர் மாவட்டம் திருமானூர் அரசு ஆரம்ப சுகாதார நிலையத்தில் கொரோனா   மூன்றாவதுஅலை பரவி வரும் இந்த காலகட்டத்தில் மருத்துவமனைக்கு வரும் பொதுமக்களுக்கு விழிப்புணர்வு நிகழ்ச்சியும் மற்றும்  கபசுர குடிநீர் சூரணம் வழங்கும் நிகழ்ச்சி நடைபெற்றது.

இந்நிகழ்ச்சியில் மருத்துவமனைக்கு வந்த பொதுமக்களிடத்தில் மருத்துவ அலுவலர் செல்வமணி விழிப்புணர்வு ஏற்படுத்தினார். அப்போது அவர் கூறுகையில், பொதுமக்கள் அனைவரும் மாஸ்க் அணிந்து வெளியில் செல்லுங்கள்.  

சளி, இருமல், உடல வலி, காய்ச்சல் போன்ற அறிகுறிகள் இருந்தால் உடனடியாக அரசு மருத்துவமனைக்கு வந்து தங்கள் உடலை பரிசோதித்துக்கொள்ளுங்கள்.

அடிக்கடி நோய் எதிர்ப்பு சக்தி தரக்கூடிய கபசுர குடிநீர் பருகுங்கள் என்று பொது மக்களிடம் தெரிவித்தார். நிகழ்ச்சிக்கு மருத்துவ அலுவலர் டாக்டர் செல்வமணி தலைமை தாங்கினார்.  

இதில் திருமானூர் சித்த மருத்துவ அலுவலர் சாகுல் ஹமீது கலந்துகொண்டு பொது மக்களுக்கு கொரோனா விழிப்புணர்வு மற்றும் கபசுர குடிநீர், நிலவேம்பு குடிநீர் சூரணம் வழங்கினார்.

முடிவில் மருந்தாளுநர் குணசேகரன் நன்றி கூறினார்.

செந்துறை:

அரியலூர் மாவட்டம் ஆண்டிமடம் அருகே உள்ள தேவனூர் கிராமத்தை சேர்ந்தவர் எஸ்.எஸ்.சிவசங்கர். அரியலூர் மாவட்ட தி.மு.க. செயலாளரான இவர் பெரம்பலூர் மாவட்டம் குன்னம் தொகுதியில் தி.மு.க. சார்பில் போட்டியிட்டு வெற்றி பெற்று மாநில பிற்படுத்தப்பட்டோர் மற்றும் சிறுபான்மையினர் நலத் துறை அமைச்சராக இருந்து வருகிறார்.

அமைச்சர் ஆன பின்னர் மாநிலம் முழுவதும் தொடர்ந்து பல்வேறு அரசு நிகழ்ச்சிகள் மற்றும் கட்சி நிகழ்ச்சிகளிலும் ஓய்வின்றி பணியாற்றி வருகிறார். இந்த நிலையில் கடந்த 2 நாட்களாக அவருக்கு கடுமையான சளி காய்ச்சல் மற்றும் இருமல் ஏற்பட்டது.

இது தொடர்பாக பரிசோதனை மேற்கொண்டபோது தனக்கு கொரோனா தொற்று உறுதி செய்யப்பட்டிருப்பதாக அவரே தனது முகநூல் பக்கத்தில் பதிவிட்டுள்ளார். அந்தப் பதிவில் உடல்நிலை பாதிப்பு காரணமாக சோதனை மேற்கொண்டதில் தனக்கு கொரோனா தொற்று உறுதி செய்யப்பட்டுள்ளது.

ஆகையால் என்னுடன் தொடர்பில் இருந்தவர்கள் தங்களை தனிமைப்படுத்திக் கொள்ள வேண்டும் என்றும் அறிவுறுத்தி உள்ளார்.

ஏற்கனவே கடந்த ஆண்டு கொரோனா தொற்று ஏற்பட்டு சிகிச்சை பெற்று குணமடைந்த நிலையில் தற்போது இரண்டாவது முறையாக அவருக்கு தொற்று ஏற்பட்டுள்ளது. அவர் கொரோனா தடுப்பூசி இரண்டு தவணையும் செலுத்திக்கொண்டுள்ளார்.

இதனையடுத்து அமைச்சர் எஸ்.எஸ்.சிவசங்கர், அரியலூரில் உள்ள தனது வீட்டில் தன்னை தனிமைப்படுத்தி கொண்டுள்ளார்.

அரியலூர்:

அரியலூர் மாவட்டம் ஜெயங்கொண்டம் அருகே உள்ள கூவத்தூர் குடிகாடு கிராமத்தைச் சேர்ந்தவர் கருணாகரன் (வயது 41). அவருக்கு செந்தமிழ்ச்செல்வி (40) என்ற மனைவியும், சந்துரு என்ற மகனும், தருமி என்ற மகளும் உள்ளனர்.

இந்தநிலையில் கருணாகரன் தனது வீட்டில்இருந்து சிறிது தூரம் தள்ளி முந்திரி தோப்பில் மா மரத்தில் தூக்கிட்டு தொங்கிய நிலையில் இருந்துள்ளார்.

அந்த வழியாக கல்நடைகளை  மேய்க்க சென்றவர்கள் பார்த்து அவர் வீட்டிற்கு தகவல் கொடுத்துள்ளனர்.

தகவல் அறிந்த உறவினர்கள் சென்று கருணாகரனின் உடலை மீட்டு வீட்டிற்கு கொண்டு   வந்தனர். இதுகுறித்து தகவல் அறிந்த போலீசார்  சம்பவ இடம் சென்று உடலை கைப்பற்றி ஜெயங்கொண்டம் அரசு மருத்துவமனைக்கு பிரேத பரிசோதனைக்காக அனுப்பி வைத்து   அவர்  எப்படி இறந்தார்  என பல்வேறு கோணங்களில் விசாரணை செய்து வருகின்றனர்.

ஜெயங்கொண்டம்:

அரியலூர் மாவட்டம் ஜெயங்கொண்டம் அருகே முன்னூரான் காடுவெட்டி கிராமத்தை சேர்ந்தவர் பட்டு சாமி-கம்சலை தம்பதியரின் மகன் அழகேசன் (வயது 19). சிவில் என்ஜினீயரிங் படிப்பு முடித்துவிட்டு வேலை தேடி வந்தார்.

அழகேசன் குழந்தையாக இருக்கும்போது தாய் கம்சலையும், கடந்த 6 ஆண்டுகளுக்கு முன்பு தந்தை பட்டு சாமியும் இறந்து விட்டனர். பெற்றோரை இழந்த அழகேசனை பெரியம்மா கவுசல்யா வளர்த்து வந்தார். அவரும் அழகேசனை தனது குடும்பத்தில் ஒருவராகவே எண்ணி படிக்க வைத்தார்.

இதற்கிடையே அழகேசன் அதே பகுதியை சேர்ந்த ஒரு பெண்ணை காதலித்து வந்துள்ளார். இதற்கு பல்வேறு தரப்பில் இருந்து எதிர்ப்புகளும் கிளம்பியுள்ளன. மேலும் காதல் பிரச்சினை தொடர்பாக சிலருடன் முன்விரோதமும் ஏற்பட்டுள்ளது.

இந்தநிலையில் முன்னூரான் காடுவெட்டியில் உள்ள ஆசனேரி ஏரியில் அழகேசன் நேற்று இரவு பிணமாக மிதந்தார். இது பற்றிய தகவல் அந்த ஊர் முழுவதும் காட்டுத்தீயாக பரவியது. அடுத்த ஒரு சில நிமிடங்களில் அங்கு ஏராளமானோர் திரண்டனர். மேலும் போலீசாருக்கும் தகவல் தெரிவிக்கப்பட்டது.

அதன்பேரில் ஆண்டிமடம் போலீஸ் இன்ஸ்பெக்டர் குணசேகரன் தலைமையிலான போலீசார் சம்பவ இடத்திற்கு விரைந்து வந்தனர். பின்னர் அவர்கள் ஏரியில் பிணமாக கிடந்த அழகேசனின் உடலை கைப்பற்றி ஜெயங்கொண்டம் அரசு மருத்துவமனைக்கு பிரேத பரிசோதனைக்காக அனுப்பி வைத்தனர்.

காதல் பிரச்சினையில் அழகேசன் தற்கொலை செய்து கொண்டாரா? அல்லது கொலை செய்யப்பட்டு ஏரியில் வீசப்பட்டாரா என விசாரணை நடத்தப்பட்டு வருகிறது. போலீசார் நடத்திய முதல்கட்ட விசாரணையில் அழகேசனும், அருகில் உள்ள மேலூர் கிராமத்தை சேர்ந்த ராகுல் என்பவரும் ஒரே பெண்ணை காதலித்து வந்ததாக பகுதி மக்கள் தெரிவித்துள்ளனர். மேலும் அழகேசனை கொலை செய்து ஏரியில் வீசிவிட்டதாகவும் கூறி சந்தேகத்தின் அடிப்படையில் கிராம மக்கள் ராகுலை பிடித்து போலீசாரிடம் ஒப்படைத்தனர்.

ஆனால் போலீசார் முறையான விசாரணை நடத்திய பின்னரே வழக்குப்பதிவு செய்யப்படும் என்று கூறி ராகுலை விடுவித்தனர். இதனால் ஆத்திரமடைந்த அழகேசனின் உறவினர்கள் மற்றும் அப்பகுதி மக்கள் கொலை வழக்காக பதிவு செய்து ராகுலை கைது செய்ய வேண்டும் என்று வலியுறுத்தி ஜெயங்கொண்டம்- விருத்தாச்சலம் தேசிய நெடுஞ்சாலையில் இன்று சாலைமறியலில் ஈடுபட்டனர்.

இதில் முன்னூரான் காடுவெட்டி கிராமத்தைச் சேர்ந்த சுமார் 100-க்கும் மேற்பட்டோர் சாலையில் அமர்ந்து கோ‌ஷங்கள் எழுப்பினர். சம்பவ இடத்திற்கு வந்த ஜெயங்கொண்டம் துணை போலீஸ் சூப்பிரண்டு கலைகதிரவன் மற்றும் பயிற்சி துணை போலீஸ் சூப்பிரண்டு சங்கர் கணேஷ் ஆகியோர் தலைமையில் போலீஸ் இன்ஸ்பெக்டர்கள் குணசேகரன், ஷாகிராபானு, சப்-இன்ஸ்பெக்டர் சுபா, உள்ளிட்ட போலீசார் மறியலில் ஈடுபட்டவர்களிடம் பேச்சுவார்த்தை நடத்தினர்.

அப்போது அவர்கள் ராகுலை கைது செய்தால் மட்டுமே நாங்கள் மறியலை கைவிடுவோம் என போலீசாரிடம் வாக்குவாதத்தில் ஈடுபட்டனர். இதையடுத்து அனைவரையும் கைது செய்ய போலீசார் முன்னெச்சரிக்கை நடவடிக்கையாக போலீஸ் வேன்களுடன் தயார் நிலையில் இருந்தனர்.

தொடர்ந்து நடத்திய பேச்சுவார்த்தையில் சந்தேகத்தின் பெயரில் நடவடிக்கை எடுக்க முடியாது எனவும், விசாரணை அடிப்படையில் மட்டுமே நடவடிக்கை எடுக்கப்படும் எனவும் தெரிவித்தனர். பிரேத பரிசோதனை முடிந்து, முடிவு வந்த பின்னர் கொலையா? தற்கொலையா? என மருத்துவர் உறுதி செய்ய வேண்டும். கொலையாக இருக்கும் பட்சத்தில் குற்றவாளி கண்டிப்பாக போலீசாரால் தண்டிக்கப்படுவார் என கூறியதையடுத்து பொதுமக்கள் கலைந்து சென்றனர்.

இந்த சாலைமறியல் போராட்டத்தால் வெளியூர் செல்ல வேண்டிய ஏராளமான வாகனங்கள் சாலையின் இருபுறமும் அணிவகுத்து நின்றன. இதனால் ஜெயங்கொண்டம், விருத்தாசலம் சாலையில் சுமார் 2 மணி நேரத்திற்கு மேலாக போக்குவரத்து பாதிக்கப்பட்டது.

அரியலூர்:


அரியலூர் மாவட்டம் ஜெயங்கொண்டம் அருகே வாரியங்காவல் பகுதியில் திருட்டு மற்றும் கொள்ளை சம்பவங்கள் தொடாந்து நடந்து வருகிறது.

இதனை கட்டுப்படுத்தும் விதமாக அரியலூர் மாவட்ட போலீஸ் சூப்பிரண்டு பெரோஸ்கான் அப்துல்லா ஆலோசனையின் பேரில், ஊராட்சி மன்ற தலைவர் மணிசேகர் தனது சொந்த செலவில்,   44  சி.சி.டி.வி. கேமராக்களை, அப்பகுதியில் அமைப்பதற்கான நடவடிக்கைகளை மேற்கொண்டார்.

தலைவர் மணிசேகரன் முன்னிலையில்,  ஆண்டிமடம் வட்டார வளர்ச்சி அலுவலர் அருளப்பன் தலைமையில், நடைபெற்ற நிகழ்ச்சிக்கு ஜெயங்கொண்டம் போலீஸ் துணை சூப்பிரண்டு கலை கதிரவன், பயிற்சி போலீஸ் துணை சூப்பிரண்டு சங்கர்கணேஷ் ஆகியோர் முன்னிலை வகித்து பேசினர்.

சிறப்பு விருந்தினராக அரியலூர் மாவட்ட காவல் துறை கண்காணிப்பாளர் பெரோஸ்கான்அப்துல்லா கலந்துகொண்டு கண்காணிப்பு கேமராவை இயக்கி வைத்து பேசினார்.

அப்போது அவர் தெரிவித்ததாவது:&

வாரியங்காவல் பகுதிகளில் பல இடங்களில் திருட்டு சம்பவம் நடந்துள்ளது. கிராமம் தோறும் அனைத்து கிராமங்களிலும் கண்காணிக்க போலீசார் எண்ணிக்கை குறைவாகவே உள்ளது. எனவே ஒவ்வொரு சி.சி.டி.வி. கேமராவும் ஒரு போலீசார் என்பதை பொதுமக்கள் நினைவில் கொள்ள வேண்டும்.

பொதுவாக வீட்டில் உள்ளவர்கள் வீட்டை விட்டு வெளியூர் செல்லும்போது போலீசாருக்கு தகவல் தெரிவிக்க வேண்டும். மேலும் விலை உயர்ந்த பொருட்களை, நகைகளை வீட்டில் வைத்து விட்டு செல்லக் கூடாது. அவற்றை வங்கியில் பாதுகாப்பாக வைத்திருக்க வேண்டும்.

மேலும் ஒவ்வொரு வீடுகளிலும், கடைகளிலும், வணிக நிறுவனங்களிலும் கண்காணிப்பு கேமராக்கள் பொருத்துவது மூலம் திருடர்களை எளிதில் பிடிப்பதற்கு வசதியாக இருக்கும். இதன் மூலம் திருட்டு சம்பவங்களை குறைக்கவும் முடியும் என்றார்.